مع الانهيار المستمر في عائدات الاعلانات عبر الانترنت ، فأغلب مواقع الويب بدأت تتحول لطرق تانية تتدفع بيها فواتير الاستضافة بتاعتها و تحقيق ارباح .. ومن الطرق دي هي استخدام اجهزة الكمبيوتر والهواتف بتاعت الزائرين اللي على الموقع للتعدين عن العملات الرقمية ” cryptocurrency ” زي البيتكوين
الموضوع أشبه بتشغيل malware على جهاز الزائر .. الجانب السلبي انه في أفضل الأحوال هيبطئ اجهزة الزوار وفي أسوء الأحوال اما هيستنزف بطاريات الأجهزة أو هيكون السبب انك تجيلك فاتورة الكهربا عالية ^_^
محرك البحث الخاص بالتورنت The Pirate Bay وخدمة بث الفيديو بامريكا Showtime هما موقعين تم اكتشافهم انهم بيرسلوا رمز عدين للمستخدمين ، وساعتها طلع خبر رسمي من الشركة المالكة للموقع بتقول ان الرمز ده كان ” مجرد اختبار ” ^_^ وان التجربة كان هدفها انهم يشيلوا كل الاعلانات من على الموقع .
عملات cryptocurrencies زي البيتكوين وغيرها شغالة بنظام عمال المناجم “miners” ، اللي يعتبروا في سباق علشان يحلوا مسائل حوسبية معقدة للحصول على مكافآت في المقابل ، للعلم احنا هنا بنكلم عن مكافات بتوصل ل 7 ملايين دولار يوميا في حالة البيتكوين مثلا ، بس العمال دول محتاجين كمية ضخمة من قوة الحوسبة “computing power” ، وطبعا غير التكلفة بتاعت شراء أجهزة الكمبيوتر ، كمان تكلفة الكهرباء المستهلكة ، علشان كده الشركات الأكتر ربح في المجال ده اما انها بتعتمد على الطاقة الرخيصة ، او شركة مثلا مقرها في آيسلندا بحيث انها توفر شوية الفلوس بتوع عملية تبريد الأجهزة معتمدة على المناخ البارد للبلد .
فالمواقع بقى اللي هتعتمد على التعدين هتقصر الدايرة دي : بان فاتورة الكهرباء اللي هيدفعها هو الزائر للموقع اللي هو حضرتك ^_^ ، واللي بيحصل على المكافاة هو الموقع .. وهتلاقي معظم المواقع اللي ممكن تشتغل في الموضوع ده هي مواقع الألعاب والفيديوهات لانك بتقعد عليها فترة طويلة وفي نفس الوقت هي أساسا بتستخدم موارد كتير في جهازك فهتشغل miner عندك و الموضوع مش هيتلاحظ أوي
طب ليه المواقع دي تستغلني وانا اساسا امكانياتي جهازي على قد حاله ^_^ هي الفكرة انها مش بتستغلك لوحدك ، مثلا في الف واحد موجود دلوقتي على الموقع .. الموقع هيستخدم أجهزة الالف دول مع بعض علشان يقوم مثلا بعملية تعدين واحدة يطلع بيها عملة !! و عامة ماتقلقش أوي لان لسه الموضوع في الاول لكن لو عايز تحتاط برضه فممكن تستخدم مع كروم plug-in اسمه No Coin وده اللينك بتاعه : https://chrome.google.com/webstore/detail/no-coin/gojamcfopckidlocpkbelmpjcgmbgjcl
اما لو عايز تفهم أكتر يعني ايه cryptocurrency أصلا و بيتكوين فمكن تدخل تشوف المقال ده
ماهي عملة البيتكوين ؟
