دليلك للعمل الحر Freelancing #الجزء_الثاني

الصورة دي بتلخص حاجات كتير حابين نتكلم عنها النهاردة بخصوص الـ ” Freelancing ” .. و مش معني انها بتلخص كلامنا .. انه هيبقي ليها علاقة بأن #مفيش_شغل ف تنزل تبيع برتقان #بالذمة_ده_حل ^_^
كلامنا النهاردة عن العقبة اللى هيقف عندها اغلبنا و مش هيكملوا الطريق .. بعد ما عملوا account على منصة من منصات العمل الحر .. و لتكن “خمسات” اللى تطرقنا ليها فى مقالنا الاول .. بتبدأ حالة اليأس لان مفيش حد بيطلب خدماتهم
بس قبل ما نبدأ فى حالة انك مش مجمع احنا بنقول اية و يدوب شدتك الصورة .. ف دة المقال الأول .. هيوصلك كل اللى انت محتاجة : https://mshmshvalley.com/freelancing-1

ازاى تبيع اول خدمة ؟ و ازاى تزود مبيعاتك $$ ؟
قبل اي حاجة :
1- لازم تبقي مقتنع ان دة رزقك اللى ربنا قدرهولك .. يعني مفيش دولار هيضيع منك و لا دولار زيادة هيدخل جيبك .. كل المطلوب انك ” تسعي صح ” .. وتسعي صح ازاي ؟ .. فـ دي الخبرة اللى بتكتسبها مع الوقت و اللى هنقدمهالك النهاردة بشكل مبسط عشان تختصر على نفسك مشوار طويل
2- كمان لازم تبقي فاهم ان .. مفيش حاجة اسمها اربح من على الانترنت !! او دوس هنا عشان تاخد فلوس !!
انما فى حاجة اسمها ” شغل ” زي اي شغل .. الفرق انك حر .. و شغلك معاك فى اى مكان ووقت ما تحب .. و كل ما التزمت فى شغلك اكتر كل ما دخلك $$ زاد .. و فرصك بقت اكتر
3- الكلام دة مش تجربة هتصيب او هتخيب !! شباب كتير قبلك جربوا و دة بقي مصدر دخلهم .. كل اللي عليك انك تبدأ #مستعد ؟!
نرجع للصورة تاني و تعالوا نركز ف شوية حاجات كده :
أ‌- البرتقان دة منور .. تعالي نجيب 5 كيلو للعيال

هو دة اللي بيحصل فى السوق بالظبط .. اكتر من بياع .. لكن واحد فيهم بضاعتة نضيفة و عارضها صح .. ف تلاقي ستات البيوت كلهم رايحين علية

انت كمان لما تيجي تقدم خدمة هتلاقي غيرك كتير بيقدموا نفس الخدمة .. المهم انك تعرضها صح ؟
بداية من صورة الخدمة : لازم تكون جودتها عالية .. و بتعبر عن خدمتك و يفضل يكون مكتوب عليها وصف مختصر و يا حبذا لو عليها معلومات عن اعمالك السابقة ” إن وجدت “.. و دي بيكون مقاسها 680×400

