الناس دلوقتي في وادي المشمش مقسومين ل 3 اجزاء ! جزء مقرأش مقال “إزاي تحول اليوتيوب ل مصدر دخل أساسي ليك”، وجزء قرأه بس مقتنعش ومتصور إن اليوتيوب مجال صعب الشغل فيه والمنافسة فيه قوية جداً وصعب تحقيق أي دخل أو نجاح في اليوتيوب، وجزء ثالث قرأ المقال وقرر يبدأ في مجال اليوتيوب وهيبدأ ينزل فيديوهات.
بالنسبة للناس إلي مقرأتش المقال الأول تقدر تقرأه من هنا :
https://mshmshvalley.com/passive-income-from-youtube
بعدين يجي يقرأ المقال ده ^_^ أما بالنسبة للشخص إلي قرأ المقال ولسه مش مقتنع باليوتيوب كمصدر دخل ومصدر للشهرة والنجاح عايز أسئله كام سؤال، أنت أكيد أتفرجت علي شادي سرور أو حتي سمعت عنه قبل كده، تعرف شادي سرور ربحه السنوي المقدر من اليوتيوب كام؟ طب تعرف أحمد أبوزيد صاحب قناة دروس أونلاين كان شغال إيه قبل ما قناته علي اليوتيوب تنجح ويكون له آلاف المتابعين؟ طب تعرف هشام عفيفي؟ أحمد أمين؟ وغيرهم كتير، تعالي أعرفك بيهم واحد واحد.
شادي سرور ممثل كوميديي ساخر، أسس قناته علي اليوتيوب في 2013 وبدأ بفيديوهات كوميدية عن الأحداث اليومية إلي بتمر علي الطالب المصري، وفي سنة 2017 جاب المرسيدس ^_^ ، أرباحه التقديرية من اليوتيوب بتساوي تقريباً 61 ألف دولار سنوياً.
أحمد أبوزيد مؤسس قناة دروس أونلاين، كان شغال مهندس مدني حتي بعد ما أسس قناته كان لسا شغال كمهندس لحد ما قناته اشتهرت وبقي له متابعين بالآلاف قرر يستقيل من الشغل الأساسي كمهندس معماري والتفرغ في اليوتيوب، وفي لقاء تلفزيوني مع قناة العربية قال إن أرباح اليوتيوب أفضل من لما كان شغال كمهندس مدني!
هشام عفيفي كوميدي وساخر، فيديوهاته بتحقق معدلات مشاهدة عالية، يعتبر من أفضل اليوتيوبرز إلي في مصر وأكترهم شعبية، دخله التقديري من اليوتيوب من 12 الف دولار سنوياً، كمان هشام طلع في إعلان لشركة Orang من فترة قريبة كأحد الإنفلونسر المشهورين علي السوشيال ميديا.
أحمد أمين ممثل كوميدي، له برنامج كوميدي ساخر علي قناة النهار اسمه البلاتو ومثل في مسلسل الوصية رمضان الي فات. أحمد أمين كانت بدايته علي اليوتيوب، بعد ما قرر إنه يستقيل من الوظيفة عمل قناة علي اليوتيوب وبدأ ينزل فيديوهات كوميدية ساخرة بعنوان إزاي في 30 ثانية، لحد ما أشتهر وبقي مقدم برنامجه الكوميدي الخاص علي التليفزيون.
أما بالنسبة للي قرر يبدأ ويعمل قناة علي اليوتيوب وينزل فيديوهات، دول أهم النصائح والخطوات إلي لازم تعملها لأنها هتساعدك في ظهور القناة بشكل إحترافي أكتر .. و وصول فيديوهاتك لأكبر عدد ممكن من الناس والمشتركين.. وتحقيق ربح في أسرع وقت :
– خلي لقناتك جدول زمني محدد لتنزيل الفيديوهات .
– حاول يكون لك صفحة علي الفيسبوك فيها فيديوهاتك لجذب المتابعين أكتر.
– أرفع الفيديوهات المنشورة عندك في اليوتيوب مرة تانية في الفيسبوك.
– حاول تخلي الفيديو مايزيدش عن 3 دقائق في بدايات القناة.
– قبل ما تستخدم كلمات مفتاحية في الفيديو ابحث عنها في جوجل واتأكد ان هيظهرلك نتيجة البحث فيديوهات.
– رتب فيديوهاتك في قوائم تشغيل حسب الكلمات المفتاحية.
– لازم يكون ليك مقدمة ثابتة في كل فيديو عشان قناتك تكون أكتر إحترافية.
– كتابة الكلمات المفتاحية في العنوان والوصف، بكده فرص ظهور الفيديو في الصفحة الأولي لنتائج البحث بتكون أكبر.
– أعمل فيديو تعرف فيه الناس علي نفسك وعلي محتويات القناة.
– استخدم النافذة المنبثقة في فيديوهاتك عشان تخلي المشاهدين يشتركوا في القناة.
– استغل التريند الرائج لجمع مشاهدات كتيرة في وقت قصير، لكن في نفس الوقت اعمل فيديوهاتك الخاصة لجمع المشاهدات علي المدي البعيد.
– خلي الكلمات المفتاحية مفصلة ومكونة من كلمتان أو أكتر لأن جوجل بتستخدم الكلمات المفتاحية الطويلة في عملية البحث.
– تفاعل مع جمهورك بالرد علي تعليقات كل فيديو.
– أكتب وصف لكل فيديو من 300 لــ 500 كلمة ودخل معهم الكلمات المفتاحية الطويلة وكرر كتابتهم في الوصف أكتر من مرة.
– إستخدم صور مصممة مكتوب عليها عنوان جذاب للفيديو.
– إستخدم كلمة فيديو في عنوان الفيديو، ده هيحسن ترتيب ظهور فيديوهاتك في الصفحة الأولي لنتائج البحث.
حاول تستغل اليوتيوب لأن اليوتيوب فعلاً من أسهل طرق النجاح وتحقيق ثروة بس بالاستغلال الصح وشوية صبر.