لو انت طالب او لسة متخرج  والدنيا ملخبطه معاك ومش عارف تبدا منين ولا تروح فين خليني احط بين ايديك النهاردة طرف الخيط اللي ممكن تمشي عليه وتوصل وتحقق كل احلامك …
لازم تعرف انك لو عايز تبني لنفسك كارير محترم تحقق دخل كويس الموضوع مبقاش مقتصر علي انك تقعد علي مكتب وتترقي لا انت ممكن تعمل كده وانت في بيتك كل اللي محتاجه انترنت وجهاز كمبيوتر وتكون عندك المبادئ الاساسية للتعامل مع الانترنت وهاتقدر تتعلم تشتغل وتكسب كمان وساعتها هايبقي اسمك فري لانسر
خلينا ندخل في الموضوع علي طول ونعرف يعني ايه فري لانسر

ببساطة لو انا شخص محتاج خدمة معينة ومش هاعرف اعملها او معنديش وقت بعرض عليك انك تعملهالي بمقابل مادي بنتفق عليه من خلال مواقع كتير زي fiverr, upwork, freelance وده بيكون بمثابة الويسيط بيننا اللي هاينظم تعاملاتنا

طيب الخدمات اللي ممكن تتطلب منك ايه ؟ …. اي حاجة تقدر تعملها ممكن تتخيلها ! رسم .. كتابة .. ترجمة استشارات .. تصميم  … برمجة وانت وشطارتك كل مامهاراتك زادت كل مالطلب عليك بيزيد والشغل يكتر
يبقي كده عندنا 3 اطراف الموقع ومقدم الخدمات(انت) والمستفيد من الخدمات (ممكن يكون شخص او شركة )
شركات كتير بتفضل انها تطلب خدماتها زي مثلا تصميم لوجو ليها عن طريق المواقع دي وبتحط ارقام كبيرة كمقابل
طيب ليه هاتعمل كده؟

اولا : ده سوق مفتوح من كل جنسيات العالم يعني عدد كبير من المواهب والمهارات وحلول كتيرة وابداع كتير ثانيا : لان تكلفتها علي الشركات بتكوم قليلة بالمقارنة بفريق عمل عندها مثلا هايصرف مرتبات وبدلات وتامينات وغيره

ثالثا :مدة التنفيذ اسرع فالكل مستفيد

طيب لو انت لسة اول مرة تسمع عن الموضوع ؟ اكيد هتسال ابدا منين ؟
ده اللي هانعرفه المقال الجاي هناخد موقع موقع بالتفصيل و الخدمات اللي ممكن تقدمها واحدة واحدة
تابعونا

بتشتغل Freelancer .. بتعدى عليك ايام بتكون مضغوط في الشغل .. وتعدى عليك ايام تانية مفيش اي عميل بيطلب منك اي شغل !! بتمر بفترات احباط وملل .. أطمن ..اغلب الناس اللي بتشتغل فري لانسر بتعاني من الموضوع ده

وده شئ طبيعي بالنسبة للعمل الحر انك ايام تشتغل وايام لا .. انت مش شغال في وظيفة حكومية وبتاخد مرتب ثابت ولا شغال في شركة خاصة 12 ساعة في اليوم  وبتاخد ملاليم .

انت هنا صاحب شركتك الخاصة اللي بتديرها من البيت ^_^

في عميل طلب شغل هتشتغل لكن لو مفيش عميل طلب شغل ده معناه انك مش هتشتغل برضه وهتفضل قاعد محلك سر وتمر الايام  في انتظار عميل يطلب خدمتك ؟

من الذكاء انك تستغل الايام اللي مفيش شغل فيها بدل ما تدخل في حالة احباط استغل الفرصة .

ايوه وقتك الفاضي كـ فريلانسر يعتبر فرصة … تعالي نتعرف ازاي تستغل الوقت الفاضي اللي مفيش فيه شغل وتحوله لصالحك

لغتك التانية ضعيفة ومحتاج تقويها … يبقي مفيش انسب من الوقت الفاضي انك تشتغل علي اللغة وخاصة الانجليزية المطلوبة في التعامل علي اغلب مواقع العمل الحر .. طيب لغتك الحمد لله ممتازة ليه متتعلمش لغة تانية تعزز فرصك اكثر في طلب خدماتك.

