معاً نصنع المُستقبل

أفضل 10 أساليب لإدارة الوقت

Himmat Mostafa

بالحديث عن أفضل 10 أساليب لأدارة الوقت فدعنا لا نضيع وقتاً فى مقدمة للحديث و دعنا نتطرق الى تلك الاساليب مباشرة :

1- اكتب كل حاجة
فى حاجات كتير جدا المفروض تعملها .. إجتماعات، واجبات وطلبات لسه معملتش فيها اى حاجة، وعلشان بقى تفضل فى القمة – اكتب وسجل كل مهمة محتاجة إنتباهك.. فى أدوات كتير ممكن تستخدمها زى مثلا Google keep.
2- رتب أولوياتك على أد ما تقدر
جزء الإدارة من إدارة الوقت بيقولك أن مش كل حاجة محتاجة إنتباهك دلوقتى حالاً. لأ – رتب أولوياتك، مش بس جوه دماغك – لا رتبهم على الورق – أعمل قائمة مكتوبة ورتب فيها مهامك وواجباتك المطلوبة منك. برده ممكن تستخدم أداة تساعدك فى النقطة دى.

3- متعملش الحاجة اللى مش مهمة
متحاولش تعمل كل حاجة – أنت عندك أهداف عاوز توصلها، علشان كده لازم تركز ومتضيعش وقتك أنك تعمل حاجات واضح جدا أنها مش هتوصلك لأهدافك دى.

4- وزع طاقتك فى الإتجاه الصحيح
النقطة دى تحسها شبه نقطة رقم (3) شوية، لكن بوضح فيها أنك محتاج تُظبط النتيجة بتاعتك، مهامك وأولوياتك بشكل يخلى مواردك متوزعة فى الإتجاه الصحيح .

5- حط مواعيد نهائية
مهما كانت المهمة كبيرة او صغيرة، حاول أنك تحطلها ميعاد نهائى deadline وأتمسك بالموعد ده فى خطة إدارة وقت. احترم المهام المهمة وذات الأولوية فى قائمة مهامك.

6- متحاولش تكون ممتاز من أول مرة، حاول وكرر
أنت مش محتاج تكون ممتاز فى البداية ومن أول مرة، حاول بس أنك تنجز فى المهام وأنك تنتقل للمهام اللى بعدها علشان تكون بتدير وقتك بشكل أفضل. ممكن تكون محتاج ترجع تانى لمهمة كنت شغال عليها، بس عادى مفيش مشكلة.. حاول وكرر

7- بلاش تبالغ
حط بس مقدار الجهد اللى أنت محتاجه، مش أكتر من كده. ممكن تستخدم وقتك بكفاءة فى أى حاجة تانية. فى بداية حياتى المهنية، كنت بحبط بعد ما أقضى وقت بعمل presentation الهدف منها عرض بيانات عملية، ومالقيش حد اهتم أن هامش الجانب الشمال أكبر شوية من هامش الجانب اليمين للصفحة!! .

8- إتعلم أنك تنهى المهمة – قصر قائمة مهامك
حاجة ممتعة جداً أنك تلاقى نفسك خلصت مهمة وبتشلها من قائمة المهام، بدل ما تضيف واحدة زيادة عليها. وعلى الرغم انك حاطط أولويات للمهام فى القائمة، لكن لو مثلا لقيت أن المهمة رقم (3) محتاجة بس 5 دقايق من وقتك وتكون خلصت، خلصها واشطب عليها فى قائمة المهام ( المهمة انتهت) – ساعتها هتحس إحساس اللى أنجز حاجة.

9- بلاش تشتغل لوحدك
أطلب المساعدة، متحاولش تعمل كل حاجة لوحدك. الأمتع أنك تشتغل وسط مجموعة، الموضوع ده هيساعدك ده كتير، هتبنى علاقات قوية وهتلاقى نفسك فى النهاية بتنجز شغل أكتر من اللى ممكن تنجزه لوحدك.
مثلاً اشترك فى مجموعة دراسية، هتلاقى ان حجم الشغل المُنجز ضعف او ثلاثة أضعاف الشغل اللى ممكن تعمله لوحدك.
10- ارتاح، خدلك break لو حسيت انك مش فى قمة نشاطك
أهم نقطة فى أساليب إدارة الوقت، انك لو تعبان أو مضغوط هيبقى صعب جدا أنك تبقى مُنتج وتنجز حاجة. علشان كده لما تكون فى الحالة دى خدلك فاصل من الدراسة والشغل واعمل أى حاجة خفيفة ومرحة. اشترك فى أى نوع رياضة واشحن بطارية طاقتك قبل ما ترجع تشتغل تانى وهتقدر وقتها أنك تنجز أكثر من اللى كنت هتنجزه فى نفس مدة الوقت.

Himmat Mostafa
همت مصطفى – من السويس – خريجة حاسبات ومعلومات القاهرة…
بحب أقرأ واسمع مزيكا .. ومهتمة جدا بالعلوم الإدارية.. – بتمنى أن بعد 30 سنة كمان لما أبص على عمرى الاقينى كنت مشغولة بحاجات مفيدة وان حياتى كانت مش فاضية، وانى كنت مستمتعة بكل حياتى بالجد والهزار فيها.
0

أضافة تعليق

لن يتم نشر عنوان بريدك الإلكتروني. الحقول الإلزامية مشار إليها بـ *

Show Buttons
Hide Buttons