ناس كتير بتشتكي من انهم مش بيعرفوا يكتبوا ورا الدكتور في المحاضرة ! او انهم لما بيتابعوا كورس Online مش بيعرفوا يطلعوا منه بمعلومة على الرغم من ان الكورس مفيد جداً !! لكنهم بينسوا بسرعة .. و حلهم هيبقي الكتابة و التلخيص و اللى هيرجعنا تانى للمشكلة الاولى .. و هى ان اغلبنا مبيعرفش يركز و يسمع و يكتب فى نفس الوقت !
طب و الحل ؟!
فى دكتور اسمه Walter Pauk ” مدير مركز كورنيل للدراسات | و من الأساتذة الكبار في مجال مهارات التعلم ” قعد يدور على حل يسهل على طلبة جامعة كورنيل التدوين و التلخيص اثناء الاستماع للمحاضر .. و بالفعل طلع بنتيجة بتطبق من سنة 1950 و حققت نتائج مبهرة
بص ياسيدي الطريقة ببساطة : تقسيم الصفحة زي ما انت شايف في الصورة ( طبعا التقسيمة هاتختلف من عربي لانجليزي .. فتح مخك معايا 😉 .
الجزء الشمال “الكلمات المفتاحية” :
هاتكتب فيه الملاحظات الصغيرة ، مثال كلمات ( كتاب ، مربع ،سؤال “ليه القط بيخاف من الكلب?”، اي حاجة انت عايز تلقطها من المحاضرة او الفيديو وماتنسهاش )
ـــــــــ
الجزء اليمين”الشرح” :
الجزء دا هاتشرح فيه الكلمة او السؤال اللي انت كتبته في الجزء الشمال ، مثال ، انت عايز تشرح كلمة صندوق ، يبقي هاتقول ان الصندوق هو جسم مكون من 6 اوجه متساوية وهكذا .
عايز تشرح سؤال ” القط والكلب ” هاتقول ، والله دي حكمة ربنا ايش عرفني انا روحوا اسألو القط ^_^
ـــــــــ
الجزء السفلي “التلخيص” :
الجزء دا هاتكتب فيه ملخص الشرح اللي انت كتبته بعد ما تخلص المحاضرة .. و تحاول تعصر دماغك بحيث تغطي كل اللي اتقال و فهمتة و يكون مرجع ليك فى اى وقت
كمان دة Tempalate جاهز تقدر تنزله ع الجهاز عندك و تطبعة .. تكتب علية جاهز بدل ما تضيع وقت فى التسطير ^_^ :
بارك الله فيكم و نفع بكم.