ازاى تكتب و تقرا و تسمع انجليزي بشكل افضل

4 1٬670

بدأنا الاسبوع اللى فات سلسلة مقالات عن ” ازاى تتعلم انجليزي ؟ ” النهارة موضوعنا هيكون عن .. ازاى تكتب و تقرا و تسمع انجليزي بشكل افضل

1. اسمع راديو انجليزي. من احسن الطرق علشان تحسن قدرات فهم الإنجليزي عندك هي انك تسمع راديو او إذاعة بلغة انجليزية.

– حاول تسمع على الأقل حوالى 30 دقيقة في اليوم. في طريقك للشغل، و انت قاعد عالنت او اى وقت انت فاضي فيه.

– حاول تبذل جهد انك تسمع و تفهم اللى بيتقال. حتى لو لقيت الكلام سريع جدا عليك، حاول تلقط الكلمات و الجمل المميزة و تفهم الموضوع بشكل عام بيتكلم عن ايه.

– حاول تكتب الكلمات و الجمل اللى انت مفهمتهاش و دور عليها بعد كدا. و بعدين اسمع البرنامج مره تانى و حاول تركز عالكلمات اللى انت معرفتهاش اول مره.

2. اتفرج على أفلام او برامج انجليزي.

– حاول تختار أفلام او برامج تكزن بتحبها و مهتم بيها. دا بيخليك انت مش بتتعلم لا انت في بريك 😀 . و ياريت لو تختار حاجه انت أصلا عارفها و اتفرج عليها “بس من غير ترجمة طبعا :D”. داه يخليك تلقط الكلام احسن.

– مره تانى بلاش الترجمة 😀 كل اللى هتعمله انها هتخليك مشتت و تمنعك تركز على انك تفهم الكلام اللى بتسمعه و دى الفكره أصلا من الحوار دا كله.

3. اقرأ كتاب، مجلة او جورنال انجليزي. و دا جزء مهم جدا علشان تطور لغتك فإياك تنساه.

– دور على موضوع بتحبه فعلا و مهتم بيه اى كان نوعه مقال، رواية او غيره. لكن لو اخترت موضوع ممل هيبقى الدافع اقل انك تكمله.

– ابذل جهد علشان تفهم اللى بتقراه. ماتعديش الكلام و خلاص، علم اى كلمات او جمل مفهمتهاش و حاول تدور على معناها.

– ممكن تحاول تقرا بصوت عالى، لو انت وحدك و في مكان مقفول. دا هيساعدك تحسن مهارات القراية بتاعتك و كمان نطقك.

4. اكتب مذكراتك بالانجليزي :D. مش شرط مذكرات، اى ملاحظات، اراء، اى حاجة عايز تفتكرها. دا مهم لو عايز تحسن من مهارات الكتابة بتاعتك.

– الكتابة ممكن تبقى من اصعب الحاجات علشان تتعلم انجليزي لكن كمان هي اهم حاجة، لانها بتساعدك تطور من ترتيب الجمل بتاعتك و القواعد و التهجئة.

– خلى معاك نوتة صغيرة اكتب فيها كام جملة كل يوم. و زى ما قلنا مش لازم تبقى حاجة شخصية، ممكن تبقى حاجة عامة زى الجو كان عامل ازاى، اتغديت ايه او ناوى تعمل ايه اليوم دا.

– ياريت لو تخلى شخص يكون الانجليزي لغته الام، يراجع الكلام اللى انت كاتبه و يصلحه. داه يساعدك متغلطش نفس الغلطة مره تانى.

5. حاول تلاقى صديق اجنبي بالمراسلة 😀 او اى شخص تقدر تتكلم معاه انجليزي عن طريق الكتابة. الموضوع دا بقى سهل دلوقتى مع الانترنت و الميل و غيره. دا طبعا بعد ما تحسن قدراتك في الكتابة الى حد معين.

– صديق المراسلة ممكن يمون شخص بيتعلم الإنجليزي زيك او هو أصلا لغتة انجليزي .

– ان يبقى عندك صديق مراسلة اجنبي داه يساعدك تتعلم اكتر عن حضارات البلاد التانية.

4 تعليقات
  1. AHMED ELMLAK يقول

    شكرا على المجهود الرائع

  2. elshazly يقول

    thanks for your advice but i have an idea we can do this here in this valley to help each other talk to each other , practice and write the sentences here

    1. Ph. sharweda يقول

      Completely agree with you mr Emad , will be useful in general to us .
      On the other hand will help the site to be more brilliant,
      so why not mr mohamed nagy !!

  3. mohamed salama يقول

    thank you , dalia

اترك رد

لن يتم نشر عنوان بريدك الإلكتروني.