في 2004 جيم كاري عمل فيلم اسمه “Eternal Sunshine of the Spotless Mind”وبتدور أحداث الفيلم حوالين جول “كاري”اللي بيروح لمستشفى ويحاول يمسح جزء من ذاكرته علشان ينسى حبيبته كمحاولة انتقام منها لانها مسحت برضه الذكريات الخاصة بيه من مخها ^_^
فكرة الفيلم اللي كانت تعتبر خيال علمي في وقتها .. كانت مجال بحث للعلماء والمختصين بمجال الذاكرة ، وكان السؤال : هل يمكن التحكم في ذاكرة الانسان ومسح بعض الأجزاء منها من غير ما تتأثر باقي الذكريات ؟
و في شهر يونيه اللي فات نشر دكتور “كريم محمود عبده” خريج صيدلة القاهرة والحاصل على الدكتوراة من جامعة توياما اليابانية بحثه في مجلة “Science ” واللي عمل ضجة في الوسط العلمي بسبب التحكم في ذاكرة مجموعة من الفئران اللي قدر يعمله هو وزمايله في جامعة توياما
البحث كان بيدور حوالين نقطتين :
1-ازاي المخ بيخزن الذكريات المتشابهة والقريبة من بعضها
كل واحدة من الذكريات بتاعتنا بيتم تخزينها في مسار خاص بيها في المخ اللي هو عبارة عن مجموعة من الخلايا العصبية اسمها الانجرام “engram” .
ولما واحدة من الذكريات دي بتربط بواحدة تانية علشان يكونوا ذاكرة مشتركةبيحصل تداخل ما بين المسارين ، فالمخ بيكون عليه أن يربط الذكريات المتشابهة والقريبة من بعضها ببعض، وفي نفس الوقت عليه انه يعرف ازاي يفرق بينهم بحيث تحتفظ الذكريات الفردية بهوياتها الخاصة.
واللي قدر يوصله دكتور كريم وفريقه هو المكان والكيفية اللي بيخزن بيها المخ الذكريات دي بحيث يبقوا مرتبطين مع بعض وفي نفس الوقت متمايزين.
2-ازاي تمحي الذكريات السيئة من غير ما تأثر على باقي الذكريات
وقدر دكتور كريم والباحثين معاه يعملوا كده عن طريق حقن دوائين في مخ الفئران اللي أدى لنسيان الذاكرة المراد نسيانها من غير ما يأثر على الذكريات التانية .
لو عايز تقرأ عن البحث اكتر اللينك بتاعه من هنا
http://science.sciencemag.org/content/360/6394/1227
ولو عايز تقرأ اكتر عن الذاكرة وازاي بتشتغل المقال ده هيفيدك
ازاى تحافظ على اللى بتذاكره .. ميتبخرش (neuroscience )