بإختصار انت معاك 30 ثانية تعرض فيهمـ فكرة لـ شخص أول مرة يعرفك
وعرض الفكرة دى هيتلخص فى كامـ سؤال …
هتبدأ منين ؟ .. أية النقط المهمة ؟ .. ليه الفكرة دى مميزة ؟ .. ليه انت افضل من منافسيك ؟
واخد بالك ان انت فى اسانسير يعنى المفروض تشرح فكرتك واقتراحك فى خلال المدة اللى محتاجها العميل انه يوصل لـ شقته
وفى الغالب المدة دى بتترواح ما بين 30 لـ 60 ثانية .
وعشان متفضلش مستغرب كتير كلامنا النهاردة هيتركز على ازاى تستغل مدة ركوبك الاسانسير مع عميل
كل الحكاية بقا ان كلامك لازم يبقا مختصر ويوصل الفكرة بشكل موجز ومشوق
يعنى يخلى الشخص اللى معاك عاوز يسمع منك اكتر عن شغلك وعن الخدمة اللى هتقدر توفرها عشانه
زى بالظبط ما بتقول Aileen Pincus – رئيسية The Pincus Group Inc. و المدير التنفيذى فى شركة تقدمـ تدريب فى طرق العرض والحديث ووسائل الاعلامـ و أزمات التواصل – هى شايفة من وجهة نظرها ” ان اهم حاجة يقدر يعملها رجل الاعمال وخصوصا – اصحاب الاملاك او الشخص الموهوب فى البيع – هو انه يتعلمـ ازاى يتكلم عن شغله قدامـ الغير ومش بس كدا كمان انه يقدر يلخص اهم الجوانب اللى بتميز المنتج بتاعه بطرية مشوقة وجذابه ”
1- ركز على الصورة الكبيرة !
لو قررت تبدأ حوار فى الاسانسير يبقا لازم تنسى تضيع الوقت
لانه بإختصار مش هتقدر تغطى كل الخطوط العريضة والتفاصيل اللى موجودة فى شغلك فى الفترة ما بين ركوبك الاسانسير ووصلك للطابق الاعلى
لازم تقدر توصل للشخص اللى بيسمعلك انت بتبيع اية بالظبط فى خلال اول 10 ثوانى
2- حدد اهدافك واستراتجيتيك فى العمل
من حق العملاء بتوعك انهمـ يعرفوا الهدف اللى موجود ورا فكرتك واية هى الخطة اللى هتستخدمها فى تحقيق الهدف دة
ومن هنا بقا هيبقا المكان اللى هتنطلق منه ونجاوب فيه على الاسئلة اللى اتكلمنا عنها قبل كدة وهى :
ليه فكرتك مميزة عن غيرها ؟ .. وليه انت افضل من منافسيك ؟
وخد بالك ان اللى بيقدر يتكلمـ عن شغله و نفسه بصراحة ولباقة هو رجل الاعمال المحترف .
3- اعرف عملائك =D
لازمـ تعرف شوية حاجات عن العميل بتاعك
لان ببساطة معرفتك للعميل وتفكيره جزء لايتجزأ من كلامك اللى بتقوله
يعنى لازم تعرف ازاى فكرتك هتكون مفيدة وليها صله بالشخص اللى بتكلمه ؟ .. ليه المفروض هو او هى يكون مهتمـ باللى انت هتقوله ؟ .. اية اللى ممكن يكون عايزه او محتاجه من الشغل اللى بتقترحه ؟
وأتأكد من انها نقط مهمة وحاول تغطيها 🙂
وكمان مفيش مانع من انك تغير شوية صغيرين فى كلامك على حسب دماغ العميل واتصاله بـ عالمـ البيزنس
4- نصايح ع السريع =D
* أكتب الكلامـ اللى هتقوله فى الاسانسير فى ورقة عشان تتأكد من ان رسالتك واضحة وموجزة
*قول كلامك مرتين على الاقل قبل اول مرة لان كل ما تحس انك مرتاح وانت بتتكلم كل ما ثقتك بنفسك هتزيد قدام العميل
*متحاولش تحفظ كلامك صمـ كلمة كلمة لان خطتك الرئيسية وهدفك العامـ اهمـ بكتير من انك تركز على الحاجات دى
*اوعى تزود او تبالغ .. كلامك مش لازمـ يبقا مليان مصطلحات صناعية واحصاءات وتواريخ .. إلخ
كلامك لازم يبقا مفيد ومشوق .
