مقدمة عن الحقيقة الافتراضية | virtual reality

0 134

لما نزل فيلم Avatar في 2009عمل ضجة جامدة ووصلت ايرادات الفيلم بعد 10 أسابيع من طرحه لاكتر من 2 مليار دولار، وبقى أكتر الافلام دخلا في تاريخ السينما . قصة الفيلم بتتكلم عن جندي امريكي مقعد ، بيتربط ببعض الاجهزة فبيقدر انه يكون شخصية تانية “avatar “عايش في مكان تاني “باندورا”

اللي عايزنه بقى من avatar هي الفكرة اللي بيتكلم عنها واللي استخدمت أساسا في تصوير الفيلم وهي “الحقيقة الافتراضية “او    VR= virtual reality

 هي  ايه بقى virtual reality ؟

الحقيقة الافتراضية عباره عن محاكاة للحقيقة ، عن طريق برامج مصممه بطريقة تسمحلك بإشراك حواسك في الحاجة اللي بتتفرج عليها ، وبتعتمد على أجهزة خاصة بتستخدمها وتتوصل بالكمبيوتر علشان تدخلك في أجواء الحقيقة.

امثلة على الاجهزة اللي بتستخدمها ؟

  • خوذة او غطا للرأس ، بتلبسها بتكون في نضارات بتغطي العين بشكل كامل وتعرضلك الصور بشكل ثلاثي الابعاد بحيث تشوفها و كأنها واقع قدامك ، وسماعات علشان تسمع الاصوات اللي بتصدر من العالم الافتراضي.
  • قفازات واحذية بتلبسها علشان يتحدد مكانك ومكان ايديك في المحيط اللي حواليك .
  • عصاية تحكم وأدوات تانية ممكن تستخدمها مثال في الالعاب

والمطلوب من كل اللي فوق ده هو هدف واحد : انك تدخل في جو الحقيقة الافتراضية لدرجة ما تقدرش تميز مابين الحقيقة الواقعية والحقيقة الافتراضية .

انت ممكن تكون احتكيت بالعالم ده لو اتفرجت على فيلم 3D ، أو لو كنت واصل كده ولعبت العاب VR  ^_^

الحلو بقى ان الموضوع خرج لمجالات كتير ومبقاش مرتبط بس بالافلام والالعاب زي مثال : 1-التعليم : عن طريق تصميم معامل افتراضية ممكن يدخلها الطلبة ويعملوا التجارب بكل سهولة من غير الخوف من ثمن الاخطاء ، أو حتى تفجير المعمل ^_^ لان في الاخر هو مجرد معمل افتراضي .

2- المجال العسكري : عن طريق محاكاة جو المعارك وادخال الجنود في جو الحروب مع أصوات وظروف الحرب الافتراضية وده بيديهم مهاراة أكبر وأخطاء اقل لان  خلاص بقى عندهم خبرة ، ونفس الموضوع في مجال الطيران .

3- انك تعمل حاجة ما تقدرش تعملها في الواقع : ودي من اهم مميزات VR ، العلماء مثلا عملوا عالم افتراضي بيحاكي كوكب الزهرة واللي درجة حرارته بتوصل ل 460 درجة مئوية وبدأوا يستكشفوه .

4- التسوق الافتراضي : تخيل وانت قاعد في بيتكم وعايز تشتري حاجة ، تدخل افتراضيا للسوبر ماركت تشتري اللي عايزه ، وحركتك فيه ثلاثية الابعاد بحيث لما تلف يمين تشوف الحاجة المعروضة في اليمين وهكذا.

عمنا مارك بقى مش هيسيب الليلة دي تعدي عليه كده فلازم يحط اللمسة بتاعته . فاضي بقى   ^_^

في شهر أكتوبر اللي فات مارك زوكربيرغ نشر فيديو وهو بيعمل demo لازاي هيطبق VR في الفيس ، باستخدامه Rift Oculus , بيورينا ازاي باستخدامنا VR هنعمل عالمنا الافتراضي الخاص بينا واللي هنعيش في مع اصحابنا نلعب كوتشينة مع بعض ، ننزل اعماق البحار ، نطلع المريخ ^_^، نروح الشغل او البيت ، وعلى قد الفيديو ده مبهر لكنه في نفس الوقت مخيف ؛لان دوقتي مجرد ما بنمسك تليفوناتنا بنسيب اللي حوالينا وندخل عالم الفيس الافتراضي ، مابالك بقى لما يكون العالم ده محيط بينا وبنعيشه بكل حواسنا سا عتها ممكن نلاقي فيلم MATRIX بيتطبق علينا ^_^

الفيديو :

/https://www.facebook.com/zuck/videos/10103154531425531

 

كان نفسنا نعرضلكم كورس اونلاين بس لسه MOOC مادخلش عالم VR أوي ،لكن لو ليك في تصميم الالعاب ادخل شوف tutorial  ده على Unity

https://unity3d.com/learn/tutorials/topics/virtual-reality  

ولو لقيتم كورسات مفيدة في الموضوع ممكن تسيبهولنا في كومنتاتكم .. عشان نشاركها مع مواطنين وادي المشمش ^_^

قد يعجبك ايضا المزيد عن المؤلف

اترك رد

لن يتم نشر عنوان بريدك الإلكتروني.