الخوف من الفشل هو أسوأ عدو للنجاح ، تقريباً كلنا كان عندنا أفكار صغيرة وبسيطة بس خوفنا من الفشل منعنا من إننا ننفذها علي أرض الواقع ، مش بس كده ده في أشخاص بـ يخافوا يتكلموا من الأساس عن أفكارهم المبتكرة بسبب الهوس بردود فعل الناس المحيطين بيهم ..

لكن علي العكس تماماً ، في أشخاص كان عندهم أفكار بسيطة ناتجة عن مشكلة مروا بيها أو فكرة هتساعد في تحسين شئ في مجتمعهم ..
مش مهم سبب الأفكار دي المهم أنهم ما خافوش من الفشل وتبنوا أفكارهم وعملوا علي تحقيقها ودلوقتي أصبحوا من أصحاب الملايين ، وأفضل مثال علي الأشخاص دول هو “دانييل كين” ، ريادي الأعمال إلي قدر يحقق ملايين عن طريق فكرته البسيطة وإلي بـ تحل مشكلة تافهة من وجهة نظرنا كتير من الناس!

دانييل كين كان دايماً بيعاني من المحافظ الضخمة اللي مضطر إنه يخليها في جيبه الخلفي في معظم أوقات يومه واللي كانت بـ تسبب له مشاكل في الجلوس وبـ تخلي المنظر العام مش ولابد ..
دانييل كين قرر يحول غضبه من فكرة المحافظ الضخمة إلي بـ تسبب له مشاكل كتير لت فكرة Startup ، دانييل أسس شركته The Ridge لتصميم وبيع محافظ الجيب الأمامي ، واللي دلوقتي بيستخدمها أكثر من مليون شخص حول العالم.

دانييل قدر يحقق مكاسب كبيرة ويصنع علامة تجارية بملايين الدولارات عن طريق فكرة بسيطة لحل مشكلة لا تذكر!

طبعا إنشاء شركة مبنية علي فكرة بسيطة وتحقيق ملايين الدولارات منها بـ يحتاج طريقة خاصة في التفكير و مهارات معينة..
بطل قصتنا إنهارده كان مهيأ من صغره أن يكون رجل أعمال وقيادي في يوم من الأيام.

دانييل كين بيقول في واحدة من مقابلاته أنه نشأ في شمال لوس أنجلوس في أغورا هيلز ، وأنه اشتغل في عدد من الوظائف الفردية في فترة الثانوية..كان بـ يقوم بتصليح كور التنس لأصحابه ،
وكان بيدي دروس تقوية في الرياضيات لأصحابه في المدرسة و أولاد الجيران ، كان بـ يحاول يشتغل في أي وظيفة يقدر يجمع بيها فلوس عشان يقدر (يتسكع) مع أصحابه – مش كلهم بـ يشتغلوا عشان يصرفوا علي نفسهم وتعليمهم – ولما وصل لـ سن السابعة عشر من عمره ، كان مصدر ربحه الرئيسي بعض أعمال التجارة الإلكترونية عن طريق بيع أقراص فرق الروك عبر موقع Reddit ومنتديات أخري عبر الإنترنت مع بعض أصدقاء طفولته ، كان قبل ظهور الشوبيفاي وقبل ما يعرف أي حاجة عن الإعلان الرقمي علي النت..عشان كده دانييل كان بيعتبره شغل دون المستوى المهني ، بس من وجهة نظرة كانت طريقة مشوقة لجمع المال.
وبـ يضيف ويقول أن لولا شغله في سن صغير والوظائف البسيطة إلي اشتغلها مكنش فكر في أنه يؤسس شركته الخاصة لما كبر.

تحويل الإحباط لفرصة عظيمة

إزاي مشاكل بسيطة بتمر علينا يومياً ممكن تبقي فرصة لتحقيق ملايين الدولارات؟..أكيد الموضوع بيحتاج ملاحظة وانتباه منك لو كنت بتدور علي فرصة لإنشاء عملك الخاص زي دانييل كين إلي بيقول في إحدي مقابلاته أنه كان دايماً بـ ينزعج من المحافظ الكبيرة وإنها إزاي كانت بـ تفسد مظهره العام قدام الناس ،
غير أنه كان مضطر يخرج ويدخل المحفظة أكتر من مرة وده كان بـ يسبب له إزعاج كبير ، لحد ما في مرة من المرات فكر في شراء محفظة رفيعة بشريط مطاطي بحيث ماتخدش حجم كبير جوه بنطلونه..ولما دور في السوق علي حاجة مشابهة ملقاش ، وهنا عرف أن عنده فرصة لتصميم محافظ مشابهة للشكل إلي بـ يتخيله ويبيعها ويكسب من وراها.

بدأ إنشاء الشركة بمساعدة موقع Kickstarter

دانييل كين بعد إيمانه بأن فكرته ممكن تنجح بسبب أنها فكرة جديدة علي السوق ، واجه مشكلة رأس المال..فـ دانييل كان مازال طالب في الجامعة ومكنش يملك رأس المال لإنشاء شركة خاصة بيه ، فـ دانييل قرر أنه يتوجهة لـ منصة تمويل المشاريع Kickstarter لتمويل مشروعه عن طريق مساهمات عائلته وأصدقاءه وأصحاب الأموال المتحمسين لفكرته.