اكيد كمان  وانت بتتابع مواقع العمل الحر لاحظت ان في خدمات عليها طلب كثير زي البرمجة مثلا ليه متحاولش تستغل وقتك في تعلم البرمجة ولو انت عارف لغة برمجة ليه متزودش في المعرفة وتتعلم لغة برمجة تانية وتنمي مهاراتك فيها وتوصل لدرجة الاحتراف بحيث تعرف تضيفها لخدماتك علي مواقع العمل الحر

طيب فكرت تعمل موقع .. او عندك موقع او مدونة  واهملت النشر فيها لانشغالك .. جه الوقت انك تهتم بيها وتربطها بمواقع التواصل الاجتماعي وتكتب فيها خبرتك والشركات اللي اتعاملت معاها وكل حاجة ليها علاقة بمجالك كـ فريلانسر.

انت عارف كمان ان تقدر تستغل وقتك الفاضي انك تعلم غيرك المجال اللي بتشتغل فيه عن طريق فيديو علي اليوتيوب او شرح علي موقعك وتفيد غيرك .

انت كمان تقدر تعمل كورس تعليمي في مجالك و تستفيد من عائد مادى  من خلال عرضه علي منصة SkillShare

https://www.skillshare.com/

حاول تستغل وقتك الفاضي في التفكير خارج الصندوق انت مش هتفضل كثير تشتغل لحساب الغير وتبني مشروعاتهم الالكترونية … فين مشروعك انت جه الوقت اللي تفكر فيه في بناء حلمك .

متستهونش بالاجازة و تغيير الجو 

بعد ضغط الشغل هتحتاج اجازة تعيد فيها ترتيب اهدافك وتنظيم اولوياتك والتخطيط للمستقبل وبنحتاج نعمل تغيير شامل لحياتنا لان حياة الفري لانسر مش مجرد اله تدوس علي الزر تطلع شغل ده بني ادم محتاج للترفيه عن نفسه والتغيير من الروتين والضغط اليومي وتصفيه ذهنه علشان يقدر يواصل العمل .

الطريق المعتاد لاي حد حابب يبدأ كـ فريلانسر انه بيتجه لمواقع العمل الحر الاعتيادية زي موقع Upwork  ويتفاجئ انه دخل طريق مليان منافسين ومحترفين جدا بالنسبه له .. وهو بدون سلاحه من الاحترافية و وجود معرض اعمال يدل علي خبرته في المجال

ويرجع يشتكي ان مفيش شغل وان الحسابات اللي علي الموقع بتتقفل ويصاب باحباط شديد … عشان كده النهاردة معانا فريلانسر اتجه لطريق مختلف من خلال العمل علي مواقع المسابقات .

ابو الخير محمد قرر يحكلنا تجربته فى مجال الجرافيك واد ايه استفاد من مواقع المسابقات ….لانه لما بيقدم في المسابقة بيشتغل فعليا ويحسن مستواه ويطور من شغله وده مفيد جدا للمبتدئين .. و بيقول انه بدأ من عام 2014 من خلال موقع المسابقات الالماني designenlassen

لانه بيعرف المانى وعلشان الناس اللي بتزهق بسرعة .. ابو الخير اشترك في 200 مسابقة فى خلال 7 شهور يعني اشتغل فعليا 200 لوجو قبل ما يكسب اول مسابقة ليه ^_^ … اللي هو احنا بنحبط ونفقد الثقة في نفسنا من مجرد رفض خدماتنا اللي مشتغلناش ولا تعبنا فيها اصلا علي مواقع العمل الحر

وطبعا لما بيشوف اول لوجو اشتغله في المسابقات واخر لوجو بيعرف انه كل مدي بيتقدم ده غير انه بيتعرف علي شغل المحترفين ويستفيد من تطوير مهاراته

لان تصميماته كانت بتاخد نجمة واحدة لمدة 3 شهور بعد كدة نجمتين وتلاتة بعد كدة دخل المنافسة مع ناس محترفة وعندها خبرة .. وبدا ياخد كورسات علي منصة  udmey علشان ينمي مهاراته ويحترف اكثر

https://www.udemy.com/photoshop-arabic/?couponCode=WOMENCANDOIT2017

وعلشان احنا دايما بنستهين بالكورسات الاون لاين …..واغلبنا بيعتبرها مش مهمة زي الكورسات المباشرة اللي اسعارها مرتفعة وبتسبب ضياع وقت ومجهود كبير

