كم واحد مننا مدخلش الكلية إلي عايزها بسبب التنسيق أو فرق بسيط بين المجموع والدرجة إلي تدخل الكلية؟! طب هل من الممكن لشخص محصلش علي شهادة جامعية إنه يشتغل في شركة من أكبر شركات مصر ويشغل منصب كبير في الشركة “من غير واسطة”؟!

أكيد مستحيل، لأن زي ماقالوا زمان مصر بلد شهادات، ومش بس مصر ده معظم دول العالم والشركات الكبيرة نظام التوظيف فيها بـ يعتمد في المقام الأول علي الدرجة العلمية إلي حصلها الشخص، وبناءاً عليه بـ يتم قبوله او رفضه وبـ يتم تحديد منصبه في الشركة حسب الشهادة الحاصل عليها واسم الجامعة إلي درس فيها،

لكن النظام ده بيختلف عند 15 شركة من أكبر الشركات والعلامات التجارية في العالم، 15 شركة متعتمدش في التوظيف علي الدرجة العلمية او أي شهادة تانية، لكن علي عكس كل الشركات في أنحاء العالم بـ تعتمد في توظيفها علي المهارة، الخبرة، والقدرة علي حل المشاكل.

أكبر موقع توظيف علي الإنترنت Glassdoor أصدر قائمة بـ تتكون من 15 شركة من أكبر شركات العالم إلي أصبحت مبتطلبش من المتقدمين علي وظائف الحصول علي شهادة جامعية في نفس التخصص الوظيفي المقدم عليه، شركات زي جوجل، آبل، وآي بي إم.

جوجل.. حلم الجميع، أفضل مكان للعمل في العالم بسبب المميزات الكتيرة والراحة إلي بـ توفرها شركة جوجل لموظفيها، والأهم من كل ده المرتب، فالموظف في شركة جوجل بـ يقدر يكسب في السنة الواحدة أكتر من 80,000 دولار.

عملية التوظيف في جوجل بتكون عملية شاملة للتركيز في البحث عن الشخص المناسب والمؤهل إنه يكون ضمن فريق جوجل، وبـ تركز شركة جوجل في مقابلات التوظيف علي اكتشاف جوانب مختلفة من نقاط القوة عند المتقدم للوظيفة، ومن الممكن تصل عدد المقابلات لأكتر من 5 مقابلات لدراسة المتقدم بشكل أفضل وتحديد جاهزيته، وإذا كان عنده المهارات الأساسية المطلوبة للعمل في بيئة جوجل او لأ.

المهارات الأساسية المطلوبة من المتقدم علي وظيفة في جوجل.
المهارات الأساسية المطلوبة للعمل في جوجل ممكن متكونش موجودة غير عند عدد صغير جداً من المتقدمين، لأن من أهم المهارات المطلوبة إن يكون المتقدم ماهر وله خبرة في التخصص المطلوب العمل فيه وإن يكون له نظرة مختلفة للأشياء والمشاكل إلي ممكن يواجهها في الشغل وإنه يكون قادر علي التعاون مع فريق العمل في التفكير ومواجهة التحديات بطريقة إبداعية، والأهم مهارة إنه يفكر بره الصندوق مع المهارات العادية المطلوبة من أي شركة تانية زي القدرة علي التكيف والعمل تحت ضغط وباقي المهارات الإعتيادية.

هل من الممكن اشتغل في جوجل؟
أكيد، حلم الشغل في جوجل مش مستحيل وبما جوجل بقت من الشركات إلي مبتحتجش شهادة جامعية من هارفارد وكامبريدج او حتي جامعة عين شمس للتقديم علي وظيفة، فحلم العمل في جوجل بقي سهل، وكمان جوجل هتساعدك وهتوفر لك الفرصة دي زي ما قال نائب الرئيس السابق لشركة جوجل Laszlo Bock “عندما تنظر إلي الناس الذين لا يذهبون إلي المدرسة ويشقون طريقهم في العالم، هؤلاء هم البشر الاستثنائيون. ويجب أن نفعل كل ما بوسعنا للعثور علي هؤلاء الناس.”.

محتاج إيه عشان اشتغل في جوجل؟
الوظائف إلي بـ تكون عادةً مطلوبة في شركة جوجل ليها علاقة بالبرمجة و التصميم ، وفي الحالتين محتاج طبعاً لغة إنجليزية، لكن ده مش عائق بالنسبة لك، لأنك تقدر بدورات علي الإنترنت وأنت في بيتك تتعلم البرمجة او تصميم الجرافيك، كل إلي أنت محتاجه شوية عزيمة وإرادة…

أما بالنسبة للإنجليزي فتعلمه من أسهل ما يكون، بسبب وفرة مراكز التعلم والدوارات علي الإنترنت المجانية والمدفوعة، او تقدر تتعلم الإنجليزي عن طريق برامج او تطبيقات و انت قاعد فى بيتك

الخلاصة إن بعد الطفرة الكبيرة في عالم التوظيف والشركات الكبيرة بقي من الممكن شخص بسيط يحلم بمكان أحسن وإنه يشتغل في أكبر شركة في العالم ومن غير أي شهادة جامعية.