– تقدر تعرف أكتر عن موقع Kickstarter من المقال ده
https://mshmshvalley.com/%D8%A7%D9%84%D8%AA%D9%85%D9%88%D9%8A%D9%84-%D8%A7%D9%84%D8%AC%D9%85%D8%A7%D8%B9%D9%8A

بيتكلم دانييل عن الخطوة دي في إنشاء مشروعه وإزاي عائلته وأصدقاءه والداعمين علي موقع Kickstarter كان ليهم دور كبير في خروج The Ridge للنور فـ بيقول أن في الوقت إلي قام فيه بإطلاق The Ridge على منصة Kickstarter في عام 2013 ، كان عنده الخبرة الكافية بسبب شغله في التجارة الإلكترونية إلي أستمر لـ سنوات..
بس علي الرغم من كده فـ The Ridge هي علامة تجارية جديدة ، عشان كده إضطر أنه يتدخل شخصياً في كل مرحلة من مراحل الإنتاج لحد التوصيل للعميل وإلي ساعده علي كل ده كان أهله وأصحابه إلي معظمهم مازالوا معاه لحد وقتنا الحالي.

بـ يضيف دانييل أنه مكنش مدرك حجم السوق المحتمل لـ The Ridge لحد ما بدأنا في تجربة تسويق المحفظة الجديدة في عام 2014. وبين عامي 2014 و 2015 ، زودنا عدد الإعلانات 10x أضعاف مع إعلانات Facebook ، بحيث أصبحت 350 ألف دولار في الشهر. كان شئ جنوني أنه بعد مرور سنة كاملة ، شهدنا أول عائد شهري مليون دولار واستمر نمو الشركة لحد وقتنا هذا .

من حوالى الف سنة حصل انفجار عظيم فى السما
وتم مشاهدته من اكثر من مكان فى العالم و العلماء فى الصين واليابان وسويسرا وامريكا الشمالية قعدوا يسجلو الحدث ده بكل تفاصيله
وبعد الف سنة بدأ علماء العصر الحديث فى البحث عشان يقدروا يعرفوا معلومات عن الانفجار ده ومكانه بالظبط
جابوا المستندات والورق الى متسجل فيه كل حاجة و حاولوا انهم يوصلوا لمكان النجم اللى انفجر !! لكن للآسف بدون فائدة !

لحد ماوقع فى ايديهم ورق لواحد اسمه (على بن رضوان ) وكان مسجل الحدث ده
وبالفعل الورق بتاعه هو الى دلهم على كل حاجة عايزين يعرفوها وبالظبط وبالملى مكان النجم اللى فى انفجر ده فى السما وحجمه وشدة اضائته بمقارنته بكوكب الزهرة و بمقارنته بالقمر

المدهش ان على بن رضوان .. سجل الحدث ده بكل تفاصيله واحداثياته وهو عنده 18 سنة بس !

مين بقى هو بن رضوان اللى بتكلم عليه ده ؟
الراجل ده عالم مصرى اتولد فى الجيزة .. بدأ رحلته مع العلم و سنة 10 سنوات .. اتقن فى رحلتة علوم الطب و الفلك على الرغم من صغره سنة و كونة من أسرة بسيطة لأب كان بيشتغل فران .. قدر بأجتهادة و شغفة يوصل لـ لقب رئيس الأطباء

فى عصره كان فيه ولاية اسمها بلوخستان الحاكم بتاعها جاله شلل نصفي واللى عالجه هو ابن رضوان لبراعته فى مجال الطب
ابن رضوان كان شاطر اوى فى حاجة اسمها الطب الإكلينيكي وهو عبارة انه بيشوف المريض كدا من برة ومشيته وكلامه وحتى درجة عمل وظائفه الحيوية واعضائه الداخلية ونبض قلبه

كتب كتاب عظيم جدا اسمه ( دفع مضار الأبدان بأرض مصر )
و كتاب غيره فى مجال المناخ اسمه دراسة المناخ والصحة في مصر القديمة

على بن رضوان كان مقتنع ان الطبيب لازم يكون متوفر فيه سبع صفات :

1- لازم يكون انسان خلوق من الدرجة الاولى وذكى وطبعه حلو ويكون ذكر
2-  لازم يكون لبسه نضيف وكويس عشان المريض يرتاحله وتكون ريحته حلوة ونظيف البدن
3- لازم يكون كتوم لاسرار المرضي بتوعه ولا يبوح باى سر لاى حد
4- انه ميبصش للاجر اللى بياخده من المرضي وانه رسالته فى الحياة هيا العلاج وانه يكون عنده رغبة فى علاج الفقراء اكثر من رغبته فى علاج الاغنياء رغبة فى الثراء والمال
5- انه يكون عنده شغف بتعلم كل ماهو جديد فى مجال الطب ويتعلم اى حاجة ميعرفهاش عشان يقدر ينفع الناس
6- انه يكون قلبه سليم ومافيش شهوة تقدر تتحكم فيه
7- انه ميوصفش علاج ممكن يموت وهو مش عارفه واهم حاجة انه ميشتغلش فى موضوع الاجهاض إلا عند الضرورة لانقاذ الام مثلا

من اقوال ابن رضوان
– إذا دعيت إلى مريض فأعطه ما لا يضره إلى أن تعرف علته فتعالجها عند ذلك

كان بيجيب كتب الاطباء اللى قبله ويقعد يشرحها ويعلمها للناس لصعوبتها على طلبة العلم
ابن رضوان كان شاطر جدا فى مجالات تانية غير الطب زى ماقولنا فوق موضوع الفلك والنجوم والمناخ وكان ليه مؤلفات كتير

ابن رضوان مات مع الناس اللى ماتت فى الشدة المستنصرية
و الشدة المستنصرية ده كان حدث كبير جدا حصل فى مصر فى العصر الفاطمى ولو عايز تعرفه باذن الله هنزل مقال عنه قريباً

من دبلوم فنادق لأشهر مترجم في الوطن العربي
مايكل يوسف !!
نموذج رائع لشخص من أسرة بسيطة بظروف مالية وصحية صعبة .. حرفياً الظروف مكنتش في صفه أبدًا، لكنه اتحدى كل ده وقدر يكون مصدر أمل لكثير من الشباب من جميع أنحاء الوطن العربي. <3

