تعليم اللغة اليابانية مجاناً

3 213

مينفعش نبدأ ال post ده بهزار .. لان الناس اللى هنتعلم لغتهم النهاردة ناس جّد و الهزار عندهم بحساب .. فلو حابب تتعلم ياباني لازم تكون زيهم ^_^

اللغة اليابانية ..لغة مُهمة جداً و آفاقها واسعة و هتهيألك فرص كتييير جداً إنت مكنتش تتوقعها , ابسطها .. إنهم كانوا عاملين منحة للدراسة في اليابان للطلبة المصريين , و كان من ضمن شروطهم إن المُتقدم يكون معاه ع الاقل اساسيات اللغة

شوف بقي كام واحد (من ضمنهم أنا) ضاعت عليه الفرصة دي بسبب إنه مكنش عارف ياباني !

برغم إنها لغة زي أي لغة , ليها صعوباتها و سهولتها , مفيش لغة صعبة في المطلق ولا سهلة في المُطلق .

أهم حاجة إنك تنوي و تستعد و تحدد هدفك , اللغة دي مُفيدة بجد في كل المجالات , سواء طب و لا هندسة – صيدلة – علوم – آداب – تاريخ .. لأن اليابانين ما شاء الله ما سابوش حاجة معملوهاش

ع الاقل يكون معاك اساسايتها عشان لو جت فرصة زي اللي فاتت دي , تلحق لك مكان

——————————————————————————————
هنتفق ع حاجة كدا تخص اللغة اليابانية , الكتابة اليابانية بالخصوص و هي انها بتنقسم لتلات اقسام
hirgana-1
و دي للمبتدئين و بيها بينطقوا أغلب الكلمات بيها , خاصة الكلمات اليابانية الاصلية .. و هي أسهل الانماط
katakana-2
و دي أعلي مستوى شوية , بينطقوا بيها الكلمات الاجنبية اللي تم وضعها في اللغة اليابانية ..
فـ مثلا هنقول : انا استخدم الكمبيوتر .. فالكمبيوتر دي كلمة : كاتاكانا ..لانها مش اصلية في اللغة اليابانية..
هما بيقولوا عليها الـAmericanized japanese

kanji-3
و دي اعلى المستويات , و بتُستخدم للكلمات كلها ..و هي اصعب التلاتة ..:
ع العموم , الكُل بينصح انك تتعلمي الكانجي في الاخر خالص ,
يبقي كدا إحنا هنشتغل في الكتابة علي تلات مراحل .. مرحلة الهيرجانا و مرحلة الكاتاكانا و الاخيرة هي الكانجي ..

و هنا أشمل المواقع اللي لاقيتها :

japanese pod101 : http://www.japanesepod101.com/index.php
( دا موقع مشهور و شامل جداً لتعليم الياباني , فيه كل مستويات اللغة من الابتداء حتى الاحتراف , و فيه كل حاجة سواء كتابة او نطق او قواميس و قواعد )

NIHONGO Master ( learn Japanese online ) : http://www.nihongomaster.com/
( دا موقع راائع و مُمتع جداً لتعليم اليابانية , بتقدر فيه تتعلم الكتابة و القراءة اليابانية و تدخل في مسابقات مع ناس تانية و تكون فريق مع اصاحبك و تحرز نقط , باختصار : التعليم المُمتع .. و للناس اللي مش عندها وقت و دايماً برّا , الموقع عامل تطبيق للموبايلات ..و كمان جوّا الموقع قاموس ياباني – إنجليزي )

Japenese lesson: http://japanese-lesson.com
( موقع كويس لتعليم الياباني و خاصة الحروف ( انت هتتعلم الهيراجانا ) – هتلاقي عندك اربع مربعات كبيرة , مربع خاص بالمصادر بتاعة اللغة و مربع فيه تعلّمل الكتابة و منها – زي ما اتفقنا – هتختار ( الهيرجانا) لأنك لسه مُبتدأ و خلّصها و خشّ ع اللي بعدها اللي هي الكاتاكانا , و انتهي اخيراً بالكانجي ..و فيه هناك شييت عشان تدرب ع الكتابة.و المربع التالت هو بعض المُحادثات اليابانية الاساسية و الاخير هو الكلمات الرئيسية )

Genki : http://genki.japantimes.co.jp/self_en
( الموقع دا بيشرح لك التلات أنماط و بعدين الجرامر و الكلمات و في الآخر بعض المُحادثات )

JLPT practice : http://www.jlpt-practice.com/Downloads/Default.aspx
( شوف , هنا إنت هتنزل الملفات البي دي إف و الاوديو و تتعلم بقي .. و بردو هنا لتعليم انماط الكتابة التلاتة بالتفصيل )

erin ne : https://www.erin.ne.jp/en/
( دا موقع فكرته جميلة جداً , و هي إنك هتتعلم الياباني من خلال الفيديوهات الحيّة .و هي فكرة رائعة جداً و بتربطك باللغة اكتر )

Tamatamako : http://ookoch.seesaa.net
( و دا كمان موقع كويس جداً كمان بيعلم الياباني بالرسم الانيميشن )

قد يعجبك ايضا المزيد عن المؤلف

3 تعليقات

  1. عبدالله يقول

    هوكله انجليزي كده؟

  2. Eman يقول

    ربنا يكرمك فعلا على المقال المفيد ده

  3. كريم حمزة يقول

    انا عندي سلسلة pimsiluer لتعليم اللغات ودي صوتية
    ممتازة جدا وبتعلم منها ياباني حاليا
    لو حد حابب الكورس يبعتلي

اترك رد

لن يتم نشر عنوان بريدك الإلكتروني.