تعلم انت و أولادك البرمجة ” لغة Scratch “

0 5٬273

كل ما تدخل علي وادي المشمش تلاقى كورسات برمجة .. شوية جافا .. و شوية بايثون وحاجات غريبة كده
و انت مش عارف يعني ايه برمجة أساسا ^_^

عشان كده تعالي نبدأ الموضوع المرة دي من الأول خالص ..
البرمجة بكل بساطة هي لغة بنستخدمها علشان نقدر نتكلم مع الآلة ونديها مجموعة من الأوامر علشان تنفذ مهمة معينة
مش أنا و إنت بنتكلم عربي وفي غيرنا بيتكلم انجليزي ..
و هكذا بردو البرمجة لغات .. في لغة برمجة بستخدمها علشان أعمل لعبة أو أبليكشن او موقع او حتى اشغل بيها جهاز
عارف انت الغسالة اللي في بيتكم مش مامتك تلاقيها بتضغط على زراير كده علشان تظبط وقت الغسيل والشطف والحاجات دي وتقولك أنا بظبط البرنامج بتاعها !! .. اهي ضغطات الزراير دي ببتحول لبرنامج بخطوات بتمشي عليه الغسالة علشان تتطلعك الهدوم في الاخر زي الفل ^_^ ” خلى الغسالة شغالة في حالها وبلاش مامتك تدعي علينا ”

و خلينا نركز فى تعريف لذيذ كده “البرمجه هى ان تعلم اغبى صديق لديك طريقه كى يحل بها مسألة ما” ^_^
ليه بقى لأنك وانت بتبرمج بتتعامل مع غباء الكمبيوتر لو كتبتله أمر غلط او على الأقل ناقص حرف مثلا بدل ما تكتب
(while)عندما كتبت (whil) البرنامج ما يشتغلش والأخطاء تنزل ترف فوق دماغك وتلاقيك في الاخر كنت ناسي نقطة ولا حرف .. مش بقولك غبي ^_^
وممكن ده السبب اللي بيخلي معظمنا في الأول بيخاف انه يتعامل مع البرمجة وبيتخنق منها
لكن هنحلك الموضوع ده مع لغة برمجة اسمها سكراتش (scratch)
اللغة دي أساسا صممها مجموعة في معهد ماساتشوسيتس للتقنية MIT علشان المبتدئين في البرمجة والاطفال وممكن باللغة دي تصمم لعبة او قصة او animation
الحلو بقى في اللغة دي انك مش بتكتب الاوامر بايدك لا هي عبارة عن بلوكات أوامر جاهزة وانت بتحطها فوق بعض بترتيب
معين علشان في الاخر توصل للبرنامج اللي انت عايز تعمله ،عارف لعبة المكعبات اللي كنا بنلعبها زمان اهي حاجة زي كده
نيجي بقى للمهم ده لينك الموقع بتاعهم بالعربي اللي ممكن تبرمج عليه علطول او تنزل البرنامج وبالمرة تشوف برامج مكتوبة
وتشغلها وف يه حاجات كتير
/https://scratch.mit.edu
وكمان ده يا سيدي كورس حلو جدا على edxبيشرح السكراتش

https://www.edx.org/course/programming-scratch-harveymuddx-cs002x-1
هتقولي كورسات بالانجليزي تاني ( استنى ما تزعلش ده بقى لينك لكتاب بالعربي ممتاز جدا بيشرح كل حاجة عن
السكرتش وازاي تنزله على الكمبيوتر وتشغله و تتعلمه باسلوب بسيط اوي لانه اساسا مكتوب للاطفال
http://www.ev-center.com/uploads/2/1/2/6/21261678/%D9%83%D8%AA%D8%A7%D8%A8_%D8%A7%D8%AD%D8%AA%D8%B1%D9%81_%D8%B3%D9%83%D8%B1%D8%A7%D8%AA%D8%B4_-_%D8%A7%D9%84%D9%82%D8%B1%D9%8A%D8%A9_%D8%A7%D9%84%D9%87%D9%86%D8%AF%D8%B3%D9%8A%D8%A9.pdf
#ملكش_حجة

مين ممكن يستفاد من البوست ده:
1- أي حد عايز يدخل في البرمجة لكن حاسس إن الموضوع صعب . ابدأ بده هتفهم منه اساسيات البرمجة وفي نفس الوقت
هتلاقي نتيجة بسرعة( لعبة اتعملت , فيلم animationصغير) فده هيحفزك اكتر تدخل المجال
2- أي أب او أم طفله بيحب الكمبيوتر وعايز يوجهه لحاجة تفيده خصوصا إن إحنا في مصر ماشاء الله حصة الكمبيوتر نظري
وامتحاناته نظري (أم الدنيا بقى)^_^ ممكن تبتدي معاه بحاجة زي دي افتحله الموقع او البرنامج واشتغل معاه صدقني عن
تجربة الاطفال بتحب الحاجات دي جدا ، شوف بس الفرحة اللي على وش ابنك اما يعمل برنامج صغير حتى ولو قطة بتمشي
وتنونو وبعدين يعمله ، runأطفالنا بيحبوا الابتكار بس للاسف مش لاقين الفرصة
3- أي حد داخل عليه أجازة نصف السنة وعايز يستفاد منها ويعمل حاجة جديدة وخصوصا إن كلنا في بداية سنة جديدة
بيبقى عندنا عزيمة حلوة اوي

اترك رد

لن يتم نشر عنوان بريدك الإلكتروني.