ازاى تحافظ على اللى بتذاكره .. ميتبخرش (neuroscience )

1 3٬396

كام مرة قعدت تذاكر بالساعات واول ما تدخل الإمتحان تلاقي مخك بقى صفحة بيضا ومعظم اللي ذاكرته اتبخر  !!  ^_^
عارف مشكلتنا في إيه ؟ إننا بنتعامل مع مخنا بنفس الطرقة تعاملنا مع اى موبايل أول ما نشتريه .. إزاي دة ؟
أقولك أنا يا سيدي ، مش إنت لما تشتري موبايلك بيجيلك معاه الكتالوج بتاعه ومعظمنا كالعادة بيكبر دماغه من الكتالوج .. ويقولك يا عم انا الموبايل بس يعقد معاي يومين وبجبيب آخره مع إنه لو قعد ساعة يقرا الكتالوج هيجيب اخر الموبايل وممكن يعرف امكانيات للموبايل مش هيعرفها حتي لو قعد معاه سنة وكان قدر يستفيد من امكانيات موبايله بشكل أحسن
أهو احنا بنتعامل مع مخنا كده بالضبط ..

هو المخ ليه كتالوج ؟ أيوة ليه .. في علم اسمه  (neuroscience ) العلم ده مختص
بدراسة الجهاز العصبي ” مخنا بيتكون من ايه ، ايه الاجزاء المسئولة عن الابصار والسمع والتعلم والذاكرة وغيره وازاي
العمليات دي بتحصل جوه المخ ” بصراحة العلم ده مبهر وممكن لو انت بتتفرج على قناة ناشونال جيرافيك مر عليك برنامج
اسمه ألعاب العقل (  mind games) اللينك ده فيه شوية حلقات ليه بس اركنها شوية لما تخلص الإمتحانات وبعدين شوفها:
https://www.youtube.com/watch?v=LCFwFzAANVA&index=4&list=PLekJoHQRqbJoQgQhn1paroz7FDqGwrJx
بس احنا حاليا اللي يهمنا من الليلة دي هو ازاي نفتكر اللي بنذاكره
بص ياسيدي .. الذاكرة بتمر على 3مراحل :

1- الذاكرة الحسية(خاصة بالحواس) واللي بتستمر بضع ثواني وبعدين نتنقل على
2- الذاكرة قصيرة الامد (الذاكرة النشطة) short memory واللي ممكن تستمر لدقايق وبتختفي لو متنقلتش للمرحلة التالتة وهي
3- الذاكرة طويلة الامد (long memory)اللي بتفضل فاكرينها لفترة طويلة
وللاسف مشكلتنا بتكون في النقطة دي ان احنا مش بننقل اللي بنذاكره من المرحلة التانية للتالتة فنتلقينا بنذاكر الحاجة النهاردة تمام  .. نروح الامتحان بكره مش فاكرين حاجة
فتعالوا نعرض شوية أساليب ممكن تقدر تساعدنا ان احنا ناخد اللي بنذاكرة من الذاكرة النشطة ونحطه في الذاكرة طويلة الأمد:

1- الإعادة ، الأعادة ، الإعادة :
احنا لما بنتعلم حاجة جديدة بتبدأ تتكون تشابكات عصبية جديدة بين الخلايا العصبية بتاعتنا وعلشان التشابكات دي تقوى .. ونفضل فاكرين اللي تعلمناها لازم نعيد عليها بين فترة وفترة لكن مشكلتنا الأكبر ان احنا بنحاول نلزق الحاجة بذاكرتنا وتكرر فيها يجي عشرين مرة في وقت واحد ومع كده مش هتثبت زي لو كررتها نفس عدد المرات بس على أيام متباعدة زي ما بالظبط لو بتبني بيت لازم بين فترة وفترة تسيب الاسمنت ينشف علشان تقدر تكمل بنا عليه ^_^ فلازم تعمل حسابك ان تكون
الاعادة على فترات زمنية متباعدة علشان المعلومة تثبت

 