تغيير مجال الشغل حاجة مرعبة لناس كتير خصوصاً إنه بقى صعب تلاقي شغل، وكمان دخول مجال جديد محتاج جرأة رهيبة وطول بال إنك محتاج تتعلم حاجات كتير.4

الحقيقة إنك مش محتاج تغير كاريرك 180 درجة، فيه حالات ممكن تعمل shift داخل نفس المجال، زي مثلًا إنك تقرر تتخصص في مجال الترجمة الأدبية وانت اصلًا مترجم قانوني. ولكن ال Career Shift الكامل هنا هو انك تقرر تترك مجال الترجمة بالكامل وتتجه للبرمجة أو التصميم. دي بعض الخطوات اللي لازم تراعيها وانت بتغير مجال شغلك.

1) تواصل مع ناس بيشتغلوا في المجال اللي هتتجه ليه

التواصل مع ناس بالفعل شغالة في المجال اللي هتتجه ليه هي أهم خطوة لإنها هتساعدك تحدد هل الوظيفة دي ملائمة ليك ولا لا من قبل ما تترك مجالك الحالي وتتجه ليها. بالإضافة إلى إن تكوين شبكة علاقات في المجال هيساعدك فيما بعد تحصل على وظيفة داخل المجال نفسه. جهز قايمة اسئلة وحدد شخص شايفه ناجح ومحترف في المجال دة واتواصل معاه واعرض عليه اسألتك، واهم حاجة تعرف منه إزاي تكون ناجح في المجال دة. سؤال الناس الخبرة بالمجال بيوفر عليك بحث كتير ويستحسن تكلم أكتر من شخص عشان تكوَّن وجهة نظر كاملة.

2) تقبل فكرة تعلم المجال

أول حاجة بتيجي على البال لما بتطرح فكرة تغيير مجال العمل هي “ياااه لسة هتعلم من أول وجديد!” غالبًا مش هتضطر تتجه للكلية وتدرس المجال لمدة أربع سنين ولكن مهم جدًا تدرسه وتتعلمه من أهله. لذلك أنصحك بتجربة الدورات أو الكورسات الإونلاين Moocs أو حتى على ارض الواقع. اختر مكان شايفه مناسب بعد البحث والسؤال طبعًا وروح خد كورس فيه. أغلب المجالات لا تستحق دراسة جامعية إلا إذا كانت طب أو هندسة، غير كدة فباقي المجالات ممكن بعض الدورات والكتب واليوتيوب يخليك تتقنها، المهم تمشي على track تعليمي صح.

3) حدد إيه المهارات المشتركة بين المجالين

يعتقد أغلبية الناس إن في حالة تغيير المجال إنك هتترك كل شئ خلفك وتبدأ تتعلم مهارات جديدة تمامًا ومش هتحتاج خبرتك السابقة. الإعتقاد ده خاطئ طبعًا لإن فيه مهارات مشتركة بين المجالات المختلفة واللي هتحتاج تنقلها معاك وانت بتغير مجال شغلك. فيه مهارات مشتركة في اغلب المجالات زي مهارات التواصل والعرض والإلقاء، إتقان التعامل مع الكمبيوتر وحزمة مايكروسوفت اوفيس، إتقان اللغة الإنجليزية، وهكذا. ما يحدد النقطة دي هي طبيعة المجال اللي هتنتقل إليه مش أصحاب العمل.

4) خد break من مجالك الحالي قبل الإنتقال للمجال الجديد بشكل كامل

فكرة الإنفصال عن الشغل الحالي بشكل كلي ومفاجئ مش خطوة كويسة ابدًا. ممكن تبدأ ب break بسيط لمدة اسبوع أو اسبوعين -إن أمكن- عشان تقدر تقرر هل انت على أتم استعداد لتركه ولا ممكن تكمل فيه. في فترة ال break ممكن تجرب تعمل اي task بسيطة في المجال الجديد وتقرأ وتعرف اكتر عنه وتحدد هل طموحك يتماشى مع المجال الجديد ولا محتاج تعيد النظر في القرار.

