قاعدة الـ 5 ثواني

1 2٬033

من 10 سنين و تحديداً فى 2008 .. المؤلفة والمعلقة التلفزيونية ورائدة الأعمال ” ميل روبينز” خسرت شغلها وفلوسها .. وزوجها استثمر فلوسه في مطعم كان على وشك الافلاس !! واصبحت ابسط القرارات اليومية محتاجة جهد حقيقي عشان تنفذها ، بسبب فقدها للدافع اللي يخليها تقدرتقاوم و تكمل حياتها

وساعتها أدركت ميل انها محتاجة اكتر من وجود دافع ممكن يسحبها من الحالة اللي وصلتلها ، هي محتاجة اكتر لاستراتيجية ! حاجة تخليها تقوم بالفعل “take action” حتى لو ماكنتش مرتاحة او حابه الفعل ده

وفي مرة “ميل “وهي بتفلب في التلفزيون لقت اعلان لانطلاق صاروخ ، وقررت ساعتها انها تستخدم نفس الطريقة علشان تقوم من السرير الصبح ، لما جرس المنبه يرن هتعد من 5 لغاية 1 (5 4 3 2 1) وبعدين “تنطلق  ^_^ ” تخرج علطول من السرير ، وبدات تعمل ده يوم ورا يوم لغاية ما بعد فترة كانت بتستخدم طريقة العد التنازلي دي في كل حاجة عايزة تعملها بس مش بتحبها او مافيش عندها الدافع للقيام بيها

و بقت دي قاعدتها الجديدة ، لانها كانت شايفة ان الحياة محتاجة انك تدفع نفسك للقيام بالأشياء اللي مش مريحة علشان تقدر توصل للنتايج اللي عايزها وان السر” انك ماتقعدش تستنى اللحظة اللي مشاعرك هتدفعك ان تقوم تشتغل ، والحقيقة هي أننا لو انتظرنا علشان تيجي المشاعر “المناسبة” لأعمال زي (انك تقوم تذاكر، تقوم من السرير ^_^، الاستعداد النفسي انك تبدأ مشروع معين ) مش هنقوم بالأعمال دي خالص ^_^

طيب ليه “خمس ثواني” ؟

لأنه زي ما اكتشف أستاذ جامعة هارفارد” جيرالد زالتمان” : ان 95% من القرارات اللي بيخدها الناس مش بتستند على المنطق أو التفكير العقلاني ، ولكنها بتكون على أساس العاطفة ( ازاي بيشعر الشخص حوالين الحاجة اللي عايز يعملها ؟)

وفي احصاءات أن الأميركيين بياخدوا حوالي 35 الف قرار يوميا. ومعظم القرارات دي بتتاخد من غير وعي ، وبتتاخد بناء على مشاعرنا في اللحظة اللي بناخد فيها القرار ، والأسوا ان المشاعر السلبية زي الخوف والغضب والشك بيكون ليها تأثير قوي على قراراتنا.

وبينت البحوث أن هناك فترة زمنية تقريبا 5 ثوان ما بين الفكرة اللي بتيجي على دماغك وما بين اتخاذ عقلك لقرار انه يدعم الفكرة دي او يقتلها ^_^.

وبدل ما عقلك يدخل علطول في آلية الدفاع ويبدأ ياخد قرارات جاية على هوى نفسك ^_^ انت بتوقفه و بتجبره انه يعد تنازلي من 5 ل1 وبكده انت بتحميه من ان تخطفه مشاعر زي الخوف او الكسل أو الشك أو الغضب أو أي مشاعر قوية تانية ممكن تؤدي بيه لقرارات سيئة

بجانب ان العملية دي بتحفز قشرة الفص الجبهي “prefrontal cortex” .. الجزء من دماغك اللي بيكون نشط أثناء تغييرك لسلوك معين .. تعلمك لحاجة جديدة او لما بتكون متحكم في أفكارك .

علشان كده قاعدة 5 ثوان مفيدة في أي قرار بتحاول تاخده ومشاعرك بتمنعك منه خوفا من الخروج من منطقة الراحة الخاصة بيها .

وكل ما تبقى عايز تعمل حاجة مهمة بالنسبة ليك عد (5 4 3 2 1) وبعدين ابدأ فيها علطول وخلي المشاعر تيجي بعدين كنتيجة لافعالك مش سبب ليها ^_^

وده فيديو لميل بتشرح فيه قاعدة 5 ثواني

 

 

 

تعليق 1
  1. هلال يقول

    موضوع اكثر من رائع اشكرك يا صديقتي

اترك رد

لن يتم نشر عنوان بريدك الإلكتروني.