لكن هو اقتنع ان بوابة الوصول للاحتراف في مجاله من خلال التعليم الالكتروني

حتي لما كانت بتقابله اي مشاكل في شغله كان بيبحث علي الحلول من خلال الانترنت

وعن الكورسات اللي درسها اون لاين واستفاد منها كورسات علي موقع ليندا

https://goo.gl/jKtud4

https://goo.gl/6j5IiY

ومجموعة كورسات علي قناه creatnprocess علي اليوتيوب

https://www.youtube.com/channel/UC9jcqrmogdYp7BsUpMVl09w

وبعد ما اكتسب خبرة واصبح عنده معرض اعمال لشغله اشترك في موقع Upwork

واول يوم قدم فيه علي شغل اتقبل فورا لان العميل شاف ان شغله محترف وليس شغل مبتدئين

وبينصح المبتدئين في المجال انهم يبدأوا في مواقع المسابقات علشان يتعلموا ويكتسبوا خبرة

ومش بس كدة بينصحهم انهم طول الوقت يتعلموا حاجات جديدة واهم نقطة لاي فريلانسر في مجال التصميمات انه يكون عنده معرض اعمال وبيرشح موقع  jimdo  المجاني ده غير انه مش محتاج اي خبرة فى الويب ديزاين

وبيرشح للمبتدئين موقع المسابقات crowdsite وبيشرحه بالتفصيل من خلال الرابط

وهنا بيشرح موقع المسابقات الانجليزي crowdspring

https://goo.gl/dOdgaR

وهنا شرح موقع designenlassen الالماني بالتفصيل

https://goo.gl/quey7J

وفي النهاية حاول دايما تدور علي المجال اللي بتحبه ويعتبر هوايتك لان مجال الجرافيك كان هوايته وفاكر انه رسم اول لوجو وهو في ابتدائي .. وكان هدفه الاساسي التعلم وليس الربح .

عاوزة تشتغلي ومش لاقية شغل؟
عاوزة تشتغلي وفي نفس الوقت عندك مسؤوليات تانية خايفة تتأثر؟
الاسئلة دي بتدور جوا دماغ ستات بيوت كتير، اللي بتبقى نسبة كبيرة منهم سابوا الشغل عشان مسؤوليات بيتهم.
في الفترة الاخيرة ومع انتشار فكرة ال Freelancing .. اصبح هو الحل الامثل لـ ستات البيوت اللي عايزين يشتغلوا من البيت ويحافظوا على مسؤولياتهم.

طيب خلونا نفهم الاول يعني ايه فريلانسر؟
انك تبقي فريلانسر معناها انك تبقي موظفة مستقلة، تابعة لنفسك مش لاي شركة، انتِ اللي بتختاري الشغل اللي عايزاه، بتختاري الوقت اللي هتنفذي فيه الشغل ده .. الا في بعض الحالات بيكون العميل عايز الشغل في وقت محدد ، وبتحددي العائد المالي اللي هيرجعلك، والاكيد مع اهم ميزة انك بتشتغلي من اي مكان يريحك، اللي هو غالبًا بيكون البيت.
و اللى ممكن نختصر مميزاته في انه شغل بتقدري تشكليه بما يناسب ظروفك تمامًا.

ازاي ابدأ؟
خلونا نقسم البداية لجزئين: جزء التعلم، وجزء التسويق والبحث.

في جزء التعلم لازم تبدأي تحددي انتِ شاطرة في ايه وعندك مهارات ايه، ويكون كويس جدًا وفي صالحك لو بصيتِ على سوق العمل الحر عشان تعرفي ايه المهارت المطلوبة واللي عليها اقبال، والجزء الجاي هعرضلك أهم الوظائف المطلوبة واللي ممكن تشتغليها كفريلانسر، وارد جدًا يشدك مجال انتِ معندكيش فكرة مسبقة عنده ودي بتحصل لناس كتير، الميزة العظيمة في معظم وظائف الفريلانس انها قابلة للتعلم من على الانترنت، يعني حتى لو معندكيش مهارة معينة انتِ شايفة انها مطلوبة، هتقدري تتعلميها في اغلب الاوقات.

