شهر سبتمبر اللي فات واثناء المؤتمر الدولي للملاحة الفضائية ف استراليا اعلن ايلون ماسك ” رائد الاعمال الأشهر واحد عمالقة وادي السليكون وصاحب شركة SpaceX اللي من ضمن خطط اعمالها بناء مستعمرة بشرية على سطح المريخ.. و المعتاد انه بين فترة والتانية يطلع علينا بمشروع جديد وفريد من نوعه ^_^ ” .. أعلن انه بيخطط لبناء سفينة جديدة قادرة انها تسافر لأي مكان على الأرض في أقل من ساعة ، يعني ممكن الرحلة من نيويورك بأمريكا الى شانغهاى بالصين تتم في نصف ساعة بس ^_^
وجهة نظر ايلون انه بما اننا بنستخدم سفن الفضاء للوصول للمريخ فليه ما نستخدمهاش في الأرض !!! المشروع ده بيعتمد على الصواريخ الاخيرة اللي نجحت شركة SpaceX في تطويرها وهي صواريخ قابلة لاعادة الاستخدام مرة تانية .. فـ بدل ما الصواريخ ما بتنفجر بعد اطلاق المركبة الفضائية ، الصاروخ هيرجع تاني لقاعدة في البحر متحدد موقعها الجغرافي من قبل كده ، وعرض ماسك في المؤتمر فيديو للمشروع بيوضح هيشتغل ازاي .. الركاب هيتنقلوا بسفينة صغيرة للقاعدة البحرية وبعدين هيركبوا مركبة فضائية أعلى الصاروخ ، الصاروخ هينطلق علشان يدور حوالين الأرض وتنزل المركبة في المكان المطلوب وبعدين يرجع الصاروخ تاني للقاعدة اللي خرج منها ^_^
الصاروخ هيقطع تقريبا 7الاف ميل في 39 دقيقة ومتوقع ان السرعة ممكن توصل ل 18 ميل في الساعة و سفينة الفضاء ممكن تشيل من 80 ل 200 مسافر
و الاهم ان تكلفة السفر هتكون نفس تكلفة الطيران في الدرجة الاقتصادية ^_^ اما عن الاجراءات التنظيمية الخاصة بالسفر وياترى هيكون السفر مناسب لكل الاعمار ولا لا وهل هيكون هناك اشتراطات صحية معينة فدي كلها تفاصيل لم يتم الاعلان عنها
ممكن تشوف الفيديو الخاص بالمشروع من هنا :
وبما ان الموضوع قرب وممكن مهندسين الميكانيكا يلقوا نفسهم بيشتغلوا في الصواريخ ومركبات الفضاء بدل العربيات
والطيارات ^_^ فحبينا نبلغكم ان في كورس بيقدمه معهد ماساتشوستس للتكنولوجيا MITعلى منصة ادكس اسمه
Introduction to Aerospace Engineering: Astronautics and Human Spaceflight
https://www.edx.org/course/introduction-aerospace-engineering-mitx-16-00x-1
اللي بيدي الكورس بروفسور اسمه ” جيفري هوفمان” رائد فضاء سابق في ناسا قام بخمس رحلات فضاء ، وكان اول رائد يسجل 1000 ساعة متواصلة على مكوك فضاء ، الكورس هيعلمك المبادئ الاساسية ورا السفر واستكشاف الفضاء ، وازاي الصواريخ بتشتغل و المركبة الفضائية ازاي بتتحرك في المدار ، وازاي بتعيش جوه البيئات الصناعية الخاصة بالمركبات وازاي تعيش من غير جاذبية ، الكورس بدأ يوم 26 سبتمبر وهيستمر لمدة 10 أسابيع