أكتر من 35 ألف شخص ماتوا ! فى سنة واحدة نتيجة حوادث السيارات فى امريكا فقط ! وكانت الأخطاء البشرية السبب في 94% من الحوادث دي في 2014 .. و ده كان احد الدوافع القوية لدعم جهود شركات ومؤسسات كتير على تطوير تشريعات لنشر السيارات الذاتية القيادة خلال السنين اللي فاتت
ومع اننا ماسمعناش عن السيارات دي الا من سنوات قليلة ، الا ان التجارب اللي كانت بتتعمل على النوع ده من السيارات بيرجع تاريخها لخمسينات القرن الماضي ، ولكن ظهور اول سيارة حقيقة ذاتية القيادة كان في تمنينات القرن ده .
بعدها بدأت كتير من الشركات الكبيرة والمنظمات البحثية في في تطوير نماذج اولية للنوع ده من السيارات ، وبدأ يتم تطويرها بشكل كبير بمشاركة اكتر من 35 شركة سيارات وتقنية زي شركات جوجل وانتل وابل وفورد وتسلا واوبر وتويوتا وغيرها .
وفي سنة 2009 بدات جوجل تشتغل على تصنيع وتطوير تقنية القيادة الذاتية علشان تعتمد عليها في انتاج السيارات دي ، واختبرت التقنيات دي على سيارات تويوتا على الطرق السريعة بولاية كاليفورنيا في نفس السنة
وفي سنة 2012 أصدرت ولاية نيفادا بامريكا أول رخصة لسيارة ذاتية القيادة، وفي نفس السنة أعلنت جوجل أن سياراتها أكملت نصف مليون كيلومتر من القيادة الذاتية على الطرق السريعة بدون حوادث، وفي 2015 سمحت مجموعة من الولايات باختبار السيارات دي على الطرق العامة ، بجانب مجموعة من الدول الاوروبية زي ألمانيا واسبانيا
وتعتبر جوجل من اكبر الشركات اللي بتشتغل في تقنيات السيارات ذاتية القيادة ومن ساعت ما بدأت في المجال من 2009 وهي بتصرف فلوس كتير على المجال ده لغاية ما وصلت في مايو 2014 انها تتطلق نموذج جديد لسيارة ذاتية القيادة من غير لا عجلة قيادة ولا دواسة بنزيل ولا مكابح يعني ذاتية بالكامل ، وفي 2016 بدل ما الموضوع ده ماكان مشروع في جوجل اتحول واصبح شركة كاملة بتتبع جوجل اسمها “Waymo ”
شركة جوجل شايفة ان الوظايف في المجال ده هيكون عليها طلب كبير في المستقبل القريب فبدأت تهتم بالكورسات الخاصة بيه على منصة “udacity” ، والاهتمام ده جه بتاثيره .. فـ “The Self-Driving Car Nanodegree” مشترك فيها حاليا 10 ألاف طالب ، بجانب 43 ألف استمارة طلب التحاق اتقدم للكورس ، ومع ان لسه المجموعة الاولى ماتخرجتش ، لكن وفقا للمنصة 60 طالب وجدوا وظايف بالفعل في المجال ده ، ولكن المشكلة في البرنامج ده هو سعره !! حوالي 800 دولار ^_^
https://www.udacity.com/course/self-driving-car-engineer-nanodegree–nd013
لكن في كورس مجاني بيقدمه معهد MIT كمقدمة في الموضوع وهو”Deep Learning for Self-Driving Cars ”
http://selfdrivingcars.mit.edu/
و يعتبر مقدمة لممارسة deep learning من خلال تطبيقه في بناء سيارات ذاتية القيادة