غالبًا بنتجنب معارضة اي شخص له سلطة علينا سواء أحد الوالدين أو دكتور في الجامعة أو مدير في الشغل خوفًا من العقاب. وفي حالة المدير والموظف في بعض الأحيان بيكون الموظف على حق، وبتكون عنده رؤية أفضل للموقف لإنه بيكون منخرط في العمل أكثر من مديره اللي ممكن تكون مهمته المراقبة والمتابعة فقط. لو عندك وجهة نظر مختلفة مع مديرك في الشغل ممكن تعرضها عليه بشكل يضمن توصيل وجهة نظرك وفي نفس الوقت يحميك من إنك تخسر وظيفتك بإنك تتبع الخطوات التالية:
1) إختيار التوقيت المناسب
اختيار الوقت المناسب لمناقشة مديرك هو أهم خطوة، لإن سوء اختيار الوقت ممكن يدفعك للظهور في الجانب المخطئ رغم إنك على حق. حاول تتجنب مخالفة مديرك أمام باقي الموظفين والأفضل تكلمه على انفراد.
2) إعرف سر حماس مديرك
علشان تقدر تكسب نقاش مع أي حد لازم تظهر له اهتمامك بحاجة مهتم بيها وهو بيقدَّرها. اظهِر لمديرك بعض الاحترام والتقدير لأي حاجة بتحفزُه وبتُثير اهتمامه. وفي النقطة دي تحديدًا هتحتاج تطلَّع Sherlock Holmes اللي جواك علشان تعرف معلومات أكتر عنه. استخدم المعلومات دي لوضع إطار لاقتراحك باعتباره شئ مختلف عن اقتراح مديرك، ولكنه ما زال بيخدم أولويته.
3) ساعده في تحسين صورته أمام الموظفين
أكثر ما يثير اهتمام المديرين هو حُسن مظهرهم زي كل الناس، ولكن بالتحديد شكلهم أمام الموظفين سواء من حيث حُسن السلوك أو قوة الشخصية. اتكلم عن مميزات مديرك وحسن إدارته للشغل قدامه وبكدة هتقدر تتقرب ليه شخصيًا ودة هيساعده يتقبل منك أي نقد بنَّاء أو أي وجهة نظر مختلفة معاه.
4) اغتنِم الفرصة
قولنا في الأول إن اختيار الوقت المناسب أهم شئ ولكن متستناش مدة طويلة، لازم تلحق تعرض وجهة نظرك قبل فوات الأوان. لازم تعرضها في وقت ينفع يتاخد فيه أي اجراء أو خطوة ممكنة تجاه الموقف دة، غير كدة فهيتم اعتبارها وجهة نظر ملهاش لازمة لإنها وصلت متأخر.
5) استعد للخسارة
هتعمل كل شئ ممكن علشان تعرض وجهة نظرك المخالفة لمديرك ويمكن مش يتغير شئ في الآخر، لذلك لازم تكون مستعد لشئ زي دة نفسيًا من قبلها. خسارتك في مواجهة مع مديرك مش معناها خسارة وظيفتك ولكن هتكون مجبر للتعامل مع قرار مديرك شايفه أفضل قرار على الإطلاق في حين عدم اتفاقك معاه. لو دة حصل، تعامل معاه بهدوء وحاول تفهم غرض مديرك من القرار دة عشان تقدر تتعامل معاه حتى لو مخالف ليك.
وفي النهاية، لازم تكون على يقين ان صوتك لازم يتسمع في مكان عملك وإن السير مع القطيع عمره ما هيساعد في تقدمك. خليك دايمًا متطلع على كل جوانب شغلك وأقسام الشركة وإن كنت مش مسؤول عنها أو موظف فيها، لإن دة هيساعدك في المستقبل وانت بتفتح شركتك الخاصة.