إستقبلتوا مولود جديد مش بينام ولا بيخليكوا تناموا كويس 🙂 ؟ عندك افكار كتير مجنونه و جديده في دماغك خطفت النوم من عينيك ؟ 🙂
عامل زى العصفورة اللي بتصحى بالليل بس للأسف كل مواعيدها مترتبة بالنهار :/ !! عادي جداً لأن الكل بيمر بمرحله شبيهه لحالتك .
من واقع تجربتي الشخصية و لأنى كنت بشرب حوالى 6 او 10 اكواب من القهوة وأنا لسه في بدايه العشرينات فـ أنا متفهم لواقع مشكلتك .كونك شخص مبيحصلش على فترة نوم كافيه بسبب رغبتك في اتمام المهام المفروضة عليك بشكل إبداعي يميزك عن غيرك في نفس مجالك.
خلينا متفقين ان شرب القهوة او حتى مشروبات الطاقة المشهورة مبتحلش المشكلة و ده لآن كلنا عارفين ان الكافيين مش هيديك نفس تأثير الطاقة الإبداعية الطبيعية ,لكن إيه رأيك لو جبنالك حلول تانيه موازيه تحافظ على نشاطك و إبداعك ؟
دول بقى 11 طريقه موازيه تخليك تشتغل و تفكر و تنتج بإبداع حتى لو منمتش كويس :D
- إتكلم مع الناس
لما بتشارك الحديث مع شخص تانى حتى لو كان القطه بتاعتك :v ده بيعطى تأثير فعال كما لو كنت بتضغط زرار لتجديد و تحفيز عمل المخ . حاول تخلق كلام متناسق و مترابط مع بعضه بالإضافة لإنك تسمع اللي قدامك وترد عليه تستخدم إشارات جسديه لتوضيح كلامك و متنساش كمان تركز مع لغة جسد اللي قدامك. كل دي عوامل بتزود تركيزك و ترفع كفاءته .
دلوقتى بما إنك إبتديت تركز , إبتدى عمليه تحويل تركيزك ده ناحيه المهام اللي مطلوب منك تخلصها . لما تبدل تركيزك بين مهمتين او أمرين أسهل من إنك تحاول تخلق تركيز جديد على مهمه واحده بس زي الشغل . كمان حاول تخطط في جدول يومك من 30 دقيقه لساعه كامله تقضيها في تبادل حديث تلقائي بدون ترتيب للأفكار مع صديق او زميل في الشغل , ده هيخليك تقضى بقيه اليوم بتركيز أفضل .
- مارس الرياضة قبل ما تنام بمده من 3ل4 ساعات في ضوء ساطع
خلف العين موجود نوعين من الخلايا اسمها “خلايا التأقلم” اسمها الشائع هو الساعة البيولوجية ,الخلايا دي مرتبطة بشكل مباشر ببؤبؤ عينك وعشان كده لما بتبدى تشتغل في ضوء واضح وساطع ساعتك البيولوجية بيوصلها شيء زي إشارة عصبيه تنبيهيه تصحيها و ده بيفسر سبب شعور الشخص بحاله مزاجيه افضل اذا ابتدى يومه مع شروق الشمس مش قبله .
الكل عارف ان ممارسه الرياضة بتدى الشخص طاقه أكبر و ده لأنها بجانب إنها بتقوى عضلات الجسم كمان بترفع مستوى الإندروفين و ده هرمون بيفرزه الدماغ وبيكون ليه تأثير مسكن . ممارسه الرياضة في ضوء واضح بتظهر نوع من التآزر العصبي والتعاون ما بين أجزاء الجسم المختلفة , كمان الجسم بيكتسب الطاقة ويبتدى يخزنها بفعل تأثير عاملين عليه هما الضوء و التمارين الرياضية . بجانب العوامل الخارجية دي ,كمان الطاقة الطبيعية في الجسم بدورها بتخليك مركز بوتيرة أفضل و ده اللي بيزود التفكير الإبداعي عندك .
من ناحيه تانيه , لو مارست الرياضة قبل النوم بحوالي تلات او أربع ساعات ده هيخلى جسمك يوصل لمرحله عميقه من النوم بيسميها علماء النفس ” موجات النوم المنخفضة” و دي مرحله بيحتاجها الجسم عشان يداوى الجروح او يعمل اصلاح ذاتي و ده كمان هيساعدك انك تكون شخص منتج و قادر على العمل بصورة أفضل.
