اتكلمنا قبل كده عن اهمية تعليم اطفالنا البرمجة ..
وانهم محتاجين يعرفوا التكنولوجيا اللي حواليهم بتشتغل ازاي وبكده ممكن يتحولوا لاكتر من كونهم مجرد مستهلكين بس للتكنولوجيا دي ، بجانب طبعا فرص الشغل اللي هتتفتحلهم لو اختاروا البرمجة كمهنة ليهم مستقبلاً، لكن بيبقى السؤال المعتاد ازاي طفلي ممكن يتعلم البرمجة ؟؟

احد الطرق هي استخدام المواقع المصممة لتعليم الاطفال البرمجة ، وعلشان كده على اكتر من مقال هنقدملكم قايمة بمجموعة من المواقع اللي متقسمة على حسب عمر الطفل ، واللي هتلاقوا منها مواقع مجانية ومواقع تانية فيها جزء مجاني وجزء مدفوع التمن

اولاً : مواقع لاطفال في الفترة الابتدائية :

Blockly

الموقع مجاني و للاطفال من سن 8 سنين فما فوق ، الموقع بيعلم مبادئ البرمجة وبيدي مقدمة للغة الجافا سكريبت باستخدام نهج البرمجة القائم على فكرة “block”

بيظهر للطفل على الشاشة قطع الغاز ، كل قطعة من اللغز بتمثل جزء من الكود زي كده جزء من قصة ، الطفل بيبدأ يسحب الاجزاء دي ويحطها في مكانها الصحيح علشان يعمل سلسة من الاوامر البرمجية ويكمل القصة اللي بتعمله كود البرنامج ، وبعد كده بيشغل الطفل البرنامج ويشوف النتيجة ، واللي بتكون عبارة مثلا عن شخص بيتحرك في متاهة او طائر بيطير ناحية عشه .

الحلو في الموقع ان ليه النسخة العربي بتاعته ، لكن في بعض الالعاب المتقدمة هتلاقيها بالانجليزي وعلشان كده ممكن يكون محتاج مساعدتك في الترجمة ، وعامة الموقع متصمم للاطفال اللي مافيش عندهم اي خبرة بالبرمجة وبياهلهم انهم يتعلموا البرمجة المعتمدة على اللغة النصية

https://blockly-games.appspot.com/?lang=ar

Code Combat

الموقع عبارة عن لعبة اونلاين بتعلم لغات برمجة البايثون والجافا سكريبت .. المستويات الاساسية مجانية لكن الباقي بيكون باشتراك شهري .. اللعبة هنا مستواها اعلى لانها بتستخدم البرمجة النصية فهتبقى مناسبة اكتر للاطفال الاكبر سنا .

الموقع معظمه انجليزي لكن عامة بالنسبة للاطفال لما بيجى الموضوع للالعاب فالانجليزي مش بيكون عقبة اوي قدامهم ^_^ ، وهم بدأوا يترجموا في الموقع وحتى بيطليوا من المتحدثين بالعربية مساعدتهم في كده

بتدخل على الموقع وتضغط على Play Now وتسجل حساب وتبدأ في اللعب علطول وهتلاقي ارشادات بتوجهك تعمل ايه

https://codecombat.com

Code Monkey

الموقع مناسب لسن 9 سنوات فما فوق ، الدخول للعب مجانا من زرار العب “play” ، بس هتلاقي برضه فيه اشتراكات سنوية ، الموقع بيعلب الطفل لغة CoffeeScript وهي لغة في بنائها بتشبه الانجليزي لكنها بتجمع في جافا سكريبت ، والموقع ليه نسخة بالعربي https://www.playcodemonkey.com

يوم الاتنين اللى فات 4 ديسمبر جوجل غيرت شكل الصفحة الرئيسية بتاعتها وخلته Doodle برمجية .. و هي عبارة عن لعبة معتمدة على بعض اساسيات البرمجة اللي بتستخدمها علشان تساعد الارنب للوصول للجزرات الموجودة في اللعبة ^_^

جوجل عملت الموضوع ده احتفالا بمرور 50 عاما على ابتكار اول لغة برمجة للاطفال وكانت على شكل لعبة اسمها لوغو “Logo ” و اللى تم تطويرها لتعليم الاطفال البرمجة على ايد باحثين في معهد MIT .. و من بعد اللوغو تم ابتكار اكتر من لغة برمجة هدفها تعليم
الاطفال البرمجة وتشجيعهم على دخول عالم المبرمجين من صغرهم

