لو وريت الصورة دي لاى حد فى اى مكان ف العالم .. هيعرف مش اقل من 80-90% من اسامي الشركات دي ! سواء اتعامل معاها و استخدم منتجاتها او لأ ..

ازاى دة حصل ؟ و ازاى الشركات دي وصلت انها تخلى كل العالم بمجرد ما يشوف ال شعار ( Logo) بتاعها يفتكر اسمها و منتجاتها ؟ و ازاى ممكن تطبق الكلام دة انت كمان على الحاجة اللى انت شغال عليها سواء Business .. موقع .. مجرد فكرة .. نشاط طلابي ..

الاجابة بتتلخص فى ان الشركات دي كلها اختارت الشعار (Logo ) الصح اللى يمثلها ! و اللي يثبت فى دماغ عملائها مش بس كده الشركات دي اختارت الشعار اللى يخلى اللى ميعرفهاش عنده فضول يعرف الشركة دي تخصصها اية و بتقدم اية .. لان شعارهم فى الغالب بيلفت انتباهه
بس كده ! مجرد اختاروا شعار صح ! حققوا النجاح دة كله .. امال فين دور ال Branding و ال Marketing .. ؟

جودة منتجك .. و طريقة تعاملك مع العملاء .. و خدمات ما بعد البيع .. واسلوب التسويق المبتكر .. و غيرها من الاسس اللى بيتبني عليها نجاحك مش هتؤتى ثمارها على المدي البعيد الا لو كان عندك شعار مميز ثبت فى ذهن عميلك و مع الزمن بدأت تبني معاه ثقة كل ما يشوف ال logo بتاعك .. و يبقي عنده فضول يعرف كل جديد عن خدماتك او منتجاتك او حتى اخبارك بمجرد ما تيجي علامتك التجارية قصادة ( حاول تسقط الكلام دة على مثال حي قصادك و ليكن شركة Apple )

و بالتالى ممكن نلخص اهمية وجود “شعار” مميز للحاجة اللى انت شغال عليها فى :
1- الانطباع الاول .. ” الجواب بيبان من عنوانه ” : و بالتالى كل ما الشعار الخاص بيك كان احترافي و فيه فكرة .. زاد احترام عميلك و اعجابة بال Brand بتاعتك .. و اتسبب فى اثارة فضول آخرين و تحويلهم لعملاء ليك
2- الثقة : كل مرة بيجرب عميل فيها منتجك و بيعجبه .. احتمالية انه يرجعلك تاني و يجرب منتجات جديدة لو شاف ال logo بتاعك بتزيد اضعاف .. و بتوفر عليك مجهود و تكلفة التسويق للمنتج او الخدمة الجديدة
3- المنافسة : تخيل ال Logo المميز بتاعك .. وسط شعارات معدومة الاحترافية او الفكرة لمنافسين ليك مش حاطين احترافية الشعار الخاص بيهم كأولوية .. تتوقع العميل هيروح لمين !

طيب انا على قدي فى الفوتوشوب و مفيش ف بالي فكرة مميزة لشعار .. !؟

بسيطة ادي العيش لخبازه ^_^ ووظف عندك حد يكون ليه خبرة ف تصميم الشعارات و صمم فوق ال 100 شعار و ليه خبرة فوق السنتين و اتناقش معاه بفكرتك و الالوان اللي تفضلها و اديله كل التفاصيل عشان يكون قادر يحول تخيلك لواقع بلمسة احترافية يحط فيها خبرته
لأ ما اهو احنا بردو لسه حاجة صغيرة و معندناش قدرة نجيب موظفين ؟ و مش قد تحمل تكلفة تصميم شعار و مصمم محترف !
حاول تتناسي الاعتقاد التقليدي عن التوظيف .. لانك ممكن تستعين ب Freelancer يشتغل معاك عن بعد بالمهمة مش بمرتب .. و كلمة التكلفة مش مناسبة على 5$ ( اقل من 50 جنية مصري ) لانك تقدر فعلياً تقدر تحصل على تصميم احترافي لشعار بميزانية تبدأ من 5$ لو اعتمدت على موقع زي خمسات ^_^

