كام مرة قررت تبدأ تتعلم لغة جديدة أو بدأت وبعدين ما حستش بأي تقدم وكسلت والموضوع وقع منك !! طيب ايه رأيك تحاول مرة تانية .. لكن تخد بالك من شوية النقط دي في محاولتك الجديدة ^_^

الذاكرة :

كل واحد فينا ذاكرته بتكون قوية في حاجات ، وواقعة في حاجات تانية ^_^ ، والسبب ان ذاكرتنا بتخدمنا أوي في المواضيع المهمة بالنسبة لينا ، فـ لو انت مثلا بتشجع كورة هتلاقيك فاكر أسامي اللعبية بأسامي المدربين والمعلقين ونتايج المباريات ، وقيس على كده أي مجال بيشد انتباهك هتلاقي اللي فاكره فيه اكتر من اللي فاكره في المادة اللي هتروح تمتحن فيها بكرة ! أما لو جه الموضوع انك تحفظ كلمات لغة جديدة أو القواعد بتاعتها هتلاقي خلاياك العصبية عاملة اضراب و ذاكرتك طويلة الامد داخلة في اعتصام ^_^ طيب ايه الحل ؟

حاول توصل ما بين المواضيع اللي بتهمك واللغة اللي بتتعلمها ، يعني مثلا لما تيجي تعلق على ماتش امبارح مع أصحابك ، قولهم التعليق بالانجليزي وما يهمكش الكلمتين اللي هتسمعهم منهم ^_^ ، وهكذا اربط اللغة اللي عايز تتعلمها بالمجال اللي بتحبه واسمع و اتكلم واقرأ واكتب فيه باللغة دي

اتكلم ، اتكلم ثم……. اتكلم برضه  :

مهما قعدت تاخد كورسات لغة وتسمع في أفلام ، لازم في مرحلة تبدأ تتكلم باللغة اللي عايز تتعلمها ، أنا عارف ان دي ممكن بتكون اكتر لحظة مخيفة وصعبة في تعلم أي لغة جديدة ، ولكن لو فضلت تأجل فيها ، يبقى انت لسه ما خدتش أهم خطوة في تعلم اللغة

اقعد كلم نفسك أو مع أخواتك في البيت .. خلي جزء من قعدتك مع اصحابك تتكلموا فيها انجليزي بس وهتلاقيها أكتر فترة بتضحكوا فيها ^_^ ، وخلي بالك ان الاطفال اول خطواتهم لتعلم اللغة هي السماع وبعدين الكلام قبل ما يتعلموا يقرأوا أو يكتبوا

واجه مخاوفك :

العقل بطبيعته بيتحول لـ صفحة بيضاء !! اول ما بيتحط في موقف بيخوفه وبيبدأ ينسى كل حاجة و يركز على الخوف ده .. افتكر يوم امتحان الشفوي ^_^ ، أو اول مرة كان مطلوب منك تشرح حاجة قدام جمهور أو حتى لو بتخاف من العناكب والضلمة ، هتحس بنفس الخوف ده لو قاعد مثلا في English club وجه عليك الدور انك تتكلم لأول مرة ، هتلاقي نفسك نسيت كل كلمات الانجليزي اللي اتعلمتها .. و السبب الخوف اللي ملى مخك !

ساعتها اعمل ايه ؟ خد نفس عميق ، جمع أفكارك وابدأ قدم ردك ، وافتكر ان اللي قاعدين معاك مش جايين يحاسبوك ولكنكم بتتعلموا مع بعض

بلاش القلق :

بلاش تضغط على نفسك ، ومتتسرعش في الوصول لأهدافك بطرق وأدوات ممكن مما تكونش مفيدة أوي أو يكون تأثيرها قصير الأمد ، واقبل من البداية ان تعلم اي لغة واجادتها بياخد وقت ، وان تعلمك للغة لازم يبقى جزء من روتينك اليومي ، وراقب تقدمك وماتنساش بين فترة والتانية تقدم شوية جوايز لنفسك مكافأة ليها على مجهودها ^_^

ملاحظة :

