لماذا يجب ان يصبح TEDx جزء من روتينك اليومي

1 2٬562

من حوالى 30 سنة .. اجتمعت مجموعة من عشاق التكنولوجيا فى كاليفورنيا بناء على فكرة واحد اسمه “ريتشارد ورمان ” .. بهدف تبادل الأفكار حول ثلاثة مواضيع: التكنولوجيا، والترفيه والتصميم.
و دي كانت بداية مؤسسة TED اختصارا ل 3 كلمات (Technology, Entertainment, Design) و زادت الأفكار اللي بتطرح في المؤتمر لتشمل مجالات متنوعة من علوم وتقنية و فكر و فنون اقتصاد وبيئة وأعمال خيرية وغيرها .. وبقت رسالة المؤتمر “أفكار تستحق الانتشار ” Ideas worth spreading

و اللي بيتحدثوا في المؤتمر من أماكن متعددة في العالم ، ومنهم اللي ليه مناصب عليا على الصعيد العالمي زي رؤساء الدول والإعلامين والحاصلين على جوائز نوبل والكتاب ورواد الاعمال وغيرهم ،و بيعطى المتحدثون 18 دقيقة كحد أقصى لعرض أفكارهم بأكتر الوسائل ابتكارا وإثارة للاهتمام.
وفي 2006 بدأ المسئولين عن المؤتمر ينشروا فيديوهات على الانترنت للاحاديث اللي بيلقيها الضيوف وبدأت تزيد شعبية المؤتمر، وعلى يونيو 2009 كانت المحاضرات دي اتشاهدت 50 مليون مرة، وقفز الرقم ده ل 500 مليون على 2011 وفي 2012 بقى مليار مشاهد ة ^_^

بنقولك الاحصائيات دي علشان نأكدلك ان ” “TEDيستحق انه يكون جزء من روتينك ، وانك لازم تسيبك شوية من برامج التوك شو بتاعتنا ^_^ والفيس المفتوح على الفاضي والمليان .. ودي شوية فوايد هتشجعك على متابعة فيديوهات  TED

1- كل فيديو عبارة عن كبسولة من المعلومات المختصرة والمفيدة في أي مجال بتحبه واللي بيقدملك المعلومات دي أشهر و انجح ناس في المجال ده\

2- هتلاقيك بتابع أحدث التطورات والعلوم اللي العالم بيوصلها ، واتفلسف بيها يا عم على صحابك ^_^

3- في كتير من الفيديوهات هتلاقيها عن أشهر وانجح الكتب المنشورة ، وهتلاقي اللي بيديلك زتونة الكتاب هو الكاتب نفسه اللي كتبه

4- زيادة كمية المصطلحات اللي بالانجليزي اللي هتتعلمها في مجالك سواء بالاستماع للمحاضرة او تشغيل الترجمة بالانجليزي أو اي لغة تختارها

5- تقوية مهارات العرض والالقاء عندك عن طريق متابعة المحاضرين وازاي بيعرضوا افكارهم بحماس وتمكن ، وبيجذبوا جمهورهم بطريقة الكلام واختلاف درجات الصوت وتعبيرات الوش والجسم .

الحلو بقى ان تيد ممكن توصلها من أي مكان اما عن طريق الموقع ادخل اختار الفيديو الل عايزه وشغل ترجمته او حتى حمله
https://www.ted.com

او ممكن تنزل الـ app بتاعهم على موبايلك سواء جهازك  android / ios
https://play.google.com/store/apps/details?id=com.ted.android&hl=ar

https://itunes.apple.com/us/app/ted/id376183339?mt=8

وعلينا في وادي المشمش ان احنا نشجعك ، وبين فترة والتانية هتلاقينا ان شاء الله بنرشحلك شوية فيديوهات في مجالات مختلفة ،
تتفرج عليهم و تدعيلنا ^_^

تعليق 1
  1. مؤمن طه يقول

    جزاكم الله خيرا وبارك فيكم وفي مجهودكم وجعله الله عز وجل في ميزان حسناتكم أنتم ووالديكم جميعا

اترك رد

لن يتم نشر عنوان بريدك الإلكتروني.