أهم الوظائف اللي ممكن تبدأي فيها كفريلانسر:
• البرمجة
من أهم المجالات المطلوبة واللي ليها فرص عمل كتير، لغات البرمجة كتير ممكن تختاري واحدة والافضل في البداية انك متشتتيش نفسك، ركزي على واحدة وحاولي تتقنيها بعدين شوفي الباقي..
ده كورس يعتبر ك مقدمة لعلوم الحاسب والبرمجة ممكن تبدأي بيه، من جامعة هارفارد
https://www.edx.org/course/apr-computer-science-principles-harvardx-cs50-ap

كورس هيشدك لكورس تاني وثالث، خصوصًا ان مجال البرمجة واسع وليه فروع كثيرة، ليه كورسات كتير متوفرة جدًا على الانترنت.

• التصميم
من أكثر المجالات المنتشرة برضو، وفروعه كتير، من اول الجرافيك ديزاين اللي بيخليكِ تقدري تصممي لوجوهات، اغلفة كتب، اعلانات، تصميم حر وغيره، لحد تصميم المواقع والمدونات، وتصميم الثري دي والانيميشن والفيديوهات، وممكن التصميم الهندسي كمان..
Udemy
من أهم المواقع اللي بتوفرلك مخزون كبير جدًا من كورسات التصميم بمختلف اشكاله، تقدري تدخلي تاخدي لفة وتختاري اللي يعجبك

الكورس دة للمبتدأين و بالعربي : https://www.udemy.com/photoshop-arabic/?couponCode=WOMENCANDOIT2017

• كتابة المحتوى
تكتبي مواضيع او مقالات لمواقع او مدونات او مواقع التواصل الاجتماعي، احيانًا ممكن تكتبي لمجلات وصحف الكترونية، وفي معظم الاوقات بيبقى اونلاين.

• ادخال البيانات

• الترجمة

• التصوير الفوتوغرافي

• التعليم الاونلاين

وزي ماقلت سابقًا، بإمكانك تدخلي على المواقع اللي بتعرض وظائف الفريلانس عشان تاخدي فكرة أكبر.
آخر نقطة في جزء التعلم هعرضلك فيها أهم المواقع اللي هتبقى مصدر كورسات في مختلف المجالات:
Coursera
Edx
Udemy
Udacity
Lynda

بعد جزء التعلم بييجي جزء تاني لايقل أهمية عن الاول، دلوقتي انتِ اتعلمتِ وبقى عندك مهارة وقدرة على تنفيذ عمل في أي مجال، الخطوة اللي بعد كده انك تبدأي تلاقي الناس اللي عايزين فريلانسرز، وازاي تبدأي تسوقي نفسك
أيون، تسوقي نفسك D:
في مواقع مشهورة كتير بتعتبر تجمع لكل الفريلانسرز في العالم، وفي مواقع عربية كمان، هعرضلك اهمهم في الجزء الجاي، بس حاليًا خليني اقولك كام نقطة مهمة بخصوص البداية والتسويق والامور المالية:
_ الموضوع في الاول ممكن يكون صعب انك تلاقي شغل، نظرًا لان مفيش خبرة ولما بيبقى عندك بروفايل على المواقع اللي قلنا عليها ومعندكيش تقييمات – يعني الناس اللي اشتغلتِ معاهم قبل كده ورأيهم في شغلك- ف طبيعي الموضوع يبقى اصعب في الاول، بس هو عايز صبر مش أكتر، وممكن ترضي في الاول بعائد مادي اقل من اللي انتِ عايزاه نظرًا لانك في الاول، بعد كده شغل هيجيب شغل وتقييمات ويبدأ اسمك يتعرف وساعتها العائد المادي هيزيد اكيد : )

_ نقطة مهمة جدًا لازم تحافظي عليها هي سمعتك، يعني ايه؟
يعني مدى التزامك واتقانك لشغلك، لان ده اللي هيفرق مع العميل بتاعك، لو عجبه شغلك ايه اللي هيحصل؟
هيشتغل معاكِ تاني : )
ممكن يجيبلك عملاء تانيين : )
هيديكِ تقييمات مرتفعة تجذب عملاء تانيين انهم هيشتغلوا معاكِ : )

وبعدين ايه اللي هيحصل؟
الزهر هيلعب معاكِ والدولارات تنهال عليكِ
_ لازم من الاول تحددي السعر اللي هتشتغلي بيه، ده مقال هيساعدك في الموضوع ده
http://mshmshvalley.com/%D8%A3%D8%AA%D8%B9%D9%84%D9%85-%D8%A5%D8%B2%D8%A7%D9%8A-%D8%AA%D8%B3%D8%B9%D9%91%D8%B1-%D9%86%D9%81%D8%B3%D9%83/
ومع الوقت والخبرة الموضوع هيبقى اسهل.
_ حددي مع العميل في الاول طريقة ونظام الدفع، ومتحرجيش تتكلمي في الموضوع ده، في ناس بتاخد عربون في الاول وبتستلم الباقي بعد مالشغل يخلص، وفي ناس لو الشغل هياخد مدة طويلة بيقسموا المبلغ لدفعات، ايًا كانت الطريقة فـ لازم تحدديها من الاول وتبقى واضحة، وتحددي الطريقة اللي هتستلمي بيها فلوسك.