2- بطاقات الفلاش (flash cards) :
للاسف مناهجنا مليانة دش مالوش لزمة والعقل اما يقرا او يسمع كمية كبيرة من المعلومات ما بيقدرش يحدد النقط الرئيسية
وبالتالي معظم اللي قريناه بينتهي بيه الأمر في الذاكرة القصيرة وننساه بعد شوية علشان كده حاول تجيب ورق ابيض مثلا a4
بتاع الطباعة ده واجمع فيه أهم النقاط الرئيسية والفرعية بتاعت الموضوع واستخدم أسهم كده والوان واختصر بقدر الامكان
(كأنك كده بتعمل برشام بس البرشام ده علشان تذاكره مش تاخده معاك في الإمتحان ^_^) والنقاط دي لما تفتكرها هتلاقي العقل بيرجعلك الدش اللي ورا النقط دي لوحده لان النقطة الأساسية خلاص ثبتت عنده

3- نظام الشماعة لتقوية الذاكرة (mnemonic peg system ) :
التكنيك ده بيستخدم علشان نفتكر بيه الحاجات الي لازم يكون ليها ترتيب معين هو بيحاول يربط معلومات انت عارفها أصلا (مثلا الارقام من واحد لعشرة او الحروف من أ – ي)بحاجات جديدة عايز تفتكرها وبصراحة اتعمل اكتر من نظام ربط يحاول
يربط حاجة بحاجة تانية ممكن تشوفهم من هنا :
http://www.memory-improvement-tips.com/remembering-lists.html
في النظام ده بيحاول يربط الحاجة اللي عايز تحفظها بصور فتثبت في دماغك أكتر لأن المخ بطبيعته بيفتكر الحاجة اللي تكون
مربوطة بالحواس (الرؤية الشم السمع وهكذا) أكتر من انك تديله مجرد معلومة وتقوله احفظها
مثال لو كنت زي حالتي كده هندسة وعانيت مع القوانين والثوابت اللي مفروض تحفظها قبل ما تدخل الأمتحان
(مع العلم أساسا ان احنا المفروض ندخل الامتحان نتلقى الحاجات دي مكتوبة في ورقة الأسئلة)
مثلا قانون التحويل بين درجة الحرارة من سيلسيز لكلفن c=k+273
ممكن تحفظ (273 )بالطريقة دي”اتنين مجوزين( 2)بيتمشوا على حرف جبل (7)تحس كده ان السبعة شكلها مدي على شكل حافة الجبل وقعوا اتعلقوا في شجرة (^_^ ” )tree:3three
وهكذا يا عم كل حاجة معصلجة معاك في المذاكرة اربطها بحاجة كده وخليها درامية ،كوميدية ورينا ابدعاتك بقى
هو احنا هنتجنن من قلة ^_^

بالنسبة لادبي برضه ممكن نربط بطرق زي دي :
مثلا كنت بدرس فقه العبادات وكنت بحفظ شروط صحة الصلاة وشروط وجوب الصلاة وهكذا باقي العبادات طبعا تخلص
المذاكرة من هنا وتلاقي كله دخل في بعضه من هنا
فعمل ايه شروط الصحة (3س و 2ط)”اسلام،ستر عورة ،استقبال قبلة ،طهارة حدث،طهارة خبث” وهكذا
وخلي بالك متستخسرش الوقت اللي بتستخدمه في حاجات زي دي لاني صدقني هتوفر عليك وقت كبير بعد كده وانت بتراجع
ولو عايز تتعرف اكتر عن الذاكرة وازاي تستخدمها صح يبقى خليك مع عمنا توني بوزان المعروف بأستاذ الذاكرة .. وكتابه “إستخدم ذاكرتك”

ولو الموضوع داخل دماغك اوي زي حالاتي كده ^_^
ممكن تاخد الكورس ده من على coursera واللي عجبني فيه انه بيشرح الذاكرة باستخدام الأفلام فبيقدمه بأسلوب بسيط

Understanding Memory: Explaining the Psychology of Memory through Movies
https://www.coursera.org/learn/memory-and-movies/home/welcome

تعليق 1
  1. عمرو شتية يقول

    جهد رائع يا باشمهندسة /سمر حبشى

رد على عمرو شتية
إلغاء الرد

لن يتم نشر عنوان بريدك الإلكتروني.