ازاى تبدأ مشوارك ع الانترنت و تقبض بالدولار

2 4٬314

في مسلسل “جيم اوف ثرون” كان في حوار بين تريون لانيستر ( القزم اللي كلنا حبناه) وبين جون سنو ( الإبن اللقيط لعائلة ستارك) كان بيقول فيه: “أنا ممتن جداً لأجدادانا الأوائل لانهم لما بنوا السور اللي بيفصل بينا وبين الهمج اختاروا الجانب الصح، إحنا خدنا الشمس والخضرة والزرع وحطوهم هما في الجليد والثلوج، وده علمني دايماً أختار الجانب الصح”. في وقت احنا بنعاني فيه من أزمة ضخمة في ارتفاع الأسعار واللي بتعتبر مصيبة على الكل زي ما احنا فاكرين، لكن كل مصيبة بييجي معاها خير، والخير هنا موجود عند الناس اللي بتقبض بالدولار، الناس دي عرفت تختار الجانب الصح من بدري، لكن اطمن لسه عندك فرصة تنضم للجانب ده، وكل ما رغبتك كانت قوية، كل ما انضمامك ليهم هيكون أسرع.

القبض بالدولار بيكون سببه انها عملة دولية معترف بيها ومقبولة من كل الأطراف وعشان كده بتستخدم في التعامل سواء بين أفراد أو شركات أو حتى على مستوى الدول، فلما تبدأ مشوارك على الإنترنت اعرف انك هتتعامل في كل خطواتك بالدولار وزي ما هتقبض زي ما هتدفع، بس الفرق هنا إن دفعك هيبقى استثمار مش مصاريف وممكن تقبض بس لو انت شغال كموظف من خلال النت أو فري لانسر بس.

طب نيجي للسؤال المهم، إزاي أدخل عالم الإنترنت وأقبض بالدولار عشان أنضم للجانب الصح؟ الفكرة ببساطة انك تقدر تحل مشكلة أفضل من أي حد .. احنا بنتعلم عشان ناخد الشهادة ونشتغل بيها، لكن يؤسفني اقولك إن الشهادة وسيلة مش غاية، يعني لو خدت شهادة انك بتعرف تعمل حاجة وانت مش بتعرف تعملها، يبقى ملهاش لازمه، العميل عايز اللي يحل المشكلة بتاعته ويتعاون معاه وينفذ اللي هو محدده بدقة عالية. ملحوظة مهمة جداً بالذات للمصريين “ارمي الإيجو بتاعك في أقرب سلة زبالة لأنك مش هتحتاجه” الإيجو هنا المقصود بيه التكبر أو الغرور لأن هنا المعيار الوحيد هو القيمة اللي بتتقدم.

قبل ما تفكر تعرض خدماتك عالنت انت محتاج تجاوب على شوية أسئلة ايه المشكلة اللي أقدر احلها؟ وليه العميل هيختارني أنا؟ وإزاي أثبت للعميل إني الشخص المناسب للشغل ده؟ وهل الحاجة اللي بعرف أعملها، العميل مستعد يدفع فيها فلوس؟! دي أهم الأسئلة اللي لو قدرت تجاوب عليها فانت مؤهل تبدأ في عرض خدماتك. الجميل في الموضوع انك لما تدخل على موقع زي خمسات وتشوف الخدمات المعروضة هتلاقي كل حاجة تخطر على بالك ممكن حد يعملها، فلو مش عارف انت قدراتك ايه، اقرى الناس كاتبه انها بتقدم ايه ! وشوف أقرب حاجة قريبه ليك. طب الكلام ده كافي يعملي دخل بالدولار؛ أكيد لأ..انما كافي انك تبدأ تدخل مجال العمل عبر الإنترنت وكل ما قدراتك زادت في حل المشاكل، كل ما المبلغ اللي هتحصل عليه زاد.

