ازاى تتعلم انجليزي ؟!

6 4٬734

بما ان الإنجليزي هو اكتر لغة مستخدمة في العالم، و بما اننا بنضطر نتعامل بيه كتير جدا كجزء من حياتنا اليومية و بنحتاجه سواء في شغل او سفر او غيره، فانت مينفعش متتعلمش إنجليزي 😀

تعلم أي لغة جديدة بيحتاج شغل كتير، التزام وإرادة قوية ..
الخطوات الجاية دى هتساعدك انك تحسن مهارات الإنجليزي بتاعتك بسهولة و بسرعة.. اهم حاجة انك تلتزم ! 😀

أولا: ازاي تتكلم إنجليزي أحسن:
1. أتكلم شوية إنجليزي كل يوم. برغم كل كلام الكورسات 😀 أحسن طريقة على الاطلاق لأنك تتعلم أي لغة جديدة هو إنك تتكلمها، مش فارقة كتير اذا كنت متمكن جدا من اللغة او متعرفش غير 5 كلمات.. انك تستخدم اللغة و تتكلمها مع شخص تاني هي اسرع و انجح طريقة علشان تطور من قدراتك.
– متستناش لحد ما تحس إنك “مرتاح إنك تتكلم إنجليزي” انت غالبا مش هتوصل للمرحلة دي الا بعد وقت طويل من الممارسة. ابدأ من النهاردة !! أتكلم انجليزي مع اى حد حتى لو هتبدأ بربع ساعة في اليوم، هتلاقى نفسك بتتطور بسرعة غريبة.
– حاول تتعرف على شخص لغته الام هي الإنجليزي و اطلب منه انه يساعدك على تطوير لغتك عن طريق الكلام معاه. ممكن تعملوا مثلا نوع من التبادل اللغوي 😀 و اللي فيه انت هو بيساعدك تتعلم انجليزي و في المقابل انت تساعده يتعلم لغتك.
ملاحظة: ممكن تستعين بالEnglish clubs اللى بتقام في مكتبة السفارة الامريكية و اللى اتكلمنا عنها قبل كدا.
– لو انت عايش في بلد بتستخدم اللغة الإنجليزية ممكن تدرب نفسك بانك تبدأ محادثات صغيرة مع الناس اللى بتقابلهم زى مثلا انك تسلم على صاحب محل او تسأل عن الطريق و هكذا.

2. حسن من طريقة نطقك. حتى لو انت متمكن جدا من اللغة و قواعدها و كلماتها.. ممكن ناس كتير متفهمش انت عايز تقول ايه لو بتنطق غلط! بالذات الناس اللى الإنجليزي لغتهم الام.
– علشان تحسن مستواك في الإنجليزي لازم تنطق صح بطريقة واضحة. اسمع كويس ازاى الأجانب بينطقوا الكلمات و صوتها بيبقى عامل ازاي و حاول تقلدهم و تنطقها زيهم بالظبط. و خليك في لهجتين.. الامريكية او البريطانية.. اى حاجة تانية انت كدا بتتعب نفسك 😀
– اهتم جدا بأى صوت او حرف انت متعرفوش و مش متعود عليه.. زى مثلا الطرق المختلفة لنطق الO و الU ، و خلى بالك اوى من الth .. اللى هي عندنا حرف ال “ث” بس كلنا طبعا بننطقها “س”. 😀
– في كلمات بيختلف نطقها تماما حسب البلد اللى بتتنطق فيها. فاكر فوق لما قلتلك خليك في اللهجة البريطانية او الامريكية ؟ الكلام دا تنساه خلاص لو هتسافر بلد زى الهند او جنوب افريقيا مثلا 😀 في الحالة دى ركز على لهجة او طريقة نطق الكلام المتبعه في البلد اللى انت رايحها.
3. حسن من مفردات اللغة بتاعتك و استخدم الIdioms .
قبل اى حاجة بس ايه هي الidioms دى ؟ دى من الاخر كدا ممكن تقول عليها الكلام المجازي.. الجمل اللى معناها حاجة و المقصود بيها حاجة تانى خالص 😀 يعنى متقدرش تترجمها حرفيا لانها هتديك معنى مختلف و دى جمل بتتعلمها من الممارسة و الخبرة.
– كل ما تتعلم كلمات و جمل اكتر كل ما انك تتكلم انجليزي هيبقى اسهل عليك. و زى ما قلنا قبل كدا قضى وقت اكتر مع ناس بتتكلم انجليزي و انت هتلاقى نفسك بتلقط منهم كلمات و جمل جديدة و هتتعلمها بسرعة. مش بس كدا، كمان القراية او انك تتفرج على برامج او تسمع اخبار بالانجليزي بردوا هيساعدك كتير.
– كل ما تتعلم لغة او جملة جديدة حاول تستخدمها في الكلام كتير، دى احسن طريقة علشان تحفظها.
– طريقة تانية، انك تلزق ورقة على كل حاجة عندك في البيت مكتوب فيها اسم الحاجة دى بالانجليزي. كل ما تيجى تستخدم حاجة من الحاجات دى هتشوف اسمها و هتفتكره.
– خلى معاك نوتة صغيرة اكتب فيها الidioms اللى اتكلمنا عليها اللى بتستخدمها و بتقابلك دايما. مثلا زى “it’s raining cats and dogs” معناها انها بتمطر جامد، او “Cloud nine” معناها ان الشخص سعيد جدا، او مثلا “Piece of cake” معناها سهل جدا و هكذا.. و حاول تستخدم الجمل دى فأى كلام انت بتقولة.