http://goo.gl/qX0QKk

نعم ! 5$ .. دة اكيد هيبقي شعار اى كلام ؟
بداية خمسات و مواقع الخدمات المصغرة .. دي تقدر تعتبرها اسواق كبيرة بتسمح للFreelancers و اللى عندهم مهارات انهم يقدموا خدماتهم مقابل 5$ .. و بتلعب دور الوسيط بينهم و بين اللى محتاج الخدمات دي .. و بتضمنلك جودة العمل و رضاك التام عنه و ضمان استرجاع حقك
و بخصوص السعر البسيط .. فـ دة لان بعض المصممين بيحاولوا يبنوا لنفسهم اسم و اكبر قاعدة عملاء ممكنة و ينافسوا المصممين اللى اقدم منهم .. بجانب ان 5$ يعتبر مبلغ كبير فى بعض الدول

خمسات مش الموقع الوحيد اللى ممكن تعتمد عليه فى تصميم شعار بميزانية 5$ .. فى مواقع تانية كتير .. لكن خمسات يعتبر الافضل بسبب الدعم الفنى الممتاز .. ووسائل الدفع المتنوعة ( Credit & Debit cards – Paypal ) .. التواصل بالعربي مع مستقلين و مصممين عرب عندهم قدرة افضل على استيعاب طلبك و تنفيذة .. بجانب الميزانية البسيطة اللى هتمكنك انك تطلب من اكتر من مصمم و تنوع فى الاساليب و الافكار بحيث تطلع بأفضل نتيجة بميزانية بسيطة 10$ او 15$
دي كل الخدمات الخاصة بتصميم الشعارات تقدر تختار الانسب منهم ليك عن طريق تقييم البائع و عن طريق اطلاعك على سابقة اعمالة و تعرفك على افكارة و اساليبة المستخدمة فى التصميم
http://goo.gl/G2R4kK

بعد ما اخترت الانسب ليك .. دة شرح ازاى تشتري خدمة من خمسات ؟ :
http://goo.gl/SqyCK0

ياتري كام مرة اندهشت لما بتلاقي Google  فاهمك و عارف انت عاوز اية ؟ ^_^.. مجرد ما تكتب اول جزء تلاقية بيقترح عليك و يكملك .. ببساطة دي خدمة ” Google Auto-complete ” اللى اخترعها و نفذها فريق جوجل الأسرائيلي ^_^ قبل ما تندهش اكتر ! .. ياتري فاكر جهازك القديم اللى كان البروسيسور بتاعه Pentium 4  أو Centrino .. المعالجات دي اتطورت و اتصنعت بالكامل فى Intel اسرائيل ..

خد التقيلة عارف الفلاشة اللى معاك ” الـUsb flash memory  ” .. اختراع اسرائيلي ^_^

أندهشت و لا لسه ^_^ الكيان الصهيوني اللى عمره ميتجاوزش ال 70 سنة قدر يحقق دة كله و اللى بيمثل 1% من الحقيقة .. اللى بتتمثل فى طفرة اقتصادية هائلة نتيجة للمشاريعة الناشئة و اللى استحقت عليها لقب ” Startup nation  | آمة المشاريع الناشئة ” .. باكتر من 4800 شركة ناشئة .. و 250 شركة جديدة بيتم انشائها سنوياً .. و اكبر تجمع لشركات تقنية فى العالم ” فى مكان واحد ” بعد Silicon valley  .. و اكتر من 70 شركة منها مدرجة فى البورصة الامريكية NASDAQ  ” اكبر عدد شركات عالمياً ”

بالتأكيد الكلام اللى فات مش ترويج و لا اعجاب بانجازات الكيان الصهيوني “اسرائيل” !! .. الكلام اللى فات محاولة لمعرفة الاسباب اللى وصلتهم لكدة .. و الاستفادة منها و تطبيقها ..

