ال MBA .. ماجستير إدارة الاعمال .. و اللى بدأنا كلام عنه من حوالى شهر و عن فرصتك انك تقطع تذكرة VIP لرحلة مش هتتكرر فى عالم الوظائف و ال business .. لانك ببساطة مبقتش مضطر تدفع مبالغ بتبدأ من 40.000 الف جنية و انت طالع .. او ينضحك عليك بشهادة مضروبة .. فى حالة انك قرأت الكلام ده قبل كده و لسه تايهه ف الكلام موجهه ليك عشان يجاوب على كل الاسئلة اللي في بالك و تعرف راسك من رجليك ^_^
اما فى حالة انك اول مره تقرأ ف لا تقلق ^_^ الكلام ده هيشمل الكلام القديم كله و بتوضيحات اكتر ^_^
– انا هاخد ال MBA #مجاناً و كمان بشهادة معتمدة .. انا محتاج افهم اكتر ؟؟!!
__
بداية 40.000 الف جنية دي لو هتاخد ال MBA من مصر ^_^ انما لو بتفكر تاخده من جامعة زي University of Pennsylvania ” The Wharton School” و بالمناسبة جامعة بنسيلفانيا هى واحدة من افضل 3 جامعات ع العالم بتدي MBA .. انما تكلفة البرنامج بتوصل ل 120.000 الف دولار ^_^ مش لازم تحولها بالجنية .. لانهم ببساطة عملوا حركة جدعنة ووفروا 4 كورسات الخاصيين بأول سنة مجاناً و وادي المشمش وفر ال 4 كورسات الباقية #مجاناً من جامعات تانية
كل اللى عليك انك هتفضي نفسك 4 ل 6 ساعات ف الاسبوع و تحضر المحاضرات مع الدكاترة الاجانب و انت ققاعد فى بيتك online و #مجاناً
__
– طيب انا كده هاخد شهادة معتمدة ازاى ؟
انت بعد ما بتخلص كل كورس بتتبعتلك شهادة حضور attendance على الايميل ببلاش ^_^ كفاية و مش لازم تشغل بالك بالشهادة ال verified اللي بتتباع ب 38 $ الا لو احتجتها مستقبلاً ” بتاع 250 جنية مش أزمة ”
__
– طيب يعني ال شهادة بتاعت الحضور ام بلاش كفاية و هينفع اشتغل بيها ؟ او بالبلدي الشركات هتقبل ابو بلاش و تسيب اللي دفع 120.000$ دولار … طب ده انا سمعت عن ال Mini Mba ب 7000 جنية هنا فى مصر فى كذا و معتمد تقريباً ؟
آه الشهادة كفاية و هتتقبل .. لان آخر بيان صحفي ل David Wilson المدير التنفيذي لل GMAT و ده Graduate Management Admission Council .. المعهد المسؤول عن اعتماد شهادات ال MBA و امتحانها .. قال ان ال MBA اتحولت من درجة ماجستير و شهادة ورق .. ل portfolio of courses & certificates .. يعني شوية كورسات على شوية شهادات و الاهم انك تكون فاهم و تعدي ال interviews و اي اختبارات

و من ناحية فاهم وتعدي interviews .. ف في ” وادي المشمش ” هنعلمك ازاى تكتب الموضوع بشكل منسق بداية من ال CV و انك درست ال MBA ك Self Study .. بالاضافة لاننا قدمنا و بنقدم مقالات مترجمة هتساعدك تفهم ال كورسات اللى بتذاكرها و بالعربي .. يعني #ملكش_حجة
تقدر تتابع و تستفاد من المقالات دي عن طريق : http://goo.gl/yhydSr
كمان بنجهز لمحاضرات #مجانية فى القاهرة و الاسكندرية ان شاء الله .. عشان نظبط موضوع المذاكرة و الاستعدادات مش بس مقالات
__

اما بالنسبة لموضوع ال Mini Mba ف دي ف وسط الشركات يعتبر اللى واخدها مختوم على قفاه #لامؤخذة .. عشان اي سمك لبن تمر هندي و دفع فلوس عشان كلمة شهادة ^_^

__
لو حابب تعرف اكتر عن ال MBA و هتفيدك ازاى اياً كان مجالك او سنك ؟ .. أقرأ الكام موضوع دول
1- http://goo.gl/X056W0
2- http://goo.gl/AYXyrN

بداية – من المشاكل ال واجهتنا لما كنا بندرس ف الجامعة اننا منعرفش هنشتغل ايه لما نتخرج .. (انا شخصيا واجهت المشكلة دى) … خلينى اقولك ف البوست ده هحاول اغير طريقة تفكيرنا تجاه ال MBA لانها هتكون نقطة التحول ف حياتك >> “بدون مبالغة”. يلا بينااا نذكر 3 حقائق:
• الشهادة بتفتحلك افاق عمل مختلفة تماما .. وبالتالي بتزيد فرصك انك تشتغل ف مناصب اعلي.
• بالقياس (الشركات الكبيرة بتدور ع ناس عندها خبرة) والاحد الادني ان يكون عندك معرفة تفوق دراستك النظرية وده بتوفره ال MBA.
• واخيرا … اصحاب الشركات بيقدموا ترقيات بس للناس ال كملت دراسات عليا ف البيزنس عشان ال بيكتسبوه من مهارات مش موجود ف مكان تاني ..

وباقي النقاط والحقائق هkوضحها اكتر ف ال 10 نقط الجاية – (معادلة: التعب + الاجتهاد= تميز) –متستغربش حضرتك !! ده شرح مبسط هيلخص استفادتك من ال MBA اياً كانت تخصصك اية .. (حياتك الوظيفية هتبقي عاملة ازاى ؟ فرصك ؟ مرتبك $$$ ) ..

1- انا ك خريج/خريجة شغال ف ال IT هستفيد ايه من الشهادة يعنى؟ — هتستفيد انها هتفتحلك مجالات تانية فى نفس التخصص زى IT Manager وTechnology Manager وكمان IT Project Manager لان خريجي الماسترز ده هيقدروا يوجهوا اهداف الشركة بالنسبة لتكنولوجيا المعلومات عن طريق ال Computer Systems ال هتحقق الاهداف دي.. طب خد عندك دى؛ (ابداعك هيتوهج فى المجال ده بسبب المهارات والامكانيات ال اتعلمتها) .. وايه تاني؟ متوسط الراتب مثلا ل IT Manager هيزيد ل 115000 دولار سنوياً .

2- نيجي للناس ال معاها الماسترز وشغال ف ال Management Consulting .. لالالا استني شوية انا سمعت الكلمة دى قبل كده – ده صحيح عشان احنا اتكلمنا عنها ف مقال سابق، والكلام دلوقتي بيأكد ال قولناه من اسبوع انك من خلال مهاراتك ومعرفتك هتقدر تفيد الشركات عشان تؤدي وظايفها باقصى قدر من الكفاءة والفاعلية. وممكن تخدم العملاء ف مجال واحد او اكتر من مجال. وماديا –ف متوسط المستشار الادراي بيترواح من 77000 ال 110000 دولار سنوياً وممكن اعلى.

