و لإن الإنسان عدو ما يجهل .. تهافت الناس علي البحث عنه علي جوجل بشكل كبير مؤخراً . و أصبح ” انترنت الأشياء ” ” The Internet of Things ” من أكثر المواضيع بحثاً على علي جوجل , علشان كدة جبنالكم هنا أكثر الأسئلة اللي اتسئلت علي جوجل عن ” انترنت الأشياء ” والإجابة عليها بس من شخص حقيقي مش مجرد محرك بحث.
س1: إيه هو ” انترنت الأشياء ” ؟ وليه هو مهم ؟
– انترنت الأشياء أو زي ما هو معروف بإختصار IoT هي فكرة قائمة من سنين طويلة بين شركات التكنولوجيا الجديدة وكتير من المخترعين. وبالفعل تم الإعلان عن أول جهاز متصل بالإنترنت وكان “Toaster محمصة” سنة 1989.
– هي ببساطة عبارة عن مجموعة من العمليات البسيطة هدفها توصيل بعض الأشياء بالإنترنت للتحكم فيها ومتابعتها عن بعد. تقنية بتسمح لك إنك تتواصل مع المباني والأجهزة وممكن الحيوانات ودة عن طريق الربط بينهم وبين بعض التطبيقات.
أبسط مثال عن ” انترنت الأشياء ” هو الثلاجة الذكية اللي بتخليك تتابعها بشكل منتظم. لو حصل نقص في أي منتج في الثلاجة تقدر تشوف دة ، بيوصلك تنبيه أو رسالة بإن اللبن خلص مثلًا علشان تجيبه. بل والأدهي إنها بتابع صلاحية المنتجات من تاريخ الصلاحية اللي علي العلبة ودة بسبب الكاميرات الداخلية !!
– إنتشر إستخدام التقنية دي في الفترة الأخيرة وخصوصًا في إنجلترا. التقنية دي بتُستَخدم في نظام تدفئة المنازل وإستخدام الطاقة. الحكومة كمان بتشجع الشركات إنها تستخدم العدادات الذكية. بالتالي النظام دة بيسمح للمواطن هناك إنه يستهلك الطاقة وقت الحاجة بس. يعني لو اليوم مشمس مش هيحتاج لنظام التدفئة أو لو البيت مش فيه حد اليوم دة أو حتي سافروا لفترة ، يقدر ساعتها النظام من الشركة يلغي إستخدام الطاقة للبيت دة. وفي الحالة دي بتستخدم كاميرات إستشعار الحركة للتأكد من وجود أصحابه بالبيت !!
– الموضوع موقفش عند المنازل الذكية والأجهزة المتصلة بيها ولكن الأمر توسع لدرجة المدن الذكية. يعني إشارات المرور الذكية المتصلة بكاميرات عند كل إشارة بدون إستخدام أي فرد بشري في تنظيم المرور. الموضوع تطور لدرجة صناديق الذبالة الذكية ^_^ يعني بتدي إشارات وقت ما الصناديق تتملي علشان تتفرغ. حتي في المجال الزراعي بيتم توصيل أجهزة بالمحاصيل لمتابعة مراحل نموها.
– الحكومة هناك بتشجع بشكل كبير تسليم المواطنين عدادات ذكية والسبب إن كل البيانات المستخدمة في الطريقة دي وربطها بالأنترنت تعتبر أكثر كفاءة من الطريقة العادية ودة بينتج عنه إستخدام أقل للطاقة.
س2: هل هو آمن؟ وهل البيانات فيه آمنة ولأ يمكن إختراقها بسهولة؟
– علشان مش كل اللي بيلمع دهب ومن مبدأ الميزة والعيب ، انترنت الاشياء ليه عيوب بردة. أكبر تحدي للتقنية دي هو الأمن والخصوصية لإن الأجهزة المستخدمة فيه بتحمل بيانات خاصة بالأفراد. الأجهزة دي بتعرف إذا كان فيه ناس في البيت ولأ لأ. ولو فيه ناس إيه الأجهزة اللي إستخدموها. يعني مثلا حد شغل التليفزيون أو فتح الثلاجة…إلخ.غير إن الأجهزة دي متصلة بقاعدة بيانات الشركة وللشركة الحق في الإطلاع عليها.
– من ناحية الأمن والخصوصية صرح بعض الخبراء الأمنين إنه مش بيتم بذل جهود كافية لتأمين مراحل تنفيذ أي عملية بإستخدام التقنية دي. ولإثبات النقطة دي تم إختراق أجهزة متصلة بالتقنية دي من أول جهاز مراقبة الطفل المرتبط بالكاميرا لحد نظام تدفئة البيت بل وإشارات المرور المستخدمة في شوارع المدينة. ولكن بعدان تم توضيح إن قراصنة الإنترنت مش عندهم أي إهتمام لإختراق الأجهزة المتصلة بالتقنية دي. والسبب إن إختراق جهاز متصل بالإنترنت تابع لشخص معين مش كافي إنه يؤذيه أو يستخدم ضده وملوش اي أثر في الهجوم عليه. علشان كدة ميستحقش كل المجهود اللي بيبذله قراصنة الإنترنت لإختراقه لإن إختراقه غير سهل بالمرة.
