الموهبة مش كفاية ! تلخيص كتاب Talent is never enough

0 57

كلنا بنقع في حيرة كبيرة واحنا بنبحث عن شغفنا واهتمامتنا .. و بعد مدة من البحث اما بنوصل لعلامات ورسايل تدلنا على الطريق الصح أو بنوصل لحارة سد ونلاقي إننا مش شاطرين في حاجة أو معندناش موهبة اتولدنا بيها زي الرسم، الغناء، الكتابة،… إلخ.

في كتاب Talent is never enough بيأكد المؤلف John Maxwell إن لكل شخص موهبة أو عدة مواهب اتولد بيها ومهمته انه يكتشفها. وبعد ما تكتشفها موهبتك لوحدها مش كفاية..الموهبة محتاجة بعض الضوابط والمقومات عشان تقدر تحول الموهبة لإحتراف وكمان مصدر دخل ليك فيما بعد. ولذلك وضع جون 13 قاعدة قابلة للتنفيذ ومش مجرد كلام وبس تقدر بعد ما تنفذهم تحصل على أقصى استفادة من موهبتك.

1) الإيمان Belief
هنا المؤلف بيقول إننا عندنا إمكانيات قوية جدًا واللي بيفرق شخص ناجح عن غيره هو مدى استغلاله لإمكانياته. طب ليه في ناس عندها ضعف في النقطة دي؟ لإنها بتتعرض لعوامل تخلي ثقتها في إمكانياتها تقل. العوامل دي ممكن تبقى البيئة المحيطة والأهل وحتى بعض الأصدقاء المحبطين. كل اللي عليك انك تحدد امكانياتك ونقاط قوتك، وتثق فيهم مهما حاولوا يهزوا ثقتك في نفسك وفي قدراتك.

2) الشغف Passion
كلنا بنمتلك نسب متقاربة جدًا من قوة التحمل والإرادة والصبر، ولكن تقدر تضاعف نسبتك منها بالشغف! لو عندك شغف ناحية محتوى الكورس اللي يتدرسه هيبقى اولويتك، مش هتفوت اي درس فيه، هتحطه على رأس قايمة مهامك وهيبقى اول حاجة يجي في بالك أول ما تصحى. لو قوة تحملك وإرادتك هتمشيك 1 كيلومتر، فالشغف هيحركك 10 كيلومتر.

3) المبادرة Initiative
ناس كتير بيحصل عندها لبس ما بين مفهوم “الإنتظار” و “الصبر”. إنك تصبر معناه متيأسش في البحث والسعى والمحاولات، الصبر هو انتظار وتحمل مع حركة. إنما مجرد الإنتظار في سكون وهدوء وبدون أي خطوة أو مبادرة مش هيوصل لأي نتيجة على الإطلاق!

4) التركيز Focus
بنُعجب جدًا بأي شخص ناجح في أكثر من مجال ولكن الشخص دة بيبقى كويس في كل مجال عارفه وعمره ما بيتعدى مرحلة ال “كويس” إلا لما يقرر يركز في حاجة أو 2 كحد أقصى. ركز على قاعدة “معرفة شئ عن كل شئ، وكل شئ عن شئ.” تجميع مجهودك ووقتك كله في حاجة واحدة هينتج نتيجة افضل واسرع عن توزيعه على 5 أو 6 حاجات.

5) الإستعداد Preparation
محدش فينا عارف فرصة عمره ممكن تيجي امتي، لذلك لازم نكون مستعدين ليها في اي وقت. واثناء بحثك عن الفرص اللي تغير حياتك متوقفش تطوير في نفسك. انت ادرى حد باللي ناقصك من مهارات وأدوات محتاج تتقنها، لذلك كمل شغل عليها وخليك دايمًا مستعد.

6) التدريب Practice
تعلم أي شئ عبارة عن جانبين “النظرية” و “التطبيق”. الجانب النظري في اي شئ لوحده غير كافي، لذلك متوقفش تدريب وتمرين سواء كنت بتكتسب لغة أو بتتعلم آلة موسيقية أو حتى بتتعلم طبخ! Practice makes perfect

7) المثابرة Presevance
العبقري Thomas Edison ليه مقولة بييقول فيها إن في ناس كتير فشلت عشان مش كانت مدركة لأي درجة كانت قريبة من هدفها لكنها قررت تستسلم وتتراجع قبل الوصول للهدف بخطوة!

8) الشجاعة Courage
الخوف ممكن يشل موهبتك حرفيًا ويحرمك من أهم الفرص في حياتك. متخليش الخوف يسيطر عليك، لإن بعد 20 سنة لما تبص على اللي عدى هتندم على اللي معملتوش أكتر من ندمك على حاجات عملتها فعلًا.

9) قابلية التعلّم Learnability
المهارة بتساعدك تتخطى بعض مراحل التعلم، لكن هيفضل ناقصك حاجات تتعلمها. تغلب على جزء الغرور وخليك مؤمن إنك هتفضل تتعلم لحد ما تموت. الناجح هو اللي يقدر يحدد هو محتاج يتعلم ايه حتى لو الباقين شايفينه خبير ومحترف وعارف كل حاجة في مجاله.

10) الشخصية القوية Character
اي موهبة سهل انها تختفي ومتطلعش للنور بسبب ضعف شخصية صاحبها. دور على جوانب النقص في شخصيتك زي تأثرك برأي المحيطين واتباعك الأعمى ليهم أو الخجل أو الكسل.

11) العلاقات Network/Relationships
النقطة دي بالذات بتترجم على حاجتين: ممكن relationships وهنا القصد هيكون في البحث عن العلاقات اللي بتسندك وتدعمك وتشجعك وميبقاش تركيزك على حياتك العملية ينسيك حياتك الشخصية والإجتماعية. وعلى الجانب الآخر ال network في الشغل هيفتحلك أبواب كتير ودة بترشيحك للحصول على فرص ومناصب هما عارفين إن انت عندك الإمكانيات المطلوبة ليها وبتدور عليها.

12) المسئولية Responsibility
غالبًا بناخد قرارات واحنا مضطرين لكنها ضرورية، فأهم شئ إننا نتحمل نتيجة اختيارتنا سواء النتائج كانت إيجابية أو سلبية. معنى كدة إنك لما تنجح تقدر تنسب جزء من النجاح لتعبك واجتهادك ولما تفشل مش تعلق فشلك على اللي حواليك.

13) العمل الجماعي TeamWork
تخيل إنت بمهاراتك وإمكانياتك لو تقدر تحقق قدر من النجاح، مع بعض الأشخاص المميزين زيك وبإدارة كويسة تحققوا عشرات الأضعاف. مفيش شركة أو مؤسسة أو اي كيان قائم على المجهود الفردي، لذلك هتحتاج تتعلم التأقلم واتكيف وحسن التعامل مع فريق بل ويمكن تكون مدير الفريق زي ال project manager.

اترك رد

لن يتم نشر عنوان بريدك الإلكتروني.