3- ومساعدة البنوك والشركات الاستثمارية بادارة المحافظ الاستثمارية الخاصة بيهم ع طريق ما يسمي ب “المدير الاستثماري” – دى النقطة التالتة لينا .. يعني لما تاخد ال MBA هتعمل توصيات لافضل الطريق لادارة الاموال والاستثمارات .. – لا ومتوسط الدخل ما بين 105000 و122000 دولار سنوياً.

4- من التخصصات المهمة ال بتتعلق بال ماسترز ادارة الاعمال ((التسويق)) .. ان كحاصل ع ال MBA ده بيديك مساحة اكبر من ناحية تصميم وتطوير المنتج .. يعنى بتلعب دور اكبر –قصدي حضرتك بتبدع كمان ف وضع الحلول للاستراتيجية التسويقية. مهم نعرف ان دخل مدير التسويق ما بين 108000 و 122000 دولاراً امريكياً.

5- سؤال بسيط: تتوقع يا باشا ان المدير التنفيذي للشركة CEO أو المدير المالي CFO اساسا خريجين حقوق مع شوية معلومات عن البيزنس وادارة المؤسسات؟؟ -ده طبعا لما ياخد ال MBA اصحاب الاعمال هم ال بيطلبوه – ولك ان تتوقع ان ده بيفرق معاه ماديا كتيير اوى “لان متوسط الراتب بيكون 165000 فما فوق” .. والله من زمان وانا بحب القانون والحقوق =)

6- جمعية رسالة –أو بمعنى اوضح “المنظمات الغير ربحية” .. ضروري تعرف انها بتعلمك الكتييير وبتضيف لرصيدك معاني وقيم نادرا لو لقيتها ف الزمن ده- ع الاقل دى وجهة نظري الشخصية “لنفرض ان ف مقابل مادي” –. وانت مدير لجمعية مسؤل عن التعامل مع المؤسسات الحكومية او مسؤل العمليات والتشغيل وحاصل على ال MBA ده هيرفع دخلك ل 77000 مع اختلافي زى ما قولت ع نقطة المقابل المادي ف منظمة لا تهدف للربح اصلا.

7- تخيل لو انك درست بيزنس ف تخصص مالية –وانت شاطر شوية ف “هندلة” او التعامل مع الارقام … قررت تاخد خطوة لقدام وحصلت ع ماسترز ادارة الاعمال. ده بيسمح ل المحلل المالي انه يراجع البيانات المالية ويعمل توصيات عشان يقلل الخسائر ويحسن مستوي الاداء. (وبالنسبة ل متوسط راتب استاذنا ف بيكون 74000 دولار سنويا.

8- لو انت حد مكافح وخدت ال MBA وانت معاك بكالوريس محاسبة –دى بيأهلك تشتغل ف مجال المحاسبة او الجانب المالي “Finance” .. اما لو فكرت تاخد ال CPA ال هي شهادة جبارة يا ريس –هتتعب كتيير وهيطلب منك تعدي امتحانات معينة ومن ضمنها انك تكون بتكمل دراسات عليا او ال Countinuing Education – طبعا قفزات زى دى هترفع متوسط راتبك ل 61000 دولار والناس الاعلي ممكن يوصلوا ل 106000.

9- سمعت عن ريادة الاعمال قبل كده؟ طيب تعرف المقصود بيها ايه؟ ..فكر معاى ايه السبب ال بيخلي كتيير من رواد الاعمال بيفشلوا ف اول 3 سنوات؟ -دى اسئلة مهمة بتعرفنا ازاى ال MBA بتزودك بمعلومات كافية ال Business Cycle وازاى تفهم فرص البيزنس بتاعك > وبالتالي هتعرف المنتج بتاعك بصورة افضل > وبعد كده التسويق واخيرا البيع . من خلال بعض المحاولات الناجحة هيكون متوسط دخلك 72000 دولار او اكتر.

10- مفهوم ال Sales بمعناه الواسع بيسمحلك لو حاصل علي ال MBA تكون ف المناصب الادارية العليا –وايه يعنى؟ يرد شخص مستفز. بنقوله حضرتك هتشرف على برامج التدريب، والعروض الترويجية وكمان هتكون مسؤل عن ادارة موظفى المبيعات او حتي >> تشرف ع مديري المبيعات الاقليميين. وبتحط اهداف المبيعات وبتحلل ادائها سواء المبيعات الفترة دى مرتفعة او منخفضة –وبتشتغل جنب مديري التسويق و المالية ،وكمان مع مجموعات البحث والتطوير .. يعنى مع الناس التقيلة (وزى ما هو واضح انك مسؤلياتك بتكبر – اكيد متوسط دخلك هيوصل 107000 دولاراً.

فى النهاية – شهادة ال MBA دى هتشقلبلك حياتك للافضل –وطبعا هترفع من مستواك الفكري كتيير جدا .. وممكن تقدر تحقق جزء كبيير م ال بنتحلم بيه – “وادي المشمش” معاً نصنع المستقبل.
ابدا ومتضعيش وقت اكتر م كده … انتظرونا

لو حبينا نعرف التسويق نقدر نقول هو انك تعرف ازاى تحدد الى العميل عاوزه وازاى تحققوله ولورجعنا للمصطلح العلمى هانلاقيه مختلف شويه وهو ان التسويق جزء من البيزنس الى بيحدد ازاى البضاعه او الخدمة بتتباع بس لو فكرت حبيتين هاتلاقى الاتنين نفس المعنى يعنى تقريبا هى اى حاجة الشركة هاتعتبرها سيطرة من جهتها فى بيع منتجهاتها وخدماتها
و فى ناس هاتشوف ان الاتنين واحد وهو ان التسويق هو البيزنس والبزنس هو التسويق فالشركات التسويقيه العملاقة بتخلى ابحاثها واقسام التطوير فيها والعلماء عندها جزء من ماكينه ابحاثها وجهودها فى مجال التسويق لانها بجرد انها تحددد العميل عاوز ايه هاتتنقل فورا للخطوة التانيه وهى انها توجده و فى كل مره بتقدم على منحة او وظيفة او بتعمل مؤتمر انت بتمارس التسويق فى بعض الاحيان انت بتسوق بحث لمشاريعك وبعض الاحيان بتسوق نظريتك وافكارك الخاصة او حتى نفسك وقدراتك
بس ده المنفروض مش يفاجئك لان مصطلح التسويق قديم جدا وشائع جدا فبرغم تغير الطرق والفاهيم المختلفة المبادىء الاساسيه فى التسويف هاتفضل نفسها وببساطه التسويق ليه اربع اضلع رئيسيه وهى مبادئه الاربعه (المنتج) (الدعايه)(السعر او تسعير السلعه والخدمه)(التوزيع) وخلينا نشرح الاربع مفاهيم او المبادىء دى
استراتيجيه المنتج
باختصار هى قدرتك على تحديد حاجه العميل بتاعك وبعدين ايجادها سواء بابتكار فيها او اختراعها حتى فى شكل منتج تقدمهوله يعنى انك تقدر تحددد منتجك بالظبط وازاى يتميز عن نماذج المشابهه من المنتجات التانيه فى السوق بحيث ان بمجرد انك تحدد المنتج ده او بلسان دارس ام بى ايه ازاى انك تضمن ولاء عملاءك للمنتج ده وتخلقله علامه تجاريه مميزه
يعنى لو هانضرب مثل لما تقدم على وظيفه فمثلا هل انت خبير فى مجال المعلوماتيه الحيويه؟ ولا عالم احياء بخبره فى البرمجه؟ ولا مبرمج بخبرة فى علوم الاحياء ؟
هنا المنتج بتاعك هايتحدد بناءا على الوظيفه الى اختارتها او اخترت تقدم عليها اكتر من كون المنتج اعتمد على مؤهلاتك فى حد ذاتها بالذات لو المؤهلات دى تقدر تصاغ فى كذا شكل
هنا هايبقى جزء من بحثك فى الوظيفه دى هى انك تحدد رب العمل عاوز ايه وتقدر تخلقه ليه ودى هى استراتيجيه المنتج
استراتيجيه التسويق
وهى انك توصل للطريقه الى هاتعمل بيها الدعايه للمنتج بتاعك وتبيعه فاكبر جزئين فى الاستراتيجيه دى الجذب والدفع

