لما بنقرر نبدأ نتعلم لغة جديدة، ساعات الموضوع بيبقى صعب، وساعات الموضوع يبدأ بحماس بعدين تبدأ تتعب او تزهق، وساعات مبتكونش مقرر انت عايز تتعلم ايه بالظبط وليه فـ تبدأ تتشتت وينتهي الموضوع بإنك تبطل!
احنا هنقولك على كام نصيحة ممكن يساعدوك خلال رحلة تعلمك ويسهلوا الموضوع عليك : )

1- حدد انت ليه عايز تتعلم لغة جديدة.
احيانًا لما بنقف او نزهق او نسأل نفسنا –من التعب- احنا ليه بنعمل الشيء الفلاني، بنبقى محتاجين اهدافنا تكون واضحة قدامنا عشان نفتكرها وقت اللزوم وتساعدنا نتخطى مرحلة التعب، لازم تبقى محدد وعارف انت ليه قررت تتعلم اللغة الفلانية، عشان منحة؟ عشان شغل؟ عشان شغل وقت فراغ بشيء مفيد؟
ايًا كان السبب فـ انت اكيد عارف اهميته ليك.

2- شجع نفسك.
ممكن التشجيع يبقى من خلال شريك ليك تتعلم معاه، بس مش دايمًا بنلاقي الشريك ده، في مواقع كتير بيبقى موجود عليها ناس من كل العالم بيتعلموا برضو، شارك واتفاعل معاهم، متبقاش قاسي على نفسك لان كل شيء بيبقى صعب في الاول بعدين بيبقى سهل، كل ما تلاقي نفسك ثابت ومبتزهقش وبتتطور كافئ نفسك.

3- اتفرج واسمع كتير.
من اكتر الحاجات اللي ممكن تخليك تتشرب اللغة اكتر وتتفاعل معاها وتفهمها انك تشوف وتسمع ناس بيتكلموا بيها، نزل افلام ومسلسلات واسمع اغاني وشوف المتحدثين الاصليين للغة بيتكلموا ازاي، بشكل شخصي انا اتعلمت كلمات تركية كتير من المسلسلات التركية المترجمة D:
ده وانا مكنش في دماغي موضوع تعلم اللغة، لكن لو حد مركز أكثر اكيد استفادته هتكون أكبر.

4 – خلي الموضوع ممتع.
في مواقع وتطبيقات كتير ممكن تخلي عملية تعلمك للغة سهلة بسيطة وممتعة كمان

5- اسمع و سجل
اللغة عبارة عن كلمات، كل ماتعرف كلمات اكثر، كل ماقدرتك على التعبير هتكون أفضل، خلي معاك قاموس – ممكن على الموبايل- دايمًا، عشان أي كلمة جديدة تشوفها تعرفها، وسجل.. مهم تسجل الكلمات الجديدة اللي بتعرفها، ده بيساعدك أكثر تفتكرها بعد كده.

6- اتكلم كتير وفكر بيها
اتكلم باللغة اللي بتتعلمها سواء مع نفسك او مع غيرك، كل مابتتكلم أكتر كل مابتاخد ثقة أكثر في نفسك لانك بتبقى جربت مرة واتنين ومع الوقت بتعبر أكثر، وبتعرف ايه اللي ناقصك وبتعالجه، لو عندك امكانية انك تتكلم مع متحدثين اصليين ده بيكون شيء مساعد جدًا.

7- فكر بشكل ايجابي، مختلف
فكر ان اللغة الجديدة دي هتكون باب بيتفتح ليك على ثقافات مختلفة وفرص مختلفة لتكوين صداقات او فرص مستقبلية في شغل او حتى للتطور الشخصي، ومتستناش من نفسك تكون بيرفكت من اول مرة، تقبل الاخطاء اللي هتقع فيها في الاول لانها شيء وارد جدًا، اخطائك بتكون هي مفتاح نجاحك لانك بتعرف نقط النقص وبتطورها ومع الوقت الاخطاء بتقل كنتيجة طبيعية للتطور اللي بيحصل

يقال ان الاطفال هم الافضل في تعلم اللغات , بس ده مش معناه ان الكبار ميحاولوش , طلبنا من بعض المترجمين فى TEDx انهم يشاركونا اسرارهم لاحتراف اي لغة اجنبية, و اجاباتهم كانت بتتلخص في 7 نقاط اساسية

1 – كن واقعي : حاول انك تحدد هدف سهل كبداية عشان متحسش ان الموضوع مرهق في الاول, مستر جوديث ماتز المترجم الالماني بينصح اننا نختار 50 كلمة من اي لغة و نبتدي نتعامل بيهم مع الناس , بعد كدة ممكن ندخل في قواعد اللغة

2 – خلي تعلم اللغة ياثر على حياتك : اليزابيث بوفارد ( معلمة لغة انجليزية لمدة 27 سنة ) شايفة ان اللي بيفرق بين الطلاب الناجحين و باقي الطلاب هو الثبات و الاستمرارية , خلي عندك عادة لغوية تتبعها سواء كنت مرهق , تعبان او حتى واقع في الحب