الاسباب اللى لو استبعدنا منها .. الامور السياسية و الاقتصادية .. هيتبقي لنا ” التعليم ” و ” البحث العلمي والتكنولوجيا ” و اللى بيتصرف عليه 5% من الناتج القومي ” اعلى نسبة فى العالم !”

و اللى نتايجة ظهرت ف :

• اكبر معدل للباحثين و العلماء فى التقنين فى العالم موجودين فى اسرائيل بمعدل 145 مقابل كل 10,000 نسمة .. اعلى من اليابايان و امريكا بمعدلات 85 و 83 من كل 10,000 نسمة
• 7 جامعات اسرائيلية فى قائمة افضل 500 جامعة فى العالم .. و 3 منها فى قائمة افضل 100 جامعة فى العالم

واحدة من الجامعات دي ” Technion – Israel Institute of Technology ”  و اللى بتقدم حالياً كورس Online  على منصة Coursera .. اسمه ” From Idea to Startup ” .. ” من مجرد فكرة .. ل شركة ناشئة ”

و اللى الهدف منه تحويل الفكرة اللى ف راسك لخدمة و منتج حقيقين بتقوم عليهم شركة تكبر و تحقق ارباح.. من خلال استراتيجات و ادوات ابداعية .. بجانب مهارات التواصل و البيع ..

الكورس : https://www.coursera.org/learn/startup-entrepreneurship-from-idea-to-startup

فعلياً أترددنا كتير قبل ما نشارككم بيه .. لكن الحقايق اللى فوق كانت كفيلة انها تنهي مرحلة التردد .. خاصة و اننا بنقابل عكسها فى مجتمعنا .. و اللى هدفنا الرئيسي فى ” وادي المشمش .. ( المجتمع الموازي ) ” بيتمثل فى تقديم حلول ليها .. و اللى هيكون المرة دي بالاستفادة من العدو و طريقة تفكيرة و الاسباب اللى وصلتله للنجاح دة ” زي ماهو قاعد بيدرسنا طول الوقت !! ”

للتوضيح الكورس من اكثر الكورسات تقييماً فى مجال ال Entrepreneurship  و ال Startups  .. الكورس  بال English  .. ومترجم بال English  ” Subtitles  ” تسهل الفهم للى مستواهم فى ال English  كأستماع و فهم نص نص #ملكش_حجة

بعد ما عرفت يعني اية Freelancing وخدت فكرة مُجمَلة عن مشوارك فيه .. و سواء بدأت او لازالت فى نقط مبهمة بالنسبة ليك و معطلاك .. فـأنت لازم تتعلم إزاي “تسعّر نفسك” !!

بالظبط زي ما قريت تسعّر نفسك..لازم تبقى عارف قيمة شغلك اللي بتقدمه للعميل ك Freelancer وتستحق كام عليه.

خلوني احكيلكم قصة بسيطة فى البداية 

2 مصممين بيدخل لهم كل شهر من شغل الفريلانس 6000 دولار…الإثنين بيستخدموا نفس الأدوات وبيحثوا علي شغل في نفس المواقع وبيقدموا مشاريع بنفس التوقيت والكفاءة…الفرق اللي بينهم -وهوة فرق شاسع مش هيّن- إن الأول بيشتغل 60 ساعة في الأسبوع والتاني من 20 ل 25 ساعة بس في الأسبوع.

الإثنين دول بيمثلوا نفس الشخص بس بفرق 6 شهور. الشخص دة بيحكي إنه كان بيشتغل 60 ساعة في الأسبوع وبيكسب شهريًا 6000 دولار وبعدها ب 6 شهور فضل يكسب نفس المبلغ بس بعدد ساعات شغل أقل ومشاريع أقل؛ بقي عنده وقت للعائلة والأصدقاء ووقت لنفسه يتعلم ويقرأ وكمان يرتاح ويستمتع بالفلوس ^_^

الشخص دة في أول شغله كان حاطط سعر لنفسه بالساعة..في فترة كان سعر ساعته 60 دولار. مرة جاله مشروع تصميم موقع..الموقع خد منه 3 ساعات فقبض 180 دولار هوة كان راضي بالمبلغ وصاحب المشروع عجبه الموقع.