استراتيجيه الدفع:
بتتكون من انك توصل بالمنتج فى متناول العميل وانك بمندوبين المبيعات عندك يوصلوا بمنتجك للعملاء بحيث النتيجه تكون ان يبقى منتجك هو المنتج الوحيد الى الناس تقدر توصله
استراتجيه االجذب: هى انك تسوق منتجك بحيث ان العميل هو الى يدور عليه ويطلبه مابين كل المنتجات التانيه
يعثى وبنفس مثال البحث عن وظيفه تختار استرتيجيه الدفع ؟وهى انك تملا 500 الف ابليكيشن توظيف وتتصل و تزور كل مواقع التوظيف لحد ماتوصل للوظيفه الى بتتمناها ؟ ولا انك هاتستخدم نظريه او استراتيجيه الجذب عن طريق انك تبرزاسمك وسمعتك فى المؤتمرات وتلقى محاضرات وتنشر مقالات معتبرة باسمك وتخلى اصحاب العمل هما الى يتصلوا بيك ويطلبوك بالاسم؟اكيد انك تستخدم الاستراتيجيتين هو الاكثر مثاليه وكفاءه بس يومك مش هايكفى الافضل والحل انك تحدد الامثل لمنتجك يعنى لو انت عالم حائز على جئزه نوبل فاستراتيجيه الجذب فى الدعايه هى هدفك تحديدا اما لو انت براند جديد بس طموح ومثابر هاتكون نظريه الجذب مش الامثل ليك لان لسه ماحدش سمع بيك وهنا الدفع هو الحل قدامك

استراتجية التسعير
التسعير او تحديد السعر المناسب للسلعه او الخدمة هو اكتر جزء بيستهان بيه فى التسويق
وببساطه كونك تحدد سعر المنتج بناءا على تكلفته فقط هو نوع من السذاجه بل الحماقة لان السعر بشكل كبير بيعكس مدى جوده المنتج الشىء الخطير بخصوص تحديد السعرهو ان ضرر تحديد سعر منخفض للمنتج يضر بنفس درجة السعر المبالغ فيه
تحديد الكميه الى ممكن تتباع باستخدام اسعار مختلفه هو مهاره وفن ولازم يكون جزء اساسى من حاسابتك تقديرك للمبلغ الى لازم تحصل عليه من السلعه دى
ومثال البحث عن وظيفه ملاءم هنا كمان فمثلا كونك تلاقى فرصه الحصول على وظيفه براتب 30 الف بنفص صعوبه انك تلاقى وطيفه براتب 70 الف الفارق هنا انك تحدد انت عاوز ايه او انك تقدر تقدم ايه فاذا كنت باحث فى مرحله مابعد الدكتوراة فى الصناعة ولكن انت سعيد تماما براتب المختبر الجامعى ممكن ده يبقى ضدك وينظر اليك على انك غير مؤهل
استراتجية التوزيع
بتحدد ازاى هاتوصل المنتج بتاعك للعميل وكم مستوى هاتتكون منه سلسلة التوزيع وكم هايحتاج كل مستوى عشان يوصل المنتج للمستهلك النهائى و قد ايه هاتحتاج من مخزون على مستوى الجمله والتجزئه لحد مايوصل منتجك على الرف وفى متناول العميل او المستهلك وهاتبيع فين منتجك وازاى كل الاسئله دى استراتجيه التوزيع مسؤله عن تحديد اجباتها هنا فمثلا السى فى بتاعك بيتبعت بالايميل فلو بعته بخدمه البريد السريع او فيدكس مثلا هاتكون خطوة مجدية وهل هاتستحق التكلفه ولا تسليم السى فى شخصيا وبشكل مباشر افضل

وزى ماتوقعت التسويق ليه تطبيقات كتيرة اكتر من مجرد مثال البحث عن الوظيفة فى خلال الاسابيع الاربعه الى جايه هانناقش الاستراتيجيات الاربعة بمثال الشركات التكنولوجيا الحيويه الصغيرة الى بتحاول تبيع منتجات موجودة بالفعل وهنشرح الوسائل والحسابات الى ممكن تستخدم لتقييم وتحليل القرارات التسويقيه المختلفة…. استنونا

جزء استراتيجية التسويق فى خطة العمل بتاعتك لازم يبين حاجتين؛ أولها- أنه لازم يوصف السوق الحالى بتاعك، جو السوق واللى بيسمى ” تقييم السوق marketing assessment”. الحاجة التانية، إنه يوصف ازاى هتقوم ببيع المنتج أو الخدمة اللى بتقدمها “استراتيجية التسويق marketing strategy “.
الموضوع اللى فات احنا ناقشنا “تقييم السوق”، لو لسه مقرتهوش الأحسن أنك ترجع تقراه وتاخد نظرة سريعة قبل ما تقرأ الجزء ده.
الموضوع ده بقى، هناخد المعلومات اللى اتعلمناها عن جو السوق “تقييم السوق” وهنبنى استراتيجية التسويق حولين المعلومات دى.
بالنسبة للناس الجديدة فى موضوع التسويق، ياريت ترجعوا للفصل 2 من السلسلة دى؛ اللى بيناقش التسويق بالتفصيل.
النهاردة هراجع معاكم على المبادئ اللى ناقشناها فى الفصل 2 المذكور، بس هناقشها أكتر من جهة ايه اللى هنحطه فى خطة العمل دى بعيد عن تعقيدات التسويق نفسه.
بمجرد انك تعرف وتفهم منافسينك بيعملوا ايه وايه الجو العام التنافسى للمنتج بتاعتك، الخطوة اللى بعد كده انك تحدد بالضبط أنت ازاى هتنافس؟؟
استراتيجية التسويق بتاعتك اللى هتعملها هتلعب دور كبير فى ده ولازم يكون فيها أفكار عن الاربع مبادئ دى:
السعر Price – المنتج Product – الترويج Promotion – التوزيع Distribution.

