ال Drop shipping مشروع بدون رأس مال

2 6٬763

كام مرة فكرت تبدأ مشروع جانبي يوفرلك دخل اضافي وسط التقلبات اللى احنا عايشين فيها ( الدولار بيزيد .. البنزين غلي .. الطماطم ب 10 جنية .. Bla Bla )

و طبعا علشان تبدأ مشروع حاليا وتشتغل في التجارة .. انت متخيل هتحتاج راس مال اد ايه ؟؟؟؟

لكن تعرف انك ممكن تفتح محل و يبقي ليك فروع فى كل دول العالم وتشتغل في التجارة الالكترونية … بدون رأس مال !!!

ازاى ؟

فى البداية خلينا متفقين ان التطور اللى حصل في مجال التجارة الالكترونية ازال الحواجز والحدود بين دول العالم.

يعني حضرتك تقدر تشتري بضاعة من الصين وتبيعها في امريكا وانت موجود في مصر او تشتري من امريكا وتبيع في انجلترا مثلا … يعني من الاخر تشتري من اي مكان في العالم وتبيع لاي مكان في العالم وانت قاعد بتشرب كوباية الشاي قدام الكومبيوتر في بيتك .

معقول الكلام ده … مش معقول ليه !

ادخل اي متجر الكتروني من المتاجر العالميه زي ebay  هتلاقي جنسيات من مختلف انحاء العالم شغالين علي الموقع وبيعرضوا منتجات عليه سواء المنتجات دي محلية .. او Drop shipping

يا تري ايه هو نظام الدروب شيبنج ؟

الفكرة ببساطة انك هتكون وسيط  بتختارمنتج بسعر مخفض من موقع الكتروني وتعرضه في موقع اخر او علي متجرك الخاص وتستفيد من هامش الربح .

مش بس كده !

انت كمان مش هتشيل هم الشحن … ولاتغليف المنتج …. ولامكان لتخزين المنتج .

لان المنتج هيتشحن من المتجر اللي اخترته الي العميل مباشرة.

مثلا اخترت منتج من موقع امازون  سعره 10 دولار وعرضته علي موقع ebay او متجرك الخاص بسعر15 دولار و في عميل اعجب بالمنتج وقام بشرائه ودفع ثمنه وكتب عنوان الشحن

الخطوة اللي بعد كده ….

هقوم بشراء المنتج من موقع امازون واكتب عنوان العميل علي موقع امازون والمنتج هيتشحن مباشرة من موقع امازون الي عنوان العميل في اي مكان في العالم وانت هتستفيد بهامش الربح بعد خصم عمولة ايباي طبعا .

 

طيب فيه مشكلة ؟ انا مافيش عندي خبرة في وصف المنتج

مافيش مشكلة انت هتاخد وصف المنتج وصورته من موقع امازون

طيب فيه مشكلة كمان ؟ هتاكد ازاى من جودة المنتج ؟

بسيطة انت هتبحث علي البائعين الموثوقين ودي بتكون واخدة اكبر نسبة في التقييم وتدخل المتجر وتقرأ اراء العملاء اللي اتعاملت مع المتجر وقامت بالشراء منه. اذا وجدت  ان اراء العملاء ايجابية وتقييم  المتجرنسبته عالية اعرف ان المتجر موثوق منه وتقدر تختار المنتجات اللي هتعرضها منه علي موقع ebay  او متجرك الخاص.

طيب هدفع الفلوس ازاى وانا بشتري وهسحب ارباحي ازاي ؟

انت الاول تعمل فيزا انترنت من البنك تعرف تشتري من خلالها  وبالنسبة للسحب انت هتربط  متجرك علي ebay  بالبنك الالكتروني  paypal اللي هتربطه بكريدت كارد تقدر تسحب من عليه فلوسك بالمكسب .

في ناس كثيرة في العالم شغالين بنظام الدروب شيبنج وحققوا منه ارباح كبيرة لكن بما ان المنافسة كبيرة جدا علي موقع ebay فمحتاج صبر لكن الميزة الموجودة علي الموقع ان كل يوم بيدخل للموقع ملايين من العملاء من مختلف انحاء العالم تريد الشراء منه .

2 تعليقات
  1. محمد فتحي يقول

    موضوع اكثر من رائع، شكرا للمجهود العظيم
    ممكن توضيح اكتر لطريقة السحب

  2. تامر أحمد جمعة يقول

    الموضوع ممتاز ، ودخلت على eBay لكن ماعرفتش أبدأ منين.
    ممكن توضيح بسيط لبداية ال business.
    جزاكي الله خيرا

إلغاء الرد

لن يتم نشر عنوان بريدك الإلكتروني.