- بكل بساطه إشرب ميه كتير :D
جرب تستبدل فنجانين قهوه بكوب بارد من الميه ده هيخليك تحس بطاقه أكبر و كمان عقلك هيفكر بشكل أفضل. بيوصى الاطباء بشرب الميه فى بداية اليوم و ده لأن الميه الزيادة بتدى الجسم دفعه للتحرك لأنها بتغذي الخلايا اللي بدورها بتكون الاعضاء بالتالي بتحفز الجسم كله .
أما اذا أُصبت بجفاف نتيجة شرب اكواب قهوه كتير نظرا لتأثيرها المدر للبول فده هيخليك خامل و كسول بالتالي مش هتكون شخص مبدع بالصورة المطلوبة . لكن لو قمت باستبدال القهوة بأكواب من الميه ده هيخليك شخص حيوي بصورة أكبر وهيساعدك تكون شخص منتج .
- حاوط نفسك بريحه القهوة
فى الواقع انت مش محتاج تشرب قهوه زياده و ده لأن الدراسات العلمية وضحت انه مجرد استنشاق ريحه القهوة بتحفز المخ و تخلى الشخص في حاله مزاجيه أفضل . كمان الابحاث أظهرت ان الناس السعداء بيكونوا أشخاص مبدعين بنسبه 10:12 % اكتر من الاشخاص اللي مش سعداء وعشان كده شم القهوة :v ده هيخليك مبسوط و كمان هتكون مبدع بصورة أكبر .
- هات قلم و إبتدى اكتب
كتير مننا بتجيله فكرة معينه او يحاول انه يبتدى شغل مختلف لكنه مبيبقاش عنده رؤيه واضحه للموضوع ككل . لكن لو جربت تقوم تتمشى في مكانك لصورة بسيطة ده هيساعد على إن أفكار و محفزات اكتر تظهر بشكل أوضح وأفضل . مش معنى كده انك تقوم ترقص باليه في مكان الشغل مثلا :v لكن جرب تمسك قلم او حتى الموبايل وتبتدى تكتب عليه كل الافكار اللي بتعدي في دماغك او كل الحاجات اللي محتاج تخلصها في يومك .
كل مره بحس فيها إن الافكار بتتزاحم جوه عقلى بامسك سبورتي البيضاء الصغيرة واكتب عليها اول حاجه تيجى فى بالى, بعديها بابتدى اربط بين اللي في عقلي واللى لازم اخلصه و إزاى اخلصه . دي طريق الموضوع سريعة و فعاله عشان تحافظ على قدراتك حتى وانت مش نايم لفترة كافيه .
- غير الموضوع
لما تحس إنك مستغرق في موضوع معين بصورة مجهده , من السهل إنك تحس بملل او إرهاق من الموضوع اللي بتشتغل عليه. لو مكنتش قادر تركز على مهمه واحده, بكل بساطه حاول تلاقى حاجه تانيه صغيرة و بسيطة تعملها . ممكن يكون عندك تقرير او بحث لازم يتسلم فى نهاية اليوم مثلا , لكن بكل بساطه انت تفكيرك بقى مشتت ومرهق لدرجه متقدرش تنجز المطلوب منك حالا. عشان تتغلب على الموضوع ده حاول تدور على حاجات بسيطة تخلصها فى وقت قليل . ده هيديك إحساس أفضل لكونك أنهيت حاجه معينه و كمان هيكسبك ثقه تساعدك انك تنهى البحث الممل المفروض عليك .
- إختار المزيكا المناسبة
أظهرت ابحاث كتيره جدا إن الظاهرة المعروفة ب”تأثير موزارت” هي مجرد كدبه, لكن في نفس الوقت الموسيقى بتأثر بصورة واضحه على الفهم والابداع. لو كنت محتاج تركز على قراءة او كتابه او تعديل او حتى فهم الموضوع اللي بين إيديك, يبقى انت محتاج تسمع موسيقى هاديه , عشان تساعدك تبقى شخص منتج بصورة أكبر , على سبيل المثال أي معزوفة لهاموك او البوم the leaf أو XX هي كنوز تستخدمها كخلفيه موسيقية إبداعيه. لو عندك خلفيه موسيقية مزعجه شويه هتحفز المخ من غير ما تضايقه او تزود الاحمال عليه, بالتالي هتزود الابداع عندك .
