معاً نصنع المُستقبل

مبروك حضرتك بقيت صاحب شركة صغيرة

مبروك حضرتك بقيت صاحب شركة صغيرة ^_^ .. متستغربش بمجرد بدايتك الشغل ك Freelancer انت بقيت صاحب شركة صغيرة ! بمعني انك بقيت بتمثل رئيس مجلس الأدارة و Head فريق التسويق بالاضافة لكونك بقيت مدير الحسابات .. طبعاً بجانب انك الموظف الوحيد فى الشركة .. #الحرية اللى اتكلمنا عنها فى المقال الاول مش بالساهل : http://mshmshvalley.com/freelancing-1/
لكن متقلقش احنا حلينا دة كله فى المقال الثاني بكشل مبسط لتوضيح الفكرة العامة : http://mshmshvalley.com/freelancing-2/

و كان هدفنا قياس نسبة التفاعل و الاستجابة اللي وصلت 65% تقريباً .. لتحديد اولويتنا اثناء كتابة المقالات اللي جاية من سلسلة العمل الحر .. عشان كدة المقال دة هيكون عن أهم نقطة و اللي هيتوقف عليها نجاح شغلك كـ Freelancer ” شركتك الصغيرة 🙂 ” و استمراره … #التسويق ..
فى نفس الوقت ال 35% من الشباب اللى واجتهم مشاكل تقنية بعد المقال الأول .. كـ الأشتراك و اضافة الخدمات علي منصة العمل الحر .. كمثال : “خمسات ” .. #استعدوا هنقدم لكم شرح مبسط من البداية فى المقال القادم 🙂

** التسويق **

كلامنا عن التسويق النهاردة هينقسم لجزئين :

1- التسويق لخدماتك داخل منصات العمل الحر
2- التسويق لخدماتك خارج منصات العمل الحر

و في كلا الحالتين هدفنا هيكون ان العميل هو اللي يدور عليك مش انك انت اللى تفضل تدور علية !! بمعني ان مجهودك ووقتك اللى هتستثمرهم فى التسويق هيفضل اثرهم مستمر و فى ازدياد مع مرور الوقت .. مش آثر لحظي ” عميل او اكتر ” يشتروا منك بعدين تقعد من غير شغل !

1- التسويق لخدماتك داخل منصات العمل الحر

الجزء دة من التسويق بيتلخص فى فكرة ظهورك بشكل مميز و بارز وسط باقي مستخدمى منصة العمل الحر و اللى تمت تغطيتة في صورة النصائح اللى كانت موجودة بالمقال الثاني : http://mshmshvalley.com/freelancing-2
و اللي بالأضافة ليها لازم تهتم ب ” كلمات البحث ” Tags = ” الكلمات الدلالية ” اثناء اضافتك للخدمة .. لان ببساطة دي الكلمات اللى العملاء بيوصلوا بيها للخدمات عن طريق استخدام البحث | Search فى منصات العمل الحر
كمثال : بفرض انك بتقدم خدمة بعنوان ” تصميم شعار احترافي ب 5$ ”
كلمات البحث الخاصة بيك و اللى متوقع ان العملاء هيكونوا بيدوروا عليها لو محتاجين خدمتك : ” تصميم شعار , تصميم شعارات , تصميم Logo , مصمم شعارات , لوجو ”
ملحوظة : بين كل كلمة بحث و الكلمة التانية لازم تفصل بعلامة ( ___ , ___ )
____
كمان لو خدت بالك و احنا بنعرفكم بمنصة العمل الحر “خمسات” .. http://khamsat.com/ اتكلمنا عن كونك وسط 300.000 مستخدم عربي بيخلقك سوق واسع تقدر تبيع فية .. لكن دة ميمنعش ان ال300.000 فيهم منافسين ليك ف لازم تتميز عنهم .. عن طريق :
أ‌- المنافسة فى السعر ” بمعني انك ممكن تقدم ضعف الخدمة اللى بيقدمها منافسك بنفسه سعر .. كمثال : ترجمة 500 كلمة ب 5$ فى حين ان باقي المستخدمين بيقدموا 250 كلمة ب 5$ ”
لكن انتبة فى المقام الاول للجودة اللي هتقدم بيها خدمتك .. يعني الضعف دة مش قانون ثابت .. يعني ممكن تقدم الخدمة قى المثال السابق ” ترجمة 300 كلمة ب 5$ ”
ب‌- المنافسة فى سرعة التنفيذ ” بمعني انك ممكن تثبت السعر مع منافسينك عشان متكلفش نفسك خساير .. لكن تنافس فى مدة التنفيذ و ليكن 3 ايام بدل 5 .. و بالتأكيد لازم تاخد فى اعتبارك .. تسليم الخدمة بأعلي جودة .