دلوقتي هقولك أهم المواقع اللي تقدري تبدأي من خلالها:
الاجنبية
Upwork
Toptal
Freelancer

العربية

بيكاليكا
مخصص بشكل أكبر للمصممين والمطورين.

مستقل
من أشهر المواقع وعليه اكتر من 300 الف مستقل.

خمسات

في نهاية الموضوع، لازم نعرف ان كل شيء في الدنيا ليه جانب كويس وجانب سيء، أبرز مشكلة بتقابل معظم الفريلانسر هي مشكلة تنظيم الوقت، اليوم كله بيقلب شغل، واحيانًا ايام بتضيع من غير حاجة فـ بتؤدي لتراكم بعد كده، التشتت والضياع ممكن تحسيهم لو من الاول منظمتيش وقتك ورتبتِ اولوياتك، دي بعض النقاط المتفرقة اللي ممكن تساعدك في مشكلة تنظيم الوقت:

– حددي اولوياتك، الاهم فالاقل اهمية، لما بيبقى عندك كذا شيء مطلوب منك زائد مسؤولياتك الشخصية بتحسي طول اليوم انك تايهة وشوية من هنا على شوية من هنا وفي نهاية اليوم مفيش شيء انجز بشكل كامل، ف الحل انك تحددي ايه المطلوب يتعمل الاول، تخلصيه وتنتقلي على اللي بعده وهكذا.

– متخليش وقتك ابدًا يقلب كه شغل، لازم تقسمي مابين شغل وبيت وحياة اجتماعية وراحة، اليوم فيه ساعات ويكفي اكتر ممانتصور، بس محتاج حبة ترتيب مش أكتر.

– حددي الوقت اللي هتشتغلي فيه اليوم، اعرفي في اي وقت من اليوم بتبقي نشيطة وعندك طاقة اكتر ع الابداع وتنيذ الشغل، يحبذ كمان انك تعرفي اهل بيتك بالوقت اللي هتشتغلي فيه، عشان يحترموا ان ده وقت شغل ومتلاقيش مقاطعات كتير بتشتتك وبتقلل من انتاجيتك.

– لو بتستصعبي موضوع انك تكتبي كل يوم وراكِ ايه وايه اللي مفروض يتعمل، في فكرة احسن : )
حددي مسؤولياتك اسبوعيًا، في نهاية كل اسبوع حددي المهام اللي مطلوبة للاسبوع الجديد، ده هيخليهم في دماغك وهتبقي عارفة ايه المطلوب منك، مش مهم تقيدي نفسك باوقات معينة او ايام محددة، خلي عندك هدف ان الاسبوع لما يخلص تكون كل مهامه خلصت، ايًا كان خلصت امتى، ده بيساعد في نقطة تانية، ان احيانًا بيبقى مطلوب منك مثلًا شغل معين في يوم معين، بس في اليوم ده انتِ مش قادرة تعمليه، مش مشكلة، بتحصل عادي جدًا، عشان كده بقولك خلي عندك مرونة وخلي المهام محددة باسبوع بحيث تعمليها خلال الاسبوع في اي وقت يناسبك : )

آخر حاجة، متخليش الشغل ييجي على حساب صحتك وراحتك وحياتك الاجتماعية، بشوية تنظيم كل مسؤولياتك دي بتتشكل مع بعض بتناغم وحياتك بتمشي بشكل هادي ومستقر معظم الاوقات، مفيش مشكلة تتعبي احيانًا او تزهقي، خدي فترة راحة ومتضغطيش نفسك، عشان ترجعي تاني عندك قدرة اكبر انك تمارسي مهامك بنشاط وقدرة على الابداع.

بعد ما عرفت يعني اية Freelancing وخدت فكرة مُجمَلة عن مشوارك فيه .. و سواء بدأت او لازالت فى نقط مبهمة بالنسبة ليك و معطلاك .. فـأنت لازم تتعلم إزاي “تسعّر نفسك” !!