فكر بعدها إن فيه مصممين بيتقاضوا آلاف في الموقع الواحد -لو فعلًا بالكفاءة المطلوبة- فقرر إنه يلغي نطام الساعة وإنه يشتغل بالكفاءة!! أول موقع صممه بعد موقع ال 3 ساعات كان موقع خد عليه أضعاف أضعاف المبلغ الأول وخلصه في حوالي 5 ساعات لإنه كان يستاهل وشغله كويس بس معرفش يسعّر نفسه صح من البداية!!

** أول درس تتعلمه إنك تحط لنفسك سعر تقريبي لتعبك وكفاءتك ومستوي الشغل اللي بيطلع من تحت إيدك سواء ترجمة أو كتابة أو تصميم أو برمجة ..إلخ وتفضل سايب الباب مفتوح لحد ما تعرف تفاصيل المشروع لإنه ممكن يستحق رقم أعلى.

تفاصيل المشروع

لازم تعرف أغلب تفاصيل المشروع قبل الإتفاق علي (الفلوس والوقت اللازم لتنفيذ المشروع). أسأل العميل بعض الأسئلة عن المشروع وتفاصيله كاملة بحيث تحدد هياخد منك وقت ومجهود قد إيه ولو بشكل تقريبي وتبلغه بالوقت والفلوس، أو تقدر تتفاوض معاه عليهم. التفاصيل مفيدة علشان لو العميل طلب منك تحدد انت الديدلاين بنفسك. طبعًا مش تزود جدًا عن المعتاد علشان مش يرفض، ولكن ضيف علي عدد ساعات المشروع الأصلية ساعات الراحة الخاصة بيك وساعات المشاريع الأخري اللي مازالت قيد التنفيذ. غلطة كبيرة بيقع فيها أغلب المستقلين إنهم يقبلوا بكم مشاريع كتير في وقت واحد ويضيعوا ما بينهم بفوات الديدلاين ويبقوا زي ما بيقولوا “لا طولت بلح الشام ولا عنب اليمن”!!

علي سبيل المثال: لو هتكلم عن الترجمة -مجالي- ترجمة النص القانوني غير النص العام غير النص العلمي…ممكن أترجم نص عام 300 كلمة في ساعة وممكن 300 كلمة طبية في 3 ساعات!!! العام هترجمه بدون اللجوء للقاموس كتير علشان خبرتي فيه والطبي هيجهدني من كتر القواميس والمراجع.

كفائتك وجهدك ووقتك بيحددوا السعر

الوقت

العميل ملوش دعوة خلصت المشروع في 10 ساعات ولا 10 ايام من المدة اللي حددتوها في الإتفاق..ممكن مشرع ياخد منك أسبوع تدي العميل معاد أسبوعين علشان تلحق تخلصه و تظبط أمور تانية وعلشان مترفضش مشاريع افضل ممكن تجيلك في نفس الفترة. لو العميل وافق علي إسبوعين تمام بس ميخصوش إشتغلت الأسبوعين كاملين علي مشروعه ولا خلصته في يومين!! أهم حاجة نتيجة المشروع وقبل الديدلاين!!

