معاً نصنع المُستقبل

كل ما تحتاج لمعرفتة عن موجات الجاذبية “Gravitational Waves”

0 318

من حوالى 100 سنة اينشتاين اتنبأ في نظريته للنسبية العامة بحاجة اسمها موجات الجاذبية ” Gravitational Waves ” وأظهرت النظريات الرياضية لاينشتاين ان الأجسام الضخمة اللي بتتحرك بصورة متسارعة (زي النجوم النيوترونية أو
الثقوب السوداء اللي بتدور حوالين بعضها ) ممكن تعمل تشوه في النسيج المكون للكون وهو نسيج الزمكان او “-space
time” وده بيؤدي لانتاج موجات جاذبية ممكن تشبهها بالموجات اللي بتحصل لما بترمي حجر في وسط بحيرة ، لكن
الموجات دي قوية جدا و بتقدر تسافر خلال الكون بسرعة الضوء ، وأقوى الموجات دي هو اللي بيحصل
نتيجة احداث كارثية ضخمة زي مثلا اصطدام الثقوب السوداء او انهيار النجوم العظمى او حتى بقايا اشعاع الجاذبية اللي
نشات نتيجة ولادة الكون نفسه ، وعلشان الصورة توضحلك اكتر شوف الانيمشن ده :

ومع شرح اينشتاين للموجات دي نظريا الا انه اتنبأ انها هتكون دقيقة جدا بحيث هتفضل بالنسبة لينا مجرد اثباتات نظرية
ومش هنقدر نلاحظها عمليا وبالتالي ممكن تفضل مجهولة للأبد ، وحقيقي حاول علماء كتير يثبتوا وجود موجات الجاذبية
عمليا لكنهم فشلوا بسبب الصعوبة البالغة في العثور عليها وقياسها اللي بيتطلب توفر مجسات فائقة الحساسية، لأن الموجات
دي لما توصل الأرض بتبقى صغيرة جدا ممكن أصغر ألف مرة من حجم نواة ذرة

لكن بعد 100 سنة من نظرية اينشتاين اللي وضعها في 1916 وتحديداً في سبتمبر 2015 قدر الفريق اللي شغال في مرصد
ليغو ” LIGO ” انه يرصد عملياً التشوهات اللي حصلت في نسيج الزمكان نتيجة موجات الجاذبية اللي نتجت عن اصطدام ثقبين
اسودين ووصلتلنا الموجات دي بعد 1.3 مليار سنة ضوئية من اصطدامهم ^_^

الابداع والدقة اللي وصلها مرصد ليغو هو اللي خلى مبتكرين المرصد يفوزوا بجايزة نوبل للفيزياء لسنة 2017 .. فعلياً المرصد يعتبر أدق مصيدة اتعملت في تاريخ البشر لغاية دلوقتي ، علشان كده الموضوع اخد منهم 40 سنة كاملة من الضبط والتجريب واعادة الضبط
في مشروع مكون من أكتر من الف عامل مابين علماء ومهندسين ورجال ادارة وكمان عملوا نسخة تانية منه على بعد 3 الاف
كيلومتر علشان يقارنوا النتايج اللي بيوصلولها ويتاكدوا منها وكل ده علشان بس يلتقطوا الموجات دي

التقنيات المستخدمة في المرصد ده هتمكنا انا احنا نعرف بصورة اكتر دقة ازاي ظواهر فلكية حوالينا بتشتغل زي الثقوب
السوداء والنجوم النيوترونية وممكن تمكنا كمان من رصد أكتر اسرار الكون غموض بالنسة لينا لغاية الوقتي وهي المادة
المظلمة ” Dark matter ” و دي نتكلم عنها في مقال تاني ان شاء الله ^_^

لو حابب تعرف اكتر عن موجات الجاذبية وازاي مرصد ليجو بيشتغل وتاريخه فالكورس ده ممكن يفيدك و اللي بيديه عالم
الفيزياء الفائز بجايزة نوبل واحد مبتكري مرصد ليجو ” راينر وايز ” الكورس اسمه ” 100Years of Gravitational Waves ”

وبتقدمه منصة ” World Science U ” .. المنصة مختصة بتقديم كورسات في العلوم بس بطريقة مبسطة وتفاعلية واللي بيدي الكورسات دي هم باحثين فايزين بجوايز في مجالات علمية مختلفة ، الكورس تقدر تاخده في اي وقت ومجانا ، كل اللي عليك انك تسجل حساب في المنصة وتدخل تبتدي في الكورس :
http://www.worldscienceu.com/courses/master_class/master-class-rai-weiss

تعليقات
Loading...