لية ماجستير أدارة الأعمال MBA ؟

4 7٬561

و الله انا مش عارف الدوشة اللى انتوا عاملينها دى كلها على ايه !! اعمل اية ب ماجستير أدارة الأعمال MBA حتي لو #مجاناً مش ب 40.000 الف جنية .. كلها كورسات و شهادات و حبه ورق بيتركن ع الرف .
انا ايه اللى يجبرنى اتعلم من اول و جديد و اتعب نفسى و انا عارف الدنيا ماشيه ازاى ! و الناس طول عمرها بتشتغل كدا من غير شهادات ولا غيره. و على رأى المثل #من_فات_قديمه_تاه =D
هقولك يا سيدى ان ال MBA دى مش لأى حد ، دى للناس اللى تقدر تثبت انها #قد_التحدي
بردوا مش فاهم ؟ هفهمك =D
ركز معايا كدا .. دلوقتى هشرحلك 5 أسباب تخليك تاخد الMBA هتفهمك الدنيا و بيتهيألى بعد ما تخلص المقال دا هتقوم تبدأ ال MBA على طول =D
1- مرتب أعلى
حضرتك تعرف ان مرتب الشخص الحاصل على MBA بيبقي اعلى بكتير من مرتب شخص تانى حاصل على شهادة ماجيستير عادية !! تقريبا الفرق دا في المرتب يوصل للضعف !! ده غير التأمينات الاجتماعية و الصحية.. يعنى ظروف شغل احسن بكتييييير من اللى بتوفرهولك شهادة الماجستير العادية او اى شهادة تانية.
2- فرص شغل أحسن
طبيعى.. طالما هتقبض احسن يبقى هتشتغل في منصب أعلى =D
و ده اللى بتوفرهولك ال MBA ، لانها بتأهلك انك تترشح لمناصب ادارية كبيرة بغض النظر عن الخبرة و ده طبعا لان معاك مؤهل عالي.
الاحصائيات بتقول ان 70 % من الحاصلين على ال MBA بيشغلوا مناصب كمديرين تنفيذين او أعضاء مجلس إدارة.
طبعا منصب أعلى معناه مسؤولية اكبر و ساعات عمل أطول.
من الاخر ، سواء انت عايز تتحسن في شغلك او تبتدى في مجال جديد في منصب قوى، يبقى عليك و عال MBA ^_^
3- تكوين علاقات عمل قوية
كطالب MBA ، بيبقى عندك فرصة كويسة اوى علشان تكون علاقات تساعدك في مجال الBusiness.
من خلال دراستك بتقدر انك تكون علاقات كويسة مع زمايلك “مديرين مستقبليين” ، دكاترة و محاضرين “غالبا بيبقوا ناس شغالة في مجال الBusiness او اشتغلت فيه قبل كدا و عندهم خبرة عالية جدا”.
و طبعا بما ان برنامج الMBA ده اونلاين، فبالتالي انت عندك وقت كويس اوى انك تشتغل وظايف صغيرة او تدريب في نفس المجال ، من خلالها تكون علاقات كويسة مع مديرين الشركات و الموظفين.
طبعا العلاقات دى بتخليك على معرفة كويسة بكل جديد في مجال الBusiness ، و بيبقى اسهل بالنسبالك الحصول على الفرص الجديدة.
4- اكتساب خبرة ومعلومات جديدة
ممكن انت بقى تستهين بالنقطة دى =D و تسألنى سؤال ذكى و تقولى هو مش دا المفروض ان اى برنامج نعليمى بيعمله ؟
تمام انت صح. بس غالبا اللى بياخدوا ال MBA بيبقوا خريجين جداد و خبرة قليلة “سنتين او تلاتة”. او ساعات حتى بياخدها موظفين كبار اللى بيبقوا عايزين يطوروا من نفسهم.
بعد حوالى سنتين من الحياة المهنية، الانسان بطبعة بيبتدى يكتسب طبيعة تكرارية، و ركود في اللى بيسموها ال comfort zone ، من غير اى رغبة في تطوير الذات او تعلم حاجات جديدة.
و ده بيجاوب على سؤالك اللى في الأول: ليه اتعلم حاجة جديدة لما ممكن اخلينى في اللى انا عارفه ؟
دراسة الMBA في حد ذاتها بتدفعك انك تخرج من ال comfort zone بتاعتك دى، تتعرف على اجدد المواضيع، و تتطبق اجدد طرق و تقنيات الاداره و تفضل باستمرار في تحدى مع نفسك.
و داب يستمر حتى بعد ما تخلص. و دا لان ال MBA بتوفرلك القنوات اللى تقدر من خلالها تعلى مستوى التحدى و تخليك تتطور من نفسك باستمرار.
5- تكوين نظرة شاملة لعالم الأعمال
زى ما قنا قبل كدا ، و انت بتدرس ال MBA بتبقى جزء من شبكة كبيرة من المحترفين و الشركات، و بتحاول باستمرار انك تطور من نفسك باجدد طرق التعامل مع “او هندلة” المشاكل.
الحاجات دى كلها مع بعض بتديك رؤية هايلة وشاملة عن عالم ال business والإدارة، فهم عميق وملاحظة دقيقة لأبسط التغييرات في بيئة العمل.
النوع دا من الفهم و قوة الملاحظة مش بيتحقق الا لو قضيت وقت كتير بتشتغل علشان تحققه.
لو انت من النوع اللى يقدر يكون #قد_التحدي بتاع المناصب القيادية ؟ لو تقدر تستحمل مسؤولية كبيرة و تقدر تتعلم و تتطور من نفسك باستمرار ؟
يبقى انت من الناس اللى هتحقق انجاز هايل في الMBA