وهم الخبرة

تأكد إن العميل لا يلزمه شئ من سنك سواء 15 أو 50 سنة.كلمة “خبرة” بقت منتشرة جدًا ومطلوبة مؤخرًا…الحقيقة إنها بتطلب للضمان بس إن المشروع هيتنفذ ويخرج بشكل كويس…طب والمبتدئ في أي مجال يجيب منين الخبرة من غير ما يجرب وينفذ كام مشروع يستفيد من أخطائه فيهم ويقدّر قيمة شغله ويعرف كفاءته منهم. أي عميل يحاول يقنعك بإن سنك مش مناسب اقنعه بكفاءتك وبمدي مرونتك في المشروع بحيث لو سلمته ومحتاج تعديل هتعدّل فيه. اقنعه بعدد المشاريع اللي خلصتها وإعرضها عليه كنماذج حتي لو شاركت فيها حتي لو عملتها بمقابل ضئيل أو بدون مقابل، حتي لو لسة عندك 20 سنة.. الخبرة بتيجي بالتجارب مش بالسنين.

رحم الله إمرئ عرف قدر نفسه

أغلب الناس بتغلط في التسعير يعني لو العميل عايز المشروع يخلص في شهر ويدفع 1000 دولار، المستقل يقول له هخلصه في أسبوع واحد وأخد 2000 دولار..العميل يغلط غلطة أكبر ويوافق وبيضغط الفريلانسر من دول علي نفسه ولا ياكل ولا يشرب ولا يعرف ينام إلا إما يخلصه في خلال 10 أيام علشان ياخد ال 2000 دولار…اللي بيحصل كالآتي:

*المشروع مش بيطلع بالكفاءة المطلوبة والعميل يا إما هيتخانق معاك علشان تعدله يا إما هيقفل الباب وراك ومش هيرجع لك في أي مشروع تاني مشابه ولا يرشحك حتي لعميل تاني!!

*حتي الفلوس اللي خدتها زيادة وفرحت بيها هتصرفها علي تعبك وإرهاقك في الفترة اللي ضغطت نفسك فيها، مش هتحس إنك عملت إنجاز وصفقة كويسة بعد التوتر والقلق والهم اللي كنت فيه علشان المقابل كان جزء من صحتك.

السعر الدارج في مجالك

لازم تبقي عارف في نفس مجالك الناس بتقبض كام ومتنزلش عن السعر المحدد وتبخس بنفسك.

طب هوة في البداية أوي يعني من أول مشروع وتجربة ليك مسموح تنزل السعر عن العادي ب 30% مثلًا لإن هو زي تكنيك عند العملاء يقلبوا بمبتدئين في المجال علشان بياخدوا فلوس أقل. ولكن من بعد أو أو تاني مشروع تثبت فيه كفائتك لازم ترفع سعرك للمستوي الطبيعي علشان بعد تنفيذ أول مشروع انت مبقتش “مبتدئ” علي الجانب الآخر مش تطلب مبالغ عالية جدًا أكبر من كفاءتك وقدرتك وغير معقولة إطلاقًا علشان دة إسمه “نظام تطفيش” وإنت الخسران!!

شخصية العميل

شخصية العميل مهمة جدًا..دة شخص إنت بتخدمه طول فترة المشروع ممكن يكون متطلب أو إستغلالي..مش معني إنك بتخلصله شغل وإسمك موظف مؤقت عنده ينسيك كفاءتك ومهارتك اللي دفعوه يختارك من وسط مئات كان ممكن هما اللي يخلصوله المشروع..ياريت بس مش تقلل من شأنك مقابل الفلوس لإنك كدة مش هتنول رضاه!! فلوسك من حقك و في مقابل شغلك..المعاملة الإنسانية دة شئ أساسي سواء اتفقتوا او اختلفتوا ولازم يكون فيه إحترام متبادل خارج نطاق الفلوس.

الزتونة إنك تسعّر نفسك على أساس (كفاءة شغلك – تفاصيل المشروع – وقتك – مجهودك)

كام مشروع و فكرة ما اتنقلوش لأرض الواقع بسبب قلة رأس المال؟ كام مشروع وفكرة وهدف فضِل مكانهم عقلك وبس لإحتياجك لـ رأس مال؟

طب مسألتش نفسك كام مشروع تجاري بدأ بـ رأس مال كبير وبملايين وخسِر ومبقاش له وجود في اللحظة دي ؟!

