ايه الفرق مابين صلاح ومابين شيكابالا غير الفرق اللى كل الناس عارفاه ^_^
صلاح واحد من انجح اللاعبين على مستوى العالم اللى قدر يحقق ارقام ونجاحات فى موسم واحد وده يرجع لسبب معين !
بس خلينا الاول نقول الفرق مابين صلاح وشيكابالا وناس كتير هتستغرب من الكلام اللى هقوله
لو بصينا للناحية الفنية هنلاقي ان شيكابالا لاعب مهارى وفنى اكتر من صلاح
نعم ؟؟؟ انت بتقول ايه ياعم ؟؟؟
ايوة اللى بيتفرج على كورة ومتابع هيعرف ان شيكابالا لاعب مهارى من الطراز الاول كمان
واحد بقى ييجى يسالنى .. طب لما هو افضل وامهر من صلاح ليه محققش حاجة من اللى حققها صلاح ؟؟
هو ده السر اللى عند صلاح مش عند اى لاعب تانى موجود فى الدورى المصرى
وهيا ان صلاح بيشتغل على نفسه وبيتمرن لوحده بالاضافة لتمرينه مع الفريق
نعم ؟؟
يعنى عشان كدا بقى من افضل لاعيبة العالم
مش مصدق .. صح ؟
خلينى اقولك ان صلاح طور مهارة عنده وبفضلها اصبح “مو صلاح” العالمى
وهيا مهارة الجرى
تعرف ان صلاح حاليا اسرع تالت لاعب فى العالم بعد ميسي وجارث بيل ؟
صلاح قدر يطور النقطة دى عنده مع تعلم شوية مهارات معينة تساعده فى لعبه
معظم اللى اتعلمه مكانش حد بيعلمهوله
هو كان بيشتغل على نفسه كتير لحد ماوصل
وده بيوصلنا للى انا عايز اتكلم فيه النهاردة وهو
**التعلم الذاتى** واللى بيسموه ال SELF STUDY
الموضوع مش صعب زى ما ناس كتير متخيلة .. الموضوع سهل جدا
وعشان اثبتلك انه سهل
خليك معايا لحد الاخر وابقى احكم بنفسك
وفى الاخر هتقولى بنفسك انه سهل
وخليك فاكر
واحد يقولى ايوة يعنى نعمل ايه
بص فى البداية اى حد عايز ينجح ويوصل لازم يشتغل على نفسه
وده اللى بنسميه التعليم الذاتى
علم نفسك بنفسك
يحضرنى قصة لسيدنا مالك ابن انس انه فى مرة باع الخشب بتاع سقف بيته عشان يتعلم
تخيل ؟؟؟؟
واللى ميعرفش مين هو مالك ابن انس فهو من ألقابه (شيخ الاسلام وحجة الامة وامام دار الهجرة ومفتى الحجاز وسيد الائمة )
سيدنا مالك ابن انس موصلش لكل ده بسهولة … ده واحد باع السقف بتاع بيته عشان يتعلم !!!
انت متخيل ؟
هو ده اللى بيسموه الشغف للعلم
الشغف اللى بيخليك تجرى عشان تتعلم الحاجة اللى بتحبها
ودى حاجة لازم تكون فيك لو انت ناوى تتعلم اى حاجة مع نفسك
عملية التعليم الذاتى بتتمثل انها بيكون فيها شوية ملل ورتابة
فعملية الشغف للحاجة اللى بتتعلمها هيا اللى هتخليك توصل
دايما خليك باصص على هدفك ..
تعالى اقولك استراتيجية لطيفة تساعدك انك تعلم نفسك بنفسك
لما تيجى تتعلم اى حاجة
متتعلمهاش كلها مرة واحدة
دماغك هتسيح
قسمها اجزاء صغيرة واتعلم كل حاجة لوحدها
و لما تخلص الجزء متدخلش على الجزء اللى بعده
لأ !
لازم تمارسه الاول عشان يثبت فى دماغك ويكون شيء ثابت فى عقلك
مثلا لو انت بتتعلم انجليزى لوحدك واتعلمت مثلا ازاى تنطق
متدخلش على اللى بعده الا لما تمارس النطق كتير
ابسط حاجة ممكن تعملها
تمسك تليفونك الجميل وتقعد تتكلم وتسجل لنفسك
انت كدا بتعود لسانك على النطق
وبعدين ابقى خش على اللى بعده
انت كدا بتسهل على نفسك
شوفت سهلة ازاى
تانى حاجة فى عملية التعليم الذاتى انك تعمل خطة وتمشي عليها
بس زى ما احنا عارفين كلمة خطة بتتعب الناس ازاى
وتقريبا معظم اللى بيعملوا الخطط مش بيمشوا عليها
ماهو انت برده لازم تكون ذكى
خلى الخطة فيها مرونة اكتر ماهى بتضغط بيها على نفسك
يعنى مثلا لو انت مخصص ساعتين فى اليوم تتعلم فيهم
مش لازم يعنى تخلى الساعتين ورا بعض على طول
قسمهم ياسيدى ساعة وساعة
برده انت كدا بتسهل على نفسك
معلومة حلوة سمعتها وانا نفسي طبقتها مؤخرا
لو انت بتقرا كل يوم ربع ساعة فى المجال بتاعك فانت بتعمل فرق شاسع مابينك وبين ناس كتيرة شغالة فى المجال بتاعك
يعنى مثلا انا واحد من الناس اللى شغالة CONTENT CREATOR
لقيت انى فعلا لما بقرا فى المجال بتاعى ولو ربع ساعة بس يوميا لقيته انه بيفرق معايا جامد عن ناس كتيرة
انا عارف انى طولت عليكم .. بس الموضوع فعلا يستاهل
انت مش هتوصل لهدفك غير بالتعلم الذاتى
لازم يكون عندك المهارة دى
ولو مشيت باللى قولتلك عليه
الموضوع هيكون سهل
لا هو فعلا الموضوع سهل بس احنا اللى بنحب ناخد كل حاجة بصعوبة
وفى النهاية هقولكم اخر طريقة وهي حلوة جدا
وهيا ان الحاجة اللى تتعلمها حاول تشاركها مع الناس وتعلمها لغيرك
وبكده عمرك مهتنسي اللى اتعلمته ابدا
ممكن نخلص عملية التعليم الذاتى فى 4 حاجات بس :
– قسم الى عايز تتعلمه
– مارس اللى اتعلمته
– اعمل خطة وخليها مرنة
– شارك مع الاخرين
بس ياسيدى
صدقت انها سهلة ؟
شاركونا بارائكم حول الموضوع وهل فيه ناس استخدمت التعليم الذاتى في انها تطور نفسها ولا لا ؟