هيعتمد ايه أكثر حاجة من الأربعة دول أنت محتاج تركز عليه ويكون أكثر اهمية بالنسبة لخطة العمل بتاعتك على نوع البيزنس اللى انت شغال فيه.
السعر Price
السعر بالنسبة لكتير من المنتجات محرك تسويق أساسى. بعض الشركات منتاجتها بتتباع بس علشان سعرها أقل من سعر المنافسين.. شركات تانية منتجاتها بتتباع علشان سعرها أعلى من السعر اللى المنافسين بيبيعوا بيه.
الظاهرة المتوقعة دى بيسموها إدراك جودة نفوذ السعر ” price-influenced quality perception” يعنى، السعر العالى بيدى إنطباع فى تصور وادراك العميل أن المنتج بشكل ما أكيد أفضل وأحسن، مثال ممتاز على استراتيجية التسعير هو مؤشر الليزر. كل طفل فى منطقتكم عنده مؤشر ليزر بيتباع بشكل أساسى بسعر معين. المؤشر اللى سعره 20 دولار مش هيتباع لو محطوط على رف فى محل جمب مؤشر سعره 10 دولار وبيعمل نفس الحاجة. لكن لو الجيش حب يشترى نظام توجيه بالليزر لإطلاق صواريخ، وعالرغم أنه ممكن تكون نفس التكنولوجيا المستخدمة فى مؤشر الليزر اللى بيلعب بيه الاطفال هى نفسها المطلوبة للجيش،بس لو حبيت تبيعهلهم ب 10 دولار،فى الغالب مش هيصدقوا ولا هيثقوا ان التكنولوجيا دى ممكن يعتمدوا عليها وتكون دقيقة كفاية.
ومع ذلك فى أسواق ومجالات تانية، يعتبر السعر جزء فرعى او ثانوى فى استراتيجية التسويق. لو مثلا أنت عندك منتج علاج جديد لمرض مالوش علاج أصلا.. الناس هتشتريه لو كان بدولار واحد أو حتى ب 10 دولار!!!
تركيزك الأساسى هنا هيكون على المنتج وانك ازاى تروج له وتسوقه.
بصرف النظر عن ايه الوضع اللى أنت فيه أو مجال البيزنس، خطة العمل بتاعتك لازم يكون فيها وصف لخطة تسعير.
من الأمور اللى لازم تناقشها برده بخصوص السعر فى خطة عملك.. هى المنافسة هتكلف كام؟؟ أد ايه العميل حساس للسعر اللى هتحطه ” المقصود مدى تقبله ورفضه للسعر”؟ وايه هامش الربح مقابل السعر اللى هتقدمه؟ .. متخافش وأنت بتعمل كده – جمع كل ال data بتاعتك ولخصها فى جداول علشان تسهل عليك.
الترويج Promotion
الترويج لمنتج جديد ممكن يكون صعب جدا!!. فى النهاية، محدش سمع قبل كده عن شركتك ولا المنتج بتاعك.. طب ازاى هتغير ده؟؟
خطة العمل بتاعتك المفروض تجاوب عن السؤال ده. تحديداً، أنت لازم تكون عندك نوعاً ما خطة عن مدى ضخامة قوة المبيعات بتاعتك؟ ازاى هتعلن عن منتجك؟ وأد ايه كل ده هيكلفك؟؟
لو أنت لسه فى مرحلة البحث والتطوير، ممكن هنا تحاول التقريب. لو انت مستعد أنك تخرج المنتج بتاعك، يبقى هنا لازم يكون عندك معلومات كتير محددة. على الأقل لازم يكون عندك جدول إعلامى” عدد فقرات التليفزيون الإعلانية –عدد إعلانات الراديو—وهكذا”، طبعا مع شرح لميزانية وياريت نماذج للإعلانات دى هتكون ازاى – مفيش حاجة تشجع الخيال أفضل من واحد يشوف الإعلانات دى هتكون عاملة ازاى فى الواقع.
كتير من الشركات المبتدئة بتعتمد على شراكة مع شركات تانية بتشتغل فى السوق فى معظم شغل الترويج بتاعهم.. مثلا، معظم شركات اللى بتشتغل فى التكنولوجيا الحيوية بتتعاون مع شركات أدوية كبيرة علشان يخلصوا لهم ويتعاملوا هما فى معظم شغل التسويق، التصنيع والتوزيع نيابة عنهم.
لو أنت بتخطط تعمل كده ” أو عملت اتفافيات فعلا مع شركات تانية بخصوص الترويج” – متعملش خطة ترويج مفصلة فى خطة العمل بتاعتك، كفاية انك توصف فى خطتك انت ازاى “هتفوض” المهمة دى لشركة تانية وهتكلفك كام؟؟
لازم برده توضح بعض قصص النجاح الخاصة بالشركة اللى هتتعامل معاها فى موضوع الترويج فى الخطة بتاعتك.
لو لسه بقى موصلتش لأى ترتيبات بخصوص الترويج، اشرح ازاى الأخريين فى المجال اللى بتشتغل فيه بيروجوا وبيعلنوا عن منتجهم، مين ممكن يكون شريك محتمل ليك ؟ وليه ممكن يكونوا مهتمين بالشراكة معاك؟.

