التعليم في وادي المشمش ( المجتمع الموازي )

0 289

كل سنة في ملايين بيتخرجوا من الجامعات المصرية …. وعندهم امل وطاقة انهم يشتغلوا ويعافروا ويحققوا احلامهم .. لكن للاسف بيتصدموا من الفجوة الرهيبة بين التعليم اللي درسناه في المدارس والجامعات و بين المطلوب في سوق العمل وحياة ما بعد الجامعة .

 

احنا في كل مراحل التعليم بيتم برمجتنا علي اساليب تعليمية اساسها الحفظ ومناهج عفي عليها الزمن واول ما بنحاول نشتغل بنكتشف ان المطلوب حاجة تانية خالص غير اللي درسناه .. محتاج مهارات واساليب تواكب العصر الموجودين فيه وطبعا ده زود مشكلة البطالة انك خريج جامعة ومش عارف تشتغل في مجالك .. وفيه اللي بيستسلم للوضع ويقضيها علي القهاوي والنت ومش عارف حتى يستفيد من العمل الحر من خلال الانترنت .. وفي اللي بيغير مسار حياته ويشتغل اي شغلانة مش مناسبة لمؤهله ولا مقتنع بيها لكن الظروف اجبرته انه يشتغلها وبدل ما يشتغلها مؤقت لحد ما يتطور من نفسه وينمي مهاراته ويقدر يجاري المطلوب في سوق العمل بيستسلم للظروف وللوظيفة الغيرمناسبة ليه ولاحلامه وطموحاته . وفيه اللي حظه حلو واشتغل في الحكومه لكن للاسف نقلها كل الاساليب التعليمية والمناهج اللي عفي عليها الزمن بدون اي تجديد او تطور او ابداع اتحول من طالب عنده امل وطاقة لموظف روتيني كل همه القبض في اخر الشهر .

لقينا نفسنا دخلنا في دوامة مش عارفين نخرج منها ما بين طالب مبرمج علي الحفظ و موظف مبرمج علي اخر الشهر وعاطل مبرمج علي الكافيهات والانترنت ومهندس بيشتغل سواق مع احترامنا الشديد للمهنة لكن فيه فرق انك تختار المهنة بكامل ارادتك او تحت ضغط الظروف

طيب لحد امتي هنفضل في المشكلة دي اجيال بتترمي في بحر الحياه مفيش معاهم اي وسيلة تساعدهم علي مواجهة الموج …لذا قررنا في وادي المشمش في العالم الموازي اننا نحاول نحل مشاكلنا بطريقة مختلفة وغير تقليدية ونبدأ بمشكلة التعليم وارتباطه السيئ بسوق العمل

ومن خلال تجاربنا لقينا ان العمل الحر والمشروعات الالكترونية علي الانترنت احدي الطرق لحل مشكلة بيعاني منها الكثييير في عدم ايجاد شغل مناسب لمؤهلاتهم . لكن في نفس الوقت محتاجين يتعلموا المهارات اللازمة للعمل الحر …….ومش بس كدة كمان يتعرفوا علي اهمية المشروعات الالكترونية . يعني مثلا في ناس قرأت عن المشاريع الالكترونية اللي يحققوا منها دخل مادي لكن مش عارفين يبدأوا اول خطوة . وعلي الناحية التانية في ناس نفسهم يتعلموا المهارات اللي يقدروا يشتغلوا بيها في مجال الفريلانسر مش مجرد مقالات او مشاهدة فيديوهات كثير علي اليوتيوب بتزود تشتتهم . محتاجين حاجة اكبر من كدة بين تعلم المهارات وتوظيفها في سوق العمل الحر.

وبما انكم مواطنين في المجتمع الموازي ” وادي المشمش ”  يهمنا نعرف رأيكم ورؤيتكم لحل المشكلة في الفجوة بين التعليم وسوق العمل . وايه المهارات المطلوب تعلمها والتركيز عليها شاركونا برأيكم انتم و اصحابكم وهيتم مناقشة افكاركم تباعاً

اترك رد

لن يتم نشر عنوان بريدك الإلكتروني.