تعرف مين ده؟ ده شاب سويدي أسمه Felix Arvid
فيليكس عمل قناة علي اليوتيوب اسمها Pewdiepie وكانت الفيديوهات إلي بينزلها علي قناته مجرد فيديوهات ليه وهو بيعلق علي الألعاب اثناء لعبه، مجرد فكرة بسيطة ومش مكلفة خالص وفي نفس الوقت بيعمل الحاجة إلي بيحبها.
حاليا فيليكس آرفيد يعتبر أغني شخص من خلال اليوتيوب بدخل سنوي اكتر من 10 مليون دولار، وتُقدر مجموع مشاهدات فيديوهاته اكتر من 12 مليار مشاهدة.
أنت كمان تقدر تعمل قناة علي اليوتيوب وتكون مصدر دخل رئيسي ليك، وفي أمثلة كتير علي كده في مصر زي احمد أبوزيد، هشام عفيفي، شادي سرور وناس تانية كتير شغلهم ومصدر رزقهم اليوتيوب.
إزاي اعمل قناة علي اليوتيوب وابدأ أرفع فيديوهاتي؟
الموضوع سهل جداً ويمكن أكتر حاجة بتميز الشغل من خلال اليوتيوب سهولة البداية والتعامل عليه. كل إلي أنت محتاجه إن يكون عندك حساب علي جوجل، ولو معندكش حساب علي جوجل تقدر تسجل حساب جديد بكل سهولة، بعد كده بتدخل علي موقع اليوتيوب ومن الإعدادات settings بتختار إنشاء قناة جديدة create new chanel وبتختار إسم لقناتك، وبكده يكون عندك قناة علي اليوتيوب وتقدر تضيف شعار لقناتك، صورة خلفية ،أو حتي وصف لقناتك عن طريق الصفحة الرئيسية لقناتك علي اليوتيوب.
بعد ما اعمل القناة ازاي هبدأ اكسب فلوس؟
قبل ما أقولك إزاي تكسب فلوس ويكون ليك مصدر دخل شهري من اليوتيوب، في شوية حاجات مهمة لازم تعرفها علشان تكون قناتك ناجحة وتحققلك دخل محترم كل شهر.
1- اعمل فيديوهات عن الحاجة إلي أنت بتحبها ومهتم بها ومستعد تعملها حتي لو من غير مقابل بس لأنك بتحبها أو فكرة جديدة ماتعملتش قبل كده، لأن فعلاً ده إلي هيخليك تبدع وتجذب جمهور دائم لقناتك، جمهور له نفس الشغف والإهتمام.
2- متكلفش نفسك في البداية، لأن أهم حاجة بتجذب الجمهور في البداية علي اليوتيوب هو المحتوي. لو أنت إلي هتظهر وتتكلم في فيديوهاتك، يبقي كفاية إنك تصور بكاميرا الموبايل أو كاميرا اللاب توب، مش لازم تشتري كاميرا بروفشنال وغالية علشان تبدأ تعمل فيديوهات علي اليوتيوب وعلي فكرة مش عيب أبداً، ناس كتير بدأوا كده زي الممثل أحمد أمين إلي بدأ بكاميرا موبايل ملزوقة علي ظهر الكرسي، وهشام عفيفي إلي بدأ بكاميرا اللاب توب، وغيرهم كتير.
ولو هيكون محتوي فيديوهاتك عن حاجات تقنية أو محتاج إنك تصور من جوه الكمبيوتر نفسه، إستخدم برامج مجانية وبلاش المدفوعة في البداية، حتي في المنتاج إستخدم في البداية برامج مجانية لقص وتعديل الفيديو واضافة الموسيقي، لأنها مش هتكلفك وسهل إنك تتعلم عليها بسرعة.
3- إحترم سياسات اليوتيوب، لأن إنتهاك قواعد اليوتيوب ممكن يكلفك قناتك إلي تعبت فيها واشتغلت عليها كتير.
سياسات اليوتيوب هي عبارة عن شوية قواعد لازم تمشي عليهم في قناتك زي عدم إستخدام اسم مضلل للفيديو، عدم إنتهاك حقوق الطبع والنشر، وحاجات تانية كتير، ومخالفة القواعد دي بيضر بجودة محتوي اليوتيوب عامةً وجودة قناتك بالخصوص، وممكن توصل بموقع اليوتيوب إنه يقفلك قناتك أو أي قناة تانية مخالفة عشان يحافظ علي جودة محتوي اليوتيوب.
سياسات اليوتيوب :
https://www.youtube.com/intl/ar/yt/about/policies/
4- خلي الجزء الأكبر من وقتك إلي بتقضيه للشغل علي قناتك للتسويق والإعلان لقناتك، يعني انشر فيديوهاتك في جروبات الفيسبوك وتويتر أو تتفق مع صاحب قناة تانية إنكم تعملوا إعلان متبادل لقنواتكم مع بعض، المهم تحاول تشهر قناتك وتسوقلها لأن السويق لقناتك هو إلي هيجيب لك مشاهدات اكتر ومتابعين دائمين لقناتك.
طب إزاي هقدر استفيد مادياً من القناة؟
عن طريق جوجل أدسنس، برنامج من موقع جوجل بيتيح لك عرض الإعلانات علي موقعك أو قناتك علي اليوتيوب، وبيكون لك نسبة ربح مقابل كل ضغطة أو 1000 مشاهدة للإعلان من خلال قناتك. كل إلي أنت محتاجه حساب في جوجل أدسينس وبعد ما قناتك توصل ل 10000 مشاهدة تقدر تربط حساب الأدسنس باليوتيوب وتفعل الربح من عرض الإعلانات علي فيديوهاتك.
إزاي أسحب أرباحي من أدسنس؟
بعد ما بتوصل أرباحك في اخر الشهر ل 100 دولار أو اكتر، وبعد ما بتبعت لجوجل بياناتك وصورة بطاقتك بتقدر تسحب أرباحك من أقرب فرع ويسترن يونيون لبيتك وتستلمهم كمان بالدولار.
قناة فيليكس آرفيد
https://www.youtube.com/user/PewDiePie
برنامج مونتاج مجاني
https://kdenlive.org/en/