حكايته بدأت أما دخل دبلوم فندقي نظرًا لظروف مالية وأسرية ولاحتياجه للشغل، بعد ما خلصه دخل كلية تجارة لكنه مكنش شايف نفسه فيها وسابها .. جرب يشتغل في السياحة لكن لقى نفسه إنه مش عايز يشتغل جارسون، كان عايز يجتهد أكثر ويشتغل على نفسه ويكون أكبر من كدا .. بس مش عارف يعمل إيه؟

سمع عن مجال البرمجة إن فلوسه كويسة ومجال شيق .. فـ بدأ يقول لأصدقائه وأهله إنه عايز يبقى “مبرمج” لكنه لقى تريقة وسخرية من الكل .. وكان دايمًا بيسمع جملة “أنت دبلوم عايز تكون مبرمج إزاي؟ أنت آخرك تشتغل جارسون أو تنتحر لو مش عاجبك !” -_-

عرف إنه علشان يحترف المجال ده لازم يذاكر كتب برمجة بالإنجليزي .. وهو مستواه صفر في اللغة .. فبدأ يجيب الكتب دي ويترجم كلمة كلمة، واعتزل كل الناس اللي بتحاول تحبطه أو تتريق عليه لمدة سنة مكنش بيعمل فيها حاجة غير إنه يذاكر

النتيجة الطبيعية للسعي هي إن مستواه بدأ يتحسن وفي سنة 2003 اشتغل وأخد شهادتين من مايكروسوفت في البرمجة وقواعد البيانات وهو لسة معاه دبلوم ^_^

فقرر إنه يجرب يكتب مقالات على موقع devarticles وكان ساعتها يعرف شخص معاه ماجستير في علوم الحاسب وبعت هو كمان مقالة في نفس الوقت .. والصدمة إن مقال مايكل اتقبل ومقال الشخص التاني اترفض!

وبعدها اتعرض عليه يكتب مقالات في البرمجة بفلوس .. ومقاله الأول قرأه أكثر من 700 ألف شخص وهو منشور على موقع devarticles حتى الآن!

وبعدها طور مهاراته أكثر ووصل لمنصب مدير قواعد بيانات .. بس كان لازم يحل مشكلة الكلية
في سنة 2006 دخل كلية آداب ترجمة – قسم التعليم المفتوح جامعة القاهرة لإنه كان متأكد إنه مش هيتعب فيها

بعدها بسنتين ظهرت عليه أعراض مرض شديدة والدكاترة مكنوش عارفين يشخصوه وصرف تحويشة عمره على التحاليل والأشعة .. رغم إنه اتخرج بالعافية لكن في الوقت ده شغله وفلوسه وصحته ضاعوا .. كان مُحطم بكل معنى الكلمة! :/
وقال “هدور في الكتب على أعراض مرضي واتعالج هي كدا كدا بايظة”

فاكتشف إن عنده تسمم بالزئبق بسبب حشو الأسنان سبب تسمم بالنحاس وفقر شديد بالزنك ومشاكل في الغدد .. ورحلة العلاج خدت من عمره سنين

ولكنه قدر يشتغل كمترجم .. وحضر ماجستير في الخارج .. ومكتفاش بعلمه لنفسه .. لا ده قدر يساعد آلآف الناس حول العالم العربي في تعلم الإنجليزي ^_^

وبكدا قدر ينجح تاني مع تحدي كبير وهو “المرض”

مايكل يوسف دايمًا بينصح الشباب ويقول “لازم يكون عندك أمل وعزيمة وإصرار وإلا يبقى مفيش هدف من الحياة” <3

عارف ايه اللى ممكن تعمله لو قدرت تتحكم فى الذرة ؟
جه واحد اسمه ريتشارد فريمان سنة 1959 وسأل العلماء السؤال ده والنص بتاعه كالاتى
ماذا لو كان فى الامكان ان نتحكم فى حركة الذرة ونرتبها بدل تفجيرها ؟؟
بس للاسف محدش قدر يجاوب على السؤال ده لسنين
لحد ماجه واحد اسمه ( حسن منير نايفة )
بعد اقل من عشرين سنة على طرح السؤال ده جه الراجل ده وجاوب على السؤال ده عن طريق حاجة اسمها النانوتكنولوجى وتقريبا هو من مؤسسين العلم ده
و بأجابته على السؤال ده اسس منير نايفة فرع جديد فى علم الكيمياء وهذا لو تعلمون عظيم
مين بقى هو حسن نايفة ده ؟
ده عالم ذرة اتولد فى فلسطين سنة 1945 اخد دكتوراة من جامعة ستانفورد .. فى مجال الفيزياء الذرية وفى مجال علم الليزر
حسن منير نايفة هو اول واحد اخترع حاجة اسمها جزيئات السيلكون نانو
الراجل ده حاليا شغال بروفيسور فى جامعة الينوى
ان حد يشتغل بروفيسور فى مجال الفيزيا الذرية . فده شيء مش هين اطلاااااقا
تخيل نفسك واحد من القلة اللى موجودة فى العالم اللى اخد لقب بروفيسور فى مجال زى ده
من وسط 7 مليار انسان تقريبا فيه عشرات يتعدوا على الصوابع بيشتغلوا بروفيسور فى مجال الفيزيا الذرية
وانك تكون فى اول القايمة فده شيء مش هين ابدا ودول اللى بيتقال عنهم انهم بيغيروا خرطية العالم بعلمهم
منير حسن نايفة حصل على حوالى 100 جايزة دولية بسبب ابحاثه العلمية
منير حسن نايفة هو رئيس شبكة العلماء والتكنولوجيين العرب فى الخارج اللى اتعملت سنة 1992
وده حد ممكن يفكر انها سهلة
بس لو مش عارف فاحب اقولك ان الشبكة دى فيها احمد زويل .. مجدي يعقوب و فاروق الباز
فكون انه واحد زى حسن نايفة يراس الشبكة دى اعتقد ان دى حاجة مش هينة ابداً
منير حسن نايفة عمل شيء غريب جدا باستخدام النانو تكنولوجى
عمل لوحة فنية
ايوة زى ماسمعت كدا واللوحة دى كانت لصورة قلب وفي وسط القلب ده كان فيه حرف موجود والحرف ده كان P
اشارة لفلسطين واللوحة دى اترسمت باستخدام الذرات والحرف ده كان بعرض خمسة مليون من مليمتر
اللوحة دى اتحطت على غلاف مجلة New Scientist والمجلة دى تعتبر من اشهر المجلات العلمية فى بريطانيا
والعالم كله اتكلم عن الصورة دى وعن العبقرى الى عملها والى اثبت بيها انه يقدر يتحكم فى حركة الذرات كيفما يشاء
كنت عايز اتكلم عن انجازات حسن نايفة اكتر من كدا
بس هتبقى صعبة شوية على معظم الناس لان المقال هيتحول لـ مصطلحات معقدة جدا ومعظم الناس مش هتفهما
حسن نايفة هو واحد من اعظم علماء الذرة فى العصر الحديث
واحد فلسطينى انشأ علم جديد فى الكيميا وبسبب اختراعه غير اشياء كتير جدا زى الطب والاختراعت التكنولوجية وتكنولوجيا الاتصال
يبقى مش قليل ابدا ان احنا نقول عليه عبقري
متسنوش تشيروا البوست عشان الناس تعرف ان عندنا نماذج عبقرية لا تقل ابدا عن اي نموذج غربي