الشغل على الانترنت نوعين:

نوع أنا عايز فلوس دلوقتي حالأً، ونوع تاني أنا مستعد أتعب كتير في الأول بس أستريح بعدين والمجهود يقل والعائد بيزيد. النوع الأولاني مناسب لو انت متزوج ووراك مسئوليات فده بيكون مناسب ليك، وهنا انت بتبدأ تبيع وقتك وبتقدم خدمتك وتاخد تمنها في الحال وفي مواقع فري لانسنج عالمية كتير ومش هتفرق معاك كتير لان كل حاجة موجودة عندهم بقى في منافس عربي ليها حتى مستويات العملا اللي بيدفعوا كتير، هتلاقي العملا اللي من دول الخليج بيدفعوا كويس جدا إذا كنت شاطر وقدرت تقدم الخدمة بالجودة اللي طالبينها فالأفضل ليك هيكون مواقع عربية زي خمسات khamsat.com أو مستقل mostaql.com . طب ده النوع الأولاني، بالنسبة للنوع التاني بياخد شوية وقت زي انك تبني موقع أو مدونة صغيرة ممكن بلوجر لو لسه في البداية أو أعلى شوية زي الورد بريس وممكن حاجة أبسط زي صفحة عالفيس بوك والوقت اللي بيتاخد عشان تكبر الحاجة اللي اخترت تعملها، يعني لو موقع محتاج تعرف تجبله زوار وتنشر محتوى يفيد الناس ولو صفحة عالفيس هتحتاج مشتركين فيها بحجم ضخم ويكونوا متابعين ليها. خد بالك في كلامنا عن المواقع لازم تقدم قيمة حقيقية، يعني مش أي كلام يتحط وخلاص، لازم الناس تستفاد فعلا عشان المعلنيين يكونوا مهتمين يدفعوا عشان يعلنوا عندك.

السؤال اللي هتسئله في بالك، ايه اللي يخلي الشركات تيجي تعلن عندي .. بص .. الشركات في العالم كله بتهتم بـ 3 حاجات

واحد: تسويق علامتها التجارية: النوع ده بتلاقيه في الشركات الضخمة زي بيبسي، كوكاكولا، مرسيدس وغيرها. في النوع ده من الشركات بتكتفي انها تحط اللوجو بتاعها وتفكر الناس بيها وبتحب تظهر في الأماكن أو مع الأشخاص اللي الناس بيحبوها .. عشان كده اغلب اعلاناتهم مع فنانين أو لاعيبة كورة.

اتنين: الانتشار على الانترنت، لما شركة جديدة بتبدأ أو شركة في المجال وعايزه تتفوق على منافسيها بتلجأ إنها تنشر نفسها وزي ما بتعمل اعلانات في التلفزيون بيبقى ليها اعلانات عالانترنت لكن بتكون في الأماكن المخصصة، يعني لو انت عامل صفحة عالفيس وعمال تتكلم عالأكل وعندك جمهور ضخم أو متوسط بيتابع الأكلات وتعليقاتك والصور بتاعتك، ساعتها هتلاقي المطاعم بتتصل بيك وتطلب منك تتكلم عن مطعمهم مقابل مبلغ بتتفقوا عليه بيتناسب مع حجم الناس اللي عندك. ولو عايز تعرف أكتر عن النوع ده اعمل سيرش على حساب “عبقر” للرياضيات.. ده مُغرد سعودي بينشر ألغاز وعنده ألاف المتابعين فالشركات الكبيرة بتعلن على حسابه مقابل مبالغ كبيرة وغيره كتير من الصفحات أو أصحاب قنوات اليوتيوب ومش محتاج اقولك إن باسم يوسف بدايته كانت قناة عاليوتيوب ومنها اتاخد لشاشات التلفزيون وأرباحه اتضاعفت آلاف المرات.

تلاتة: البيع المباشر، لو عندك صفحة متخصصة في منتج أو خدمة معينة فانت ممكن تبيع المنتج ده من خلال الانترنت عن طريق العمولة وأشهر نوع في الحالة دي زي سوق دوت كوم وجوميا في مصر ووادي ونمشي في الخليج ولو كانت خدمة برضه فانت ممكن تبيعها بالعمولة برضه زي خدمات السفر والحجز في الفنادق وغيره.
لو شايف ان الموضوع بقى كبير اصبر لحد النهاية وهتفهم أكتر، لو انت مهتم تعمل مشروع بس في حجات كتيرة مبتعرفش تعملها، فانت محتاج مساعدة ناس تانية وفي نفس الوقت بأسعار قليلة عشان ميزانيتك، في الحالة دي مواقع الخدمات المصغرة بتكون هي أنسب حاجة، كل حاجة بـ 5 دولاروهتلاقي في منها بجودة عالية جداً، اتعب شوية في قراية التقييمات ووصف الخدمة والأفضل تختارهم من الأكثر مبيعاً ومتقلقش من حتة النصب لأن الموقع بيضمن حقوقك وعندك اشهر موقع للنقطة دي خمسات ولو مشروعك كبير شوية ممكن تروح لمستقل برضه زي خمسات بس لمشاريع أكبر. ركز انك تعمل الحاجة الوحيدة اللي محدش غيرك يقدر يعملها، يعني لو هتقدم خدمات كتابة أو ترجمة فالأفضل يبقى عندك مدونة شخصية وممكن تستعين بأشخاص يعملوا الموقع ويجهزوه وانت تتفرغ للكتابة فيه فقط بحيث تحافظ على وقتك وتبدأ الدخول بسرعة ويبقى عندك نماذج الأعمال اللي هتعرضها للعملا بتوعك.

