مقدمة عن تعلم الآلة “Machine Learning”

0 3٬505

من فترة كده بدأ يحصل مشادات ما بين اتنين من أباطرة التكنولوجيا في العالم ايلون ماسك مؤسس شركات تسلا وسبيس اكس  وغيرها ، ومابين مارك زوكربيرج مؤسس الفيسبوك ، وسبب المشادات دي هي رؤيتهم المختلفة لمدى تأثير تطور الذكاء الاصطناعي و خطره على البشر على المستوى البعيد ..

وجهة نظر ماسك واللي صرح بيها لبعض المسئولين الحكومة الأمريكية انه لازم يوضع حد لتطور مجال الذكاء الاصطناعي لان الأمر خطير وبيهدد البشرية وممكن نتلقى في يوم من الأيام الآلات بتقتل البشر ، علشان كده لازم يكون في قانون أخلاقي بيحد ويقنن التطور في الصناعات دي ، وده مش رأي ماسك لوحده ولكن في علماء تانين بيوافقوه على الموضوع ده زي الفيزيائي ستيفن هوكينغ اللي شايف ان الآلات اللي بتفكر بتشكل خطر على وجود الجنس البشري
مارك بقى رد على تصريحات ماسك بان ” نظرة ماسك عن الذكاء الاصطناعي محبطة وسلبية جدا وان الكلام ده خارج عن شخص مش مسئول ^_^ ”
ساعتها ماسك رد بتويتة على حسابه قال فيها ان اتكلم مع مارك بخصوص موضوع الذكاء الاصطناعي وطلع فهم مارك
للموضوع ده محدود ^_^
المهم بقى ان بعد قصف الجبهة الجامد ده من الطرفين طلع علينا خبر ان شركة الفيس بوك قفلت واحد من أنظمة الذكاء
الاصطناعي بتاعتها بعد ما اكتشوفوا ان اتنين من شات البوتس bots سابوا اللغة اللي كانوا متبرمجين انهم يتواصلوا بيها
واستبدولها بلغة تانية جديدة خاصة بيهم وغير مفهومة علشان يكون التواصل ما بينهم أسرع وأكفأ .. مع العلم ان مش حالة الفيس بوك هي الاولى ولكن حصلت قبل كده في اكتر من حالة مشابهة لما اتلاحظ ان بعض تقنيات الذكاء الاصطناعي المتراقبة بواسطة البشر بعدت عن استخدام الانجليزي لتطوير لغة تانية خاصة بيهم ومع انها غامضة بالنسبة للبشر ولكن ليها معنى لما قدروا يترجموها باستخدام تقنيات  AIتانية .
نسيبنا احنا بقا من صراع العمالقة ونخلينا في الحاجات اللي على قدنا ، في كورس ” مجاني ” بيقدمه معهد كاليفورنيا للتكنولوجيا على منصة ايدكس بيديك مقدمة عن تعلم الآلة “Machine Learning” الكورس بيغطي النظريات والخورازميات والتطبيقات الخاصة بالموضوع ده وبيحاول يفهمك الموضوع بجد مش مجرد شوية معلومات عامة وخلاص ، والحلو بقى ان اللي بيدي الكورس هو دكتور مصري اسمه “ياسر أبو مصطفى ” خريج اتصالات القاهرة وسافر من السبعنيات تقريبا ، و يعتبر واحد من أبرز الدكاترة فى المجال دة ، الكورس بدأ يوم 17 سبتمبر وهيستمر لمدة 10 أسابيع وده اللينك بتاعه :
https://www.edx.org/course/learning-data-introductory-machine-caltechx-cs1156x-0
كمان فى فيلم ظريف اتعمل عن موضوع علاقة البشر مع الذكاء الاصطناعي و ازاي ممكن يكون شكلها في المستقبل .. تقدر تبدأ بية عشان تتحمس اكتر للكورس … فيلم I, Robot (2004) من بطولة ويل سميث وبيتكلم عن نفس الفكرة تقريبا .. يا ترى ممكن في يوم الروبوتس تهدد حياة الانسان ؟

اترك رد

لن يتم نشر عنوان بريدك الإلكتروني.