بالظبط زي ما قريت تسعّر نفسك..لازم تبقى عارف قيمة شغلك اللي بتقدمه للعميل ك Freelancer وتستحق كام عليه.

خلوني احكيلكم قصة بسيطة فى البداية 

2 مصممين بيدخل لهم كل شهر من شغل الفريلانس 6000 دولار…الإثنين بيستخدموا نفس الأدوات وبيحثوا علي شغل في نفس المواقع وبيقدموا مشاريع بنفس التوقيت والكفاءة…الفرق اللي بينهم -وهوة فرق شاسع مش هيّن- إن الأول بيشتغل 60 ساعة في الأسبوع والتاني من 20 ل 25 ساعة بس في الأسبوع.

الإثنين دول بيمثلوا نفس الشخص بس بفرق 6 شهور. الشخص دة بيحكي إنه كان بيشتغل 60 ساعة في الأسبوع وبيكسب شهريًا 6000 دولار وبعدها ب 6 شهور فضل يكسب نفس المبلغ بس بعدد ساعات شغل أقل ومشاريع أقل؛ بقي عنده وقت للعائلة والأصدقاء ووقت لنفسه يتعلم ويقرأ وكمان يرتاح ويستمتع بالفلوس ^_^

الشخص دة في أول شغله كان حاطط سعر لنفسه بالساعة..في فترة كان سعر ساعته 60 دولار. مرة جاله مشروع تصميم موقع..الموقع خد منه 3 ساعات فقبض 180 دولار هوة كان راضي بالمبلغ وصاحب المشروع عجبه الموقع.

فكر بعدها إن فيه مصممين بيتقاضوا آلاف في الموقع الواحد -لو فعلًا بالكفاءة المطلوبة- فقرر إنه يلغي نطام الساعة وإنه يشتغل بالكفاءة!! أول موقع صممه بعد موقع ال 3 ساعات كان موقع خد عليه أضعاف أضعاف المبلغ الأول وخلصه في حوالي 5 ساعات لإنه كان يستاهل وشغله كويس بس معرفش يسعّر نفسه صح من البداية!!

** أول درس تتعلمه إنك تحط لنفسك سعر تقريبي لتعبك وكفاءتك ومستوي الشغل اللي بيطلع من تحت إيدك سواء ترجمة أو كتابة أو تصميم أو برمجة ..إلخ وتفضل سايب الباب مفتوح لحد ما تعرف تفاصيل المشروع لإنه ممكن يستحق رقم أعلى.

تفاصيل المشروع

لازم تعرف أغلب تفاصيل المشروع قبل الإتفاق علي (الفلوس والوقت اللازم لتنفيذ المشروع). أسأل العميل بعض الأسئلة عن المشروع وتفاصيله كاملة بحيث تحدد هياخد منك وقت ومجهود قد إيه ولو بشكل تقريبي وتبلغه بالوقت والفلوس، أو تقدر تتفاوض معاه عليهم. التفاصيل مفيدة علشان لو العميل طلب منك تحدد انت الديدلاين بنفسك. طبعًا مش تزود جدًا عن المعتاد علشان مش يرفض، ولكن ضيف علي عدد ساعات المشروع الأصلية ساعات الراحة الخاصة بيك وساعات المشاريع الأخري اللي مازالت قيد التنفيذ. غلطة كبيرة بيقع فيها أغلب المستقلين إنهم يقبلوا بكم مشاريع كتير في وقت واحد ويضيعوا ما بينهم بفوات الديدلاين ويبقوا زي ما بيقولوا “لا طولت بلح الشام ولا عنب اليمن”!!

علي سبيل المثال: لو هتكلم عن الترجمة -مجالي- ترجمة النص القانوني غير النص العام غير النص العلمي…ممكن أترجم نص عام 300 كلمة في ساعة وممكن 300 كلمة طبية في 3 ساعات!!! العام هترجمه بدون اللجوء للقاموس كتير علشان خبرتي فيه والطبي هيجهدني من كتر القواميس والمراجع.