شوية نصايح اخيرة
– لو حاسس ان معندكش موهبة فريدة أو مميزة ممكن تحدد مجال انت حابه وتبدأ تتعلم المهاردة دي وفي عندك أكاديمية حسوب : https://academy.hsoub.com/

هتلاقي فيها أقسام كتيرة تساعدك بجانب اليوتيوب و جوجل .. الانترنت مليان .. انت انوي واعمل سيرش وهتلاقي.
– الشغل على الانترنت مفهوش مجال للف والدوران والعميل لو معجبهوش الشغل مش هيدفع وكل كلامكم بيكون متسجل والموقع بيحكم بينكم في حالة نزاع؛ فبلاش شغل الفهلوة واشتغل باحترافية عشان العميل يكرر التعاون معاك.
– الشغل التقني أو المهارة اللي عندك مش كافية عشان تأمن نفسك بدخل من الانترنت، لازم تتعلم مهارة البيع والتسويق، ومهارات تانية تساعدكأو تعرف تشتريها منين بأرخص سعر كل ما تحتاجها.. زي انك تقدم عرض مُغري في المناسبات من خلال صورة احترافية فلو مكنتش بتعرف تشتغل عالفوتوشوب هتروح لحد يصممهالك بسرعة من خمسات او يصمملك أكتر من عرض بأكتر من صورة وهكذا.
– متستعجلش أبداً في تسليم الخدمة، خلي تركيزك انك تسلم شغلك كامل ومُرضي للعميل، هو خلاص دفع الفلوس ومش هيجري والله، سلم شغلك حلو عشان يديك تقييم إيجابي يفيدك مع المستخدمين الجداد.
– متعتمدش على الموقع اللي عارض شغلك فيه بس، خد لنك خدماتك وانشرها في المنتديات أو الأماكن اللي تتوقع ممكن يجي منها عملا، وممكن تعمل شروحات مجانية وتحط لنك الخدمة في وصف الفيديو، وخد بالك لو الموقع بيدعم خدمة الأفلييت خليه رابط أفلييت لخدمتك، عشان لو كان المستخدم جديد تاخد عليه عمولة تسجيل بخلاف طلبه للخدمة بتاعتك.
– الشغل على الانترنت دايماً بيطور، فاللي بيوقف تعليم أو تطوير نفسه بيموت ببطء، فاتأكد انك كل يوم بتتعلم حاجة جديدة تخليك تقدم شغلك بطريقة أفضل وأسهل
– العلاقات: 80% من مبيعاتك هتكون من 20% من العملا عن طريق انهم رجعوا طلبوا نفس خدمتك، فعامل كل عميل بيطلب خدمتك على انه أهم عميل وهتعرف بعدين هو ضمن أنهي فئة، فلازم تكون حريص في تعاملاتك.
في النهاية، بأكد عليك الشغل على الانترنت زي أي شغل في العالم، الفرق انك هنا بتكون مدير نفسك ورقيب على نفسك، هو فرصة ممتازة لكل حد طموح وعايز يبدأ شغل بجد، ولما تبدأ هتتعرف بناس بدأت من سنين وهتسمع بداية كل واحد كانت إزاي وانت كمان بعد سنين ممكن تحكي حكايتك.. بالتوفيق للجميع وأي استفسار أنا جاهز في الكومنتات

2 تعليقات
  1. shimaa moussa يقول

    شكرا علي المجهود الجميل دا..والدقة دي

  2. soha sabry يقول

    مجهودك فعلا رائع

اترك رد

لن يتم نشر عنوان بريدك الإلكتروني.