5) استكشف التغييرات البديلة اللي ممكن تنفذها في مجالك الحالي

تفتكر هل المشكلة فعلًا في مجال شغلك الحالي بالكامل ولا في ظروف وطبيعة شغلك نفسها؟ يعني مثلًا ليه بقية زمايلك في نفس المجال سعداء جدًا ومرتاحين فيه على عكسك؟! أنا شخصيًا قابلتني المشكلة دي مع مجال التدريس. في البداية محستش براحة ولكن فضلت مستمرة فيه لمدة 10 شهور وجربت اشتغل مدرسة في حضانة لأطفال وفي أكاديمية للكبار، جربت تدريس منهج اللغة الإنجليزية المدرسي وحتى تدريس كورس بغرض التحدث باللغة واتقانها. غيرت اكتر من مرة الطلبة اللي بدرَّس لهم والمكان اللي بشتغل فيه. تقريبًا مسبتش وسيلة تغيير داخل المجال إلا وجربتها، ورغم إني كنت شاطرة فيه إلا إني مكنتش مرتاحة ليه إطلاقًأ. ساعتها بس قدرت أقرر وبكل يقين إني مش عايزة اكمل في المجال دة ولازم اتركه بشكل كلي.

نرجع ونقول ال Career Shift انتشر جدًا مؤخرًا وناس كتير قدرت تحقق فيه نجاحات عظيمة. انتشار ونجاح مفهوم ال Career Shift هو ترجمة إن “محدش بيشتغل بشهادته”، وإنك تقدر تنجح في أي مجال مؤمن بنفسك فيه، المهم تاخد خطوات مدروسة ومنضبطة علشان متقعش في فخ “لا طال بلح الشام ولا عنب اليمن!”.

سوق العمل بقى بيتغير بصورة سريعة ،فبدل ما تبني مستقبلك على نتيجة ثانوية عامة في بلد التعليم فيه ضايع ^_^، الافضل ليك انك تشوف الوظايف في العالم من حواليك رايحة على فين وعلى اساسها تقدر تحدد خياراتك بصورة ادق

وفي تقرير نشره المنتدى الاقتصادي العالمي في 2016 بعنوان مستقبل الوظايف(The Future of Jobs) التقرير  استطلع تنبؤات اكتر من 350 من اصحاب العمل في تسع صناعات مختلفة في 15 من اكبر القوى الاقتصاديةفي العالم

اتذكر فيه ان على حلول عام 2020 التطورات التكنولوجية والثورة الصناعية ممكن تؤدي لخسارة اجمالية في الوظايف مقدارها تقريبا 7.1 مليون وظيفة غالبيتها هتكون لاصحاب الوظايف والمناصب الادارية “white-collar office”

لكن على الجانب التاني توقع التقرير ان في وظايف جديدة هتكون مطلوبة بشكل اكبر ، ودي قايمة باهم 8 وظايف متوقع انها هتشهد طلب متزايد الفترة الجاية

1. Data analysts

طبقا لاستطلعات التقرير مهن محللي البيانات هتشهد طلب متزايد بسبب قدرتهم على الاستفادة من ملايين البيانات اللي بينتجها عالمنا التكنولوجي ، وتقدر تقرا اكتر عن الموضوع هنا

2 . computer and mathematical jobs

مهن زي المبرمجين ومطوري التطبيقات و المسئولين عن امن المعلومات هتفضل من اكتر المهن المطلوبة ،بجانب طبعا الزيادة المستمرة للعاملين في مجالات زي AI و machine learning

3. Architects and engineering

على مدار السنين الجاية هيكون في زيادة في الطلب على المهندسين الشاطرين وخاصة في مجالات زي النانوتكنولوجي ،الروبتكس و الكيمياء الحيوية

وطبقا للتقرير على سنة 2020 اتنين مليون وظيفة جديدة هتطلب على مستوى العالم في المجال الهندسي وحوسبة المعلومات

4. sales people

مع زيادة دخول التكنولوجيا في كل الصناعات هتزيد الحاجة لرجال المبيعات المتخصصين في تسويق مبيعات الشركات وعروضها للفئات المختلفة من المستهلكين باستخدام وسائل الدعاية التكنولوجية المختلفة

5. Senior managers

بما ان معظم الشركات هتكون على اعتاب فترة حرجة من التغيرات اللي هتضرب العالم بالتالي هتكون محناجة شوية مدراء شاطرين يعدوا بيها الفترة دي بسلام ، والدليل على كده كتير من اباطرة التكنولوجيا اللي شفوناهم بيقعوا الفترة اللي فاتت بسبب عدم قدرتهم على مواكبة التغير والتطور السريع في عالم التكنولوجيا

6. Product designers

من اكتر المهارات اللي هتكون مطلوية في2020 هي الابداع ،والسبب في كده لان كتير من الوظايف الرتيبة ممكن يقوم بيها الكمبيوتر لكن الوظايف الابدعاية مازالت بتطلب العنصر البشري