3 – اتعود على اللغة : كل ما تحاول انك تستعمل اللغة الجديدة في حياتك اليومية هتلاقي مخك بيتعامل معاها انها حاجة مفيدة و يبدأ يهتم بيها , المترجمة الروسية أولجا دميتروشينكوفا بتقول ” استغل كل فرصة متاحة انك تستعمل اللغة الجديدة ” حاول تسمي الاشياء في بيتك باسمها في اللغة دي , اقرا كتب اطفال مترجمة او اتفرج على فيديوهات مترجمة

4 – خلى التكنولوجيا تساعدك : ديمتروشينكوفا بتقول ” انه من الممتع لو غيرت لغة موبايلك للغة الجديدة و ده هيساعدك تتعلم كلمات جديدة باستمرار ” , ممكن كمان تغير لغة الكمبيوتر , و كمان ممكن تدور على فرص للتعلم على الانترنت , المترجمة الهولندية ايلز دي كيسر بتنصح انك تستعمل تطبيق (دولينجو) للتعرف على قواعد اللغة , او تطبيق ( أنكي ) للكلمات و المرادفات

5 – فكر في تعلم اللغة على انه تجربة جديدة : بالنسبة للمترجم الاسباني سيباستين بيتي , تعلم لغة بيدور حول الفرص و الخبرات اللي اللغة الجديدة هتوفرها او بمعنى اخر , فكر في كل الحاجات الممتعة اللي بتحب تعملها و اربطها بتعلم اللغة الجديدة , على سبيل المثال المترجمة انا مينولي اتعلمت الانجليزية عن طريق مشاهدتها لنسخ غير مترجمة من افلامها المفضلة , في حين ان المترجم الكرواتي ايفان ستامينكوفيتش اكتشف فجأة انه يقدر يتكلم انجليزي في الصف الخامس بعد سنين من مشاهدته لقناة كارتون غير مترجمة , الخلاصة , حاول انك تربط اي حاجة بتحب تعملها باللغة اللي بتتعلمها

6 – اتعرف على اصدقاء جدد : التواصل في اللغة شئ اساسي , هيساعدك على التعبير عن افكارك بسرعة بدل ما تترجم كل جملة في دماغك قبل ما تقولها , حاول تشوف ناس اجانب يساعدوك , او ببساطة دور على الانترنت على مواقع تبادل لغوي , هتلاقي ناس يساعدوك تخسن لغتك و انت هتساعدهم يحسنوا لغتهم

7 – متقلقش من الاخطاء : احد اكبر العقبات في تعلم لغة جديدة هو الخوف من الاخطاء , اصحاب اللغة الاصليين لو شافوا انك بتحاول تتواصل معاهم بلغتهم هيقدروا ده جدا و هيساعدوك , و لو قلقان ممكن تجرب تبدأ محادثات مع الاصغر سنا , المترجم الالماني جوديث ماتز بيقول انه اتصدم لما اتكلم مع طفل ايطالي و اكتشف انهم تقريبا في نفس المستوى في اللغة , و لازم تكون صبور , لانه كل ما اتكلمت اكتر كل ما تقرب من انك تكون طليق اللسان في اللغة و تبدأ محادثات مع ناس من نفس عمرك

ياتري تعرف ان اللغة الروسية بيتكلم بيها أكتر من 250 مليون إنسان , و انها من أهم اللغات المُعتمدة في المحافل الدولية .. خاصة في السياسة و السياحة و الأدب و التاريخ و العمارة ..

و بعيداً عن ان روسيا انها إمبراطورية ضخمة و ليها تاريخ عظيم .. و اختصاراً للمقدمات الطويلة .. ال HR فى الشركات بيحبوا يشوفوا عبارة ” أتحدث اللغة الروسية ” في الC.V بتاعك ^_^ ..

اتفقنا ان مفيش أي لغة صعبة تماماً و لا لغة سهلة تماماً ، كل لغة و ليها التحدّي بتاعها
و إتفقنا إنك هتتعلم و انت قاعد ف بيتك #مجاناً .. و مش هتحتاج اكتر من قلم و كشكول و سماعتك و كوباية شاي ^_^

—————————————–

1-
Secondary Russian

دي عبارة عن 3 مستويات من الروسي , مُمتازة جداً بتعتمد عن إن فيه دكتورة بتشرح لك كل حاجة بخصوص اللغة بالتفصيل من البداية تماماً و الحروف الابجدية لحد ما تبقي مُحترف
https://www.youtube.com/playlist?list=PLF2F566484C119BF4

2-
Russian with Passion

هي بردو عبارة عن قناة youtube فيها كذا درس للمبتدئين و بتتنقل بيك لمستوى متوسط ثم مُتقدم اكتر و فيها شرح قواعد و تعبيرات و أفعال روسية

https://www.youtube.com/playlist?list=PLCL8PrsNNVvfJwbyXoi4mqQecEKyy2MY7

إذا كنت تفكر في استغلال بعض من وقتك لتسفيذ من دورات ودروس  يقدمها أساتذة جامعيين و محترفين في شتى العلوم والمجالات من مختلف الجامعات الأجنبية .. الآن يمكنك أخد دورة في اللغة الانجليزية أو في الأمن المعلوماتي أو حتى في الفزياء وكل هذا “مجانا” ، بل حتى أنك ستحصل على شهادة من هذه الدورات. لذلك هذه قائمة بأهم الدورات التعليمية التي ستبدأ في الشهر المقبل أبريل 2014 في مختلف المواقع التعليمية على الأنترنت .