الدكتور مجدى يعقوب او زى مابيقولوا
“السير مجدى يعقوب”
الكل يعلم من هو مجدى يعقوب .. و لكن لا نعلم كثيرا عن تاريخه وقصة نجاحه
الاعلام البريطانى اطلق لقب على مجدى يعقوب ولقبه بملك القلوب
والملكة البرطانية اعطته لقب فارس وبقى السير مجدى يعقوب
الدكتور مجدى اتولد فى الشرقية فى بلبيس سنة 1935
( نفسي افهم هو ليه كل الناجحين من الشرقية ) ^_^
درس طب الاول فى جامعة القاهرة ومراحش مرة واحدة على بريطانيا زى ماحنا فاهمين
لا ده راح كمل دراسة فى امريكا فى جامعة شيكاغو
وبعدين جاله شغل فى لندن فى مستشفى الصدر هناك
وبعدين انتقل لمستشفي هارفيلد وقعد فيها من سنة 69 لحد سنة 2001
قعد فى المستفشى دى 32 سنة شغال اخصائي القلب ورئة
عمل عملية لواحد عنده 83 سنة
ودخل بالعملية دى موسوعة جينيس للارقام القياسية لان الراجل صاحب العملية لسة ميت من سنتين اتنين فى 2016
ولما مات مات بسبب تانى غير سبب العملية وغير سبب القلب !
مجدى يعقوب تم منحه جايزة اسمها جائزة فخر بريطانيا وتم اعطائه الجايزة دى على الهواء مباشرة قدام كل الناس على التليفزيون والكلام ده سنة 2007 ( احنا كنا وقتها فين ؟؟)
مجدى يعقوب برده اخد قلادة النيل من مصر سنة 2001 من الرئيس السابق حسنى مبارك
مجدى يعقوب كان قائد لفريق عمل صمام قلبي تم انشائه من حاجة اسمها الخلايا الجزعية
الخلايا الجزعية دى حاجة كبيرة اوى وثورة فى عالم الطب ومش اى حد بيفهم فيها
كون انك تعمل جزء من عضو باستخدام الخلايا دى فانت اقل شيء يتقال عنك عبقرى ومجدى يعقوب فعلا كان عبقري
اوعى تكون فاكر ان مستشفى مجدى يعقوب اللى فى مصر هنا هيا اول عمل خيرى يعمله
مجدى يعقوب اسس مؤسسة اسمها سلسلة الامل
بس المؤسسة دى كانت فى انجلترا واسسها سنة 1995
المؤسسة دى مش ربحية دى مؤسسة خيرية برده وهدفها انها تساعد الاطفال اللى عندهم مشاكل فى القلب
المشاكل دى بتكون مشاكل خطيرة وبتهدد حياتهم فى اى لحظة
مجدى يعقوب لما اشتغل فى المستشفى بتاعت هارفيلد نفذ هو والفريق بتاعه حوالى 1000 عملية زراعة قلب
و بسبب مجدى يعقوب المستشفى دى اصبحت المركز الرئيسي لزراعة القلب فى انجلترا
لان المستشفي ده كان بيزرع فى السنة الواحدة حوالى 200 عملية زرع قلب وده عن طريق مجدى يعقوب بمساعدة الفريق بتاعه
ومش بس مجدي يعقوب تسبب فى تغيير خريطة عملية زراعة القلب هناك لا ده غير فى خريطة تانية
غير فى خريطة معدلات البقاء على قيد الحياة بعد عمليات الزرع
وكمان فيه حاجة اسمها فترة التعافى بعد العملية وفترات النقاهة للمرضي دول وخلاها فترة قصيرة بعد ماكانت بتقعد مدة طويلة
كلام كتيييييييييير اوى عن مجدى يعقوب وتاريخه ونجاحه العظيم اللى يفتخر بيه اى مصرى
ولو قعدت اتكلم عنه مش هخلص كلام
بس خلونا نختم بكلمة حلوة ليه
( لا اريد ان تفتر همتى فانه اسلوب حياتى وانا استمتع به )
متنسوش تشيروا البوست عشان اصحابكم يشوفوه وتعرفوا مين هو مجدى يعقوب

اللي في الصورة دي Amanda Hocking مجرد إنسانة عاديه غير مميزة في أي شيء إلا أنها بتحب الكتابة .. لدرجة إنها حاولت أكثر من مرة إنها تنشر كتابتها في دور نشر كتير لكنهم رفضوا كلهم.

