مصادر لتعليم اطفال المرحلة الاعدادية البرمجة

اتكلمنا الايام اللى فاتت عن أهمية تعليم البرمجة للاطفال و شاركنا معاكم بعض المواقع لتعليم اطفال المرحلة الابتدائية البرمجة .. النهاردة هنتكلم عن مواقع مناسبة اكتر للاطفال الاكبر سنا و تحديداً سن 13 سنة فما فوق ، وخاصة لو كان الطفل عنده قدرة كويسة للتعامل مع الانجليزي لان ما فيش واجهة عربي للمواقع دي :

موقع App Inventor

الموقع بيوفر دروس لـ لغة اسمها “App Inventor” وهي لغة برمجة بصرية بتستخدم لبناء تطبيقات الاندرويد ، معتمدة على فكرة البلوكات وتحريكها من غير ما تحتاج انك تكتب بايدك سطور الكود .

اللغة في الاساس عملتها شركة جوجل .. وبعدين معهد MIT تولى الفكرة وطرحها اونلاين مجانا ، لما تدخل على الموقع هتلاقي الدروس متجمعة في حاجة اسمها “Course-in-a-Box”واللي بيحتوي على فيديوهات ودروس نصية واختبارات وفصول من كتاب بتشرح كل حاجة بالترتيب وخاصة لو معلم وحابب تدرس الموضوع ده للاطفال هتلاقي الدنيا متنظمة قدامك ، الكورس بيبدأ بتعليم بناء التطبيقات البسيطة وبعد كده يتنقل لمراحل اعلى .

ده الموقع الخاص بالكورسات والدروس : http://www.appinventor.org/

وده الموقع اللي هتستخدمه علشان تبدا في بناء التطبيقات اللي عايزها :http://explore.appinventor.mit.edu/

بتضغط على “create apps”وتسجل حساب ، وبعد كده تتختار التطبيق اللي عايز تبدا فيه وهتلاقي مع كل تطبيق الشرح بتاع طريقة بناءه ، وهتلاقي شاشتين (designer /blocks)واحدة لتصميم شكل التطبيق والتانية علشان الكود.

موقع GameBlox

الموقع يستخدم في بناء العاب الكمبيوتر معتمدة برضه على فكرة البلوكات ، مجرد لما بتضغط على زرار “Make a Game” هتلاقي علطول دخلت على شاشة كتابة الكود ، هتلاقي في اعلى الشاشة زرار “Help” اللي هياخدك على خمس دروس يتوضحلك تبدا ازاي ، غير كده هتلاقي الموقع مش بيوفر معلومات كتير الا لو سألت على online forum بتاعت الموقع او بتلاقي برضه دروس توضيحية على اليوتيوب .

الالعاب اللي بتعملها ممكن تتلعب اونلاين على الموقع او على تطبيق GameBlox اللي هتلاقيه متوفر لاجهزة الاندرويد و iOS

https://gameblox.org/

موقع Thimble by Mozilla

الموقع يعتبر محرر نصي اونلاين للغات الخاصة بتصميم المواقع (HTML, CSS, JavaScript)

الدروس هتلاقيها متنظمة جوه مشاريع ، اما ان الطفل يختار انه يبدأ مشروع بنفسه او يعدل على مشروع موجود .

بمجرد ما تبدا في المشروع هتلاقي الشاشة اتقسمت نصين جزء بيظهر صفحة الويب والجزء التاني بيظهر الكود اللي استخدم في كتابتها ، وبمجرد ما تغير في شاشة الكود بتلاقي النتيجة ظهرت في صفحة الويب وده بيظهرلك الكود بيشتغل ازاي .

والموقع ممكن يكون مناسب للاطفال بيدروسوا حاليا تصميم المواقع في المرحلة الاعدادية انهم يطبقوا اللي بياخدوهم بايدهم ، لكن مش هتلاقي فيه شرح على الموقع

https://thimble.mozilla.org/en-US/