و بداية من 2014 دخل تعليم البرمجة في المناهج الدراسية كجزء من المنهج الاساسي في كتير من البلاد واصبح جزء من ثقافة اي بلد متحضرة ان اطفالها يكون عندهم معرفة بعلوم البرمجة وأساسياتها ، وعلشان يحسسوا الطفال بمتعة البرمجة ويقدروا يبدأوا فيها من غير تعقيدات تم ابتكار مجموعة اللغات اللي بتعتمد بشكل رئيسي على فكرة الالعاب .. الاهتمام الحالي لتعليم الاطفال البرمجة مش لمجرد انهم يلاقوا حاجة يشتغلوا فيها لما يكبروا ، صحيح ان البرمجة ممكن تكون مسار وظيفي مربح لكن مش لازم الكل يختاره .. انك تهتم بتعليم طفلك البرمجة فانت بتعلمه “ازاي يفكر” وعلى رأي مارك زوكربيرج “على خمسين سنة هنلاقينا بنعلم اطفالنا البرمجة زي ما بنعلمهم القراية والكتابة ، ونتعجب ليه ما بدأناش الموضوع ده من بدري ”

و دي مجموعة من الاسباب اللي ممكن تشجعك اكتر :

1- مخ الاطفال بينمو بصورة مستمرة ، خلايا جديدة بتتكون ، ومسارات جديدة بتعمل تشابكات ما بين الخلايا دي ،
وقدرات جديدة بتزيد مع اقتراب الاطفال لمرحلة البلوغ ، وتعلم الاطفال للبرمجة بتساعد عقولهم على تطوير
مسارات وخلايا عصبية هيستفيدوا بيها على مدار حياتهم

2- تعلم البرمجة بيعلم الطفل انه يشوف الصورة الكبيرة للمشكلة “big-picture” و يقسمها لاجزاء صغيرة ، يحط خطة
للحل ، ينفذ الخطة ، تطلعله اخطاء ، يتعلم منها ويحاول يصلحها ، وفي الاخر ينهي المهمة بنجاح.
لو لاحظت هي دي الخطوات والمهارات اللي بتتعلمها في اي كورس حل مشكلات او ادارة مشاريع بتاخده علشان
تستفيد بيه في حياتك الخاصة او المهنية اي ان كان مجالها .

3- البرمجة بيئة بتعلم الاطفال انهم يخاطروا من غير ما يخافوا من الفشل ، لقيت مشكلة حاول تحلها ، فشلت دور على
طريقة تانية وحاول من جديد ، وانا لما بعلم الطفل انه يستغل الفرص اللي بتقابله ويتعامل مع الاخطاء انا بعلمه
ازاي يتعامل مع الحياة بعد كده ، وان الخطأ مش نهاية العالم و انه ممكن يتصحح .

4- البرمجة بتعلم الطفل انه يسال على المساعدة ويدور عليها ، فبينما بنبص في ثقافتنا على ان تطلب من حد
مساعدة فده بيظهرك على انك ضعيف ، لكن المبالغة في الاستقلالية بتخلي الاطفال يفتكروا انك لو مقدرتش تعملها
بنفسك يبقى ما تحاولش اساسا من الاول ، البرمجة بتعلمه العكس لو الكود بتاعك ما اشتغلش فدور على الناس او
الموارد اللي ممكن تساعدك في المشكلة اللي مش قادر تحلها .

5- “وقت الشاشة” من المصطلحات اللي بقت بتستخدم بكترة في عالم التربية وفي كتير من البيوت ، والاباء والامهات
بيعانوا مع اطفالهم علشان يقللوا الوقت اللي بيقعدوه قدام شاشات الاجهزة الالكترونية ، واللي هتلاقي معظم الوقت
اما الطفل بيتفرج على فيدوهات او بيلعب يعني “مجرد مستهلك ” ، لكن البرمجة بتخليه يستخدم الوقت ده في
الانتاج ، فبدل ما تلعب لعبة ليه ما تصممش واحدة ؟ ولو لمجرد التسلية ، بدل ما تتفرج على فيديو انيمشن حاول
تعمل واحد ، بدل ما تتصفح المواقع على الفاضي فكر ازاي اتصممت .

وعلشان ما يبقاش الكلام ده مجرد تشجيع على الفاضي فاحنا في وادي المشمش هنوفرلك مجموعة من المصادر والمواقع لمختلف الاعمار والمراحل الدراسية اللي ممكن تساعدك في تعليم طفلك البرمجة ، وده على مدار مجموعة من المقالات و اللي هنبدأها بالمقال دة :
http://mshmshvalley.com/%D9%84%D8%BA%D8%A9-scratch