4 تعليقات
  1. A. Ahmed يقول

    مقال هايل جدا ، واسلوب الكتابه احلى … ربنا يكرمكم

  2. Ahmed Hagag يقول

    لو سمحتوا ياريت بس موضوع عن ترتيب الخطوات اللي المفروض نعملها نبدا بانهي كورس ونتابع ازاي واللي لسه شايف الموضوع انهارده يبدا ازاي
    ونكمل في الموضوع ازاي
    ولما ندخل على الكورسات نشوف ايه الفيديوهات علطول ولا في حاجه نشوفها الاول وبعد الفيديوهات نعمل ايه
    محتاجين خطوات كامله لو سمحتم

  3. محمد علي يقول

    شكراااا جزيلااا ليك و كلامك صح ١٠٠٪ ومش بس علي مستوي السوق المصري….. حتي في الخليج او الهجره بتفرق في النقط.
    انا بدات معاكم وان شاء الله نكمل مع بعض وناخد الماجستير باذن الله …… انا بس حابب اتاكد منك انه بعد ما اخلص كل الكورسات حقدر اعادلها واخد شهاده ماجستير ؟ لاني شايف ان الكورسات من ٣ جاماعات مختلفه ومن الصعب حسب علمي الشخصي معادله المواد من ٣ جامعات مختلفه في جامعه جديده مقابل الماجستير وخصوصا اذا كانت جامعه زي بنسيلفينيا “رقم ٩ علي العالم في اخر احصائيه ” …… انا مش عايز من حضرتك اي تفاصيل مرهقه كفايه قوي مجهودك الخرافي والمتميز انا عايز بس تاكدلي بكلمه منك الامكانيه بحصولي علي الماجستيرلاني حسيب الماجستير اللي انا لسه بداءه من شهر دلوقتي مع كليه ادنبره وابقي معاكم عشان التوفير وعشان برضه قوه بنسلفينيا او الويسترن كيس بالمقارنه مع ادنبره ( ٣١٢ علي العالم حاليا)…… وشكرااا جزيلاااا

  4. محمود على يقول

    كيف يمكن الاشتراك فى البرنامج و كم تبلغ التكلفة وما هى المدة الزمنية للبرنامج وشروط الحصول على MBA

رد على Ahmed Hagag
إلغاء الرد

لن يتم نشر عنوان بريدك الإلكتروني.