التوزيع Distribution
فى الجزء ده من خطة العمل، أنت لازم توضح انك فاهم ايه هى قنوات التوزيع فى مجال البيزنس اللى انت شغال فيه؟ وتشرح ازاى هتوصل المنتج بتاعك للجهات دى؟
لو فى أكتر من قناة أو جهة توزيع محتملة للمنتج بتاعك “مثلا: انك توزع عن طريق تجار التجزئة و البيع عن طريق البريد الألكترونى” – لازم تفسر أنت هتختار أى قناة توزيع وليه؟
لو مفيش حاجة مختلفة بشكل كبير بخصوص قناة التويع اللى اختارتها، فانت مش محتاج أنك تدخل فى تفاصيل كتير بخصوصها فى خطة العمل.. اشرح ببساطة أنت ازاى هتوصل المنتج بتاعك لسلسة التوزيع. تانى بقووول، لو هتعتمد على شراكة مع شركة تانية تخلصلك موضوع التوزيع ده، اشرح الترتيبات الخاصة بالشراكة دى فى الجزء الخاص بالتوزيع فى خطة العمل.
المنتج Product
معظم المناقشة بخصوص المنتج بتاعك هتتعمل فى جزء “التكنولوجيا” من خطة العمل، الجزء اللى سميناه من كام شهر فاتوا ” اشرح علمك”.
علشان كده فى الجزء ده، هيكون المهم أكتر اننا نشرح ازاى هيتقارن منتجك بالمنتجات المنافسة فى السوق، وليه هيكون منطقى للعميل أنه يشتريه بدل ما يشترى المنتجات المنافسة.
لو مفيش مشكلة واضحة زى مثلا ” أن فى 12 منتج فى السوق بيعملوا بالضبط اللى بيعمله المنتج بتاعك”؛ فمش لازم تدخل فى تفاصيل كتير هنا – فى النهاية المنتج بتاعك فريد من نوعه.
كل اللى انت محتاجة انك تقنع اللى بيقرأ خطة العمل بده، وإنه فى مجال فى السوق مفتوح قدام المنتج بتاعك، وهتكون كده تمام اوى.
لو مكنتش فى بيزنس قائم على التسويق، جزء خطة التسويق فى خطة العمل بتاعتك المفروض يكون قصير وحلو. خليه بسيط، لكن اقنع اللى بيقراه أنك عارف السوق جداً وأنك عندك خطة كويسة أنك تعمل فلوس من ورا المنتج بتاعك.

سلسة تجربتي مع ال MBA .. دي مجموعة مقالات مترجمة لخبرات ناس خدوا ال MBA و كانت سبب فى نجاحهم الوظيفي .. المقالات دي عاملة زي ملزمة المراجعة النهائية فيها الملخص المفيد انت هتذاكرها الاول بالعربي عشان تسهل عليك مذاكرة الكورسات الاساسية الخاصة بال MBA #ملكش_حجة

هنتكلم النهارده عن “خطة العمل واقسامها – ودي إما للترويج لفكرة علمية مثلا أو لبداية مشروع.
لازم نعرف ان خطة العمل دي تنقسم لعدة اقسام “حاجة كده زى التورتة –عبارة عن قطع” -كلامنا هيكون عن التقييم التسويقي ،ممكن بعض الناس متفهمش يعنى ايه؟
دى قطعة من التورتة — ومعناها الجزء اللي بيصف البيئة التنافسية الحالية للمنتج الخاص بيك.

بالبلدي — زى ما بيقولوا “سوقك” حلو – نتكلم بقي فى الجد.

خطة العمل و الاستراتيجية التسويقية لخطة العمل دول عبارة عن حاجتين :

1.(تقييم السوق) وده معناه وصف السوق الحالي للمنتج أو لخدمة الخاصة بيك.
2.(الاستراتيجية التسويقية) ودى يقصد بيها وصف ازاى هتبيع المنتج او الخدمة الخاصة بيك فى البيئة السوقية.

يعنى لازم تعمل بعض الابحاث لكتابة الجزء الاول — وتفكر بطريقة ابداعية ده لو هتكتب تاني جزء.
لو هنشتغل على الحاجة الاولي “تقييم السوق” هيكون صعب جدا لان كتيير من العلماء شايفين ان ده محتاج بحث فى مجال معظم العلماء مبيعرفوش عنه غير حاجات بسيطه.

البيئة الحالية للمنتج الخاص بيك.
اولا -ترتيب السوق حسب الحجم:

الخطوة الاولي هي تحديد حجم السوق الخاص بيك؟ وكم سرعة نمو السوق ده؟ مثال: لو ان شركتك بتطور دوا جديد لمرض الزهايمر — يبقي لازم تعرف عدد الناس اللي بيعانوا حاليا من المرض ده وتقدر كام واحد هيكون عنده الزهايمر فى المستقبل. أما لو انك بتبيع نموذج جديد من اجهزة القياس — فى الحالة دى هتحدد مش بس عدد العلماء اللي بيستخدموا النوع ده من الاجهزة عالميا وكمان عدد اللي هيشتروا اجهزة جديدة فى السنوات اللي جاية.

مهم انك تعرف ان تقدير حجم السوق مش عملية ف جوهرها مؤكدة -والاهم انها مش بالضرورة افضل.
احتمال لما تقوم ببحث لترتيب السوق حسب حجمه ،تلاقي تقديرك للنتيجة مش مؤكد.وده ربما يكون مقلق للعلماء اللي بيدرسوا للناس عدم نشر رقم ما الا لما تتأكد منه 5 مرات وتلاقيه فى اطار مقبول. بس الغموض هو ده طبيعة الاعمال. والحقيقة — ان مفيش حد بيعرف عدد الناس المصابين بالزهايمر حول العالم او عدد العلماء اللي بيخططوا يشتروا اجهزة قياس جديدة السنة الجاية. بس فى طرق لتقدير الارقام دى يمكن الدفاع عنها للي بيقرو خطة العمل.

افضل مكان للبحث بالنسبة للامراض هو الادب العلمي؛ كتيير من اللمحات العامة للامراض هتقدر عدد المصابين بالامراض دى -وغالبا كتب زى “MERCK MANUAL” بتقدر الارقام دى. ولو عندك لايحة منشورة لمنافس — فالفرص بتكون عبارة عن نشر تقديرات عن ترتيب السوق حسب حجمة فى التقرير السنوى ،اصدار نشرات ومواد تانية بتكون متاحة للعامة. “ويمكن بالنسبة لسلع زى اجهزة القياس ان يكون البحث ده اكتر صعوبة.

– خلينا نبص علي منافسينا ونقدر الحجم الكلي لعدد السكان ونعمل افتراضات واضحة عن عدد اللي هيشتري الاجهزة دى — ابحث على الانترنت وافتكر ان الارقام مش شرط تكون صح بس لازم على الاقل تقدر تدافع عنها من الناحية المنطقية.

نظرة عن المنافسة:
بمجرد انك قدرت حجم السوق الخاص بيك .. ف الخطوة ال بعد كده انك تبص علي عدد المنافسين ف السوق ؛ودي حاجه صعب تعملها بدقة -لان الشركات بتفرض نوع من السرية بخصوص تنبؤاتها وعدد مبيعاتها ( بس خليك فاكر ان مع شوية بحث و جهد بسيط تقدر تلاقى الكتيير ). لو مجالك هو صناعة الدواء -إبدأ بتحديد اى الادوية اللي بتوصف للامراض ال بتحاول علاجها — دور كمان عن الاعداد المختلفة ال بتعالج المرض ده .. ومين بيصنعهم؟

مثلا لو لقيت 4 شركات مشهورة بتنافسك مباشرة فى مجالك ف ده يحفزك ان دواءك يكون افضل من الموجود ف السوق. طيب لو فيه منتجين اتنين منافسين “بس متصنعوش لسه” ده معناه ان عندك فرصة عشان تحارب وتثبت نفسك. تخيل بقي لو مفيش منتج واحد واخد حصة كبيرة ،اعتقد انك هتنافس عشرات الشركات التانية.
دور علي منافسيك ونسبة كل واحد فيهم ف السوق … لو مفيش حد نسبته تتعدي 10% يبقي حضرتك سهل تاخد حته من التورته —عكس لو ف شركة واحدة نسبتها تعدي ال 90%.