إذًا وجود رأس مال من غير خطة مدروسة مش دا إللي هيخليك صاحب ملايين وبيزنس كبير … لكن وجود فكرة وخطة مدروسة مع قلة رأس مال هيخليك صاحب ملايين وبيزنس محترم

عشان كده دول  8 خطوات هيساعدوك تبدأ مشروع الصغير بـ أقل رأس مال ممكن :

1. اِشتغل في إللي تعرفه:

في البداية حاول يكون شغلك في اللي تعرفه و “تفهمه” وهتستخدم فيه مهاراتك وهتتقدم فيه بمعارفك الشخصية، و دا أفضل من إنك تعتمد على مساعدات خارجية في حاجة متفهمهاش.

= اِستغل خبرتك الشخصية.

2. قول للي حواليك إنك فاهم بتعمل إيه:

أهلك – أصدقائك – أصحابك – زملاء عملك القديم لازم يكونوا على علم بعملك الجديد ، ودي بقت حاجة سهله خصوصًا في ظل الإنترنت ورسائل الميل والتكنولوجيا ف اِستغلها في إنك تكبّر جمهورك .

= يعني من الآخر – سَوّق لـ نفسك

3. اصرِف في الضروريات بس:

هيبقى عندك مصاريف ضرورية ومصاريف غير ضرورية , حاول تقلل من المصاريف الغير ضرورية خاصًة إن إنت لسه في البداية، وقدرتك على الإقتصاد هي اللي هتساعدك تكبر أسرع بمال أقل.

4. مترميش نفسك في دوامة الديون:

كونك هتبدأ في شغل خاص دا معناه إنك هتحتاج بعض الأجهزة والأثاث والتليفونات في وقت سريع، بس دا مش معناه إنك ترمي نفسك في دوامة الديون وربحك كله يروح في تسديها.

حاول تشوف الطرق التجارية الذكيه إللي تسهّل عليك المهمه دي، وربحك يروح في إنشاء شغل جديد .

5. إتأكد إن المستحقات إللي عليك مش هتبلعك:

لو شغلك هيكون في مجال الإستشارات والمنتجات والتجارة… لازم يكون عندك خطة دفع وتسديد وإستلام مدروسة عشان متبصش تلاقي نفسك غرقان وتايه، ودا هيوديك لـ سكة الخسارة وقلة ثقة العملاء فيك.

6. متشتغلش من غير مقابل:

كل شغل هتعمله لازم يكون له مقابل، وإلا هتلاقي نفسك ومجهود في الاخر لاشئ – ابنِ نفسك واكبَر وفي فس الوقت خد مقابل لعملك ومجهودك.

7.استفيد من الدعاية المجانية والتسويق:

زي إنك تستخدم وسائل الإعلام الإجتماعي وتتفاعل مع عملائك أو المستهليكن أو إنك تعرض منتجك أو إستشارتك ، أو تستخدم السوشيال ميديا وتتواصل وتتفاعل معاهم وتستجيبلهم وبالتالي هتكسب ثقتهم.

8. خليك جاهز للزحمة:

كونك هتبدأ شغل خاص بـ رأس مال قليل فـ دا هيخليك تباشر عملك بنفسك وبالتالي هتتكلم مع العملاء والموظفين وتستقبل الدعوات، وتراجع الفواتير والحسابات , ودا هيتطلب منك جهد أكبر وطاقة أكبر.

متخليش قلة رأس مالك ترجّعَك عن أفكار جديدة وعظيمة وكبيرة، هتقابلك صعوبات وإحباطات لابد منها المهم إنك متيأسش ومتتراجعش.

