السنة الجديدة مش لازم تكون مرتبطة بشهر يناير من كل سنة، في الحقيقة ان الوقت اللي بتقرر فيه تغير حاجة في حياتك مش عاجباك وتبدأ صفحة جديدة مع نفسك، دي تعتبر سنة وبداية جديدة، مش لازم نلزم نفسنا بتوقيتات معينة لان مفيش قانون بيقول كده، ابدأ وقت ماتحب، المهم انك تبدأ، في المقال ده هحاول اقول شوية نقاط متفرقة تساعدنا كلنا في البدايات.
سجل الاحداث المهمة..
يمكن ناس كتير وأنا منهم، لما تيجي تخلص سنة بيواجهوا صعوبة في تذكر الاحداث المهمة للي حصلت فيها، نظرًا لان الاحداث كترت وتشابهت وبقى صعب نفتكر تحديدًا حصل ايه، عشان كده مهم تبدأ تسجل عندك بأي طريقة تحبها الاحداث المهمة اللي بتحصلك على مدار السنة، القرارت اللي بتاخدها، الاخطاء اللي بتتعلم منها، واللحظات الحلوة عشان دي بتحتاجها بعد كده تفكرك بإن مفيش سنة بتبقى كلها وحشة، وزي ماكل سنة بتحصل حاجات وحشة، فـ في حاجات حلوة برضو تحصل، يعني سنتك الجديدة أكيد شايلالك حاجات حلوة برضو : )
مهم تعرف انت عايز ايه من السنة الجديدة، كلنا في فترة اكيد كتبنا كل اللي عايزين نعمله واحبطنا في الاخر اننا معملناش حاجات كتير!
الحقيقة ان الدنيا مش بتمشي بالمسطرة زي ماحنا عايزين بالظبط، عشان كده وارد جدا تبقى مخطط لحاجات وتلاقي نفسك معملتهاش وفي المقابل عملت حاجات تانية، النقطة المهمة هي مبدأ الانجاز نفسه، ان متعديش سنة من سنين عمرك من غير ماتكون اضفت فيها حاجة لنفسك، سواء على الناحية العملية او العلمية او في مستوى الحياة الشخصية.
في كل يوم بيعدي عليك بتيجي افكار في بالك وتروح، مهم جدا انك تمسك الافكار دي وتكتبها قبل ماتطير D:
دون كل شيء تعتقد ان مهم تدوينه، هتتفاجأ في اخر السنة بكمية الاحداث المهمة اللي حصلت وغيرت فيك وانت مش واخد بالك.
اشتغل على نفسك..
افتكر دايمًا المقولة اللي بتقول:
I am working on myself, for myself, by myself
انت بتشتغل على نفسك طول مانت عايش، متخافش تحط احلام كبيرة، كل الاحلام الكبيرة بتبدأ بخطوات صغيرة، لو مشيت بخطى ثابتة على الخطوات الصغيرة وكنت عارف طريقك، فالأكيد ان مفيش حاجة تمنعك من تحقيق احلامك.
اشتغل على نفسك في أكثر من ناحية، من ناحية صحية مارس الرياضة وراقب أكلك، لان كل ماجسمك بقى صحي أكثر كل ماده ساعدك في تحقيق احلامك، مفيش شك انك مش عايز تبدأ تصاب بأمراض ونشاطك ومجهودك يقل في سن صغيرة نسبيا بسبب نظام وعادات خاطئة، دي نقطة مهمة جدًا متقللش من اهميتها.
من ناحية ثقافية، اقرأ، القراءة بتخليك تعيش أكثر من حياة وتتعلم من تجارب وخبرات الآخرين، ليه تقع في نفس الغلط لما ممكن تتعلم منه من خلال شخص آخر؟
مش معنى انك تبقى مركز على تطوير نفسك انك تنسى الناس اللي حواليك، اهلك وصحابك بنفس الاهمية، اعرف مين مهم ومين عايزه يكمل معاك ومتوقعهمش من حساباتك : )
في الآخر، حدد اولوياتك وركز عليها، متحاولش تبقى شبه حد او تخلي اولوياتك زي اولويات حد تاني عشان انت شايف الحد التاني ده ناجح، النجاح نسبي وكل واحد ليه مقاييسه الخاصة، خليك ناجح بطريقتك الخاصة واللي محدش شبهك فيها.
