بتحب الأحياء وفروع التكنولوجيا الحيوية والهندسة الوراثية .. وفي نفس الوقت مهتم بعلوم الكمبيوتر والهندسة والتصميم
يبقى أكيد علم الأحياء الاصطناعية “Synthetic Biology” هيعجبك لانه حقل مبتكر وجديد بيجمع العلوم اللي فوق دي كلها
علشان يخلق أدوات مفيدة ممكن نحل بيها مشاكلنا ، وعلشان نفهم الموضوع أكتر تعال نبتدي الموضوع من الاول
كل الكائنات الحية بتحتوي على مجموعة من التعليمات اللي بتحدد شكلها ووظيفتها ، وكل التعليمات متشفرة في الحمض النووي “DNA “بتاع الكائنات واللي هو عبارة عن سلاسل طويلة ومعقدة من الجزيئات الموجودة في كل خلية حية،والتعليمات المتشفرة دي اللي بنسميها الشفرة الوراثية للكائن او “الجينوم “genome
الفكرة بقى ان البشر من زمان وهم بيغيروا الشفرة الوراثية للنباتات والحيوانات من خلال انهم يربوا ويزرعوا سلالات معينة
بينقهوها بناء على المميزات بتاعتها . ومع الوقت اللي شغالين في مجال التكنولوجيا الحيوية اتعلموا انهم يقروا “الشفرة” دي و يتلاعبوا فيها ، وبدأوا ياخدوا المعلومات الجينية المسئولة عن بعض الخصائص المفيدة في كائن ويضيفوها لكائن تاني ؛ وده كان أساس “الهندسة الوراثية ” واللي سمح للباحثين انهم يسرعوا عملية تطوير سلالات جديدة من النباتات والحيوانات .
ده وعارفينه ، ايه بقى الجديد ؟
الجديد ان العلماء قدروا يصنعوا سلاسل جديدة من الحمض النووي من الصفر ، يعني مش مجرد دمج أو تلاعب ، وده عن طريق انهم استفادوا من التطورات المهولة في مبادئ الهندسة الحديثة واستخدموا الكمبيوتر مع المواد الكيميائية وبدأوا يصمموا كائنات حية بتعمل حاجات جديدة زي مثلا : الوقود الحيوي ، منتجات بتفرز عقاقير طبية وهكذا ، وده بقى اللي “Synthetic Biology” بنعتبره جوهر علم الاحياء الاصطناعية برز مع بدايات القرن ده ، واستخدم الاحتمالات المتزايدة في قراية وكتابة الحمض النووي في تصميم
وتركيب خلايا ونظم بيولوجية بوظايف ماكنتش موجودة قبل كده في الطبيعة وبالتالي بيقدملنا خيارات جديدة للابتكار في مجالات زي الرعاية الصحية وانتاج المواد وموارد الطاقة المستدامة (مستدامة يعني هتفضل موجودة للاجيال الجاية ) ، وبكده العلم ده كتير بيعتبره تكنولوجيا المستقبل واللي ممكن يكون بالنسبة لنا دلوقتي زي ماكان ظهور الكمبيوتر في الستينات
لو حابب تعرف عن الموضوع أكتر وعايز تعرف الطرق اللي بيتم بيها برمجة الكائنات والنظم البيولوجية علشان تأدي مهام
“Principles of Synthetic Biology” معينة ، يبقى ادخل خد الكورس ده
الكورس بيقدمه معهد ماساتشوستس للتقنية ، MITالكورس بدا يوم 14 فبراير هيستمر لمدة 14 اسبوع بمعدل من 8 ل 9 ساعات فى الاسبوع :
https://www.edx.org/course/principles-synthetic-biology-mitx-20-305x-0
اما لو عايز تشوف الموضوع من بعيد باختصار ببعض التخوفات اللي حواليه الفيديو ده هينفعك :
https://www.youtube.com/watch?v=rf5tTe_i7aA
أوتشوف استخدامات العلم ده في مجالات مختلفة ممكن تختار أي فيديو من المواضيع دي على TEDوتتفرج عليه :
https://www.ted.com/topics/synthetic+biology
ملحوظة كده على الماشي ^_^ :
الكورس ده لو نزلت تحت في صفحة بدايته عن الأسئلة الشائعة هتلاقي مكتوب “لسوء الحظ، فإن المتعلمين من( إيران) لن
يكونوا قادرين على التسجيل في هذه الدورة.فبينما تلقت EDXتراخيص لتقديم دورات للمتعلمين من هذه الدول، لكن
الرخص التي لدينا لا تغطي هذه الدورة. EDXتأسف حقا أن العقوبات الأميركية تمنعنا من تقديم كل من دوراتنا للجميع،
بغض النظر عن المكان الذي يعيشون فيه.”
تستفيد بقى من الكلمتين دول بايه ، ان لو انت شايف ان الكورسات دي رفاهية ، ويا عم احنا فين وهم فين واما حال البلد
يتعدل نبقى نفكر في الذكاء الاصطناعي او الاحياء الاصطناعية او الحاجات اللي قاعدين تدوشونا بيها ^_^ ، للاسف ممكن
بعد شوية الكورسات دي والعلم نفسه مش هيبقى متوفرلنا أساسا ، وده مش بعيد انه يحصل في ظل الظروف السياسية اللي
شايفنها حوالينا ، يعني من الاخر كده ممكن يبقى في دول تانية عليها الدور بعد ايران
