إزاي تبيع مشغولات يدوية أونلاين و تحقق ارباح تصل لـ 1000 دولار شهرياً

تعرف موقع إيباي ebay ؟.. طب تعرف كام مليون شخص بيدخل الموقع كل شهر؟
موقع إيباي ebay هو أكبر موقع مزادات على الإنترنت، بيمثل دور الوسيط بين البائع والمشتري، بيدخل الموقع اكتر من 113 مليون شخص شهرياً، و متاح لأي شخص إنه يعرض منتجه ويبيعه من خلاله، ومتاح لك أنت كمان إنك تبيع مشغولاتك اليدوية أو تحف موجودة عندك لأي شخص في العالم ويبقي مصدر دخل شهري لك.

 إشمعني المشغولات اليدوية والتحف؟
مع إنك تقدر تبيع أي حاجة على موقع إيباي ebay إلا إن المشغولات اليدوية والتحف من أحسن الحاجات الى ممكن تبعها على ebay عشان سببين مهمين جدا

أول سبب: أن الطلب على الHandmade والتحف عالي جداً في المواقع إلى زي إيباي.
تاني سبب: إنك مهما زودت في ثمن منتج من المشغولات اليدوية أو تحفه قديمة الناس برضو بتشتريه لأن المشغولات اليدوية والتحف بتكون ليها قيمة كبيرة عن المنتجات التانية، وده هينفعك جدا قدام.

طيب أنا ما بعرفش اعمل مشغولات يدوية ومش محتفظ بأي تحف؟
مش مهم.. أنت ممكن تروح لأي حد بيعمل مشغولات يدوية أو تروح لمحل بيبيع تحف قديمة وتختار منتج تبيعه على ebay وتتفق معاه إنك هتصور المنتج ده إلى عنده وترفعه على الموقع ولما حد يطلبه من الموقع تبقي أنت تشتريه منه، وبكده تكون نفعت وإستنفعت من غير ما تصنع أنت حاجة بإيدك.

طيب أنا محتاج إيه عشان ابدأ؟
حضرتك مش محتاج غير حساب على إيباي عشان تبدأ تبيع. وماتقلقش بالنسبة للتسويق لأن زي ماقولتلك الموقع بيدخله أكتر من 113 مليون شخص شهرياً، يعني زبونك هيجيلك لحد عندك.
وحساب PayPal باي بال عشان تقدر تسحب أرباحك من الإيباي.

إيه هو ال PayPal؟
الباي بال PayPal عبارة عن بنك بس إلكتروني تقدر تشيل فيه فلوسك وتعمل إيداع أوسحب زي أي بنك حقيقي على أرض الواقع.

ليه باي بال بالذات؟ لإن بنك باي بال مملوك بواسطة موقع إيباي نفسه إلى بيحول أرباح مبيعاتك على باي بال فقط ولازم عشان تقدر تسجل في موقع إيباي يكون عندك باي بال، يعني زيتهم في دقيقهم.
بالنسبة للباي بال عشان تقدر تستخدمه وتسحب منه أرباحك لازم يكون متفعل، ودي النقطة إلى أغلب الناس بتقف عندها، لكن أنا هدلك على طرق بسيطة تقدر تفعل بيها حسابك على الباي بال.

طيب إزاي هبدأ أبيع المنتجات على إيباي؟
أنا هقولك إزاي.. في الأول بعد ما تسجل حساب على إيباي متاح لك ترفع من 5 ل 10 منتجات فقط على الموقع وبعد أول كام مبيعة العدد ده بيزيد. طريقة رفع المنتج بسيطة جداً وفي فيديوهات كتير على اليوتيوب بتشرح طريقة رفع الامنتج على الإيباي.

طيب إفرض حد من أمريكا حب يشتري المنتج بتاعي؟

طبعاً ده إلى هيحصل، ماتستناش أن حد من المنصورة مثلاً يشتري المنتج بتاعك، الناس إلى هتشتري منتجاتك هتكون كلها من بره مصر، فده هيخليك تضطر إنك تشحن منتجك لبره مصر، والطريقة الوحيدة الي تقدر تشحن بها لبره مصر هي Fedex أو Dhl. والشحن بيكون بعد ما المشتري بيطلب المنتج من الموقع ويدخل بياناته زي الإسم، العنوان، والبلد وأنت بتاخد البيانات دي والمنتج وتروح لشركة الشحن وتدفع لهم تكاليف الشحن، وبكده تكون شحنت المنتج بره مصر للمشتري.

طيب وتكاليف الشحن هتكون عليا أنا؟

فاكر في أول المقال لما قولت لك أن المشغولات اليدوية والتحف هي أحسن حاجة ممكن تبيعها على إيباي لأنك ممكن تزود في ثمنه وتتباع برضو، أنت طبعا مش هتزود في ثمنه لمجرد الزيادة أو بسبب الطمع، أنت هتزود ثمنه حسب تكاليف الشحن للمشتري، وتكتب على المنتج أن الشحن مجاني وبكده تتضمن أن المنتج يتباع، لأن الناس هتشوف المنتج إنه مش هيكلف هم مصاريف شحن، وبكده تكون أنت ماصرفتش حاجة من جيبك لأن فلوس الشحن هترجعلك تاني مع الأرباح.

بالنسبة لفلوس البيع بتقدر تستلمها عن طريق الباي بال بعد 15 يوم، لأن الموقع لازم يتأكد أن المنتج وصل للمشتري أنه مافيش أي مشكلة أو عيب في المنتج، وبعد ال 15 يوم بتقدر تسحب فلوسك كاش من الباي بال.

 

طريقة إنشاء حساب باي بال وحساب إيباي وربطهم معاً
https://www.youtube.com/watch?v=otS1fYQcAvQ

طريقة رفع منتج للبيع على إيباي
https://www.youtube.com/watch?v=PUKkABh8rng

دورة صغيرة عن طريقة تحضير المنتج للشحن
https://www.youtube.com/watch?v=4tk2FXhsl7k&list=PLmab2vvMHti1wESrRFYW9eGVr32XqLCtQ&index=4

شرح خيارات الشحن في إيباي
https://www.youtube.com/watch?v=AHvaa98GX0w