ببساطة بص ع المنتجات الموجودة فى السوق بالفعل. ابحث ونقب عن المنتجات ال تحت التطوير لان ف النهاية منتجك ممكن يستغرق 5 سنوات للانتاج. وخد بالك –ان بحث زى ده صعب عشان معظم الشركات بتحب النوع ده من المعلومات يكون سرى وبعيد عن منافسيهم.

الحلو ف الكلام ده اننا دلوقتي عايشين ف عالم الناس فيه على دراية بالاسعار وكمان بيطلب قانوناً من الشركات العامة انها تظهر هذه الحقائق.
والحاجتين دول بيجبروا معظم الشركات لنشر معلومات عن المنتجات قيد التطوير وده قبل ما تنزل ف السوق بسنوات.

وممكن تحصل ع المعلومات عن طريق القليل من البحث -ده حتي ف مواقع على النت زى WWW.RECAP.COM اللي بتجمع كتيير من المعلومات دي وبالتالي بسرعة الي حد ما هتلاقى اجابات لاسئلة زى مين عنده منتجات تحت التطوير؟ وفى اى مرحلة؟
لما تكتشف ان نوفارتس عندها منتج زي منتجك !! -ده مش معناه ان المنتج الخاص بيك ملوش قيمة -ده هيخليك تقضى وقت اكبر عشان تشرح ليه الدوا بتاعك ده افضل وازاى هتبيعه للعملاء — ده فى حد ذاته هيخلي البيئة تنافسية بدرجة ما.

نظرة علي قنوات التوزيع :

تالت حاجه محتاج انك تاخدها بعين الاعتبار هى قنوات التوزيع للمنتج او السلعة. يعنى هتسأل نفسك شويه اسئله من نوعية (هل فى تجار جملة هم ال بيتحكموا بالتوزيع ف المنطقة؟) … هل التوزيع بيكون من خلال طبيب او ممرضة؟ –طيب هل فى مجموعات شرائية “دى مجموعات بتشتري نفس المنتج مقابل سعر ارخص” هتأثر علي ارباحك؟

و الله انا مش عارف الدوشة اللى انتوا عاملينها دى كلها على ايه !! اعمل اية ب ماجستير أدارة الأعمال MBA حتي لو #مجاناً مش ب 40.000 الف جنية .. كلها كورسات و شهادات و حبه ورق بيتركن ع الرف .
انا ايه اللى يجبرنى اتعلم من اول و جديد و اتعب نفسى و انا عارف الدنيا ماشيه ازاى ! و الناس طول عمرها بتشتغل كدا من غير شهادات ولا غيره. و على رأى المثل #من_فات_قديمه_تاه =D
هقولك يا سيدى ان ال MBA دى مش لأى حد ، دى للناس اللى تقدر تثبت انها #قد_التحدي
بردوا مش فاهم ؟ هفهمك =D
ركز معايا كدا .. دلوقتى هشرحلك 5 أسباب تخليك تاخد الMBA هتفهمك الدنيا و بيتهيألى بعد ما تخلص المقال دا هتقوم تبدأ ال MBA على طول =D
1- مرتب أعلى
حضرتك تعرف ان مرتب الشخص الحاصل على MBA بيبقي اعلى بكتير من مرتب شخص تانى حاصل على شهادة ماجيستير عادية !! تقريبا الفرق دا في المرتب يوصل للضعف !! ده غير التأمينات الاجتماعية و الصحية.. يعنى ظروف شغل احسن بكتييييير من اللى بتوفرهولك شهادة الماجستير العادية او اى شهادة تانية.
2- فرص شغل أحسن
طبيعى.. طالما هتقبض احسن يبقى هتشتغل في منصب أعلى =D
و ده اللى بتوفرهولك ال MBA ، لانها بتأهلك انك تترشح لمناصب ادارية كبيرة بغض النظر عن الخبرة و ده طبعا لان معاك مؤهل عالي.
الاحصائيات بتقول ان 70 % من الحاصلين على ال MBA بيشغلوا مناصب كمديرين تنفيذين او أعضاء مجلس إدارة.
طبعا منصب أعلى معناه مسؤولية اكبر و ساعات عمل أطول.
من الاخر ، سواء انت عايز تتحسن في شغلك او تبتدى في مجال جديد في منصب قوى، يبقى عليك و عال MBA ^_^
3- تكوين علاقات عمل قوية
كطالب MBA ، بيبقى عندك فرصة كويسة اوى علشان تكون علاقات تساعدك في مجال الBusiness.
من خلال دراستك بتقدر انك تكون علاقات كويسة مع زمايلك “مديرين مستقبليين” ، دكاترة و محاضرين “غالبا بيبقوا ناس شغالة في مجال الBusiness او اشتغلت فيه قبل كدا و عندهم خبرة عالية جدا”.
و طبعا بما ان برنامج الMBA ده اونلاين، فبالتالي انت عندك وقت كويس اوى انك تشتغل وظايف صغيرة او تدريب في نفس المجال ، من خلالها تكون علاقات كويسة مع مديرين الشركات و الموظفين.
طبعا العلاقات دى بتخليك على معرفة كويسة بكل جديد في مجال الBusiness ، و بيبقى اسهل بالنسبالك الحصول على الفرص الجديدة.
4- اكتساب خبرة ومعلومات جديدة
ممكن انت بقى تستهين بالنقطة دى =D و تسألنى سؤال ذكى و تقولى هو مش دا المفروض ان اى برنامج نعليمى بيعمله ؟
تمام انت صح. بس غالبا اللى بياخدوا ال MBA بيبقوا خريجين جداد و خبرة قليلة “سنتين او تلاتة”. او ساعات حتى بياخدها موظفين كبار اللى بيبقوا عايزين يطوروا من نفسهم.
بعد حوالى سنتين من الحياة المهنية، الانسان بطبعة بيبتدى يكتسب طبيعة تكرارية، و ركود في اللى بيسموها ال comfort zone ، من غير اى رغبة في تطوير الذات او تعلم حاجات جديدة.
و ده بيجاوب على سؤالك اللى في الأول: ليه اتعلم حاجة جديدة لما ممكن اخلينى في اللى انا عارفه ؟
دراسة الMBA في حد ذاتها بتدفعك انك تخرج من ال comfort zone بتاعتك دى، تتعرف على اجدد المواضيع، و تتطبق اجدد طرق و تقنيات الاداره و تفضل باستمرار في تحدى مع نفسك.
و داب يستمر حتى بعد ما تخلص. و دا لان ال MBA بتوفرلك القنوات اللى تقدر من خلالها تعلى مستوى التحدى و تخليك تتطور من نفسك باستمرار.
5- تكوين نظرة شاملة لعالم الأعمال
زى ما قنا قبل كدا ، و انت بتدرس ال MBA بتبقى جزء من شبكة كبيرة من المحترفين و الشركات، و بتحاول باستمرار انك تطور من نفسك باجدد طرق التعامل مع “او هندلة” المشاكل.
الحاجات دى كلها مع بعض بتديك رؤية هايلة وشاملة عن عالم ال business والإدارة، فهم عميق وملاحظة دقيقة لأبسط التغييرات في بيئة العمل.
النوع دا من الفهم و قوة الملاحظة مش بيتحقق الا لو قضيت وقت كتير بتشتغل علشان تحققه.
لو انت من النوع اللى يقدر يكون #قد_التحدي بتاع المناصب القيادية ؟ لو تقدر تستحمل مسؤولية كبيرة و تقدر تتعلم و تتطور من نفسك باستمرار ؟
يبقى انت من الناس اللى هتحقق انجاز هايل في الMBA