لحد ما نشرت Amanda أول كتاب ليها على منصة أمازون كـ كتاب رقمي (إلكتروني)، وقدرت تحقق في أول 6 شهور من نشره أرباح وصلت ل 20000$ وبعد 20 شهر .. أصبحت Amanda أول مليونيرة من النشر الحر بأرباح تفوق 2.5 مليون دولار بعد ما باعت 1.5 مليون نسخة من كتابها ^_^ .

هتقولي وأنا إيه علاقتي بالقصة دي؟! دي اكيد صرفت مبالغ كبيرة عشان تقدر تنشر كتابها وتسوق له.
لأ Amanda تقريباً ماصرفتش دولار واحد على كتابها من حيث النشر أو تسويق أو التوزيع والشحن للمشترين، وكمان من غير أي علاقات أو واسطة من وهي في بيتها! أنا هقول لك إزاي؟

أكيد سمعت عن أمازون أكبر موقع مختص بالتجارة الإلكترونية، بس الي ممكن تكون ما سمعتوش قبل كده أن امازون بدأ كموقع لبيع الكتب ومازال لحد دلوقتي، و في مايو 2018 فقط امازون حقق أرباح 22.5 مليون دولار  من بيع الكتب .. ده كفيل يبين لك حجم التجارة المعتمدة على بيع الكتب.

دلوقتي أمازون بيتيحلك خدمة النشر على منصته امازون كيندل المختصة ببيع الكتب، مجانا وبتقدر من خلالها نشر كتابك علي شكل كتاب رقمي أو ورقي.

كل المطلوب منك أنك تبدع في الكتابة، وامازون هو المسؤل عن نشر كتابك وتسويقه سواء نسخة رقمية أو ورقية، وأنت اليي بتحدد سعر الكتاب وبناءاًً عليه امازون بيديك 70% ك أرباح من سعر الكتاب لو إنك سعرته ما بين 2.99 – 9.99 أو 35% إذا كان سعر الكتاب أكثر أو أقل، وبعد 5 دقائق من ملئ بيانات كتابك بيكون جاهز للنشر وبيظهر على منصة امازون لبيع الكتب ما بين 24 – 48 ساعة.

 طب هو أنا إلي هسوق كتابي بنفسي؟
ماتقلقش أنت مش محتاج أنك تسوق لكتابك، موقع امازون بيدخله 100 مليون مشتري محتمل كل 24 ساعة، تخيل كتابك في معرض كتاب بيدخله 100 مليون زائر يومياً!
كل إلي عليك تكتب رواية شيقة أو كتاب مفيد، ووصف يدل علي محتوي العمل وكلمات مفتاحية (Keywords ) مناسبة لإستهداف عمليات البحث علي موقع امازون.

طيب و غلاف الكتاب ؟
الغلاف من أهم عناصر الكتاب إلي بتجذب المشتري. مع ذلك ده مش هيمثل لك أي مشكلة نهائي، لأن الغلاف تقدر تصممه بطريقتين،
الطريقة الأولي: أنك تطلب من مصمم محترف من علي خمسات أو fiverr أنه يصمم لك غلاف جذاب يتناسب مع محتوي كتابك ودي الطريقة الأسهل.

الطريقة الثانية: أنك تتعلم بنفسك طريقة تصميم غلاف على الفوتوشوب لكتابك وتقدر تبحث في اليوتيوب هتلاقي فيديوهات تعليمية أجنبية ممتازة، سهلة التعلم والتطبيق. ( فى نهاية المقال هنشارككم بمصادر للتعلم )

طب أنا مابعرفش أكتب إنجليزي وكل كتاباتي بالعربي ؟
مع إن امازون سمحت بالنشر بالغة العربية (تجريبياً)، إلا إنك مش هتقدر تحقق أرباح إلا من كتاب باللغة الإنجليزية. بس برضو ماتقلقش، أنت قدامك حلين،
الحل الأول: إنك تطلب أحد المترجمين من علي خمسات، fiverr،أو upwork أنه يترجم لك الكتاب بمقابل مادي أو ب نسبة من أرباح الكتاب (إذا كنت واثق من قدراتك الكتابية وجودة كتابك).

الحل الثاني: إنك تتعلم إزاي تكتب رواية أو كتاب أو أي عمل فني باللغة الإنجليزية وده الحل إلي أنا أفضله، وفي كورسات كتير اونلاين بتعلمك ازاي تكتب بالإنجليزي خصوصاً لو عمل فني. بردو ( فى نهاية المقال هنشارككم بمصادر للتعلم ) ^_^