هل يجب ان تبدأ بأقناع المستثمر بما سيستفيده  بالاستثمار معك ؟ أم ان تقوم  بطرح فكرتك  وكيف ستستفيد هي من هذا الاستثمار ؟ .. و الذي سيعود بالتأكيد بالنفع على الطرفين؟

دعني اوضح لك بعض الحقائق:

عندما تعرض مشروعك على مستثمر فإنه يقرر منذ البداية إن كان سيستثمر معك أم لا , مع صعوبة تغير رأيه لاحقا فى الغالب , حتى و إن تركك تكمل عرضك لباقي مشروعك أو فكرتك .

الأساسيات التي يركز عليها أغلب المستثمرين ,  أولها أنت و شخصيتك و طريقتك في العرض و الأقناع  .. المستثمر يستثمر بك أنت شخصيا أكثر من استثماره بالمنتج و لذا قد لايكون يثق 100% بمنتجك و بمدى نجاحه وهو يخاطر معك أنت شخصيا لانه تأكد من قدراتك للوصول النهائي أو في حال الفشل فإنك قد قمت ببذل كل ما تستطيع .

لو أعجب المستثمر بفكرتك فأنه سيبدأ بالتفكير معك واضافة المزيد عليها , مثلا (يمكنك أيضا استخدام الطريقة التالية أو يمكنك استهداف السوق الاضافي ) ..

أما لو لم يعجب بك المستثمر فإن أسئلته ستكون (ماذا عن العقبة الفلانية أو ماذا عن المنافسين أو كيف ستتعامل مع التحديات التالية) .

يبحث المستثمر دائماً عن النجاح و الصفقات الناجحة .. ومن منا لا يفعل ؟ .. قدم له أدلة اضافية للاقتناع بك أو بفكرتك أو بشركتك .. عليك أن تثبت مدى إيمانك بما تقدم و مدى شغفك به و إلى أي مدى تود الوصول ؟

المقالة التالية هي بالاصل جزء من مقالة المدون / محمد بدوي :
http://www.badwi.com/blog/?p=1433

لية ؟؟ وادي المشمش ؟

– لان مجتمعنا شايف ان قمة النجاح هو الحصول على وظيفة بمرتب عالي .. وان اى محاولة خارج الصندوق هى “جنون” و ان مصيرها ” تفشل ”

– لان مجتمعنا اصبح هوائه ملوث برائحة الاحباط و ترابة مخلوط ببقايا احلام و افكار مشفتش النور .. انتهت عند كلمة ” ده ف المشمش ” او ” انسي ” !!

-لان مجتمعنا مُفتقر للخبرات و المهارات اللازمة لتحويل تلك الاحلام و الافكار لواقع

-لان سبب فشل و تأخر نجاح الكثير من الافكار دي .. نقص الدعم المادي و المعنوي

و اسباب كتيرة ..
هنوفر وقت كتابتها فى محاولة للقضاء عليها .. بداية من :

1- لقاءات اسبوعية و شهرية لاصحاب الافكار و المشاريع .. و عرضها على المهتمين و المستثمرين .. لتقديم الدعم المادي و المعنوي

2- توفير الخبرات اللازمة و الاستفادة من الخبرات السابقة عن طريق :
– الدورات و الكورسات فى كل محافظات مصر “مجاناً”
– تواجدنا online (عبر الموقع الرسمي .. و الشبكات الجتماعية )

3- توفير مساحة عمل مشتركة ” مجاناً ” .. لتحفيز اصحاب الافكار و المشاريع على العمل فى بيئة مُحفزة ( و لاضع لك تصوراً مبدأياً قبل ان تصبح جاهزة .. تصفح صوراً لمكاتب جوجل و انطباعات موظفينهم ) (قريباً بالقاهرة )

4- توطيد العلاقة و تكوين صداقات جديدة بين “المُختلفون” اصحاب الاحلام و الافكار فى مجتمعنا

و المزيد بأذن الله من اجل نخلق مجتمع جديد قائم على العلم و العمل .. مجتمع خالي من كلمة مستحيل .. مجتمع كل الافكار و الاحلام فيه ممكنة بالاجتهاد و العمل الجماعي