ازاي تبدأ تستثمر بمبلغ صغير ؟

0 130

مش لاقي شغل؟..
اشتغل في الاستثمار!!

الجملة دي انتشرت جداً الفترة اللى فاتت ! وأكيد معظمكم عارفين القصة، لكن بالرغم من إن صياغة الجملة غلط وإتقالت في موقف غلط إلا إن فعلاً الاستثمار هو الطريقة الصح لتحقيق ثروة وإنك تكون غني.

وارن بافت رجل أعمال وأشهر مستثمر أمريكي ويعتبر حالياً ثالث أغني رجل في العالم، وارن بافت بدأ في تكوين ثروته ب10,000 دولار فقط عن طريق الاستثمار في البورصة والأسهم، من أشهر مقولاته عن الاستثمار

“شخص ما يجلس تحت ظل شجرة لأن شخص أخر زرعها منذ وقت طويل”.

يعني إيه استثمار؟
الاستثمار هو عبارة عن أي مبلغ بيقوم الشخص أو الوحدة الاقتصادية بتشغيله في أصول ممكن تعود عليه بالمنفعة المالية والربح مقابل تشغيله أو شرائه للأصول دي.

ما تقول يعني إيه الاستثمار؟! (:

باختصار كده الاستثمار يعني إزاي تخلي الفلوس إلي معاك دلوقتي تجيبلك فلوس أكتر في المستقبل بشكل مستمر طول فترة الاستثمار أو إنك تشتري حاجة بالفلوس دي دلوقتي وتبعها في المستقبل بربح، يعني إنت لو معاك حالياً مبلغ مالي صغير تقدر تستثمره بأكثر من طريقة وتحقق دخل مضاعف في المستقبل القريب أو البعيد.

طب المبلغ إلي معايا ده ليه أستثمره؟

طبعاً من الأفضل ليك إنك تستثمره لإن ده هيفتح عقلك علي الاستثمار وأهميته زي الحماية المالية والوصول لأكبر قيمة من الدخل،الحماية المالية يعني لما أنت بتستثمر مبلغ من المال ويحقق لك عائد فإنت كده بتحافظ علي رأس مالك، والوصول لأكبر قيمة من الدخل يعني لما حضرتك بتستثمر مبلغ من المال بيحققلك عائد مستمر، أنت تقدر تكبر قيمة العائد ده عن طريق زيادة المال “العائد” المستثمر لحد ما توصل لأكبر قيمة ممكن تحقيقها من الدخل الناتج عن الاستثمار، وأهم حاجة إنك بالاستثمار بتكبر حجم ثروتك المالية.

طب إزاي ابدأ استثمر مبلغ صغير؟

إنت تقدر تستثمر مبلغ صغير وليكن 100 دولار أو أقل حتي بأكتر من طريقة وفي أكتر من مجال، أونلاين وأنت في بيتك، هقولك علي 3 طرق منهم في المقال ده على سبيل المثال لا الحصر.

1- التسويق الإلكتروني
التسويق الإلكتروني هو عبارة عن التسويق لمنتج أو خدمة علي الإنترنت، وبتاخد عمولة أو نسبة من سعر المنتج أو الخدمة مقابل كل عملية بيع عن طريقك، ناس كتير حققوا ثروات كبيرة جدا من التسويق الإلكتروني.
تقدر بمبلغ صغير تبدأ مشروعك علي الإنترنت للتسويق لمنتج أو خدمة عن طريق إنك تحجز دومين واستضافة وتنشأ موقعك الخاص للتسويق ويكون مختص في نفس مجال المنتج أو الخدمة إلي هتروجلها.
أو تقدر بالمبلغ ده تنشأ صفحة علي الفيسبوك أو إنستجرام وتبدأ في نشر إعلانات مستهدفة عن المنتج أو الخدمة وبكده تضمن الوصول للعملاء المستهدفين إلي ممكن يشتروا المنتج أو الخدمة ويكون مكسبك مضمون.

2- التداول في أسواق المال والبورصة أونلاين
تقدر بمبلغ صغير تبدأ التداول في أسواق المال زي الفوركس والبورصة علي الإنترنت وأنت في بيتك، بالرغم من أن التداول في الأسواق المالية والبورصة ليه مخاطر كبيرة زي إنك ممكن تخسر رأس مالك كله لكن لو عرفت إزاي تستثمر صح في الفوركس أو البورصة هتحقق أرباح كبيرة.
في مواقع كتيرة علي الإنترنت بتقدملك فرصة التداول والاستثمار في البورصة العالمية وأسواق الفوركس بمبلغ بسيط وأونلاين، أشهرهم موقع إيتورو Etoro بأكتر من 4.5 مليون مستخدم فهو موقع ممكن تثق فيه، وتقدر تلاقي شروحات كتير علي اليوتيوب لطريقة فتح حساب عليه وطريقة إستخدامه.

3- استثمر في نفسك
وده من وجهة نظري أفضل استثمار ممكن تحط فلوسك فيه لأنه هيعود عليك في المستقبل بعائد مادي ومعنوي في نفس الوقت، ومن المستحيل إنك تخسر في الاستثمار ده لأنك بتطور من نفسك وده إلي هيخليك تحقق عائد مادي كبير مدي الحياة.
تقدر تستثمر في نفسك عن طريق إنك تتعلم مهارة جديدة أو تحسن مهارتك في حاجة معينة بحيث بعد التعلم تقدر تشتغل بها وتحقق عائد مادي، ويعتبر مجال التسويق الإلكتروني والبرمجة من أفضل المجالات إلي ممكن تحققلك دخل كبير في المستقبل وإنت قاعد في بيتك ك Freelancer أو في أي شركة لأن المسوق الإلكتروني والمبرمج من أكتر الوظائف المطلوبة عالماً.
أفضل المواقع إلي بتوفر لك كورسات أونلاين بأسعار بسيطة وجودة عالية ومحتوي كويس وبتأهلك لسوق العمل Udemy – Coursera – Udacity، وتقدر تاخد شهادات معتمدة بعد ما تكمل الدورة، وتبدأ تشتغل أونلاين أو في أي شركة وتحقق عائد مادي من استثمارك.

اترك رد

لن يتم نشر عنوان بريدك الإلكتروني.