اتكلمنا امبارح عن ماجستير إدارة الأعمال MBA … و شرحنا لية كل الشركات Multinational هي اللي بتجري وراك عشان توظفك عندها .. و انك ممكن تحصل علية #مجاناً بدل ما تدفع 40.000 الف جنية و بشهادة معتمدة من جامعة Pennsylvania الامريكية كمان ^_^
فى حالة انك لسه اول مره تسمع عن الموضوع ده .. لازم تقرأ:
http://goo.gl/OiKqn5

نرجع للي تابعنا امبارح .. و اللي طبيعي بيسأل الاسئلة دي دلوقتي :

– هي الشهادة معتمدة معتمدة و لا معتمدة معتمدة ؟!
– طيب هو انا مش هدفع فلوس ازاى #مجاناً دي ب 40.000 الف جنية ؟!
– انتوا بتتكلموا جد ؟! و لان انا هضيع وقتي ع الفاضي ؟!
___

ال 3 أسئلة دول و اي سؤال تانى ممكن يخطر فى بالك .. اجابتهم بتتلخص فأنك لازم تعرف التالى :

– ال MBA ده بيعادل درجة ماجستير يعني مرحلة تعليم تكميلية سنة او اتنين بعد ما بتخلص جامعة .. طيب معني كده اني كـ طالب لسه بيدرس مش هعرف اخده .. مين قال كده اياً كان مجال دراستك او سنك تقدر تحصل على ال MBA

– حلو نيجي للمناهج اللى بتدرسها فى الماجستير ( مبادئ التسويق Marketing – مبادئ المحاسبة Accounitng – مبادئ التمويل وتقييم الشركات Finance – مبادئ إدارة العمليات Operations Management – علم الإدارة أو بحوث العمليات Management Science – المسئولية الاجتماعية للشركات Corporate Social Responsibility )

و افضل الجامعات اللى بتدرس MBA هي University of Pennsylvania’s Wharton School of Business الامريكية و اللى بتوصل تكلفتة 4500 استرليني = 40.000 الف جنية .. غير بقي مصاريف السفر و الاقامة طول مدة دراستك فى امريكا .. وبعدها تدخل الامتحان و تاخد شهادتك المعتمدة و اللي ليها وزنها

و لأن مش كل الناس هتقدر تدفع التكلفة دي و الموضوع علية طلب كبير نظراً لاهميتة .. ظهرت اكاديميات و مراكز و ناس ملهمش علاقة بأي حاجة و قالك تعالا خد Mini MBA ب 3000 جنية و اللى بيحصل كالتالي .. محاضر بيجي يشرحلك كورسات تسويق على محاسبة على ادارة اللى بتتاخد فى اى كلية تجارة مصرية .. و هوب ختم الجامعة .. و اسمها شهادة

فى حين ان جامعة زي Pennsylvania بتقدم الكورسات دي Online و بشهادة معتمدة #مجاناً .. و دة اللي بيسموة ثورة ال MOOC و اللى اكيد سمعت عن مصطلحات شبيها ليها .. التعليم الذاتي Self Study او التعليم عن بعد

بالراحة كدة دلوقتى انت هتاخد الكورسات زي ماهي من جامعة Pennsylvania و 3 جامعات امركية تانية #مجانــاً ..
بس الفكرة مش ف مجاناً .. الفكرة انك هتكتب الكلام ده فى ال CV .. و الشركات اللى حلمك تروح فيها Interview بتقدر جداً ال Self Study و انك سعيت و اتشقلبت عشان تتعلم حتي لو معندكش الامكانيات اللي تخليك تدفع 40.000 جنية .. و انك شخص مبينضحكش علية باختام او شهادات لمجرد كلمة شهادات

طيب انا ازاى هكتب الكلام ده فى ال CV ؟ ده اللى احنا هنساعدك فية و هنعرفك ازاى تكتب الكورسات اللي درستها بجانب شهاداتك اللي هتاخدها Online .. و هنتابع معاك خطوة ب خطوة بردو فى events #مجاناً هتتعمل فى القاهرة و الاسكندرية و هيبقي فيها شرح بالعربي و هنعملك نفس الامتحانات عشان تقيس مستواك و تتأكد انك بتتعلم صح

– الحمدلله انا اقتنعت بس قبل ما ندخل ع الكورسات .. فى سؤال محرج شويتين هو انتم اية مصلحتكم و الموضوع مجاناً × مجاناً ؟
هو ده حال مجتمعنا للآسف اى حاجة مجاناً يبقى وراها سر -_- و اى حاجة صعب نوصلها بسبب ظروف هي مستحيلة و مبندورش على حلول بحجة الايد قصيرة و العين بصيرة .
اما فى المجتمع الموازي ” وادي المشمش ” و مش وقت اندهاشات من الاسم لان وراها قصة كبيرة .. معندناش مستحيل و كل حاجة و ليها حل .. كمحاولة اننا نتحرك و نلحق بـ قطار التقدم اللي فاتنا من سنين و سابنا و سط دول العالم التالت

– نيجي للمُهم .. دي ال 8 كورسات اللي هتبدأ مذاكرتهم Online :

http://mshmshvalley.com/mba-master-of-business-administration/

هنبدأ من النهاردة و حتي 22/1/2015 و لمدة 5 شهور .. مش هتحتاج اكتر من 4 ساعات فى الاسبوع
كل ال Updates تقدر تتابعها علي : http://goo.gl/Dj6c1b

و ممكن تعمل account على وادي المشمش مجاناًَ عشان توصلك updates :
http://www.mshmshvalley.com/wp-signup.php

احنا هنقوم بدور التنظيم و الترتيب و هنوفرلك محاضرات تساعدك فى القاهرة و الاسكندرية زي ما اتفقنا بردو .. اي استفسار ف بالك هتسيبة على الموضوع ده .. و احنا هنجاوبك ان شاء الله

الاسبوع دة هنبدأ كلنا ب : Inspiring Leadership through Emotional Intelligence
اللي هتلاقيه هنا بكل التفاصيل :
http://mshmshvalley.com/mba-master-of-business-administration/