2- التسويق لخدماتك خارج منصات العمل الحر
فعلياً دة الجزء الاهم من التسويق .. لانة بيمثل حوالي 60% من المبيعات اللي ممكن توصلها .. بالاضافة لانة بيأثر ايجابياً على التسويق الداخلي و زيادة المبيعات عن طريقة هو الآخر
و دة هيكون عن طريق :
أ‌- مواقع التواصل الأجتماعي زي ( Facebook – Twitter – linkedin )
ب‌- مدونة شخصية Blog خاصة بيك
و سواء اخترت تستغل الوسيلتين او واحدة منهم بس ! لازم تبقي عارف انك عشان تحقق نتائج ف الموضوع اكبر بكتير من انك تعمل Share ل link خدمتك .. او مجرد تعرض الخدمة و تطلب من متابعينك شرائها
الموضوع محتاج انك تضيف قيمة ” فائدة ” للمهتمين بخدمتك ..
ازاى ؟!
بمعني انك لازم تكتب محتوي لية علاقة بخدمتك .. يعني تتكلم عن ” تصميم الشعارات ” مثلاً .. و اهم حاجة انك تراعي ان النقطة الفرعية اللى هتتكلم عنها تكون هي اللى تهم العملاء اللي محتاجين يشتروا الخدمة دي
يعني كمثال تكتب محتوي لية علاقة بـ ” اهمية الشعار و تصميمة فى نجاح الشركة ” او محتوي عن ” متوسط اسعار تصميم الشعارت فى الوطن العربي ” و فى المحتوي تعرض على الزائر شراء خدمتك 🙂
كمان :
1- أحكي لمتابعينك عن قصص نجاح عملائك و تجاربهم و أرائهم بعد شراء خدماتك
2- كمان ممكن تحكيلهم عن نجاحاتك و انجازاتك الشخصية ” كمثال : انك خلال شهر ديسمبر 2014 .. صممت و بعت 50 شعار ”
3- تقدر تعمل معرض اعمال خاص بيك .. تعرض فية عملائك و انجازاتك
4- تقدر تقدم شرح مطول عن خدمتك و عن الفوايد اللي هتعود على العميل لما يشتريها .. و تعرفهم اكتر بمهاراتك و اللى يأهلك انك تكون محل ثقتهم
5- تقدر تقدم هدايا و تسوق ليها ك نوع من جذب عملاء متوقعين ” كمثال : تصميم شعار احترافي لاول 3 عملاء مجاناً بمناسبة السنة الجديدة ” و هتكون اضافة بالتالي لمعرض اعمالك
و بكده تبقي تخطيت حدود تواجدك على منصات العمل الحر و حولت نفسك لمنتج ” Personal Brand ” المهتمين بية هم اللي بيدوروا عليك مش انت اللي بتدور عليهم

لكن فى شوية ملحوظات ضروري تاخد بالك منها :
1- بخصوص المدونة ف مش شرط تكلف نفسك من البداية تكاليف مدونة مدفوعة و تقدر تعتمد على مجانية زي Blogger و WordPress
2- بخصوص مواقع التواصل الاجتماعي :
أ‌- يفضل انك تعمل صفحة | Page خاصة بشغلك على Facebook و متستخدمش الاكونت الشخصي الخاص بيك
ب‌- مهم جداً انك تتواصل و تجاوب على اسألة متابعينك على مواقع التواصل الاجتماعي .. متعرفش مين ممكن يبقي عميل محتمل و السؤال دة متوقف على قرار الشراء
و بالأخص تواصل دائم مع عملائك السابقين .. دة هيديك فرصة اكبر انهم يعرفوا جديدك و يطلبوا خدماتك تاني .__

بالأضافة لمدونتك الشخصية و مواقع التواصل الاجتامعي .. تقدر تستفيد من ” المنتديات ” اللى بتقدم أقسام تجارية ليها علاقة بال social Media و ال Graphic Design و ال Web Developing

من أشهر المنتديات العربية اللى بتتيح الجزئية دي ” ترايدنت | traidnt.net ” .. و افضل طريقة لعرض خدماتك .. هي كتابة مضوع خاص بأعمالك السابقة و بنهايتة تعرض على القراء شراء خدمتك عبر منصة العمل الحر و لتكن ” خمسات ” على سبيل المثال

“ترايدنت” ماهو الا مثال خاص بالجزء اللي فات .. انت تقدر تستغل باقي المنتديات و اللى بتمثل تجمعات لعملائك المستهدفين ” منتديات الترجمة وتعليم الفوتوشوب أو تعليم اللغات الاجنبية ” و اللي هتكون انسب من ترايدنت.

لسه مكملين معاك لحد ما توصل ان شاء الله عن طريق سلسلة المقالات اللي هننشرها كل يوم أتنين و خميس على ” وادي المشمش ”
http://www.facebook.com/mshsmshvalley

مؤسس وادي المشمش .. طالب بعد الضهر .. ريادي أعمال .. مُحرض على ترك الوظيفة و الدخل الثابت و البدء فى المشاريع الخاصة ..

تواصل معي : http://www.facebook.com/nagy.kid

1

التعليقات على مبروك حضرتك بقيت صاحب شركة صغيرة

أضافة تعليق

لن يتم نشر عنوان بريدك الإلكتروني. الحقول الإلزامية مشار إليها بـ *

Show Buttons
Hide Buttons
Loading...