6 نصائح لإحتراف العمل الحر عبر خمسات

على الرغم من ان الموضوع ظاهرياً .. مفيش أسهل منة بعد ما اتكلمنا فى المقال السابق عن نقطة التسويق .. الا ان مميزات العمل الحر #Freelancing .. بالتأكيد فى الجهة الاخري مقابلها عيوب !!
العيوب دي مش هتوقفك لكنها هتأخر تقدمك .. و فى مقالنا النهاردة هنسلط عليها الضوء كنصائح لادارة شركتك الصغيرة ” عملك كـ Freelancer ” بنجاح

1- مرتبك بالدولار .. وكل ما اشتغلت اكتر كل ما قبضت أكتر
لكن احياناً .. ممكن يظهر منافس ليك .. او تكون الخدمة اللى بتقدمها موسمية .. وفى الحالة دي .. الطلب على خدماتك هيقل .. و دخلك هيكون أقل !!
دي فى حد ذاتها مش مشكلة لو معلوماتك كويسة عن Personal Finance ” اداردة مواردك المالية ” .. بمعني انك تخصص مصروفات لاحتياجاتك .. و جزء توفره كمدخرات ليك .. و جزء تعيد استثمارة فى تحسين خدماتك و التسويق ليها .. و ال 3 تقسيمات دول هتحسبهم بناءً على متوسط دخلك .. و الزيادة عن المتوسط بتدخل فى المدخرات .. و النقص بيتم تعويضة ايضاً من المدخرات 🙂
و لتفادي الوقوع فى تلك النقطة حاول تنويع خدماتك المعروضة على “خمسات” http://khamsat.com و لا تكتفي بخدمة واحدة .

2- متهدمش كل اللي بنيته
شركات كتير بتتوصف انها سيئة على الرغم من جودة خدمتها .. ودة لان مستوي خدمة العملاء الخاص بيهم متدني .. و خدمات ما بعد البيع تكاد تكون معدومة ..
يعني اية ؟ بما اننا بتعامل مع نفسنا كـ Freelancers زي ما اتفقنا ك شركات صغيرة .. ف هنفترض انك قمت بدور التسويق صح .. و قدمت للعميل اللى طلب الخدمة على اكمل وجة ! لكن بعد 3 اسابيع حصلت معاه مشكلة و بعتلك رسالة انت مردتش عليها .. !! طيب تخيل انه احتاج تعديل مدفوع و طلب منك و انت مردتش بردو ! متخيل الخساير المادية و الخسارة الاكبر ثقة العميل 🙁

عشان كده لازم تخصص جزء من وقتك لمراجعة الطلبات القديمة و المنتهية بشكل يومي ..
كمان لازم تخصص جزء من تفكيرك لتقديم هدايا دورية لعملائك المميزين .. و متترددش في تقديم هدية لعميل لمجرد انه طلبها منك
3- وقتك مش ببلاش
الكلام اللى جاي غريب نوعاً ما عن ثقافة مجتمعنا .. فكرة ادارة الوقت و عمل جدول للمهام المطلوبة مش من عادتنا اليومية
لكن بما انك بدأت الشغل ك Freelancer .. ففكرة تنظيم مواعيد عملك و اوقات استراحتك هتزود انتاجيتك و هتقدر تشتغل ال 7 ايام فى الاسبوع بدون ما تحتاج اجازة .. و بالتالي هتلاحظ دة فى زيادة دخلك $$

لو لاحظت مدة التسليم : أسبوع ” 7 أيام ” و اللى بتسمحلك انك تشتغل بحرية اكتر بعيد عن الضغط .. و النتيجة 101 تقييم ايجابي  .. و بالتالي هتضمن ثقة عملاء جدد مستقبلاً