** من فين تجيب صور جودتها عالية و حقوق استخدامها التجارية متاحة مجاناً ؟ تقدر تستخدم http://allthefreestock.com .. دة محرك بحث فى كل موافع ال Stock Images المجانية .
و ياسلام لو تقدر تعمل فيديو تشرح فية خدمتك و مميزاتها اللى هتديك أولوية عن غيرك ..
لحد ما توصل لوصف الخدمة و الكلام اللى هتكتبة .. لازم يكون منسق و مترتب صح زي البرتقان كده عشان العميل يعرف ينقي و يشتري
فـ البداية لازم تقدم له وصف مختصر بطريقة تسويقية للخدمة ” تعالي يا استاذة برتقان سكري من بتاع زمان “..
ثانياً تعريف بنفسك عن طريق اعمالك و دي الجزئية اللي هتخلي العميل يطمن ان الجزء الاول من الكلام مش كلام اعلانات ” اتفضلي دوقي بنفسك يا استاذة ”
و اخيراً لازم تشرحلة اية اللي هيحصل لما يشتري .. تعرفة انه هيبعتلك البيانات الفلانية و انت هتبدأ شغل و بعدين هتاخد رأية و هكذا
دة اللي هيحول الاطمئنان لقرار شراء مباشرة 🙂
ب‌- حط البرتقان فى شنطة الاول
هيبقي اية شعورك لما تقول ل بياع عاوز 5 كيلو برتقان و يقولك 15 جنية يا أستاذ قبل ما يوزنهم حتي !!
عشان كده.. لازم تخلص شغلك و تتأكد ان العميل راضي عن الشغل .. و لو فى اعترضات حاول تقدملة تعديلات قبل ما تسلم الخدمة و متقلقش على فلوسك .. منصات الخدمات المصغرة زي “خمسات” بتقوم بدور الوسيط الحيادي يعني حقك و حق عميلك مضمونيين .
لية تتعب نفسك و ترضي العميل و تشتغل على التعديلات ؟!
لان دة حقه عليك 🙂 و بما انك بتراعي ربنا و حقوق الآخرين .. ف العميل هيحس ده و هيرجع يشتري منك تاني بدون تردد لو احتاج الخدمة .. الاهم انك هيديك ” تقييم ايجابي ” .. و دة اللى هيخلي العملاء اللى بعده يشتروا منك وهم مغمضين ” لانك حد ثقة ” و من هنا تبدأ تبني سمعة و شهرة ” فاكر الجزئية دي .. ارجع للمقال الاول لو مش فاكر اهميتها ”
ج- حضرتك فكهاني و لا بياع برتقان
يعني الناس تقول عليك فكهاني كويس و سكان الشارع يتعاملوا معاك !! و لا الناس تقول : ان عندك برتقان مش عند اي حد .. و العملاء بتوعك يبقوا من كل حتة
صراحة مفيش اجابة اصح من التانية .. المسألة كلها مرتبطة بفكرة تخصصك فى مجال محدد .. و ليكن ” تصميم الشعارات Logos Design ” .. أو .. تقديمك لاكتر من خدمة ملهمش علاقة ببعض
لكن بناء على تجربة الكثيرين ف ” التخصص” افضل على المدي البعيد .. لانك بتبني قاعدة من العملاء الثابتين و بيبقي فيهم نسبة كبيرة من الشركات بجانب الافراد اللى بيعتمدوا عليك كـ موظف بشكل غير مباشر فى تخصصك
لو بصيت فى الصورة هتلاقيه عارض مع البرتقان .. يوسفي ” يوستفاندي ” 🙂
ياتري احتمالية انك تشتري ” يوستفاندي ” مع البرتقان اكبر .. و لا انك تشتري ” تفاح ” مع البرتقان اكبر ؟!!
ببساطة الاتنين بيكملوا بعض .. و الاتنين مرتبطين بالشتا و بالسقعة … طيب اية رأيك ان بردو الخدمات في منها المترابط !
يعني دلوقتى انت بتقدم خدمة تصميم شعارات Logos .. فى بالك كده اللي اشتري منك logo جديد هيحتاج اية معاه ؟!!
بالظبط كده .. هيحتاج يصمم ( كارت شخصي .. هيحتاج يصمم ID’s للموظفين .. هيحتاج يصمم بروشور او فلاير .. )
طيب بفرض انك عارض خدمة ” ترجمة ” !!!!!! اية احتمال ان نفس العميل يشتريها منك ؟
احنا لية بنتكلم عن نفس العميل ؟ لانك ببساطة كسبت ثقتة و مش هيبقي متردد ف انه يشتري منك تاني ” زودت مبيعاتك $$ ” و يديك تقييمات ايجابية على خدمات اكتر ” عملاء اكتر مع الوقت ”
د- قشر له يوستفانديايه
الخدمات المترابطة اللى اتكلمنا عنها فى النقطة اللى فاتت .. ممكن ميكنش عميلك محتاجها حالياً | او | معندهوش فكرة انك بتقدمها .. عشان كده ممكن بعد ما تخلص شغلك تعرضها عليهة بشكل بسيط و يا سلام لو تديلوا مع العرض دة واحدة من الخدمات دي هدية .. بعيداً عن انهم زي ما بيقولوا ف علم التسويق ” هتتخطي توقعاته ” او بمعني تاني هتبسطة  .. انت هتخلق عنده قرار بالشراء .. حتي لو مكنش محتاجهم حالياً
هـ – ال 3 ب 10 يا برتقان
خلصت الشغل اللي وراك ؟؟ طيب فى شغل تاني بسيط .. لازم تقوم تسوق لنفسك و تعرفك اللى حواليك بخدماتك
متكتفيش بالعملاء اللى بيجولك بشكل مباشر من منصات العمل الحر .. اسعي انك تجيب عملاء اكتر .. و بالطبع اقصر الطرق و ابسطها ال Social Networks .. الفيس بوك و تويتر .. تقدر تستغلهم فى نشر لنكات و معلومات عن خدماتك
احنا كده خلصنا كلام عن خدمتك و عن ازاي تعرضها بذكاء عشان تحقق مبيعات .. الكلام اللى جاي بعد كده هيبقي خاص بيك انت .. لانه علي الرغم من انك اتعلمت السواقة الا انك لسه مجربتش تسوق وسط عربيات و الطريق طويل .. لكن لا تقلق احنا مكملين معاك لحد ما توصل ان شاء الله عن طريق سلسلة المقالات اللي هننشرها كل يوم أتنين و خميس على ” وادي المشمش ”

http://www.facebook.com/mshsmshvalley
https://www.mshmshvalley.com