ازاى تخلص مهام الـ To-DO List

0 932

كام مرة حاولت تعمل قايمة “To-Do” علشان تحقق بيها أهداف من زمان نفسك تبدأ فيها ، وبدأت تحط في القايمة مهمة بعد التانية على امل انك هتصحى الصبح وتنفذها ، ويوم ورا يوم المهمات اللي في القايمة بتزيد وللأسف لسه ما نفذتش حاجة .. و حجتك بتكون واحدة من 3 حاجات  .. قدر الكاتب “ويليام رايلي” يجمعهم في كتابه “How to avoid work ” :

“مفيش عندي وقت ” مع ان كلنا بنملك 24 ساعة !!

“مفيش فلوس ” ودي ممكن بكون عندك حق فيها ^_^

“أصحابي دول غلسين ومش عايزني أبدأ او حتى مش بيشجعوني ” وممكن تقيس على كده الاهل والزمايل

بس يا ترى الأسباب دي صح ولا احنا بدون وعي أقنعنا نفسنا بيها علشان ما نتحركش من مكاننا ؟

وعلشان تخرج من المعضلة دي ، في كاتب اسمه “جيم كولينز ” جابلك طريقة مختلفة شوية ممكن تتحايل بيها على الموضوع ، قالك ايه:

(ما تركزش على الحاجات اللي عايز تعملها ، ولكن ركز على الحاجات اللي ممكن تتوقف عن عملها ^_^)

يعني بأختصار المطلوب منك دلوقتي انك تكتب قايمة (توقف عن عمل )”Stop Doing” بدل قايمة “To-Do” ؟!

 ستيف جوبز قال ان نجاح “أبل “كان بنسبة كبيرة بسبب المشاريع اللي هم قرروا انهم ما يعملوهاش !

فـ بدل ما تحاول تعمل كل حاجة ، اختار بس الحاجة اللي تستاهل جهدك وليها تأثير أكبر ، ومن خلال معرفتك بالحاجات اللي انت مش محتاج تعملها انت بتقلل بنسبة كبيرة حجم الحاجات اللي شاغل نفسك بيها وبتشتكي منها ان انت مافيش عندك وقت ^_^

طيب ازاي تقدر تميز ما بين الحاجات اللي مفروض تعملها ومابين اللي المفروض “تتوقف” عن عملها ؟؟؟

كولينز اقترح استخدامنا لحاجة اسمها “مفهوم القنفد ^_^Hedgehog Concept” :

وهو عبارة عن انك تسأل نفسك 3 أسئلة :

ايه الحاجة اللي انت عندك شغف بيها أو متحمسلها أوي ؟

الشغف مهم لأنه بيكون المفتاح اللي بيمكنك من تحقيقي هدف معين ، فلو بتشتغل على حاجة ماعندكش شغف بيها .. كأنك بالظبط بتسوق عربية من غير بنزين ف مش هتعرف توصل للمكان اللي انت عايزه

ايه الحاجة اللي انت حاسس ان انت اتخلقت علشان تعملها ؟

كل واحد لو دور شوية هيلاقى نفسه كويس أوي و قوي في حاجة غيره مش قوي فيها ، علشان كده اختار الحاجة اللي تلائم قدراتك “المدفونة ^_^ ” اختار المهام اللي انت مرتاح معاها ، و بكده انت ممكن توفر الوقت اللي بتعاني في أداء مهام مش بتاعتك أصلا

ايه اللي ممكن تعمله علشان تكسب فلوس تعيش بيها ؟

لازم برضه تبقى واقعي ^_^ لأن مش هتقدر تحقق كتير من اللي عايز تعمله من غير ما يكون عندك قوة اقتصادية كافية ، و الأحلام هتفضل أحلام من غير ما يبقى معاك شوية فلوس ^_^ ، علشان كده لازم تختار حاجة تعملها تبني بيها قاعدتك المالية اللي ممكن تستند عليها .

(طبعا انت لو بتعمل حاجة بتجمع التلاتة دول مع بعض يبقى انت كده وصلت ^_^ )

لكن لو انت دلوقتي بتعمل حاجة او عايز تعمل حاجة ، ومش بتخدم أي سؤال من 3 أسئلة اللي فوق دول ، يبقى حطها علطول في قايمة ” Stop Doing”

ابدأ دلوقتي وفكر في كل الحاجات اللي بتخليك بائس ^_^ ، الحاجات اللي بتعملها بسبب الالتزام (طبعا ممكن نستثنى الدراسة والمذاكرة وغسيل المواعين من الحاجات دي ^_^) ، الحاجة اللي بدأت فيها وفكرت انها هتخلي حياتك أفضل بس في الحقيقة هي ما عملتش كده ، لم الحاجات دي كلها و حطها في قايمة Stop Doing” واتوقف عن عملها ^_^ وابدأ استخدم الوقت الفاضي اللي كنت بتدور عليه في قايمة ” To-Do ”

اترك رد

لن يتم نشر عنوان بريدك الإلكتروني.