وبالتالي الحاجة هتفضل في ازدياد للعاملين في مجال التصميم التجاري والصناعي

7. Development specialists & Human resource professionals

نتيجة التطور التكنولوجي في وظايف كتير هتختفي ، لكن 65% من المشاركين في الاستطلاع قالوا انهم بدل ما يوظفوا ناس جديدة هيستثمروا في اعادة توظيف الموظفين اللي عندهم هن طريق تعليمهم المهارات الجديدة اللي عايزنها

وبالتالي هيكونوا محتاجين للمتخصصين في مجال التنمية والموارد البشرية علشان يساعدوا الموظفين دول علا تطوير مهاراتهم

8. Regulatory & Government relations experts

خبراء العلاقات العامة و التعامل مع الحكومة هيفضلوا مطلوبين برضه لان مع تبني الشركات للتكنولوجيا الناشئة هيحتاجوا حد يتعامل مع الجانب القانوني للموضوع

مثال على كده شركات السيارات المهتمة بتطوير السيارات اللي بتعمل بدون سائق هتحتاج انها توظف اشخاص تتعامل مع الجهات التنظيمية الحكومية علشان تظبط القوانين اللي هتحكم التقنية دي

واحنا في الوادي هنساعدك باننا نبلغك عن كورسات اونلاين في معظم المجالات اللي فاتت تقدر تستفاد بيها في المسار الوظيفي اللي هتختاره

أية رأيك لو تكمل دراسة في الجامعه الامريكيه الـ AUC .. وتاخد مرتب 1500 جنية شهرياً كمان ؟ ^_^

– أنت بتتكلم جد ؟!

ايوة .. و ركز معايا فى الموضوع ده .. علشان دى فرصة مش بتكرر.

ال AUC PRESS ده دار نشر و أبحاث تابعة للجامعة الأمريكية فى مصر .. بيعلموا كل سنة Professional Training Program برنامج تدريبى لأى حد من خارج الجامعة الأمريكية فى أى كلية أو معهد مصريين أو أجانب علشان يتدربوا فى أى من المجالات الأتية :

1. Editorial
2. Design and Production
3. Sales
4. Customer Service
5. Marketing
6. Finance
و السنة دي زودوا المجالين دول:
7. Royalties
8. Contracts and Rights

ال PDF الرسمي من موقع ال AUC PRESS : http://www.aucpress.com/images/PTP2016.pdf
السنة دى التدريب مدته 9 شهور هتبدأ بإذن الله فى 15 سبتمبر 2015 و تنتهى فى 30 يونيه 2016 ..
كل متدرب هياخد 1500 جنيه “مقابل شهرى ” .. بالاضافة انك هتاخد شهادة معتمدة من الجامعة الامريكية بعد انتهاء الدراسة .

و شغلك هيكون Full time يعنى من 9ص ل 5م مثلاً أو على حسب مواعيدهم، إجازاتك هتاخد لو رسمية + 10 أيام Casual

طيب أيه المطلوب ؟!
يكون معاك شهادة من أى كلية من أى تخصص ..
و بتتكلم أنجليزى كويس ..
و عاوز تتدرب فى أى من المجالات اللى فوق دى ” مش لازم يكون ليها علاقة ب مجال دراستك ”

أخر ميعاد للتقديـــــــــــــم : 1 سبتمـــــــبر 2015
لسه فى وقت متبعتش أوراق أو حاجه إلا لما تبقى جاهز ،، صور شهاداتك و ظبط ال CV و شوف هتقول ايه و بعدين ابعت

حضرتك هتعمل Cover Letter تكتب فيه انت بتعمل ايه فى حياتك و عاوز التدريب ليه و ايه المجال اللى عاوز تتدرب فيه ..
و تبعت السيره الذاتيه و أى شهادة حصلت عليها

و ماتنساش تكتب أنت فاضى امتى و هل تقدر تلتزم ولا لأ..
و أكتب أى شىء له علاقة بيك.

*** يعنى ايه Cover letter ؟!
اقرا الموضوع ده : http://mshmshvalley.com/?p=1258

أبعت السيره الذاتيه و ال Cover Letter و الأوراق أو الشهادات كاملة بالإيميل لـ :

Ms. Angela Hafez
The American University in Cairo Press
e-mail: angelah@aucegypt.edu

يعنى حضرتك تكتب فى ال Subject :
AUC Press Professional Training Program Application
و تكتب فى الموضوع
Ms. Angela Hafez,
و تكتــــــــــــب بقى ال Cover letter زى ما قولنا
و تقفل الإيميل
Yours,
أو Kind Regards,
أو زى ما بتكتب

———————————————————–

وادي المشمش | معاً نصنع المُستقبل