4. احضر كورس إنجليزي او مجموعة نقاش. طريقة هايلة علشان تحسن من لغتك بشكل روتينى يجبرك انك تلتزم و يرفع عنك وطأة الكسل =D. ابسط مثال للموضوع دا الEnglish clubs اللى اتكلمنا عنها قبل كدا.
– انك تحضر كورس انجليزي طريقة كويسة بتخليك تركز على اكتر طريقة رسمية تكلم بيها انجليزي. بيساعدك تركز عالقواعد و طريقة الكلام و ازاى تبنى جملة و هكذا.
– ممكن بردوا تحضر مجموعة نقاش و دى بتبقى طريقة غير رسمية و بسيطة علشان تطور من لغتك، بتركز على التواصل و تكوين العلاقات اكتر من انك تتكلم انجليزي صح! الطريقة دى بتساعدك انك تتكلم براحة اكتر و بطريقة طبيعية.
– الطريقتين ليهم مميزات و عيوب بس الأفضل ليك انك تستخدم الاتنين.

5. خلى معاك قاموس. سواء كتاب حقيقي او تطبيق على تلفونك، القاموس حاجة مفيدة جدا.
– لما يبقى معاك قاموس عمرك ما هتحتار في اى كلمة تقابلك! ممكن ينقذك من الاحراج و انت بتتكلم مع شخص اجنبي مثلا. انك تاخد دقيقة تدور على معناها احسن من انك تسكت خالص و متعرفش ترد عليه او انك تفتى و تطلع غلط 😀 .
– مش بس كدا، كل ما تحتاج كلمة معينة و تدور عليها علشان تستخدمها في جملة دا هيخليك تحفظها اسرع بشكل اقوى.
– كمان انت ممكن تستخدمه في الوقت اللى انت فاضى فيه او و انت في المواصلات مثلا! تتعلم كلمات جديدة كل يوم.
– كبداية حاول تستخدم قاموس انجليزي-عربي، و كل ما تتحسن لغتك اكتر طور من قاموسك و استخدم قاموس انجليزي-انجليزي بيدى تعريف عن الكلمة، داه يساعدك تعبر بشكل احسن.

6 تعليقات
  1. mahmoud_fouad يقول

    شكراً جزيلاً ، المقالة دي أضافت ليا حاجات كتيرة ، ألف شكر 🙂

  2. esraa shaker يقول

    رائع بجد

  3. أحمد علام يقول

    جزاك الله خيرا وربنا يجعله في ميزان حسناتك الجارية 🙂

  4. mohamed serag يقول

    كلام جميل جدا ومفيد وعملي جدا
    ومع إحترامي الكامل ليك انا هختلف معاك في آخر نقطة اللي هي القاموس الفكرة نفسها ممتازه ولكن الافضل اني أستعين ب قاموس إنجليزي-إنجليزي لإن إحنا بالأخص كمصريين وعرب لما بنتعلم الإنجليزي بنتعلمه غلط وإحنا بنتكلم بنترجم الكلام من عربي لإنجليزي ومن إنجليزي لعربي ودي أكبر مشكله انا شخصيا بعاني منها بسبب إني إتعلمت بالطريقه دي .
    لو كل يوم هتتعلم كلمتين وتعرف معناهم كإنجلش وتقلهم بتلقائية في كلامك وانت فاهم معناهم أفضل من إنك تتعلم 20 كلمه وانت عارف معناهم بالعربي والكلام ده انا بقوله من خلال خبرتي في النقطه دي .
    وأتمني للجميع التوفيق

  5. norhan يقول

    المواضيع ممتاز لكن اللغة ركيكة جدا لدرجة مستفزة

  6. khaledradwan96 يقول

    كلام جديل جدا

    بس ممكن حضرتك تقولي الاقي صديق اجنبي يقبل ان يبتدي الحكاية دي معايا فين

اترك رد

لن يتم نشر عنوان بريدك الإلكتروني.