المدونة الشخصية لأماندا هوكنج:

http://www.hockingbooks.com/amanda-hockings-biography/

موقع امازون كيندل لنشر الكتب الإلكترونية:

https://kdp.amazon.com

فيديو بسيط يشرح طريقة نشر كتابك على امازون كيندل:

https://www.youtube.com/watch?v=xoOZoGe-gOQ

فيديو يشرح طريقة تصميم غلاف بالفوتوشوب:

https://www.youtube.com/watch?v=4K_51dx9Hoo

كورس مجاني لتعلم الكتابة باللغة الإنجليزية:

https://www.class-central.com/course/stanford-openedx-adventures-in-writing-3058

كورس مجاني لتعلم كتابة الروايات باللغة الإنجليزية:

https://www.futurelearn.com/courses/start-writing-fiction

كورس مدفوع لتعلم الكتابة الروائية باللغة الإنجليزية:

https://www.udemy.com/fiction-writing-write-polish-and-publish-your-first-novel/

كورس مدفوع لتعلم كتابة كتاب بسيط من نوع (كيف تفعل ذلك…):

https://www.udemy.com/howtowriteahowtobook/

اتكلمنا قبل كده عن فيلم iron man وكان كلامنا عن الـ Machine Learningو جارفيس المساعد الشخصي للرجل الحديدي

لكن اللي يهمنا النهاردة هو الرجل الحديدي نفسه : رجل الأعمال والمهندس العبقري “توني ستارك” ^_^
اللي عملوا الفيلم استمدوا شخصية توني ستارك من رائد الأعمال والمهندس الأكثر جرأة وابداع وممكن كمان الأكثر جنوناً في وادي السليكون ” إيلون ماسك ، Elon Musk ”

الراجل ده من الشخصيات الغير معتادة والمذهلة في تاريخ البيزنس الأمريكي ، مزيج معاصر مابين المخترعين الأسطورين والصناعين زي توماس إديسون وهنري فورد وستيف جوبز ، رائد أعمال كرس ثروته وطاقاته علشان يبتكر مستقبل بعيد المنال زي اللي بنشوفه في أفلام الخيال العلمي ، وتعالوا نبتدي حكايته من الأول  ^_^
اتولد ماسك سنة 1971 في جنوب أفريقيا ، وشجعه والده اللي كان بيشتغل مهندس كهرباء وميكانيكا انه يدخل عالم البرمجة
من صغره، فتعلم البرمجة وهو عنده عشر سنين ، و باع شيفرات للعبة الفيديو بلاستار بسعر $550وهو عنده 12سنة ^_^  ، وهاجر لكندا ، وبعدين التحق بجامعة “بنسلفانيا” اللي نال منها درجة البكالوريوس في الفيزياء والأعمال في نفس الوقت
^_^

وفي سن 24 وبعد يومين بس من التحاقه بجامعة ستانفورد لدراسة الدكتوراة سابها علشان يقتنص فرصة بداية انتشار الانترنت والثراء المصاحب ليها ، ودي مجموعة من الشركات اللي أسسها ماسك من بداية مشواره لغاية دلوقتي :

شركة Zip2 : في سنة 1992استلف ماسك وأخوه مبلغ كده حلو من أبوهم ^_^ وأسسوا الشركة اللي بتقدم
خدمات على الانترنت وبعد صبر وجهد الشركت نجحت بتميز وباعوها في 1999 مقابل 307 مليون دولار وبقى مليونيرا وهو لسه في العشرينات
شركة X.com : اللي اندمجت بعد كده مع شركة تانية لإنشاء الشركة المعروفة النهاردة ب Paypal واللي
استحوذت عليها ebay بصفقة كان نصيب ماسك منها 165مليون دولار.
شركة SpaceX : في 2002 أسس ماسك الشركة ب 100 مليون من ثروته ، اللي أطلقت أول مركبة فضائية لغايات تجارية بحيث وصلت أدوات ومستلزمات للقمر الصناعي التابع لمحطة لناسا ، و حاليا بيجهز أسطول من مركبات الفضاء لغزو كوكب المريخ اللي بيسعى من خلالها “ماسك” لنشر الجنس البشري على المريخ ،مع التخطيط لاطلاق أول مركبة في سنة 2023 يعني لو عايز تحجزلك مكان الحق من دلوقتي ^_^
شركة Tesla Motors: الشركة المختصة بتصميم أحدث وأقوى السيارات الكهربائيةحققت الشركة نجاح هايل وحازت سيارات تسلا على المرتبة الأولى لعدة سنوات، بحيث كانت البطاريات الكهربائية اللي بتصنع في الشركة بيتم تصديرها لمعظم دول العالم
شركة SolarCity :  أسسها ماسك بفكرته وتمويله في 2006 مع الشراكة مع اولاده عمه ، وهي حاليا أكبر تاني مقدم لانظمة الطاقة الشمسية في أمريكا .
شركة Hyperloop : فكرة ماسك هنا انه يعمل وسيلة نقل سريعة بحيث تصل سرعتها لأضعاف سرعة
الطائرة بالاعتماد على الضغط لدفع العربات داخل أنابيب مغلقة “أنفاق” ، ورغم الشكوك الكبيرة حول كيفية بناءها وتكلفتها إلا أن ماسك بنى العربة ولسه بيبدأ في بناء النفق  ^_^
شركة Neuralink : و دي أخر شركات “ماسك” ومازالت شركة ناشئة وهدفها زراعة الكمبيوتر جوه دماغك ^_^ عن طريق رباط عصبي وهي تكنولوجيا لسه في مراحلها الأولى، بس الشركة بتسعى في المستقبل إلى المزج بين العالمين الرقمي والمادي، حيث يصبح الإنسان والآلة شيئ واحد ، وهدف ماسك هنا ان بتقنيات الذكاء
الاصطناعي الألات هتكون أذكى مننا في المستقبل فالحل ان احنا نتقدم عليهم ونستفيد من قدراتهم العالية ونزرعها جو دماغنا علشان نبقى احنا اللي أذكى منهم  ^_^

وده فيديو ليه علىTED  ” تقدر تتفرج علية مترجم ”
https://www.ted.com/talks/elon_musk_the_mind_behind_tesla_spacex_solarcity