س 3 كيف يؤثر انترنت الأشياء علي عالم التجارة والأعمال؟
– تأثير التقنية دي علي الأعمال والتجارة بيتوقف علي نوعية مجالك والصناعة الخاصة بيك. في مجال التجارو عمومًا ” انترنت الأشياء ” مفيد لتنظيم الأدوات والآلات ومتابعة أداء العمال والموظفين. بالإضافة إنه تم بيستخدم لخدمة المزارعين. ليها فايدة كمان في توصيل أجهزة الإستشعار لرصد المحاصيل والماشية. وفيه خطة حاليًا لتسخير الخدمة دي في زيادة الإنتاج والكفاءة وتتبع صحة الماشية والحيوانات المستخدمة في المجال الزراعي.
– تم تطبيق تقنية ” انترنت الأشياء ” علي أمثلة لا حصر لها. وكل اللي نقدر نتوقعه من تقنية عالية زي دي إنها هتتوغل في كل المجالات بفضل وجود أجهزة الكمبيوتر وشبكة الإنترنت. ومادام كل إستخدامها مرتبط بالبيانات يبقي سهل جدًا تقدير حجم الفوائد المحتملة اللي هتعود من إستخدامها. وبتزيد الفايدة لما يكون لها علاقة بتحفيز ودفع الموظفين في الشركات إنهم يشتغلوا بكفاءة أعلي وإنتاجية أكبر. تخيل إن بطاقة دخول مبني الشركة بيستخدم لتعقب مكان الموظف في المبني. دة بيسمح كمان لرئيسك في الشغل يعرف انت خدت بريك قد إيه أوقعدت وقت قد إيه تعمل شاي مثلًا!!
س4 علاقة انترنت الأشياء بالمجال الصحي؟
– يمكن ربط الأجهزة دي بالحبوب والمحاصيل للتأكد من جودتها ومتابعة نموها. ومؤخرًا تم تسليط الضوء علي أهمية التقنية دي في إمكانية إنقاذ حياة كتير من البشر. بالفعل فيه ناس مريضة بتستخدم التقنية دي علي هيئة إسوار حول المعصم لتتبع خطواتهم في حال حدث ليهم أزمة مرضية أوحدث تدهور فيما يخص مرضي القلب وغيرهم.
– وتفصيلًا فيه كتير من الأفكار في المجال الصحي لتطبيق الخدمة دي منها مبادرة إنتل Intel واللي قدمت أجهزة تتعقب مرضي الشلل الرعاش ومتابعة حالتهم بدقة أكبر من مراجعة وتتبعض الأشخاص بالورقة والقلم ودة لخطورة حالة أصحاب المرض دة بالذات . كمان فيه Sonamba واللي قدمت أجهزة بتابع حالة وصحة كبار السن والمرضي في حال كانوا في خطر. أما عن الأشخاص اللي بيعانوا من أمراض القلب يمكن استخدام خدمة AliveCore للكشف عن عدم إنتظام ضربات القلب.
– مجال الرعاية الصحية أحد المجالات اللي بتحتاج بيانات أكثر عن الأشخاص ودة بهدف إنقاذ الأرواح من خلال الوقاية من المرض، ورصدها وتحليلها لحالتهم لإنتاج أدوية جديدة. وبالتالي صحتنا هي الجانب الأهم والأكتر خصوصية في حياتنا، علشان كدة هنحتاج إن تطبيق تقنية ” انترنت الأشياء ” علي المجال دة يكون أكثر دقة.
س5 هل تقنية انترنت الأشياء حقيقية؟
– في الغالب دة أفضل سؤال تم رصده علي جوجل فيما يخص تقنية ” انترنت الأشياء ” .. هل هو حقيقي ؟؟
– والغريب أنه صعب الإجابة علي السؤال دة. عالم التكنولوجيا مليان بالمنتجات والتقنيات الجديدة وبيكون التسويق ليها سريع و بتعمل ضجة عالية. علشان كدة غالبا بيكون صعبة اتخاذ قرار في وقت مبكر عن أي تقنية وتحديد هل الابتكار دة هو حقيقي أو لأ. من أشهر الأمثلة سخرية كتير من نقاد التكنولوجيا علي أول هاتف آي فون.
– لكن تقنية ” انترنت الأشياء ” مختلفة. هي أحد الأفكار المنتشرة على نطاق واسع ومش بتعتمد على مشروع أو منتج واحد بعينه. ممكن الثلاجات الذكية تطبيق كويس لها ومثال علي الأجهزة الذكية في المستقبل، ووراد كمان أنها تتركن على جنب زي كثير من تقنيات التكنولوجيا اللي اتعملت ولكن نجاحها مش كان كبير لإنها حققت مكاسب قليلة جدا. أما عن فكرة أجهزة استشعار متصلة بالأجهزة الذكية هتستمر وهتطور سواء اتفقنا او مش اتفقنا معاها.
– بعد 10 سنين من دلوقتي ممكن توصيل كل شيء أو حتي اجزاء وقطع من أجهزة معينة بالإنترنت بشرط وجود الفايدة من تطبيق التقنية ، زي العدادات الذكية. ممكن ساعتها نسميها تقنية ” انترنت الأشياء ” او”الأجهزة الذكية” أو مش نسميها أي حاجة أبدًا. تذكير: وسيلة الهواتف الذكية وبكل بساطة أصبحت الهواتف المستخدمة معانا كلنا حاليًا.
لا يهم أين هو أو ما نسميها، تقنيات إنترنت الأشياء حقيقية – ولكن ما سيبدو في المستقبل هو شيء حتى جوجل لا يمكن الإجابة