من الكورسات الكويسة كورسات “Effortless English ” اللي بيديها واحد اسمه “A.J. Hoge” ، الراجل ده في كورساته بيكون مطلوب منك حاجة واحدة انك تاخد كل أسبوع 3 ملفات صوت MP3 وتسمعهم مرتين في اليوم لمدة طول الأسبوع المقاطع الصوتية بتكون قصيرة جدا عبارة عن (1- موضوع معين بيتكلم عنه ، 2- أهم الكلمات في الموضوع ، 3- قصة بيحكيها ويسألك فيها اسئلة بسيطة جدا وممكن سخيفة كمان ^_^) وطريقته في التعلم انك تفضل تسمع لغاية ما مخك ياخد على اللغة والقواعد اللغوية وعن طريقة أسئلة القصة بيكون عايزك تفكر وتتكلم بالانجليزي ، هي كورساته اشتراكها بفلوس على موقعه .. بس ليه كمية فيدوهات كتير على اليوتيوب تقدر تستفيد منها ببلاش

https://www.youtube.com/user/ajhoge

في ناس بتحب تتعلم لغة جديدة وبتشوفها حاجة ممتعة، وناس تانية مبتحبهاش لكن شايفاها ضرورة في الوقت الحالي لو انت شخص طموح انك تطلع برا.. في الحالتين احنا هنحاول نخلي الموضوع مسلي ليك أكتر!

ازاي؟

في مواقع وتطبيقات كتيرة متوفرة على الانترنت، مهمتها انك توفرلك عملية تعليم بشكل ممتع ومسلي، وفي نفس الوقت انت طبعًا بتتعلم، في المقال ده هنحاول نجمع اهم واشهر المواقع دي ..

fluent in 3 months -1

بيني، الشاب الايرلندي اللي اتخرج من الجامعة وهو بيتكلم لغة واحدة بس وهي الانجليزي، حاليًا بيتكلم بطلاقة أكتر من سبع لغات مختلفة، وليه كتاب بنفس اسم الموقع ضمن قائمة الاحسن مبيعًا، عمل ايه بيني؟

بيني متولدش متعدد اللغات، الحقيقة انه اكتشف نظام يقدر يتعلم بيه لغة جديدة بسهولة، قائم على المشاركة والتحدث مع الناس أكتر من انك تمسك كتاب وتتلقى المعلومات من غير مشاركة، معلومات أكتر وشرح لطريقة النظام بتاعت بيني وازاي تبدأ هتلاقيها على الموقع

Duolingo – 2

التطبيق الاشهر، بيخليك تتعلم كانك بتلعب وبتجمع نقاط وبتتنافس، تقدر تستخدمه من على جهاز الكومبيوتر او اللابتوب او تنزله على موبايلك.

Learn a language – 3

موقع متوفر عليه مئات من الدروس المجانية للغات كتير، بيقسم التعليم لكذا منطقة، زي انك تتعلم كلمات مثلًا، ومقسم الكلمات تحت عناوين معينة، او تتعلم جمل على بعضها، خيارات حلوة ومتنوعة تقدر تختار منها براحتك

Busuu – 4

انك تبدأ ساعات بيبقى صعب، بس لو هتبدأ بمعدل عشر دقائق في اليوم؟

اكيد الموضوع هيكون اسهل : )

واحد من التطبيقات المشهورة برضو واللي تقدر تنزلها على موبايلك عشان تستخدمه في اي وقت واي مكان

Memrise – 5

موقع آخر بطرق متنوعة ومسلية، مصمم بطريقة علمية عشان يساعدك تتعلم بشكل شخصي مناسب ليك ومتنساش!

متوفر على الاندرويد وال iOs

Anki app – 6

تطبيق آخر تقدر تنزله على جهازك او موبايلك، متوفر عليه عدد كبير جدًا من الفلاش كاردز اللي بتقدملك طرية تعليم سهلة وفعالة، او تقدر تصمم الفلاش كارد اللي انت عايزها، خصائص ومميزات اكتر هتكتشفها مع الاستخدام مع عدد كبير جدا من اللغات المتوفرة

وأخيرًا، تعلم اللغات ممكن يبقى عمليه سهلة وممتعة لاقصى حد، وبيقدملك فرصة لاكتشاف ثقافات أكتر، وقدرة على التواصل مع ناس من مختلف الجنسيات، ودي اكيد تجربة غنية هتفيدك على المستوى الشخصي والعملي