كفائتك وجهدك ووقتك بيحددوا السعر

الوقت

العميل ملوش دعوة خلصت المشروع في 10 ساعات ولا 10 ايام من المدة اللي حددتوها في الإتفاق..ممكن مشرع ياخد منك أسبوع تدي العميل معاد أسبوعين علشان تلحق تخلصه و تظبط أمور تانية وعلشان مترفضش مشاريع افضل ممكن تجيلك في نفس الفترة. لو العميل وافق علي إسبوعين تمام بس ميخصوش إشتغلت الأسبوعين كاملين علي مشروعه ولا خلصته في يومين!! أهم حاجة نتيجة المشروع وقبل الديدلاين!!

وهم الخبرة

تأكد إن العميل لا يلزمه شئ من سنك سواء 15 أو 50 سنة.كلمة “خبرة” بقت منتشرة جدًا ومطلوبة مؤخرًا…الحقيقة إنها بتطلب للضمان بس إن المشروع هيتنفذ ويخرج بشكل كويس…طب والمبتدئ في أي مجال يجيب منين الخبرة من غير ما يجرب وينفذ كام مشروع يستفيد من أخطائه فيهم ويقدّر قيمة شغله ويعرف كفاءته منهم. أي عميل يحاول يقنعك بإن سنك مش مناسب اقنعه بكفاءتك وبمدي مرونتك في المشروع بحيث لو سلمته ومحتاج تعديل هتعدّل فيه. اقنعه بعدد المشاريع اللي خلصتها وإعرضها عليه كنماذج حتي لو شاركت فيها حتي لو عملتها بمقابل ضئيل أو بدون مقابل، حتي لو لسة عندك 20 سنة.. الخبرة بتيجي بالتجارب مش بالسنين.

رحم الله إمرئ عرف قدر نفسه

أغلب الناس بتغلط في التسعير يعني لو العميل عايز المشروع يخلص في شهر ويدفع 1000 دولار، المستقل يقول له هخلصه في أسبوع واحد وأخد 2000 دولار..العميل يغلط غلطة أكبر ويوافق وبيضغط الفريلانسر من دول علي نفسه ولا ياكل ولا يشرب ولا يعرف ينام إلا إما يخلصه في خلال 10 أيام علشان ياخد ال 2000 دولار…اللي بيحصل كالآتي:

*المشروع مش بيطلع بالكفاءة المطلوبة والعميل يا إما هيتخانق معاك علشان تعدله يا إما هيقفل الباب وراك ومش هيرجع لك في أي مشروع تاني مشابه ولا يرشحك حتي لعميل تاني!!

*حتي الفلوس اللي خدتها زيادة وفرحت بيها هتصرفها علي تعبك وإرهاقك في الفترة اللي ضغطت نفسك فيها، مش هتحس إنك عملت إنجاز وصفقة كويسة بعد التوتر والقلق والهم اللي كنت فيه علشان المقابل كان جزء من صحتك.

السعر الدارج في مجالك

لازم تبقي عارف في نفس مجالك الناس بتقبض كام ومتنزلش عن السعر المحدد وتبخس بنفسك.

طب هوة في البداية أوي يعني من أول مشروع وتجربة ليك مسموح تنزل السعر عن العادي ب 30% مثلًا لإن هو زي تكنيك عند العملاء يقلبوا بمبتدئين في المجال علشان بياخدوا فلوس أقل. ولكن من بعد أو أو تاني مشروع تثبت فيه كفائتك لازم ترفع سعرك للمستوي الطبيعي علشان بعد تنفيذ أول مشروع انت مبقتش “مبتدئ” علي الجانب الآخر مش تطلب مبالغ عالية جدًا أكبر من كفاءتك وقدرتك وغير معقولة إطلاقًا علشان دة إسمه “نظام تطفيش” وإنت الخسران!!

شخصية العميل

شخصية العميل مهمة جدًا..دة شخص إنت بتخدمه طول فترة المشروع ممكن يكون متطلب أو إستغلالي..مش معني إنك بتخلصله شغل وإسمك موظف مؤقت عنده ينسيك كفاءتك ومهارتك اللي دفعوه يختارك من وسط مئات كان ممكن هما اللي يخلصوله المشروع..ياريت بس مش تقلل من شأنك مقابل الفلوس لإنك كدة مش هتنول رضاه!! فلوسك من حقك و في مقابل شغلك..المعاملة الإنسانية دة شئ أساسي سواء اتفقتوا او اختلفتوا ولازم يكون فيه إحترام متبادل خارج نطاق الفلوس.

الزتونة إنك تسعّر نفسك على أساس (كفاءة شغلك – تفاصيل المشروع – وقتك – مجهودك)