من حوالى 15 سنة .. كان في رسام اسمه “ديفيد شو ” شغلته انه يرسم جرافيتي على الجدران في كاليفورنيا ، وفي يوم اتصل بيه واحد صحبه اسمه “شون باركر” وطلب منه يرسم شوية رسومات حلوة تضيف البهجة على جدران مكتب جديد أجره وهو صحابه علشان Startup مشروع ناشئ بيشتغلوا عليه ، وبعد ما خلص شغله عرض عليه باركر وزمايله انهم يعطوه نسبة في الشركة الناشئة الخاصة بيهم بدل مايدفعولوا الفلوس كاش لانهم محتاجينها علشان يطوروا أعمالهم ، و”شو”وافق مقابل نسبة تتراوح
بين  %0,01و ، %0,25 و تفوت الايام و فى 2012 باع شو الأسهم دي بمبلغ 200 مليون دولار !!!^_^ لان المكتب الصغير دة بقى ” facebook ^_^ ”
مصطلح الشركات الناشئة او ” Startup ” أصبح من المصطلحات الي ليها انتشار واسع في مجال الأعمال وعلى نهاية التسعينات كان اكتر نوع من انواع شركات الناشئة هي شركات “الدوت كوم ”
لكن يعني ايه شركة ناشئة ؟ هي عبارة عن شركة في المرحلة الأولى من شغلها وغالبا بيتم تموليها مبدئيا بواسطة المؤسسين
بتوعها علشان يستفادوا من تطوير خدمة أو منتج بيعتقدوا انه بيحل مشكلة معينة او ان هناك طلب عليه . وبسبب قلة الموارد أو التكاليف العالية معظم الشركات دي مابتقدرش تكمل على المستوى الطويل الا بتمويل اضافي من أصحاب رؤوس الأموال
وعلى الرغم من القصص المدهشة اللي بنسمعها عن أصحاب الشركات دي الا ان الدنيا مش علطول وردي وليها مميزاتها وعيوبها
مميزات زي :

1- بيئة عمل مميزة بتتسم بالمرونة والحرية في ساعات واجراءات الشغل لضمان النمو والتطور السريع في الشركات
2- التعلم المستمر لأن اللي بيشتغلوا في الشركات الناشئة بيكونوا تحت ضغط كبير واعمال واعباء مختلفة لازم
هيتعلموا منها اكتر من اي حد بيشتغل في شركة عادية ، لانهم ملزمين انهم يطوروا من نفسهم علطول علشان يقدروا ينجحوا الشغل اللي بيقوموا بيها
لكن فى نفس الوقت بجانب المميزات .. الStartups  بردو ليها مخاطرها اللي لازم تكون مستعد للتعامل معها وخاصة في بداية الشركة زي :
1- رواتب اقل وممكن مافيش رواتب اساسا ^_^ لان الرهان في الشركات دي على الارباح مش الرواتب
2- ساعات أعمل أطول لانك مش مرتبط بساعات دخول وخروج، هتشتغل لاكتر من 8ساعات عادي جدا
3- المستقبل غامض : ممكن ينتهي بيك الموضوع انك تكون مليونير ^_^ ، وممكن ينتهي بيك الحال عاطل عن الشغل وممكن عليك ديون كمان ، لكن اضمن انك في الحالتين هتتعلم كتير
عجبك الموضوع ^_^ او عندك فكرة عايز تحولها لـ  startup..

الكورس ده اكيد هيفيدك .. الكورس بتقدمه شركة اسمها “Y Combinator ” تعتبر من أقوى الشركات الأمريكية في مجال حضانة الشركات الناشئة ..بجانب ان الكورس بيتقدم في جامعة ستانفورد

المميز فى الكورس عملي اكتر منه نظريات أكاديمية  .. لان اللي بيقدم الكورس مؤسسين شركات كتير زي “فيس بوك ، ياهو ، باي بال ، لينكدن  ” …  وبالتالي بيقدموا نصايح من واقع شغلهم ، الكورس مكون من 50محاضرة بجانب ترشيحهم لمصادر تانية كتير للقراية والاطلاع ، وده اللينك بتاعه :
/http://startupclass.samaltman.com

السبب اللى خلى الناس تحب الكورة هو حاجة زى ماتش العودة بين برشلونة وباريس سان جيرمان واللى
كانت برشلونة خسرانة قبله 0/4وكسبت بأعجوبة فى العودة 1/6وأتأهلت والسبب اللى خلى الناس ديه
تفرح بالحدث ده هو انهم شافوا قدام عينهم قصة تغلب على فشل صغيرة أدتهم أمل ان مهما كانت الدنيا
صعبة ومهم قابلك من مصاعب ومشاكل وفشل لكن تقدر تعود وتنتصر على كل ده بالإصرار ..

لكن المشكلة
ان الدنيا مش ماتش 90دقيقة !! والحياة أطول من كدا بكتير والمصاعب بتاخد وقت أطول من كدا وعشان كدا
احنا محتاجين نشوف قصص نجاح أكبر من مجرد ماتش والنهارده هنحكيلك شوية عن قصص نجاح زى كدا

1- آرينا هافينغتون
طبعاً كلنا عارفين إمبراطورية هافينغتون بوست / The Huffington Postواللى ليها نسخ بأكتر من لغة
حوالين العالم لكن من المستحيل اننا نصدق ان آرينا هافينغتون مؤسسة الإمبراطورية الصحفية ديه اترفضت
من 3دستات ناشرين كبار يعنى اترفضت 36مرة من دور نشر كبيرة قبل ما بعد كدا تتقبل وبالرغم من ان
هافينغتون بوست محققتش نجاح لحظى وفى الحقيقة حتى لما تم نشرها كان فى مراجعات سيئة جداً عن
جودتها وإحتمالات النجاح الضعيفة اللى ممكن تحققها لكن من الواضح جداً دلوقتى ان هافينغتون قدرت
تتغلب على البداية السيئة ديه وحفرت اسمها دلوقتى كواحدة من أنجح منافذ الويب للصحافة فى العالم

