معاً نصنع المُستقبل

7 حاجات قبل ما تفكر تقدم على منحة

0 274

كل واحد فينا –او معظمنا- عدت عليه فترة كان بيحلم فيها بمنحة .. و كعادة كل الاحلام .. ممكن تتحول لواقع بشوية مجهود، و الاكيد بردو ان المنحة مش هتجيلك وانت قاعد في بيتكم مستريح وبتشرب سحلب =D

في المقال ده هنحاول نجمعلكم اهم الحاجات اللي محتاج تعرفها قبل ماتقدم على منحة:

1- ابدأ دلوقتي!

الوقت مش متأخر ومش بدري، بمعنى انك لو جامعة مثلًا ولسه في اولى وتانية وبتفكر في ماستر، فـ متعتقدش ان الوقت بدري وتأجل، بالعكس كل ماكان قدامك فترة هتقدر تدور أكتر وتعرف أكتر، متأجلش..
الوقت كمان مش متأخر، لو اتخرجت او في آخر سنة متقولش الوقت فات، الفرصة قدامك طول مانت عايز، لو ملحقتش تقدم السنة دي قدامك اللي بعدها وهكذا..

باختصار، ابدأ من دلوقتي.

2- تحديد مجال الدراسة..

فكرت وخدت القرار وقررت تقدم على منحة، أول حاجة محتاج تحددها المجال اللي هتدرسه، لو لسه هتدخل جامعة فـ أنا ارجوك بشكل شخصي .. توسع تفكيرك D:
متحصرش نفسك جوا منطقة ضيقة جدا تتمثل في كليات معينة، فكر كويس واعرف انت عايز تبقى ايه وان الدنيا واسعة ومجالاتها كتير، من هنا هنرجع لنقطة ان كل مابدأت بدري كان أفضل، بس مع الوقت والتجارب بتقدر تعرف ميولك اكتر، حددها وبناءً عليها هتحدد مجالك، لو انت في جامعة مثلًا يعني حددت مجالك وعايز تكمل، ممكن تكمل في مجالك لو بتحبه ومقتنع بيه، وممكن تبدأ في مجال تاني، وفي ناس بتاخد ماستر في موضوع معين مكنش هو مجالها الاساسي بس يعتبر مكمل ليه او مفيد بشكل من الاشكال، بيجمع معرفة في مجالين وده بيفتحله فرص أكتر وأفضل.

3- اعرف عايز تدرس فين..

حددت المجال؟ كويس جدًا

بندخل على النقطة اللي بعدها واللي مرتبطة بتحديد المجال جدًا، بعد مابتحدد انت عايز تدرس ايه، بتقدر تدور على افضل الدول اللي بتقدم منح دراسية في المجال اللي انت عايزه وأفضل الجامعات، في مواقع متعددة بتبقى متخصصة في ترتيب الجامعات على مستوى العالم، ده موقع من ابرزهم

http://www.topuniversities.com/qs-world-university-rankings

بتقدر من خلاله تعرف الترتيب بشكل عام، والترتيب بشكل متخصص يعني في مجال معين.

مهم برضو تحط في حساباتك الدولة اللي هتروحها، وفي الموقع اللي فات بيقدملك كمان معلومات عن الدول وافضل للمدن للطلبة وغيره، الموقع مليان حاجات حلوة لف فيه واكتشفهD:

4- اعرف المطلوب..

في اختبارات واوراق بتبقى مطلوبة عشان تقدر تقدم على منحة، زي اختبارات الايلتس والتوفل عشان اللغة، وشهادات التخرج بتاعتك واحيانا بيبقى مطلوب يتعملها معادلة، كل جامعة بيبقى ليها الشروط اللي بتحددها، اعرف الشروط دي وابدأ جهز على اساسها.

في جامعات بتحدد مواعيد التقديم ودي نقطة مهمة لازم تاخد بالك منها، في جامعات بتطلب خطاب توصية من دكاترة درسوك قبل كده وخطاب منك انت شخصيًا تشرح فيه ليه عايز في الجامعة دي، حاول تبقى مختلف ومتكتبش كلام اتكرر كتير، بينلهم انك فعلًا مهتم، لو قرأت عن الجامعة أكتر وعرفت مميزاتها وعرفت هي عايزة ايه هتبقى انت كده عديت خلاص D:

5- الفلوس! D:

بتبقى مشكلة عند طلبة كتير مصاريف الجامعة، خصوصًا لو جامعة كبيرة، ودي ميزة المنحة انك تقدر تختار مابين منحة كاملة بتعفيكِ من المصاريف تماما واحيانا بتوفرلك راتب او مصروف شهري، وبين منحة جزئية غالبًا بتدفعلك مصاريف الجامعة بس ويتبقالك مصاريفك الشخصية، في ناس بتشتغل وهي بتدرس ومعظم الدول برا بتوفر شغل للطلبة وده شيء منتشر وعادي، انت ادرى بظروفك واختار اللي يناسبك.

6- جهز نفسك!

مش المقصود هنا الورق والمتطلبات، المقصود تجهز نفسك نفسيًا، الموضوع مش صعب ومش سهل، بس لازم تبقى عارف ان عشان جامعة تقرر تصرف على تعليمك لازم تثبت ان تستحق الفرصة دي!

في كتير بيقدموا سنويًا، لو متعبتش واديت الموضوع حقه هتضيع في وسطهم، لازم تبقى مجهز نفسك للخسارة والمكسب D:

لو منجحتش في اول مرة، مبتبقاش نهاية العالم ومحدش هيقولك لأ خلاص كفاية كده!

قدم ثاني وثالث وصمم على اللي انت عايزه، واستفيد من اخطاء كل تجربة.

 

أخيرًا، دي أهم المواقع اللي هتفيدك، سواء في معرفة معلومات أكتر وازاي تجهز ورقك او عشان تدور على الفرص المناسبة ليك..:

دليلك للدراسة في الخارج من مؤسسة علماء مصر

ده زي كتاب عملته مؤسسة علماء عشان يساعدك، اللي كاتبينه دكاترة وناس سافرت وبتنقلك خبرتهم

HotCourses

HeySuccess

Study abroad

scholarshippoints

scholarshippositions

اترك رد

لن يتم نشر عنوان بريدك الإلكتروني.