الاقتصاد السلوكي Behavioral Economics

0 2٬523

من أسبوعين بالظبط .. فاز عالم الاقتصاد الأميركي ريتشارد ثالر (Richard H. Thaler ) بجائزة نوبل للعلوم الاقتصادية لعام 2017 .. و الجائزة جت تتويجا لأبحاثه ودراساتة في الاقتصاد السلوكي Behavioral Economics .

اية هو بقي ” الاقتصاد السلوكي ” ؟

الاقتصاد السلوكي هو فرع حديث شوية من فروع علم الاقتصاد بيمزج ما بين علم النفس والاقتصاد وهدفه ان يحلل ويفسر العوامل النفسية والاجتماعية والفكرية والسلوكية اللي بتقف وراء صناعة واتخاذ القرارات الاقتصادية .. يعني من الاخر كده هو علم بيحاول يفهم ازاي البشر بياخدوه قراراتهم الاقتصادية اللي ممكن تكون في كتير من الاحيان بيخسروا بسببها على الامد الطويل بجانب انها بتكون غير عقلانية على عكس النظريات الاقتصادية اللي كانت بتقول ان البشر بيتصرفوا بطريقة عقلانية لما يجوا يخدوا قرار اقتصادي متعلق بيهم .

والأصل هنا ان الانسان بياخد يوميا الاف القرارات ، ونسبة كبيرة من قراراتنا بناخدها من غير تفكير باستخدام حاجة بيطلق عليها علم النفس (الاستدلال | heuristics) واللي ممكن نعتبرها كمجموعة من الاختصارات العقلية بتمكنا اننا ناخد قرارتنا اليومية بصورة سريعة من غير تفكير كتير ، لكن للاسف في بعض الأايان الاختصارات دي بتؤدي لأخطاء يمكن التنبؤ بيها .

وده اللي ساعات بتستغله الشركات في دفع الافراد انهم ياخدوا قرارات اقتصادية مش في صالحهم ، وتعالوا نضرب مثال انك دخلت مال ملابس مكتوب في انك ممكن تاخد 3 قمصان بسعر اتنين و على الرغم انك مش محتاج القمصان
و مش هتشتريها لو اتكتب عليها السعر مخفض بس من غير ما يتعمل على هيئة عرض .. هتشتريها المرة دي لأنها
متقدمة في صورة ( 2 + 1 مجاناً )

مثال تاني .. عديت قدام محل عجبك في اوي شكل ساعة بس المشكلة ان سعرها غالي بالنسبة لمرتبك ، ومع ذلك لو معاك بطاقة ائتمان هتشتريها بيها بدل ما تدفع الفلوس من جيبك و مع انها فلوسنا في الحالتين و سعر الساعة دي هيسبب عجز في الميزانية لما تجي تدفع حساب البطاقة لكن لانك هتدفع الفلوس دي بعد فترة زمنية طويلة فبتلقيه حساب سهل تصرف منه.

وبنفس الطريقة هتلاقيك بتميل بصورة كبيرة لصرف الفلوس على الحاجات قصيرة الامد زي الاكل والمشروبات وغيرها بدل ما تصرفها على حاجة طويلة الأمد زي التعليم او انك تاخد كورس او تدخر وتستثمر فلوسك .

وجه هنا بقى الحل اللي قدمه ريتشارد ثالر وسماه النغزة “Nudge “ واللي يعتبر أحد اهم اعمال ثالر وأكترها شهرة واللي خرج في هيئة كتاب بنفس الاسم كان من اكتر الكتب مبيعا .. و استفادت من جكومات دول زي بريطانيا
وأمريكا في سياسات البرامج الاقتصادية بتاعتها .

وعلشان تفهم الحل .. خلينا نشرحة بمثال :

لما تيجي تعمل او تقول حاجة غلطة والحاجة الوالدة قاعدة جنبك ايه اللي بيحصل ؟

غالباً هتلاقيها علطول بتنغزك بأيدها – فتلاقي نفسك انتبهت وتبدأ تظبط الدنيا ^_^

و بنفس الطريقة دي لو انا بخسر فلوسي ومش بعرف استثمرها صح مين اللي المفروض ينبهني ؟؟؟

ريتشارد بيقول هنا ان المفروض يبقى في ادارة بتنبه الناس اللي تحتها “بتنغزهم ” بحيث تحفز عندهم السلوكيات اللي بتعود بالربح عليهم ، الادارة دي بتتمثل في أشكال كتير من أول شوية الصحاب الشاطرين في الاقتصاد اللي بيقدموا نصايح محترمة لغاية السلطة او “الدولة” اللي بتقدم النصايح دي لمواطنيها

كمان لو انت مهتم بعلم الاقتصاد السلوكي .. سواء كان متعلق بمجال دراستك او من باب الثقافة العامة اللي ممكن تفيدك بنسبة كبيرة في اتخاذ قرارات اقتصادية صح ، فالكورسات دي هتفيدك :

– كورس Behavioral Economics in Action

الكورس بيعلمك ازاي تستخدم الاقتصاد السلوكي علشان تصمم تجارب وتطور أدوات تساعد الناس في اتخاذ قرارات
اقتصادية افضل ، الكورس بتقدم منصة edx ومدته 6أسابيع :
https://www.edx.org/course/behavioral-economics-action-university-torontox-be101x-0#

– كورس Behavioral Finance

الكورس بتقدمه منصة كورسيرا ومدته 3اسابيع ، الكورس بيدرس الاخطاء اللي ممكن نتنبأ بيها وبتادي لقرارات غلط ، كمان بيوجهك لازاي تحسن الانفاق والادخار الاستثمار بتاعك :
https://www.coursera.org/learn/duke-behavioral-finance

اترك رد

لن يتم نشر عنوان بريدك الإلكتروني.