- قسم المهام الكبيرة لأجزاء صغيرة
دماغ الانسان مجهز بحيث يتفاعل بصورة إيجابيه عند إتمام أي مهمه او تحقيق إنجاز جديد. وعشان كده حاول تقسم المهام او المشاريع المطلوبة منك لأجزاء صغيرة سهله الإنجاز, على سبيل المثال ارسم رسم بياني للمهمة المطلوب إنجازها , او اكتب مسوده أوليه تبين فيها خطتك او حتى اكتب عناوين رئيسيه لكل جزء من الموضوع اللي انت مطالب بإنهائه.
بتقسيمك لتركيزك على مهمات صغيرة هتحس بشعور أفضل ناحيه الشغل المطلوب منك, ده كمان هيساعدك أنك تشتغل أكتر نتيجة للتحفيزات الإيجابية اللي بتوصل للمخ بعد شعوره بانتهاء مهمات معينه. كل حاجه مهما كانت بسيطة او صغيرة بتساعد بشكل كبير لما تكون مرهق ومش نايم لوقت كافي .
- خبى الموبايل :D
تغييرات كتيره بتحصل لجسم الانسان إذا محصلش على حاجته الكافية من النوم . واحده من التغييرات اللي بتطهر هي إن الإنسان بيكون عُرضه أكتر للتوتر. في الأحوال العادية الشخص ممكن يبص على موبايله حوالى 150 مرة في اليوم الواحد , ده غير إن حوالى 67% مننا بيعمل كده حتى من غير ما يوصله أي تنبيهات جديده.
واحد من أهم مفاتيح الإنتاج و إدارة الوقت هي إزاله أي سبب من مسببات تشتيت الإنتباه .والموضوع ده بتزيد الحاجه إليه خصوصا إذا كنت محروم من النوم لفترة كافيه , من المهم إزاله أي مسبب للتشويش من موبايلك. وقتك مهم, و كمان انت محتاج تكون منتج بصورة أكبر. عشان كده حاول تخلى الموبايل على وضع صامت او حتى حاول تخبيه في أي دولاب. صدقني ساعتها هتشتغل بصورة أحسن و ده لأن انتباهك مش هيتشتت بصورة كبيرة.
- خليك واقف على رجليك
كونك مرهق نتيجة قله النوم معناه إن جسمك هيغتنم أي فرصه عشان يرتاح بمجرد جلوسك بارتياح على مكتبك. لكن قدرتك على مقاومه الموضوع ده سهله جدا. إتحرك في المكان أو على الاقل استخدم المكتب من غير الكرسي. كونك بتتحرك معناه إن جسمك مبيحصلش على الراحة اللي محتاجاه . و ده هيخليك تشتغل بصورة أفضل.
- الأهم فالمهم
التركيز على مهمه مملة هو أخر شيء ممكن تحتاجه و انت محصلتش على القدر الكافي من النوم .. عشان كده حاول تشتغل على إنجاز المهام اللي بتحتاج إبداع أولا حتى وإن كانت على نهاية قائمه اولوياتك. الموضوع ده بيساعدك ويحفزك على الإنتاج و ده لأن المهام اللي بتحتاج إبداع بتبقى ممتعه أكتر, و هي دي الحاجه اللي بتشد انتباهك لمستوى عالي, بالتالي المهمة بتحصل على تركيز أعلى وبتخلص بدقه أكبر.
بعد ما تخلص المهام الإبداعية المطلوبة هتكون سعيد لأنك أنجزت شيء بجانب إنك استمتعت بأدائه, و ده هيخليك تنجز باقى الشغل اللي ممكن يكون ممل و انت مش حاسس إنك متضايق زي الاول, كمان هيكون عندك القدرة على إنك تخلص الشغل بفعالية أكبر.
بالرغم من احتياجك للنوم هتفضل محتفظ بقدرتك على الانتاج بصورة طبيعية.