2- بيل جيتس
بيل جيتس دلوقتى هو واحد من أغنى الشخصيات فى العالم لكنه مجمعش ثروته ديه بنجاح مستقر أو ثابت
على طول الخط لأن من أول دخول بيل لمشهد ريادة الأعمال بشركة Traf-O-Data واللى كان هدفها انها
تحلل البيانات وحاول انها يبيع الفكرة ديه مع صديقه لكن فى النهاية المنتج بالكاد اشتغل وكانت كارثة بكل
المقاييس وعلى الرغم من كدا فالفشل ممنعش جيتس من انه يدور على فرص جديدة وبعد سنين قليلة قدر
يعمل أول منتج لشركة مايكروسفت ومهد طريق جديد للنجاح ودلوقتى مفيش مكان فى العالم مش بيتعامل
مع مايكروسفت أو منتجاتها
والعبرة من قصص النجاح مش انها تخليك تتقبل الفشل لكن على العكس تماماً من كدا فالعبرة المقصودة
هى انك ماتيأسش ومهما واجهت من مصاعب كمل محاولة بردو واتعلم من اخطائك وصلحها ومتكررهاش
ونمى من نفسك ومهاراتك بمختلف الطرق عشان تقدر توصل فى النهاية للحاجة اللى انت بتتمناها لنفسك

من 19 سنة ” سلمان خان ” حصل على درجة البكالوريوس في الهندسة الكهربية وعلوم الحاسب من معهد MITوبعدها أخد الماجستير في نفس المجال مع ماجستير في ادارة الأعمال من هارفارد ، وبعدين اشتغل محلل في مجال الاستثمارات المالية ..

لحد دلوقتي مجرد قصة عادية لشاب متوفق في دراسته وناجح في مجال شغلة  !!

في أواخر 2004 طلبت منه بنت عمه يساعدها في فهم دروس الرياضة اللي كانت عمللها مشكلة ، وبما انها كانت ساكنة  في نيو أورليانز وسلمان في بوسطن شرحلها الدروس بالتليفون مع استخدامه “مفكرة دودل للرسم ” على موقع ياهو ، ومع تحسن مستواها بدأ يشرح لأخواتها وبدأ يزيد عدد الاقاريب والصحاب اللي بيطلبوا منه المساعدة ، فقررفي 2006 انه يعمل قناة على يوتيوب ويحط عليها فيديوهات شرحه للدروس علشان الكل يستفاد منها ، وبدأت شعبيته تزيد و انهالت عليه اعجابات وتقدير الطلبة والمعلمين بشرحه وطريقته المختلفة في التدريس وتبسيطه للمعلومة اللي زودت من سرعة وقدرة الطلبة على الفهم .
في  2009 أخد سلمان بتشجيع من زوجته “القرار المصيري ”  و ساب شغله في مجال التمويل والاقتصاد وأتفرغ لتطوير قناة أكاديمية خان ، بنهاية 2009 سجلت فيديوهات خان متوسط مشاهدة 35000 زيارة يوميا ،وحصل على تمويل لمشروعه ” أكاديمية خان ” من زوجة واحد من اشهر أثرياء أمريكا وهي “آن دور”
وانشأ سلمان موقع وسماه Khan Academy وعملها شبه المدرسة الفعلية بمختلف العلوم المشروحة بأسلوب بسيط في فيديوهات في حدود عشر دقايق .
وفي سبتمبر 2010 تلقت الأكاديمية تبرع من شركة جوجل بمبلغ 2 مليون دولار ، وبيل جتس “مؤسس مايكروسوفت ” لقى ولاده بيدخلوا على موقع الأكاديمية وبيفهموا منها فأعجب بيه هو كمان وتبرعله ه ب 1.5  مليون دولار وظهروا مع بعض في البرامج الحوارية ، ووصفه بيل بأنه صاحب ” أفضل تجربة تعليمية في عصرنا الحديث “
واختارته مجلة التايم من ضمن أكتر 100شخص تأثيرا في العالم ، وكمان تجربته ألهمت الكتير لاطلاق منصات أخرى زي edx وcourser وUdacity

ده فيديو على TEDبيحكي فيه سلمان تجربته وازاي بقى “مدرس بالصدفة ” | مترجم بالعربية :
https://www.youtube.com/watch?v=gM95HHI4gLk

موقع أكاديمية خان واللي متقسم بطريقة بسيطة جدا باختلاف المراحل الدراسية والمواد بتاعتها سواء كنت طالب مدرسي أو جامعي
/https://www.khanacademy.org
وده الموقع بالنسخة العربية واللي هتلاقي فيه بعض المواد المشروحة بالعربي :

https://ar.khanacademy.org
ولو عايز تطبيق على اندرويد وكمان متوفر لأجهزة ابل :
https://play.google.com/store/apps/details?id=org.khanacademy.android&hl=en
نستفاد ايه بقى من الحكاية دي ^_^ ؟

ممكن الفكرة بدأت مع سلمان بالصدفة لكن اللي غير حياته ووصلته للي وصله دلوقتي هو القرار الصادم “اللي شجعته فيه مراته ^_^” انه يسيب شغلة “الناجح” علشان يتفرغ للقناة مع ملاحظة انه عاش على مدخراته الشخصية 9شهور لغاية ما حصل على أول تمويل له .
من الاخر كده نحاول نسيبنا شوية من “اه لو لعبت يا زهر^_^ ” و نركز في القرارات اللي بناخدها في حياتنا حتى لو كانت خارجة عن المألوف