The power of habit قوة العادة

0 473

في بحث اتنشر فـ 2006 .. كان بيأكد ان اكتر من 40% من التصرفات اللي بنقوم بيها يومياً هي في الحقيقة مش قرار بتاخده علشان تعمل التصرف ده وانما هي عادة بتحصل لوحدها !

ليه بقى ؟ علشان الدماغ لما بياخد باله انك ابتديت تعمل حاجة باستمرار بيبدأ يحولها لنظام عمل تلقائي علشان يوفر طاقته وتفكيره لحاجة تانية ويبدأ يخرج من مرحلة القرار لمرحلة رد الفعل

فاكر أول مرة كنت بتسوق عربية وازاي كنت مركز جدا في السواقة فين الفرامل والبنزين وازاي ترجع لورا وازاي تركن ، دلوقتي بقيت بتعمل الحاجات دي كلها وانت بتكلم اللي جنبك

و مع ان دماغك ذكي وبيقدر انه يحول الحاجات اللي بتعملها بتكرار وبعد فترة من الزمن لفعل لاشعوري وبتبقى زي شفرة وتتسجل جوه مخك (زي الطيار الالي كده) لكن مشكلته انه مش بياخد باله ياترى الحاجة اللي بتعملها دي كويسة ولا لأ !! و بيسيب المهمة دي لعقلك الواعي وارادتك ومن هنا بيدأ اكتساب العادات السيئة

والعادة وهي بتشتغل بتمر ب3 مراحل”زي حلقة كده “:

1- الدليل: الاشارة اللي بتخلي مخك يتنقل للوضع الالي علطول و تبدأ في العادة مثلا وقت معين “اول ما تصحى الصبح “مكان معين ، حالة انفعالية معينة “اتنرفزت ,زهقت “،اوغيره

2-امر روتيني : وهو ممارستك للعادة نفسها (اللي اول ما مخك بيحس بالاشارة بيبتدي فيها علطول من غير ما يديك الفرصة انك تاخد القرار)

3-المكافاة :الجايزة او الشعور اللي بتعمل العادة علشان تحس بيه وده اللي بيساعد المخ ياترى يفتكر الحلقة دي ولا لا

ويبدأ يزيد “الدوبامين” اللي بيفرزه دماغك علشان تحس بالسعادة

أمثلة على كده :الدليل- الروتين – المكافأة

بداية السنة – وضع الخطط – شعور بالانجاز حتى لو منفذتهاش “بس يكفي شرف المحاولة ^_^”

اتنرفزت- شربت سجاير – مزاجك اتظبط (خالي بالك صعب انك تقيس الحد الفاصل مابين العادة والادمان )

زهقت من المذاكرة – دخلت على الفيس “ساعتين تلاتة “- ريحت ومستعد تكمل مذاكرة

ازاي بقى نتخلص من عاداتنا السيئة دي ؟

بص هو صعب انك تمسح عادة سيئة عندك لكن ممكن تغيرها :

الدليل والمكافاة القديمة هتفضل زي ماهي لكن “الفعل الروتيني هو اللي هيتغير ”

طبيعي انك بتتنرفز وعايز مزاجك يتظبط اعمل زي ما الرسول (صلي الله عليه وسلم ) قال “غير مكانك ،اتوضا ، صلي”بدل ما “تشرب سجاير”

زهقت من المذاكرة وعايز تريح “العب شوية رياضة ،روح على المطبخ وكل حاجة بتحبها ،روح غلس على اخواتك ^_^ “، بدل ما “تدخل على الفيس” .. للعلم الرياضة والاكل من الحاجات اللي بتزود الدوبامين جداً

الكلام اللي فات ده بقى مدعوم بتجارب على المخ ودراسات فريق في MIT عملها لما بدأ يدرس موضوع العادات

والتجارب دي مع الخطوات اللي ممكن تشتغل عليها علشان تغير أي عادة هتلاقيها في كتاب أعتقد انك لازم تبدي بيه السنة الجديدة وهو “قوة العادة (The power of habit)” والحلو فيه اني اللي كاتبه صحفي وبالتالي هتلاقي أسلوبه سهل جدا

ونيجي بقى لأبليكشن هيساعدك جدا ان تكون عادات كويسة جديدة (تلعب رياضة،تقلل وزنك… ) اسمه “Fabulous” الapp ده رائع لانه أولا بيخليك تختار العادة اللي عايز تبتدي بيها ويمشي معاك خطوة خطوة علشان تمارسها عن طريق تنبيهات يبعتهالك وتحديات وايميلات بتفهمك اهمية العادة دي وبتأثر ازاي عليك ومش بيخليك تبدأ في عادة جديدة الا بعد فترة اما يتاكد انك بتداوم على العادة الأولانية

https://play.google.com/store/apps/details?id=co.thefabulous.app&hl=en

اترك رد

لن يتم نشر عنوان بريدك الإلكتروني.