من حوالى 37 سنة .. كان فى شاب اسمه ” فرانشيسكو سيريلو” وهو في الجامعة كان عنده نفس مشكلتنا انه
علطول مزنوق في المذاكرة ومش عارف ينظم وقته .. واخد باله كمان انه ممكن يعقد وشه في الكتاب بالساعات لكن مع الوقت تركيزه بيقل فقالك ايه “انا بدل ما اعقد بالساعتين وشي في وش الكتاب انا هقسم الساعتين دول على فترات متساوية (25 دقيقة)وبين كل فترة والتانية هاخد دقيقتين تلاتة راحة ” وسمى الفترات دي على اسم منبة المطبخ بتاعهم واللي كان على شكل طماطمية والل هي “Pomodoro ” بالايطالي ، وكتب عمنا فرانشسكو كتاب وسماه تكنيك الطماطمية
“The Pomodoro Technique” اصبح من اهم تقنيات ادارة الوقت فى العالم
تعال بقى نمشي على الخطوات الل كتبها الراجل الطيب ده في كتابه ونشوف هنستفيد منها ازاي
– الأدوات : (قلم ، ورقة فاضية ، الطماطمية بتاعتك “منبه او ابليكشن على الموبايل يكون فية timer ”
- الخطوات :
1- أختار مهمة عايز تخلصها (و ليكن فصل من مادة عاوزة تخلصها ):
مهمة كبيرة ، صغيرة ، حاجة بقالك مليون سنة عايز تعملها وبتأجل ^_^ مش فارقة ،المهم انها حاجة تستحق اهتمامك الكامل واكتبها على الورقة
2- ظبط الطماطمية على 25 دقيقة:
خد عهد على نفسك ” انا هقعد 25 دقيقة هخلص اللي في ايدي من غير أي مقاطعة ” ولو نفسك حاولت تغريك تمسك الموبايل وتلعب شوية ” اضحك عليها انت وقولها “الموضوع مش كبير اهي كلها تلت ساعة وبعدين نعمل اللي عايزينه ^_^ ”
3- اشتغل على مهمتك لغاية ما الطماطمية ترن :
لو افتكرت وانت بتشتغل حاجة لازم تعملها (وطبعا الحاجات دي مش بنفتكرها الا ساعة المذاكرة ^_^)اكتبها في الورقة على جنب وكمل مذاكرة ،وبعد لما تخلص 25دقيقة ابقى اعملها
4- الطماطمية رنت :
اعمل علامة “صح” قدام المهمة اللي خلصتها على الورقة . ومبروك عليك يا سيدي خلصت أول طماطمية من غير مقاطعة ^_^
5- خدلك استراحة صغيرة (من ثلاث لخمس دقايق )
اتنفس كده بعمق (شهيق وزفير جامدين) وادي شوية أكسجين لمخك ، اتمشى في البيت وروح غلس على أخوك ^_^
قوم اعملك كوباية شاي ، أي حاجة تريح بها نفسك بعيدة عن جو المذاكرة او الشغل . صدقني مخك هيشكرك على كده
نصيحة : بلاش تدخل على الفيس في الدقيقتين دول لأنه هيجهد المخ واحنا عايزين نريحه بجانب انك هتلاقي الوقت سرقك والدقيقتين بقوا ساعة ^_^
6- خلصت أربع طماطميات ( 4 × 25 = 100 دقيقة )
خدلك استراحة كبيرة شوية (من 20 ل 30 دقيقة ) عقلك هيستفيد من الاستراحة دي انه يستوعب المعلومات اللي أخدها ويستعد للجولة الجاية ^_^
نشوف بقى ازاي موضوع الطماطمية هيغيرك ؟
تكنيك الطماطمية مش بس بيساعدك على انك تنجز اللي مطلوب منك النهاردة ؛ هو بيعلمك ازاي تدير وقتك صح وتستفيد منه
على قد ما تقدر وده من خلال النقط دي :
1- الـ 24ساعة خلصوا في أيه ؟ اليوم طار ؟
أهو بالتكنيك ده مش هتدور كتير لأن كل حاجة انت عملتها في اليوم موجودة قدامك على الورق ومعاها الوقت اللي قضيته علشان تخلصها
2- اتغلبت على “المقاطعة”
مع الوقت هتتعود انك ممكن تيجي على نفسك 25 دقيقة قبل ما ترد على المكالمة الفائتة اللي على موبايلك أو تشوف الرسايل الليجاتلك على الماسنجر .. وده هيعلمك ازاي تقدر تتعامل مع الحاجة اللي بتقاطعك وتفضل مركز في المهمة اللي في ايدك
وبالتالي زودت كفائتك.
3- قدرت تعمل “جدول زمني ” مظبوط :
مشكلتنا واحنا بنخطط لوقتنا بتاخدنا الجلالة أوي ونحط حاجات كتير المفروض نعملها وفي الاخر مانخلصش الا حاجة ولا اتنين منهم وده بيخلينا يجيلنا احباط ونكبر دماغنا على ليلة تخطيط الوقت كلها ، لكن بمجرد تعودك على التكنيك ده هتقدر تحدد عدد الطماطميات اللي محتاجها علشان تخلص مهمة معينة وبالتالي هيكون سهل عليك تعمل جدول زمني يناسبك ويناسب الحاجة اللي مفروض تخلصها
4- اتخلصت من “التسويف”:
التسويف بيحصل لان مخك بطبيعته بيحب يهرب من الحاجة اللي بتتعبه وتخنقه لحاجة بتديه احساس مؤقت بالسعادة
لكن باستخدام الطماطمية انت بتركز على العملية “المذاكرة”اكتر من النتيجة “خلصت المادة ولا لأ” بجانب المكافاة اللي بتديها لمخك “فترة الراحة ، كوباية الشاي ،حتة شيكولاته ^_^” وده بيحفز مخك على المذاكرة لانه عارف انه هياخد حاجة بعد ما تخلص 25 دقيقة سواء بقى المادة خلصت او ماخلصتش
وبما اننا في الوادي مش بنحب تخرج من عندنا وايدك فاضية ^_^ فده لينك لأبليكشن على الموبايل ممكن تخليه الطماطمية
بتاعتك :
https://play.google.com/store/apps/details?id=com.AT.PomodoroTimer
دمتم نافعين يا مشمشيين ^_^
شكرا جزيلا يا م.سمر
جزاكم الله خيرا وبارك فيكم وفي مجهودكم وجعله الله عز وجل في ميزان حسناتكم أنتم ووالديكم جميعا