#Share_فى_الخير و شاركنا فى مبادرة #i_will_get_MBA .. متعرفش مين حياته ممكن تتغير بسببك ^_^
و اى معلومة ممكن تفيدنا او مساعدة تقدر تقدمها متترددش و ابعتلنا ع ال inbox

لية الموضوع اللى هنتكلم عنه النهاردة مهم ؟ لان ببساطة كل مسؤليين التوظيف فى الشركات ال Multinational بيعتبروة ” التذكرة الذهبية لدخول جنة الاعمال و الوظائف ”

ماجستير إدارة الأعمال – Master Of Business Administration و اللى مشهور بأختصار MBA ..
الموضوع مرتبط فى عقل الكثيرين بانه خاصة بكلية تجارة او الناس اللى هتعمل مشاريع بس !! لكن الحقيقة ان ماجستير إدارة الأعمال مهم بنفس القدر للـ دكتور و المهندس و أي حد اتخرج او لسة بيدرس فى اى كلية و حابب يخلق لنفسة فرصة شغل مُحترمة فى مجالة .. او يعلي من قيمتة و مكانتة لو كان شغال.

هنيجي للمشكلة التانية و هي تكلفة ماجستير إدارة الأعمال MBA .. و اللى بتبدأ من 4500 جنية أسترليني = ما يعادل 40.000 جنية مصري

و للى فى الحقيقة مش مشكلة بردو لانك ممكن تاخد الماجيسيتير #مجاناً و بشهادة معتمدة من جامعة Pennsylvania الامريكية .. اياً كان مجال دراستك اية و بتدرس او خلصت و بتشتغل .. و مش هتحتاج درجات TOEFL او غيره كشرط للحصول على ال MBA .

الموضوع سهل بس محتاج منك تركيز و مجهود واحد ناوي يغير حياته و يرسم مستقبلة بأيدة بعد توفيق ربنا .. فخلينا نتكلم عن أهميةانك تبقي حاصل على ماجستير إدارة الأعمال :
1- فى حالة انك فى كلية تجارة ” كلية الشعب و الدفعة ال 6000 طالب ” .. فـ ياتري اية اللى ممكن يميزك عنهم حتى لو تقديرك جيد جداً او امتياز ؟؟!! اللى هيميزك انك تكمل فى اللى درستة بشكل تطبيقي اكتر منه اكاديمي و بعقلية الشركات و المؤسسات

2- طيب انا مهندس و هو محامي .. ماجستير إدارة الأعمال ده هيفيدناازاي ؟
ماجستير إدارة الأعمال بيضيفلك مهارات ادارية و مؤسسية بجانب مهارات التخطيط .. يعني اية بردو ؟؟ يعني لما تيجي تتقدم لوظيفة او تترقي فى وظيفتك لمنصب أعلي تبقي مميز عن اللى حواليك يعني لو هنحتاج مهندسا يدير مصنع او طبيب يدير مستشفى او حتي مدرس يدير مدرسة … لية يختاروك انت بالتحديد ؟؟ ماهو سهل جداً تلاقي حد خبير في مهنته و شاطر فى دراستة .. لكن ميعرفش حاجة عن التسويق والنواحي المالية والنواحي التنظيمية وكيفية اتخاذ القرارات وكيفية التخطيط للمؤسسة أو للقطاع الذي يديره.
حلو دة بس الشركات الحكومة عندنا فى مصر بتمشيها بالاقدمية و المحسوبية ؟ ما احنا الكلام ده اكبر من شركة حكومة و موظف تقليدي .. الكلام ده لواحد ناوي يطور من نفسه و يخلي الشركات ال Multinational تجري وراه ^_^

طيب ازي الماجيستير #مجاناً و اقل تكلفة لية 40.000 الف جنية ؟
اولاً : لازم تبقي عارف ان ال MBA مش عبارة عن كورس او كتاب دي مجموعة كورسات و منهج دراسي كامل مش هيخلص فى ساعتين تلاتة .. #متقلقش الدنيا هتتظبط بالمواعيد اللي تناسبك كمان #ملكش_حجة

ثانياً : الكورسات دي متاحة Online و #مجاناً من افضل 3 جامعات على مستوي العالم ممكن تاخد منهم MBA .. و University of Pennsylvania’s Wharton School of Business و Western Reserve University .. و نظام الدراسة زي الجامعة بالظبط بمواعيد محددة و اسابيع محددة .. و تقدر تسأل المحاضر

و كل ما تخلص كورس منهم هتاخد شهادة معتمدة .. بس ازاى تقول انك خدت MBA و ازاى تقدر تكتبها فى ال CV ؟ و ازاي تظبط المواعيد المناسبة ليك و لشغلك او دراستك ؟ و ياتري لو عندك أسألة او متلخبط فى حاجة هتعمل اية ؟!!

هنا يجي دور “وادي المشمش” و اللى مش مهم تعرف عنه دلوقتى غير انه مجتمع موازي #هدفة يحول كل مشكلة ممكن تعطلك او تعجزك انك تكون افضل .. ل حلول و حاجات ممكنة ^_^
هنعمل اية فى وادي المشمش :
1- هننزل الكورسات الخاصة بال MBA بمواعيدها المتاحة انك تاخدها فيها من الجامعات Online .. بالاضافة لاننا هنحددلك اولويات و ترتيب الكورسات اللى المفروض تدرسها
2- اتفقنا مع اكتر من محاضر هيجاوبوا على اى أئلة هتحتاجها فى الكورس او بره الكورس اثناء ما انت بتاخد الكورسات دي
3- هنظم events شهرية #مجانا فى القاهرة و الاسكندرية مع محاضرين مصريين عشان توصل لاكبر استفادة مش بس سطرين يتكتبوا فى ال CV

كل دة هيكون متاح عن طريق الموقع الخاص بال MBA :
http://mshmshvalley.com/mba-master-of-business-administration/

هتلاقي الكورسات متنظمة تحت بعض و جنبها ارقام ( 1,2,3 ) حسب اولوية كل كورس .. المجموعة (1) دي الكورسات اللى لازم تبدأ بيها .. و بالتالي بعدها المجموعة (2) و (3)
بالاضافة لمدة دراسة كل كورس و مواعيد البداية المتاحة .. ونبذة عنة .

كمان تقدر تعمل Account ع الويب سايت #مجاناً
http://www.mshmshvalley.com/wp-signup.php
مش هياخد منك دقيقة .. عشان تقدر تسيب أسالتك و تتابع الرد عليها .. و توصلك ال Updates اللى هتنزل بالعربي و المواضيع اللي هتشرح اهمية كل كورس و الكورسات المكملة ومواعيد ال events اللي ف القاهرة و اسكندرية

و اللى تقدر تتابعها علي : http://goo.gl/Dj6c1b

الموضوع مخلصش هنا و لا النهاردة .. هيبقي فى موضوع اساسي كل يوم اتنين و خميس من كل اسبوع .. و مواضيع اضافية عن الحاجة