كمان دة هيساعدك انك متتحولش لـ “كائن بيتي” .. و تخسر علاقاتك الاجتماعية بسبب تراكم الشغل عليك ..
نيجي للتطبيق بعيداً عن الكلام النظري .. ادارة وقتك و عمل جدول مهام .. مهمة سهلة لكن محتاجة انك تحافظ على
أ‌- جدول المهام ديماً قصاد عينيك فى ورقة مش فى ملف Word و تنساه !
ب‌- المتوسط الطبيعي لساعات العمل من 6 لـ 10 ساعات | و متوسط عدد ساعات النوم من 6 لـ 8 | هيتبقي متوسط 8 ساعات للراحة و العبادات و الغداء و ممارسة حياتك الاجتماعية بشكل طبيعي
ج‌- الساعات الخاصة بالعمل هتحتاج فيها لتوزيع مهامك بداية من ” الأهم ” الي ” الاقل اهمية ” مع الوقت المتوقع لانتهاء كل مهمة منهم
د‌- اخيراً دة جدول مهماتك انت مش جدول مهمات سوبر مان ! خلية مختصر و منطقي بحيث متأجلش اي حاجة ليوم تانى .. و اللى بدورها هتصيبك بنوع من انواع قلة التنظيم و قلة الانتاجية

4- متتكسفش من كلمة “لأ”
بما اننا وصلنا لنقطة ” تراكم الشغل ” و تقديم هدية لعميل لمجرد انه طلبها منك ” .. فـ دة هيتطلب اننا نفكرك ان كلمة ” لأ ” مش عيب ..
بمعني .. ان لو حصل ضغط طلبات عليك .. و انت مش هتقدر تنجزها فى الوقت اللى انت محددة .. فممكن تبلغ العميل انك هتتأخر او انه يقدر يلغي الخدمة و يطلبها منك وقت تاني

فى المقابل :

عشان تضمن ان الخدمات التانية تتسلم بأعلى جودة و فى الوقت المحدد .. كمان انك تضمن حق نفسك من الراحة اللى هتساعدك تقدم شغل مظبوط تانى يوم .. و حقك فى الحياة الاجتماعية اللى مش هتعيشها اثناء ساعات شغلك ك Freelancer
اما بخصوص تقديم الهدايا .. ف دة هيظل فى ايطار انك متتحملش مجهود او تكلفة فوق طاقتك .. و تقدر تبلغ العميل بكل بساطة فى حالة انه طلبها كهدية ان الجزء دة هيكلفكذا $$ .. و ممكن كـ حل تقدم له تخفيض جزئي ” خصم ”
5-أدرس السوق
دراسة السوق بمعني الاستفادة من آراء العملاء و طلباتهم .. وتطبيق الدروس المستفادة مع العملاء الجدد .. و تطوير نفسك بشكل مستمر و عدم الاكتفاء بمهاراتك الحالية .. او الـ Softwares اللي بتستخدمها,كمان دراسة السوق بتطلب منك دراسة منافسيك ..
كل دة هيساعدك فى :
1- نقطة ” التسعير : وضع سعر مناسب للخدمة اللى بتقدمها ” + ” مدة التنفيذ ”
2- كمان هيساعدك انك تتفادي الهبوط المفاجيء في المبيعات اللي ناقشناه فى اول نقطة بمقالنا النهاردة

6-هتستقبل عملائك فى الكركبة دي !
هو فعلياً محدش من عملائك هيشوف الكركبة اللى حوليك دي .. بس هتبان فى شغلك !! متستغربش الكركبة اللى على مكتبك دي هي نفس الكركبة اللى هتبقي شاغلة عقلك زي ما بيقولوا فى بريطانيا ” Clear Your Desk, Clear Your Mind ” .. عشان كده حاول ديماً تخلي مكتبك منظم و فاضي على اد ما تقدر.. حاول تخلي جنبك stick notes ” ورق الملاحظات الاصفر .. اللى ممكن تلزقة ” عشان تسجل علية اي مهام اضافية ظهرتلك اثناء شغلك و مكنش معمول حسابها فى جدول مهامك