العلاقة بين تعلم الإنجليزية و “قلى البيض”!
امتى ممكن يكون الإنجليزي صعب؟!
السؤال ده كان سؤال مطروح على الموقع الشهير Quora، والحقيقة فى إجابتها ع االسؤال ده، بدأت Jaryn Capek بسؤال مهم جدا:
((هل تفتكروا إن اللغة الإنجليزية صعبة فعلاً؟))
السؤال ده كانت بتسمعوا من طلابها تقريبا كل يوم، وقالت إن أحد طلابها فى يوم من الأيام قال لها:
“جدتى كانت بتقول إن اللغة الإنجليزية صعبة، وللأذكياء بس!”
وقالت إن إجابتها دايما كانت:”كلام جدتك صحيح، لكن مش بنسبة 100%! لأن كل شخص عنه نوع معين من الذكاء لأن هناك ستة أنواع أساسية من الذكاء وكل كائن بشري واحد عادة عنده الوسيلة اللى يطور بيها ذكاؤه. عشان كده اللغة الإنجليزية للأشخاص الأذكياء ولكنها ليست صعبة!”
– زيك زيهم!
ثم ييجى السؤال الأهم “ليه؟! ليه اللغة صعبة؟!” والإجابة ببساطة: “ليه ممكن يكون فيه صعوبة؟! ممكن تبص حواليك كده وتشوف كام واحد من صحابك أو من الأقارب يقدر يتكلم إنجليزى؟! كم عدد المتحدثين باللغة فى العالم كله؟!”
تقريبا فيه أكثر من 1,5 مليار مستخدم للغة الإنجليزية فى جميع أنحاء العالم، والعدد ده كل يوم بيزيد، مع الوضع فى الإعتبار إن العدد ده لا يشمل المتحدثين الأصليين للغة، إنما لو مثلا إتكلمنا عن لغة تانية زى الأسبانية، هنلاقى إن فيه متحدثين كتير بالأسبانية، لكن لاحظ الفرق بين الأسبانية والإنجليزية، إن عدد متحدثى الأسبانية بيشمل المتحدثين الأصليين للغة، وده بيقول إن الإنجليزى بيتفوق وبشكل واضح.
قالت كمان إنها مش بتنكر إن اللغة الإنجليزيىة ممكن تظهر إنها لغة صعبة، لكن مع ذلك بتقول إن ده مش بيحصل إلا فى المراحل الأولية. المراحل دى بس اللغة بتبان فيها صعبة الإكتساب، لكن بعد كده، وبمجرد ما تخصص وقت للغة، بتلاقى إنه سهل تتعلم اللغة وتقارنها ببعض.
-المصادر متاحة، لكن محتاجة سعي!
قالت كمان إنه الأغانى وأفلام الكارتون وسيلة كويسة جدا لتعلم اللغة لو واظبنا على إننا نتابعها بغرض إننا نتعلم منها ونطلع أقصى إستفادة لغوية ممكنة.
بتنصح كمان الطلبة إنهم يدوروا على “أندية المحادثة” أو تجمعات المحادثة اللى بتخليك تتعرف ع أصدقاء يمارسوا معاك اللغة وعندهم نفس الهدف، وتقريبا فى نفس مستواك.
لفتت كمان النظر للمجموعات اللى ممكن تتكون على مواقع التواصل زى فيسبوك ويكون غرضها التواصل من أجل تعلم اللغة، ومن خلالها يقدروا يتعرفوا ع أهم المصادر اللى ممكن تساعدهم فى التعلم.
ركزت كمان ع مسألة الكتب، وقالت إن قراية الكتب المكتوبة باللغة الإنجليزية بتطور المتعلم فى القراية والكتابة مع بعض، وكمان بيزيد من إمكانية إضافة كلمات وتعبيرات جديدة لحصيلتك اللغوية، واللى بتساعد فى عملية التواصل كهدف أساسى من التواصل باللغة بين الناس.
-العلاقة بين الإنجليزى و”قلي البيض”!
وضحت كمان إنه بالنسبة ليه كل دي طرق عشان تتعلم “مهارة” إكتساب اللغة، وقالت إن دى نقطة رئيسية ومهمة، لأن اللغة مش موضوع للدراسة، اللغة “مهارة” بنكتسبها زيها زى السباحة أو الجرى أو العزف على الجيتار أو الطهى أو وركوب الدراجات، لأنك –على سبيل المثال- فى أول ما بدأت تتعلم تركب دراجة –أو عجلة بالمصرى- كنت ممكن تقع، بل بتقع فعلا، وبعدها تركب للعجلة دى عجل صغير إضافى يسندك، وممكن تتعلم فا تشيله، لكن تحتاج حد يسندك، لحد ما توصل للمرحلة اللى تقود فيها دراجتك بدون أى مساعدة من أى شخص، لحد ما تتقنها وممكن تدخل سباقات المحترفين فى يوم من الأيام.
وقالت إن الإنسان كل ما يزود وقت التعلم اللى بيلتزم فيه بركوب الدراجة كل ما إتعلمت أفضل، والكلام ده بينطبق على تعلم مهارة زى اللغة، وسألت باستغراب: هل إنت كبنى آدم متمكن من الطبخ هتحتاج وقت لقلى البيض مثلا؟! وهل عشان تقلى بيض محتاج كتاب طبخ؟؟!!
الخلاصة إن كل الناس يقدروا يتعلموا أى مهارة بصفة عامة، ومهارة تعلم اللغة بصفة خاصة، وكمان ممكن تتم الدراسة بشكل ممتع كمان، الإنجليزى لازم تشوفه من زاوية إنه وسيلة أو آداة هتوجهك لعالم مختلف تمكاما بفرص أهم وأكثر تميزا فى مجالات العلم والعمل والسفر أيضا.